Kua Kotou Tokalelei Koa Mokā Hoko Mai He ʼAluʼaga Fakafokifā?

Ko he meʼa fakafokifā ʼe feala ke hoko fakapunamaʼuli pea ʼe mole kita ʼiloʼi fakatomuʼa ia te faʼahi ʼaia. (Sakp. 4:14) Koia, ʼe fakapotopoto ia ia ʼaē ʼe ina faiga anai ke ina teuteuʼi fakatomuʼa ia meʼa fuli. (Taag. 22:3) ʼE kua kotou fai fakatomuʼa koa ia he tonu, pea mo tohi ia te ʼu faitoʼo ʼaē ʼe kotou tali anai? Moʼo tokoni atu, neʼe fai ia te foʼi ʼata Soigner sans transfuser — Besoins et droits du patient, pea ʼe fakahā tāfito ʼi te lua koga ʼo te foʼi ʼata DVD ʼaē ko tona kupu tāfito Des alternatives à la transfusion — Documentaires. ʼI takotou sioʼi ia te foʼi ʼata ʼaia, pea koutou vakaʼi peʼe kotou lava tali ki te ʼu fehuʼi ʼaenī. ʼE fakahā te ʼu tafa ʼi te ʼata ʼaia, koia ʼe tonu ke vakaʼi e te ʼu mātuʼa peʼe feala anai ki tanatou ʼu fānau ʼaē kei liliki ke natou sioʼi te foʼi ʼata ʼaia.

(1) He koʼē neʼe toe vakaʼi e ʼihi tōketā te fakaʼaogaʼi ʼo te ʼu foʼi huki toto? (2) Kotou fakahā te ʼu tafa faigataʼa e tolu neʼe feala ke fai kae ʼe mole fakaʼaogaʼi ai te toto. (3) He koʼē ko te ʼu tōketā e lauʼi afe ʼi te mālamanei neʼe natou tali lelei ke mole natou fakaʼaogaʼi te toto ʼi tanatou ʼu fai tafa? (4) Koteā te ʼu mahino foʼou fakatōketā ʼaē kua maʼu ʼo ʼuhiga mo te fakaʼaogaʼi ʼo te toto? (5) Koteā ʼaē ʼe feala ke hoko mokā fakaʼaogaʼi te ʼu foʼi huki toto? (6) Koteā te manatu ʼa te tokolahi ʼo te hahaʼi popoto ʼo ʼuhiga mo te ʼu lelei ʼo te ʼu faitoʼo ʼaē ʼe natou fetogi te ʼu foʼi huki toto? (7) Koteā ʼaē ʼe tupu ai te mole lahi ʼo te ʼu globules kula ʼi te sino, pea koteā ʼaē ʼe feala ke fai moʼo tokoni ki te sino ke ina maʼu he puleʼaki ki te faʼahi ʼaia? (8) ʼE lava fakahake feafeaʼi te ʼu globules kula ʼi te sino ʼo ia ʼaē ʼe mahaki? (9) Koteā ʼaē ʼe fakaʼaogaʼi ke mole lahi te puli ʼo te toto ʼi te tafa? (10) Ko te ʼu faitoʼo ʼaē ʼe fakaʼaogaʼi moʼo fetogi te ʼu foʼi huki toto ʼe feala koa ke fakaʼaogaʼi ki te ʼu kihiʼi tamaliki peʼe ki ni ʼu hahaʼi ʼe leletakiʼi ki te lōpitali heʼe tuʼutāmaki tonatou maʼuli, ohagē ko te ʼu hahaʼi ʼaē neʼe fakaʼī? (11) Ko te lēkula fea ʼaē ʼe tonu ke fakaʼapaʼapa kiai te ʼu tōketā ʼo ʼuhiga mo he faitoʼo ʼe loto kiai te mahaki?

Ko te tali ʼo he ʼu faitoʼo neʼe tou sio kiai ʼi te foʼi ʼata, ʼe tahi fakalogo pē ki tona leʼo ʼo loto, koia ʼaua naʼa kotou talitali ke hoko mai he tuʼutāmaki ke kotou vakavakaʼi peʼe kotou tali ia he faitoʼo peʼe kailoa. Kotou lau ia te kāpite 7 ʼo te tohi “Te ʼOfa ʼo Te ʼAtua” pea mo toe vakaʼi ia te pepa ʼaē ʼe ʼalutahi mo Te Minisitelio ʼo Te Puleʼaga ʼo Novepeli ʼo te taʼu 2006, ke tokoni atu ke feala hakotou mālama ki te ʼu tonu ʼaē ʼe kotou fai ʼo ʼuhiga mo he faitoʼo pea mo he tafa ʼaē kā fai kiā koutou. Pea kapau kua kotou papitema, kotou tohi fakalelei ʼi takotou kiʼi kate ʼo te toto (DPA) ia te ʼu meʼa ʼaē ʼe kotou loto kiai, pea kotou taupau tuʼumaʼu iā koutou ia te kiʼi kate ʼaia.

[Palalau ʼo te pāsina 3]

Kua kotou filifili koa ia te ʼu faitoʼo pea mo te ʼu tafa ʼaē ʼe kotou tali anai maʼa koutou pea neʼe kotou tohi koa ʼi te kiʼi kate ʼo te toto (DPA)?