Ke Lelei Age Tatatou Minisitelio: Tou Toʼo He ʼu Nota

“Ke ke tokaga [tuʼumaʼu] kia koe totonu, pea mo tau faiakonaki.” (1 Tim. 4:16) Ko te tokoni ʼaia neʼe fai e te apositolo ko Paulo kia Timoteo ʼaki te takitaki fakaʼatua. ʼE ha ai te maʼua ʼae ke tou faiga ʼo hikihiki tatatou faifakamafola, peʼe tou foʼofoʼou faifakamafola peʼe kua fualoa. Moʼo tokoni mai ke tou fai te faʼahi ʼaia, ʼe ta anai ʼi Te Minisitelio ʼo Te Puleʼaga he ʼu alatike ko tona kupu tafitō ʼaeni: “Ke Lelei Age Tatatou Minisitelio.” ʼE tou vakaʼi anai ʼi te ʼu alatike takitahi ʼaia ia he ʼu faʼahi ʼe maʼuhiga, pea mo tokoni mai ke tou gaueʼi. Lolotoga te mahina, ʼe fakalotomalohiʼi tatou fuli ke tou maʼuliʼi ia te ʼu tokoni ʼae neʼe fai mai. Pea ʼi te fakaʼosi ʼo te mahina, ʼe fakatuʼutuʼu anai he koga ʼi te Fono Gaue ke tou fakaha ai te ʼu lelei neʼe tou maʼu ʼi tatatou maʼuliʼi te ʼu tokoni ʼaia. ʼI te mahina ʼaeni, ʼe fakalotomalohiʼi tatou ke tou tokaga tafitō ʼo toʼo he ʼu nota moka neʼe fia logo he tahi.

He Ko ʼe ʼe Maʼuhiga?: Moʼo fakahoko te gaue ʼae neʼe foaki mai, ʼe mole gata ʼaki pe tatatou faifakamafola. Kaʼe ʼe tonu ke tou liliu ʼo ʼaʼahi natou ʼae neʼe fia logo pea mo akoʼi natou, ʼo tou fakavai ai te pulapula ʼo te moʼoni ʼae neʼe tou to. (Mat. 28:19, 20; 1 Ko. 3:6-9) ʼE tonu ke tou toe maʼu ia ia ʼae neʼe fia logo, mo faipalalau mo ia ki he faʼahi ʼe ina leleiʼia, pea ʼe tou faipalalau ai anai ʼo mulimuli ki te ʼu faʼahi ʼae neʼe tou faipalalau ki ai ʼi muʼa atu. Koia, ka neʼe tou faipalalau mo he tahi neʼe fia logo, ʼe tonu ke tou toʼo he ʼu nota ʼo tatatou faipalalau ʼaia.

Te ʼu Meʼa ʼAe ʼe Tonu Ke Ke Fai:

• Ke katoa ʼi tau kato ia meʼa fuli ʼae ʼe ʼaoga moʼo toʼo he ʼu nota. Ke maʼa te ʼu pepa ʼae ʼe ke tohi ai ʼau nota, mo ke tanaki fakalelei pea mo ke foimo tohi te ʼu manatu foʼou, ʼi te ʼosi pe ʼo hau faipalalau.

• Ke ke tohi te ʼu faʼahi ʼo ʼuhiga mo ia ʼae neʼe fia logo: tona higoa, tona tuʼasila, tona numelo telefoni, peʼe ko tona tuʼasila ʼi te Neti. Toe tohi mo te ʼu meʼa ʼae neʼe ke tokagaʼi ia ia mo tona famili, pea ʼe lagi maʼuhiga kia koe.

• Ke ke tohi te ʼu meʼa fuli ʼae neʼe kolua faipalalau ki ai, ohage la ko te ʼu vaega Tohi-Tapu neʼe kolua lau, te ʼu faʼahi ʼae ʼe tui ki ai, mo te tohi ʼae neʼe ke tuku age. Toe tohi mo te ʼaho pea mo te hola ʼae neʼe ke fai ai te ʼaʼahi.

• Ke ke tohi te manatu ʼae neʼe kolua fakatuʼutuʼu ke kolua vakaʼi moka ke toe ʼaʼahi ia ia, ʼo feia mo te ʼaho ʼae neʼe kolua fakatuʼutuʼu ki ai.

• Hili tau fai te ʼu ʼaʼahi, tohi te ʼu manatu foʼou. ʼE lelei ke lahi age te ʼu nota ʼae ʼe ke toʼo.

ʼAhiʼahi Fai Te Faʼahi ʼAeni Lolotoga Te Mahina:

• Ka ke toʼo ʼau nota, fakaha age kia ia ʼae ʼe kolua kaugā gaue te ʼu meʼa ʼae ʼe ke tohi.