‘Ke Fai Te Finegalo ʼo Te ʼAtua’
1. Koteā te kupu tāfito ʼo te polokalama ʼo te fakatahi makehe ʼaho tahi ʼo te taʼu gāue 2012, pea he koʼē ʼe lelei kiā tātou ke tou vakaʼi te faʼahi ʼaia?
1 Neʼe fakatupu tātou ʼuhi ko te finegalo ʼo te ʼAtua. (Fakh. 4:11) Koia, ʼe mole feala ke ʼi ai he ʼuhiga o tokita maʼuli mo kapau ʼe mole kita akoʼi pea mo fai te finegalo ʼo te ʼAtua. ʼE mole kohe meʼa e faigafua koteʼuhi e tou tauʼi ʼi totatou loto ia te fai ʼo “te ʼu meʼa ʼaē neʼe loto kiai te kakano pea mo te ʼu manatu,” peʼe ko te fai ʼo “te finegalo ʼo te ʼu puleʼaga.” (Efe. 2:3; 1 Pet. 4:3; 2 Pet. 2:10) Kapau ʼe mole tokoni mai te ʼAtua, pea ʼe feala ke ‘puke maʼuli tātou e te Tēvolo moʼo fai ʼo tona finegalo.’ (2 Tim. 2:26) Ko tatatou polokalama ʼo te fakatahi makehe ʼaho tahi ʼo te taʼu gāue 2012, ʼe tokoni mai anai kiā tātou takitokotahi ke tou gāue ke ʼalutahi mo te tolu puani ʼo te faikole faʼifaʼitaki ʼaē “ke fai tou finegalo.”—Mat. 6:9, 10.
2. Koteā te ʼu fehuʼi ʼe tou tali anai ki ai lolotoga te polokalama?
2 Te ʼu Fehuʼi ʼAē Kā Tou Tali Anai Kiai: Kā ke fakalogo ki te polokalama , kumi te ʼu tali ʼo te ʼu fehuʼi ʼaenī: He koʼē ʼe maʼuhiga te fakalogo ʼo te Folafola ʼa te ʼAtua? ʼE feafeaʼi hatatou haga fakasiosio lelei pe koteā te finegalo ʼo te ʼAtua ʼo ʼuhiga mo tātou? He koʼē ʼe ʼaoga ke takitaki tātou moʼo maʼu ʼo te ʼu faʼahiga hahaʼi kehekehe? ʼE feafeaʼi hatatou maʼu he tagata maʼu koloa, ʼe fīmālie tona maʼuli? Kau tūpulaga, koteā ʼaē ʼe kotou fia fakahā kiā Sehova? Koteā te ʼu fakapale ʼe tou maʼu ʼi tatatou fai ia te finegalo ʼo te ʼAtua? He koʼē ʼe maʼuhiga ke tou foimo laga pea mo fakalotomālohiʼi ʼihi?
3. ʼE feafeaʼi hatatou maʼu kātoa te ʼu lelei ʼo te polokalama fakalaumālie ʼaia?
3 Kotou faiga ke kotou tōkakaga lelei ki te polokalama. Ko he tagata fakafofoga ʼo te Petele peʼe ko he tagata taupau feʼaluʼaki ʼe kau anai ʼi te fakatahi moʼo ʼaʼahi pea mo faiakonaki. ʼI muʼa pea mo te fakaʼosi ʼo te fakatahi, kotou fai palalau mo ia pea mo tona ʼohoana mo kapau kua ʼohoana. Kā kotou liliu ki tokotou ʼapi, ʼaua naʼa kotou liliu ko “he tagata fagono ʼe loto galogalo,” kae ke kotou toe vakaʼi te polokalama mo tokotou fāmili pea mo palalau peʼe feafeaʼi hakotou fai te gāue ke lelei age ʼo mulimuli ki te finegalo ʼo te ʼAtua.—Sake 1:25.
4. He koʼē ʼe maʼuhiga ke tou fakamuʼamuʼa te finegalo ʼo te ʼAtua?
4 Kua pē te vave fakaʼauha ʼo nātou ʼaē ʼe natou mulimuli ki tonatou ʼu holi pea mo natou fakafisi ki te fai ʼo te finegalo ʼo Sehova. (1 Soa. 2:17) ʼE tou loto fakafetaʼi kiā Sehova ʼi tana teuteuʼi te polokalama ʼaia ʼi tona temi totonu, moʼo tokoni kiā tātou ke tou fakamuʼamuʼa te finegalo ʼo te ʼAtua!