Fai He Fakamoʼoni ʼe Katoa Lelei
1. Kotea te faʼifaʼitaki lelei neʼe tuku mai e te apositolo ko Paulo ʼi te minisitelio?
1 “Fai ke katoa lelei tau gaue.” (2 Tim. 4:5) ʼE mahino ia neʼe lagi palalau faʼifaʼitaliha ia Paulo ʼi tana tokoni kia Timoteo. ʼI tona fakahagatonu, neʼe fakakatoa lelei e Paulo ʼi te taʼu 47 ki te taʼu 56 H.T.S., ʼana folau fakamisionea ʼe tolu. Neʼe talanoa liuliuga ʼi te tohi ʼo Gaue ki te fai e Paulo ia he fakamoʼoni ʼe katoa lelei. (Gaue 23:11; 28:23) ʼE feafeaʼi hatatou toe fai feia mo tatou ia ʼaho nei?
2. ʼE feafeaʼi hatatou fai he fakamoʼoni ʼe katoa lelei moka tou faifakamafola ʼi te ʼu ʼapi?
2 ʼI Te ʼu ʼApi: ʼI tatatou faiga ʼae ke tou felaveʼi mo te hahaʼi ʼae neʼe heʼeki logo ki te logo lelei, ʼe lagi ʼaoga anai ke tou fetogi te lakaga ʼae ʼe tou ʼaʼahi ai ia natou. ʼE feala pe ke tou maʼu atu te hahaʼi tagata ki ʼonatou ʼapi ʼi te ʼu afiafi pe ko te fakaʼosi vahaʼa. ʼE tonu ke tou faiga fakamalotoloto ke tou maʼu te hahaʼi ʼi te ʼu ʼapi fuli, ʼo tou faiga liuliuga ke tou maʼu ia natou ʼae neʼe pupuli. Kaʼe feafeaʼi mo kapau ʼe mole tou maʼu ia te hahaʼi ʼaia? ʼE lava lelei anai mo kapau ʼe tou fai he tohi peʼe tou telefoni.
3. Kotea te ʼu faigamalie ʼe kotou maʼu ke kotou faifakamafola ai?
3 ʼI Te Faifakamafola Faigamalie: Ia ʼaho nei, ko te ʼu kaugana ʼa Sehova ʼe natou fakailoilo te “poto” moʼoni kia natou fuli ʼae ʼe fia logo. ʼI ʼihi temi ʼe natou fai te faʼahi ʼaia “i te u ala” peʼe “i te u potu kaugamalie.” (Taag. 1:20, 21) Ka tou olo ʼo fai ʼatatou fekau mahani, ʼe tou manatu koa ke tou faifakamafola ʼi te ʼu lakaga ʼaia? ʼE feala koa ke ui ʼe tou “tokaga katoa” ki te folafola? (Gaue 18:5) Kapau koia, pea ʼe tou fakahoko katoa totatou maʼua ʼae ko te fai ʼo he fakamoʼoni ʼe katoa lelei.—Gaue 10:42; 17:17; 20:20, 21, 24.
4. ʼE tokoni feafeaʼi mai te faikole mo te metitasio ke tou fai he fakamoʼoni ʼe katoa lelei?
4 ʼI ʼihi temi, ʼe feala ke mole tou faifakamafola ʼuhi ko he vaivaiʼaga peʼe ko te mataku. ʼE mahino ia ko Sehova ʼe ina iloʼi totatou gataʼaga. (Pes. 103:14) Kaʼe ka hoko he ʼu aluʼaga feia, pea ʼe feala ke tou kole kia te ia ke ina foaki mai he lotomalohi ke tou palalau. (Gaue 4:29, 31) Pea tahi, ko te ako mo te metitasioʼi ʼo te Folafola ʼa te ʼAtua ʼe tokoni mai ke tou hikihiki tatatou leleiʼia te maʼuhiga ʼo te logo lelei. (Filp. 3:8) ʼI tatatou fai ia te faʼahi ʼaia, ʼe ʼekenaki ai tatou ke tou tala te logo ʼaia ʼaki he loto katoa.
5. Kotea ʼae ʼe tonu ke tou fai ke tou kau ʼi te fakahoko ʼo te lea fakapolofeta ʼa Soele?
5 Neʼe tala fakatomuʼa e te lea fakapolofeta ʼa Soele ʼo ʼuhiga mo te hahaʼi ʼa Sehova ʼi muʼa ʼo te hoko mai ʼo tona ʼaho lahi pea mo fakamataku, “e mole toe fakatuu natou e he mea” pea ʼe mole natou tuku anai he meʼa ke ina taʼofi tanatou faifakamafola. (Soe. 2:2, 7-9) ʼOfa pe ke tou fai ke katoa lelei te fakamoʼoni ʼaia, ia te gaue ʼae ʼe mole toe hoko anai ʼi he temi.