Koutou Tokaga ʼo Fai Te ʼu ʼAʼahi!
1 “Neʼe lelei tamā fai palalau! ʼE tonu ke ʼau manatuʼi ʼo fai te ʼaʼahi.” Neʼe mole heʼeki koutou fai koa la te ʼu palalau ʼaia, pea ki muli age neʼe galo kia koutou peʼe nofo ʼifea? Kapau koia ʼaia, pea ʼe lelei ke koutou tohi ʼi he pepa, ke koutou ʼiloʼi papau ai ʼe koutou fai anai te ʼaʼahi.
2 Koutou Tohi Ia Meʼa Fuli: ʼI takotou kei manatuʼi lelei takotou fai palalau, koutou foimo tohi te ʼu faʼahi fuli ʼo te ʼaʼahi ʼaē ka koutou fai. Koutou tohi tona higoa, pea mo tona agaaga ke feala hakotou toe ʼiloʼi ia ia. Koutou tohi mo tona tuʼasila, kae ʼaua naʼa koutou hoko tohi—koutou vakavakaʼi peʼe tonu te meʼa ʼaē neʼe koutou tohi. Koutou tohi te puani ʼaē neʼe koutou palalau kiai, mo te ʼu vaega ʼaē neʼe koutou lau, pea mo te tohi ʼaē neʼe koutou tufa.
3 Kapau neʼe koutou lagaʼi he fehuʼi pea ʼe koutou fakatuʼutuʼu ke koutou tali ʼi takotou ʼaʼahi, pea koutou tohi te fehuʼi ʼaia. Kua koutou ʼiloʼi koa pe ko ai ia ia, mo tona famili, peʼe ko tana lotu? Kapau koia, pea ʼe lelei ke koutou tohi. Pea ka koutou ʼaʼahi anai ia ia, pea ka koutou palalau anai ki te ʼu faʼahi ʼaia, pea ʼe hā ai anai takotou fia tokoni moʼoni kia ia. Moʼo fakaʼosi, koutou tohi mo te ʼaho pea mo te hola ʼaē neʼe koutou fai ai takotou ʼuluaki ʼaʼahi, pea mo te ʼaho ʼaē neʼe koutou ʼui ai ʼe koutou toe liliu anai ki ai. Kapau ʼe koutou tohi fakalelei te ʼu meʼa ʼaia, pea ʼe koutou manatuʼi lelei anai, pea ʼe faigataʼa anai takotou galoʼi takotou fakapapau ʼaē ke koutou toe liliu.—1 Tim. 1:12.
4 Kapau kua koutou tohi ia meʼa fuli, pea koutou ʼave tuʼumaʼu mo koutou takotou ʼu nota, mo te ʼu meʼa ʼaē ʼe ʼaoga ki te fai faka mafola—he kato, te Tohi-Tapu, te tohi Tokoni Ki Te ʼu Fai Palalau, pea mo he tahi ʼu tohi. ʼE lelei ke koutou tohi ki te ʼu kiʼi pepa nota, te ʼu ʼapi ʼaē neʼe lāvaki pea mo koutou fakakeheʼi mo te ʼu pepa ʼaē ʼe koutou fakaʼaogaʼi moʼo tohi kiai takotou ʼu ʼaʼahi. ʼE mahino papau ia, tatau aipe peʼe koutou tohi fakalelei takotou ʼu ʼaʼahi, kae ko te meʼa ʼaē ʼe maʼuhiga ʼe ko takotou liliu ʼo fai te ʼu ʼaʼahi!
5 Koutou Fakakaukauʼi Ia Ia ʼAē Ka Koutou ʼAʼahi: Ka koutou teuteu takotou fai faka mafola, koutou toe vakaʼi takotou ʼu nota ʼo ʼuhiga mo te ʼu ʼaʼahi. Koutou fakakaukauʼi te ʼu hahaʼi takitokotahi ʼaē ka koutou ʼaʼahi, pea mo te ʼu palalau ʼaē ʼe feala ke koutou fakaʼaogaʼi mokā koutou fai he ʼaʼahi. Koutou fakakaukauʼi pe koteā te meʼa ʼaē ʼe feala ke koutou fai ke tupu ai he fia ako Tohi-Tapu ʼo takotou ʼaʼahi. Ko te taʼi fai ʼaia, ʼe ina fakatuputupu anai takotou gāue, ʼi tokotou ʼuhiga minisi ʼo te logo lelei pea ʼe koutou fiafia ai.—Taag. 21:5a.
6 Koia, kapau ʼe koutou felāveʼi mo he tahi ʼe fia logo, ʼaua naʼa koutou manatu ʼe faigafua anai hakotou toe manatuʼi te ʼaʼahi. Kae koutou tohi, mo toe vakaʼi takotou ʼu nota, pea mo fakakaukauʼi ia ia ʼaē neʼe koutou palalau ki ai, pea mo koutou tokaga ʼo fai te ʼaʼahi!