Tou Fai He ʼu Palalau ʼe Fia Logo Kiai Te Hahaʼi
1. Koteā te ako ʼe tou maʼu mai te faʼahiga fai fakamafola ʼa te kau ʼuluaki Kilisitiano?
1 Neʼe fakamafola e te kau ʼuluaki Kilisitiano ia te logo lelei ki te hahaʼi ʼo te ʼu agaʼi fenua pea mo te ʼu lotu kehekehe. (Kol. 1:23) Logolā ko te logo e tahi ʼaē ʼe natou fakamafola, te logo lelei ʼo te Puleʼaga ʼo te ʼAtua, kae neʼe mulimuli ʼanatou ʼu ʼuluaki palalau ki te ʼu faʼahiga hahaʼi ʼaē ʼe felāveʼi mo natou. Ohagē la, ʼi tana palalau ki te kau Sutea ʼaē neʼe fakaʼapaʼapa ki te Tohi-Tapu, neʼe talanoa iā Petelo ki te lea fakapolofetā ʼaē neʼe fai e Soele. (Gaue 2:14-17) ʼI te tahi faʼahi, kotou tokagaʼi ia te felōgoi ʼa Paulo mo te kau Keleka ʼaē ʼe tuʼu iā Gaue 17:22-31. Ia ʼaho nei, ʼe maʼu ʼi ihi fenua te hahaʼi ʼe natou fakaʼapaʼapa ki te Folafola ʼa ʼAtua pea ʼe feala leva hatatou fai palalau mo nātou ki te Tohi-Tapu ʼi te fai fakamafola. Kae ʼe tonu anai ke ʼaua naʼa tou talanoa fakahagatonu ʼo ʼuhiga mo te Tohi-Tapu ki he tahi ʼe mole tui ki te Tohi-Tapu, peʼe mole fia talanoa lotu, peʼe kau ki he lotu ʼe mole Kilisitiano.
2. ʼE feafeaʼi hatatou fakaʼaoga lelei te tufa moʼo tokoni kiā nātou ʼaē ʼe fakaʼapaʼapa ki te Tohi-Tapu pea mo nātou ʼaē ʼe mole fia logo kiai?
2 Tou Fakaʼaogaʼi Lelei Te Tufa ʼo Te Māhina: ʼE fetogi anai ʼi te ʼu māhina lua fuli te tufa ʼo te taʼu gāue ʼaenī kā kamata pea ʼe tufa tāfito anai ia te ʼu nusipepa, mo te ʼu kiʼi pepa lotu pea mo te ʼu kaupepa lalahi. Tatau aipē pe ʼe tou fai fakamafola ʼi he telituale ʼe tokolahi ai te hahaʼi ʼe mole natou tali te Tohi-Tapu, ʼe feala ke tou palalau ki he manatu ʼe natou fia logo kiai. ʼE lagi mole tou lau anai he vaega Tohi-Tapu, kae kapau neʼe fia logo he tahi, pea ʼe tou faiga anai ʼi te toe ʼaʼahi ʼo ia ke tou fakatuputupu tana tui ʼaē ki te ʼAtua pea mo tana fakaʼapaʼapa ʼaē ki tana Folafola. ʼI te tahi faʼahi, kapau ʼe kotou fai fakamafola ʼi he telituale ʼe fakaʼapaʼapa ai te hahaʼi ki te Tohi-Tapu, ʼe feala anai takotou fakaʼaoga he tufa pea mo he ʼu palalau ʼe fakatafito ki te Tohi-Tapu. Koia ʼe feala ke tou tuku age ki ai te tohi Te Ako Mai Te Tohi-Tapu peʼe ko te kaupepa lahi Tou Fakalogo Ki Te ʼAtua Pea Ke Tou Māʼuʼuli ʼo Heʼegata ʼi he temi pē, tatau aipē pe koteā te tufa ʼo te māhina. Ko tatatou fakatuʼutuʼu tāfito ʼe ko tatatou fakatupu hanatou fia logo ki te logo lelei.
3. Koteā ʼaē ʼe feala ke fakatatau ai te loto ʼo te hahaʼi ʼo totatou telituale ki he kele?
3 Tou Teuteuʼi Te Kele: ʼE feala ke fakatatau te loto ʼo he tahi ki he kele. (Luka 8:15) Ko ʼihi kele ʼe ʼaoga ke lahi tona teuteuʼi ke feala ke tauaka ai pea mo tuputupu ai te pulapula ʼa te Tohi-Tapu. Neʼe lelei ʼaupitō te tō pulapula ʼa te kau ʼuluaki Kilisitiano ʼi te ʼu faʼahiga kele kehekehe, pea neʼe natou fiafia ai. (Gaue 13:48, 52) ʼE toe feala foki mo tātou ke tou maʼu te taʼi fiafia ʼaia ʼaki tatatou tokaga lelei ki ʼatatou ʼuluaki palalau.