Tou Toe ʼAʼahi Ia Nātou Fuli ʼAē Neʼe Fia Logo
1 Tokolahi iā tātou ʼe tou ʼi te moʼoni iā ʼaho nei, ʼuhi he neʼe tokagaʼi e he tahi tatatou fia logo ki te logo ʼo te Puleʼaga, pea neʼe faʼa kātaki ʼo toe liliu mai—lagi tuʼa lahi—moʼo taupau tatatou fia logo. Mo tātou lā, ʼe tonu ke tou toe ʼaʼahi fakalelei ia nātou fuli ʼaē neʼe fia logo. ʼI tona fakahagatonu, ko te fai ʼo te ʼu ʼaʼahi ʼe kau ki tatatou gāue ʼaē ko te “fai [ʼo] ni ʼu tisipulo.”—Mat. 28:19, 20, MN.
2 Tou Tokagaʼi Tana Fia Logo: Tatau aipē peʼe mole tali e he tahi hana tohi, kae ko tona fofoga, peʼe ko tona leʼo, peʼe ko tana faʼahiga palalau ʼe lava ʼiloga ai tana fia fagono ki te logo ʼo te Puleʼaga. ʼE feala ai leva ke tou toe liliu ʼo ʼaʼahi ia ia. Ko te tehina neʼe ina ʼaʼahi te tagata lolotoga vāhaʼa e nima kae neʼe mole ina tali hana tohi. ʼI tana tuʼa ono leva, neʼe ina tali tana tohi, pea neʼe kamata leva tana ako Tohi-Tapu.
3 Kapau ʼe kotou tokagaʼi neʼe fia logo he tahi, pea ʼaua naʼa kotou fakatuatuai ʼi tona toe ʼaʼahi. ʼAua naʼa kotou tuku he faigamālie ki “te agakovi” ke ina taʼaki te pulapula ʼaē neʼe tō ki tona loto. (Mat. 13:19) Kotou fakahoko takotou fakapapau ʼaē ke kotou toe liliu age ʼo fai te ʼaʼahi ʼaē neʼe kotou tukupau.—Mat. 5:37.
4 Te Fagonogono ʼi Te Ala: ʼE kotou faiga koa ke kotou taupau te fia logo ʼa he tahi neʼe kotou maʼu ʼi te fagonogono ʼi te ala peʼe ʼi te fai fagonogono faigamālie? ʼI te fakaʼosi ʼo takotou fai palalau, ʼe feala hakotou ʼui fēnei: “Neʼe au leleiʼia tatā fai palalau. Kofea ʼaē ʼe feala ke au toe maʼu ai koe moʼo hoko atu tatā fai palalau?” Kapau ʼe feala, pea ko ʼihi kau fai faka mafola ʼe natou foaki tonatou nūmelo telefoni ki he tahi neʼe fia logo peʼe natou kole age peʼe feala lā ke natou fefakahāʼaki tonatou ʼu nūmelo telefoni. Kapau ʼe sisio atu ia te hahaʼi ʼe kotou tutuʼu tuʼumaʼu pē ʼi he koga meʼa ʼi takotou fai fagonogono ʼi te ala, pea ʼe lagi natou lotolelei anai ke natou foaki atu tonatou nūmelo telefoni peʼe ko tonatou tuʼasila. Tatau aipē peʼe mole natou fia fakahā atu te ʼu faʼahi ʼaia, kae ʼe kei feala pē hakotou faiga ke hoko atu tanatou fia logo ʼi takotou toe felāveʼi mo nātou ʼi te ala.
5 ʼE tou fiafia mokā tou sisio ki te mātala ʼo te ʼu ʼakau ʼaē neʼe tou fakavai pea mo gaohi. ʼO toe feiā pē, ʼe feala ke tou fiafia ʼaupitō ʼi tatatou fai ia te ʼu ʼaʼahi pea mo tokoni ki te hahaʼi ke natou tuputupu ʼi te faʼahi fakalaumālie. (1 Ko. 3:6) Kotou fakatuʼutuʼu tāfito ke kotou toe ʼaʼahi ia nātou fuli ʼaē neʼe fia logo.