ʼE Kamata Te Tufa ʼo Te ʼu Pepa Fakaafe Ki Te ʼAho Fakamanatu ʼi Te ʼAho 22 ʼo Malesio

ʼI te taʼu ʼaeni, ʼe tou kamata fakaafe anai te hahaʼi ki te ʼAho Fakamanatu ʼi te Moeaki, ʼaho 22 ʼo Malesio. ʼE fakalotomalohiʼi tatou fuli ke tou lagolago malohi ki ai. ʼI te ʼu fakaʼosi vahaʼa, ʼe feala ke tou toe oloʼi ki ai te ʼu nusipepa mo kapau ʼe feala. ʼI te ʼuluaki Moeaki ʼo Apelili, ʼe tou tokakaga tafitō anai ʼo tufa te ʼu pepa fakaafe kaʼe mole ko te kamata ʼo he ʼu ako Tohi-Tapu. Kaʼe kapau ʼe tou felaveʼi mo he tahi ʼe fia logo, ʼe lagi feala ke tou kamata hana ako Tohi-Tapu. ʼE ko te taupau gaue ʼae ka ina fakafuafua anai peʼe feala ke tufa ia te ʼu pepa fakaafe ʼi te ala pe ko te ʼu koga meʼa ʼae ʼe maʼu ai te hahaʼi. Ko te fakatuʼutuʼu ʼaia ʼe lagi tokoni anai ki te kokelekasio ke tufa ki he hahaʼi tokolahi ʼo totatou telituale. Pea tou kamata fai he lisi ʼo ʼotatou kaiga, mo ʼotatou kaugā gaue, mo ʼotatou kaugā ako, mo ʼatatou ʼaʼahi, pea mo ʼotatou feʼilo ʼae ʼe tou fia fakaafe, pea mo tou foaki age kia natou tanatou pepa moka kamata te tufa. ʼE tou fakaʼamu ke hahaʼi ia natou ʼae ka fakatahi mo tatou moʼo fakamanatu ia te toe ʼofa lahi ʼae neʼe fakaha e Sehova mo Sesu.—Soa. 3:16; 15:13.