Neʼe Tā Ia Te Tule Leʼo Pea Mo Te Réveillez-vous ! Maʼa Te Faʼahiga Hahaʼi Kehekehe
1. Ko te faʼahi fea ʼaē ʼe faʼifaʼitakiʼi ai e te kalasi ʼo te tagata kaugana agatonu mo poto ia te ʼapositolo ko Paulo?
1 Neʼe lahi te ʼu faʼahiga fai fakamafola ʼaē neʼe fakaʼaogaʼi e te ʼapositolo ko Paulo moʼo fakahā ia te logo lelei ke feala ai he haofaki ʼo “te faʼahiga hahaʼi kehekehe,” pea ʼe toe fēia mo te kalasi ʼo te tagata kaugana agatonu mo poto, ʼe ina fakaʼaogaʼi ia Te Tule Leʼo pea mo te Réveillez-vous ! ke aʼu te logo lelei ki te faʼahiga hahaʼi kehekehe. (1 Ko. 9:22, 23) Kapau ʼe tou fia fakaʼaogaʼi lelei ia tatatou ʼu nusipepa ʼaia, pea ʼe tonu ke tou manatuʼi tāfito ia nātou ʼaē neʼe tā ki ai ia te ʼu nusipepa ʼaia.
2. Neʼe tā tāfito ia te Réveillez-vous ! maʼa te faʼahiga hahaʼi feafeaʼi?
2 Te Réveillez-vous !: Ko te nusipepa ʼaenī ʼe tā tāfito moʼo fakaaʼu te logo lelei ki te taʼi faʼahiga hahaʼi ʼe hagē ko te hahaʼi ʼaē neʼe talanoa kiai ia te ʼapositolo ko Paulo ʼi te temi ʼaē neʼe fakamafola ai ki te “ ʼu tagata ʼo Ateni.” (Gāue 17:22) Ko te ʼu tagata ʼaia neʼe mole heʼeki natou logo ki he akonaki ʼa Sesu, pea neʼe mole lahi ia tanatou mahino ʼaē ki te Folafola. ʼO toe fēia pē ki te kau lautohi ʼaē neʼe tā tāfito kiai ia te Réveillez-vous ! ʼe mole natou faʼa mālama lelei ki te Tohi-Tapu. ʼE lagi mole natou ʼiloʼi ia te ʼu akonaki ʼo ʼuhiga mo Kilisito, peʼe lagi mole natou faʼa falala ki te ʼu lotu, peʼe lagi mole natou ʼiloʼi ia te ʼaoga ʼaē ʼo te ʼu tokoni ʼo te Tohi-Tapu ki tonatou maʼuli. Ko te ʼuluaki fakatuʼutuʼu ʼaē ʼo te tā ʼo te Réveillez-vous ! moʼo uga te hahaʼi ʼaē kā natou lau te nusipepa ʼaia, ke natou ʼiloʼi ko te ʼAtua moʼoni ʼe maʼuli moʼoni. Pea ko te tahi fakatuʼutuʼu ʼo te nusipepa ʼaia, ko te fakalotomālohiʼi ia te tui ʼa te hahaʼi ki te Tohi-Tapu, pea mo tokoniʼi te kau lautohi ke natou mahino ki te kehekehe ʼaē ʼa te kau Fakamoʼoni ʼa Sehova pea mo te ʼu lotu ʼaē.
3. Ko ai ʼaē neʼe tā tāfito kiai ia te ʼu faʼahiga Tule Leʼo?
3 Te Tule Leʼo: Neʼe tā tāfito ia te nusipepa ʼaenī ki te hahaʼi fuli ʼaē ʼe fakaʼapaʼapa ki te ʼAtua pea mo te Tohi-Tapu (ʼi Te Tule Leʼo Fakapilitānia pea mo Fakafalani, kae ʼi te Fakaʼuvea ʼe ko te ʼu ʼuluaki ʼalatike ʼaē ʼi te kamataʼaga ʼo te nusipepa). Kua maʼu pē tanatou kiʼi mālama ki te Tohi-Tapu kae ʼe mole heʼeki natou faʼa mahino lelei ki tana ʼu akonaki. ʼE natou hagē ko te hahaʼi ʼaē neʼe ʼui e Paulo ʼe natou “manavasiʼi ki te ʼAtua.” (Gāue 13:14-16) Neʼe tā te nusipepa ʼo Te Tule Leʼo ʼo te ʼu ʼalatike ako maʼa te kau Fakamoʼoni ʼa Sehova (ʼi Te Tule Leʼo Fakapilitānia pea mo Fakafalani, kae ʼi te Fakaʼuvea ʼe ko te ʼu ʼalatike ako). ʼI te manatu ʼa Paulo ko nātou ʼaē kā natou lau anai ia tana ʼu tohi neʼe kua natou mahino ki te Folafola pea kua natou maʼu he faʼahiga ʼatamai mālama ki te moʼoni. (1 Ko. 1:1, 2) Koia lā ʼaē, ko te ʼu ʼalatike ʼaē ʼe tā ʼi Te Tule Leʼo ako, neʼe tā maʼa nātou ʼaē ʼe kau ki tatatou ʼu fono pea kua mahino ki te ʼu kupu Fakateokalatike ʼa te kau Fakamoʼoni ʼa Sehova pea mo tanatou ʼu akonaki Fakatohi-tapu.
4. He koʼē ʼe lelei ke tou lau ia te ʼu ʼalatike fuli ʼo te ʼu nusipepa ʼaē kā tou fakaʼaogaʼi ʼi te fai fakamafola?
4 Tatau aipē peʼe tou tufa lualua ia Te Tule Leʼo pea mo te Réveillez-vous !, kae ʼi te agamāhani ʼe tou fakamahino age pē ia te nusipepa e tahi. Kae ʼe lelei ke tou lau ia te ʼu ʼalatike fuli ʼaē neʼe tā, ke faigafua hatatou fakamahino te ʼu ʼalatike ʼaē kā ʼaoga anai ki te hahaʼi ʼaē kā felāveʼi mo tātou.