Ka Tou ʼOfa Kia Sehova Pea ʼe Tokoni Mai Ke Tou Tauʼi Te Mataku

1. Kotea la ʼihi aluʼaga ʼe feala ke tou tuʼania ki ai?

FAKAKAUKAUʼI age muʼa koe ia te ʼu aluʼaga ʼaeni neʼe tau mo ʼihi Fakamoʼoni ʼa Sehova. Neʼe fia olo ia Nestor mo tona ʼohoana ko María ki te ʼu koga meʼa ʼae ʼe ʼaoga lahi ai he kau faifakamafola.b Koia, neʼe tonu ai ke nā fakaʼaogaʼi fakapotopoto tanā foʼi falā. Kae neʼe nā matataku naʼa mole nā fiafia moʼoni moka ʼe mole lahi tanā foʼi falā. Ne’e maʼuli ia Biniam ʼi he fenua ʼe fakafeagai ai te hahaʼi ki tatatou gaue. Neʼe liliu ko he Fakamoʼoni ʼa Sehova pea neʼe mahino kia ia ʼe feala ke fakatagaʼi ia ia. Pea ko te aluʼaga ʼaia neʼe mataku ai. Kae neʼe toe ʼasili age tona ia mataku pe kotea anai te manatu ʼo tona famili moka natou iloʼi tana kua alu ʼi he tahi lotu. Neʼe fakaha kia Valérie kua kovi ʼosi tona kosea. Pea neʼe ina fai ia meʼa fuli ke ina maʼu he toketa ʼe fakaʼapaʼapa anai ki te ʼu meʼa ʼae ʼe tui ki ai ʼi te Tohi-Tapu ʼo ʼuhiga mo te toto. Neʼe tuʼania ia naʼa mate.

2. He koʼe ʼe tonu ke tou faiga ke tou tauʼi totatou mataku?

² Neʼe kua ke logoʼi koa ia te taʼi ʼu tuʼania peʼe mataku ʼaia? Tokolahi ia tatou neʼe kua tou logoʼi ia te faʼahi ʼaia. Kapau ʼe mole tou tauʼi totatou mataku, pea ʼe feala pe ke tou toʼo he ʼu tonu ʼe mole lelei, ʼo fua kovi ai ki ʼatatou felogoi mo Sehova. Pea ko te aluʼaga ʼaia ʼe loto ki ai ia Satana. Ka tokagaʼi e Satana ʼe tou matataku, pea ʼe ina fakaʼaogaʼi te faʼahi ʼaia ke tou talagataʼa ki te ʼu lao ʼa Sehova, tafito te fakatotonu ʼae ke tou tala te logo lelei. (Apk. 12:17) ʼE agakovi ia Satana pea mo malohi. Kae ʼe feala hau fai he puleʼaki moʼo puipui ia koe mai ia ia. ʼO feafeaʼi?

3. Kotea ʼae ʼe tokoni mai anai ke tou tauʼi totatou mataku?

³ Ka tou tui papau ʼe ʼofa Sehova ia tatou mo tokoni tuʼumaʼu mai, pea ʼe mole tou matataku anai ia Satana. (Pes. 118:6) Ohage la, ko ia ʼae neʼe ina tohi te Pesalemo 118 neʼe maʼuli tuʼania. Neʼe lahi ʼaupito ʼona fili, neʼe kau ai he ʼu hahaʼi maʼu tuʼulaga (vaega 9, 10). ʼI ʼihi temi, neʼe lahi ʼaupito te ʼu aluʼaga faigataʼa neʼe tau mo ia (vaega 13). Pea neʼe fakatonutonuʼi ia ia e Sehova (vaega 18). Kae neʼe hiva fenei e te tagata faipesalemo ʼaia: “ ʼE mole au mataku anai.” Kotea ʼae neʼe tupu ai tana logoʼi ʼae hona puipui? Neʼe ina iloʼi neʼe ʼofa mamahi ia tana Tamai ʼae ʼi selo ia ia logo la tana haga ʼae ʼo fakatonutonuʼi ia ia. Neʼe tui papau te tagata faipesalemo ʼe tokoni tuʼumaʼu age anai tona ʼAtua ʼofa kia ia, tatau aipe pe kotea te aluʼaga ʼae neʼe tau mo ia.​—Pes. 118:29.

4. Kotea ʼae ʼe mole tonu ke tou matataku ki ai? Pea ʼe feafeaʼi hatatou tauʼi te faʼahi ʼaia?

⁴ ʼE tonu ke tou tui ʼe ʼofa ia Sehova ia tatou. Ka tou tui ki te faʼahi ʼaia, pea ʼe tokoni mai anai ke tou tauʼi aluʼaga ʼe tolu ʼe feala ke tou matataku ki ai: (1) ko te mataku ʼae naʼa mole tou lava taupau totatou kiʼi famili, (2) ko te mataku ki te tagata, pea (3) ko te mataku ki te mate. Neʼe lava tauʼi e te ʼu tehina mo tuagaʼane, ʼae neʼe tou talanoa ki ai ʼi te kamata ia tonatou mataku he neʼe natou tui papau ʼe ʼofa te ʼAtua ia natou.

TE MATAKU ʼAE NAʼA MOLE TOU LAVA TAUPAU TOTATOU KIʼI FAMILI

5. Kotea te ʼu aluʼaga ʼe tuʼania ki ai he pule famili? (Vakaʼi te pāki ʼo te takafi.)

⁵ ʼE fia fakahoko lelei e he pule famili ia tona maʼua ʼae ke tokaga lelei ki tona kiʼi famili ʼi te faʼahi fakasino. (1 Tim. 5:8) Kapau ko koe ko he pule famili, lagi ʼe ke mataku naʼa mole kei ʼi ai hau gaue ʼuhi ko te taʼi mahaki ʼae ʼe to. Neʼe lagi ke tuʼania naʼa mole ke lava fafaga peʼe maʼu he nofoʼaga maʼa tou kiʼi famili. Neʼe lagi ke toe mataku kapau ʼe mole kei ke gaue pea ʼe mole feala anai hau toe maʼu he tahi gaue. Peʼe lagi ke manatu ohage ko Nestor mo María ʼe mole feala ke ke maʼuli mo he kiʼi foʼi falā veliveli. Neʼe lava te ʼu faiga ʼa Satana ʼi tana fakaʼaogaʼi te ʼu tuʼania ʼaia.

6. Kotea ʼae ʼe loto e Satana ke tou tui ki ai?

⁶ ʼE loto e Satana ke tou tui ʼe mole ʼofa ia Sehova ia tatou pea ʼe mole tokoni mai anai ke tou tokaga lelei ki totatou kiʼi famili. Koia, ʼe feala ai ke tou manatu, ʼe tonu ke tou fai ia meʼa fuli moʼo taupau tatatou gaue, maʼia pe tou fai he meʼa ʼe maumauʼi ai ʼatatou felogoi lelei mo te ʼAtua.

7. Kotea ʼae neʼe ui e Sesu ʼe fakalotofimalie kia tatou?

⁷ Neʼe iloʼi lelei age e Sesu tana Tamai. Pea ʼe ina ui mai ‘ ʼe iloʼi e totatou ʼAtua te meʼa ʼae ʼe ʼaoga kia tatou ʼi muʼa ʼo tatatou kole age kia te ia.’ (Mat. 6:8) Pea ʼe iloʼi e Sesu ʼe foaki mai anai e Sehova te ʼu meʼa ʼae ʼe ʼaoga kia tatou. Pea tahi, ʼi totatou ʼuhiga Kilisitiano ʼe tou kau ki te famili ʼa te ʼAtua. Ko Sehova ʼe ko totatou Pule famili. Koia, ʼe tou tui papau ʼe ina fai anai te ʼu meʼa fuli ʼae neʼe ina ui ki te ʼu pule famili ke natou fai, ʼae ʼe tuʼu ia 1 Timoteo 5:8.

8. (1) Ka tou lau ia Mateo 6:31-33, kotea anai ka tokoni mai ke tou tauʼi te mataku ʼae naʼa mole tou lava taupau totatou kiʼi famili? (2) ʼE feafeaʼi hatatou faʼifaʼitakiʼi te taumatuʼa ʼae ʼe ʼasi ʼi te pāki ʼe nā vaevae he kiʼi meʼa kai mo he tuagaʼane?

⁸ Ka tou tui papau ʼe ʼofa Sehova ia tatou mo totatou kiʼi famili, pea ʼe tou falala ʼe tou maʼu anai te ʼu meʼa ʼae ʼe ʼaoga kia tatou. (Lau ia Mateo 6:31-33.) ʼE fia foaki e Sehova te ʼu meʼa ʼae ʼe ʼaoga kia tatou pea ʼe ko he Tamai ʼofa ia pea mo lotofoaki. ʼI tana fakatupu te kele, neʼe mole ina foaki mai pe te ʼu meʼa ʼae ʼe ʼaoga tafito kia tatou ke tou maʼuʼuli ai. Kae neʼe lahi te ʼu meʼa neʼe ina fakatupu ʼi te kele ke tou fiafia ai. (Sen. 2:9) Kapau ʼe tou tokagaʼi ʼe feʼauga pe te meʼa ʼae ke tou maʼuʼuli ai, pea ʼe tou feʼauga aipe. ʼE tou fakaha ai ʼe ko Sehova ʼae ʼe ina foaki mai te ʼu meʼa ʼae ʼe ʼaoga kia tatou. (Mat. 6:11) Tou manatuʼi ʼe maʼuhiga age te ʼu meʼa ʼae ka foaki mai e Sehova ʼi te ʼu meʼa fuli ʼae neʼe tou fakafisi ki ai ia ʼaho nei. Pea ʼe ina foaki mai anai te maʼuli heʼe gata ʼi te ka haʼu. Pea ko te aluʼaga ʼaia, neʼe mahino leva ki ai ia Nestor pea mo María.​—Esa. 65:21, 22.

9. Kotea ʼe ke ako mai te faʼifaʼitaki ʼo Nestor pea mo María?

⁹ Neʼe maʼu e Nestor mo María honā ʼapi matalelei mo hanā ʼu gaue ʼe lelei ʼi Colombie. Neʼe nā ui fenei: “Neʼe ma manatu ke ma maʼuli fakafeʼauga pea mo gaue lahi maʼa Sehova, kae neʼe ma tuʼania naʼa mole ma fiafia ʼi te mole lahi ʼo tamā kiʼi foʼi falā.” Kotea neʼe tokoni kia naua ke nā tauʼi tonā mataku? Neʼe nā fakakaukauʼi te ʼu aluʼaga kehekehe neʼe fakaha ai e Sehova tona ʼofa kia naua. Neʼe nā falala ʼe tokaga tuʼumaʼu anai ia Sehova kia naua, koia neʼe nā mavae ai ʼi ʼanā gaue totogi lelei. Neʼe nā fakatau tonā ʼapi pea neʼe nā olo ai ʼo maʼuli ʼi he fenua ʼe ʼaoga lahi ai he kau faifakamafola. Kotea tanā manatu ki te tonu ʼae neʼe nā fai? ʼE ui fenei e Nestor: “Neʼe ma sisio ki te moʼoni ʼo te ʼu palalau ʼae ia Mateo 6:33. ʼE ma maʼu tuʼumaʼu pe te ʼu meʼa ʼae ʼe ʼaoga kia maua ʼi te faʼahi fakasino. Pea kua lahi age toma maʼuli fiafia.”

TE MATAKU KI TE TAGATA

10. He koʼe ʼe feala ke mataku he tagata ki he tahi tagata?

¹⁰ Talu te agatuʼu ʼa Atama mo Eva kia Sehova mo te feagakoviʼaki pe ʼa te hahaʼi. (Ekl. 8:9) Ohage la, ko te hahaʼi ʼe natou fakaʼaogaʼi kovi tonatou ʼuhiga pule. ʼE fai e te kau faifakapo he ʼu agamalohi. ʼE laukoviʼi mo gaohi koviʼi e te kau ako ʼonatou kaugā ako pea ko ʼihi hahaʼi leva ʼe natou gaohi koviʼi ʼonatou famili. Koia ʼe mole tou punamaʼuli ai ki te mataku ʼa he tagata ki he tahi tagata. ʼE faiga feafeaʼi e Satana ke tou matataku ki te tagata?

11-12. Kotea ʼe fai e Satana ke tou matataku ai ki te tagata?

¹¹ ʼE faiga Satana ke tou matataku ki te hahaʼi, ke tou tuku ai tatatou faifakamafola peʼe ko te fai ʼo ʼihi aluʼaga ʼe fakatonutonu mai e Sehova. ʼE uga e Satana te ʼu puleʼaga ke natou tapuʼi tatatou gaue pea mo fakatagaʼi tatou. (Luka 21:12; Apk. 2:10) ʼI te malama ʼo Satana, tokolahi ʼe natou fakamafola ni manatu hala pea mo he ʼu loi ʼo ʼuhiga mo te kau Fakamoʼoni ʼa Sehova. ʼE feala ki te ʼu hahaʼi ʼae ʼe tui ki te ʼu loi ʼaia, ke natou vaʼi mo gaohi koviʼi tatou. (Mat. 10:36) ʼE feala koa ke tou punamaʼuli ki te ʼu puleʼaki kaka ʼaia ʼa Satana? Kailoa ia. Neʼe kua ina fakaʼaogaʼi te faʼahi ʼaia ʼi te ʼuluaki sekulo.​—Gaue 5:27, 28, 40.

¹² ʼE mole ko te mataku pe ki te fakafeagai ʼa te ʼu puleʼaga ʼae ʼe fakaʼaogaʼi e Satana. ʼE matataku ʼihi pe kotea anai te manatu ʼonatou famili moka natou liliu ko he ʼu Fakamoʼoni ʼa Sehova. ʼI ʼihi temi, ʼe lahi leva tanatou matataku ki te faʼahi ʼaia ʼi honatou gaohi koviʼi. ʼE natou ʼoʼofa mamahi ki ʼonatou famili pea ʼe natou loto ke natou iloʼi ia Sehova pea mo ʼoʼofa ki ai. ʼE natou lotomamahi moka ʼe natou logo ʼe mole fakaʼapaʼapa ʼonatou famili ki te ʼAtua moʼoni pea mo ʼana kaugana. Kae ʼi ʼihi aluʼaga, ʼe ʼomai leva ki te moʼoni ia te ʼu matuʼā ʼae neʼe fakafeagai ʼi te kamata. ʼE feafeaʼi mo kapau ko natou ʼo totatou famili ʼe mole kei fia felogoi mo tatou ʼuhi ko tatatou tauhi? Kotea ka tou fai anai?

13. Ka tou lau ia Pesalemo 27:10, ʼe tokoni feafeaʼi mai ke tou falala ki te ʼofa ʼo te ʼAtua moka liʼaki tatou e totatou famili?

¹³ ʼE tou maʼu he fakalotofimalie ʼi te ʼu palalau ʼaeni ia Pesalemo 27:10. (Lau.) Ka tou manatuʼi te ʼofa ʼo Sehova ʼae kia tatou, ʼe mole tou matataku anai ʼi te aluʼaga ʼae ka hoko, maʼia pe ʼe liʼaki tatou e totatou famili. ʼE tou tui papau ʼe ina fakapale anai tatatou faʼa kataki. ʼE foaki mai anai e Sehova ia meʼa fuli ʼae ʼe ʼaoga kia tatou pea ʼe tokoni mai ke mole tou hoha kae ke tou fiafia pea mo nofo ovi kia te ia. Pea ko te aluʼaga ʼaia neʼe hoko kia Biniam, ʼae neʼe tou palalau ki ai ʼi ʼoluga.

14. Kotea ʼe ke ako mai te faʼifaʼitaki ʼo Biniam?

¹⁴ Neʼe iloʼi lelei pe e Biniam ʼe gaohi koviʼi anai moka liliu ko he Fakamoʼoni ʼa Sehova. Neʼe ina iloʼi ʼe ʼofa Sehova kia ia pea neʼe tokoni ki ai ke ina lava tauʼi te mataku ki te tagata. ʼE ina ui fenei: “Neʼe mole au ʼamanaki au ʼe kovi feia te fakataga. Kae neʼe au tuʼania age au ia te fakafeagai ʼo toku famili ʼi te fakafeagai ʼo te ʼu puleʼaga. Neʼe au mataku naʼa ita taku tamai ʼae neʼe heʼeki tauhi kia Sehova ʼi taku filifili ke au liliu ko he Fakamoʼoni ʼa Sehova pea ʼe mole toe fakaʼapaʼapaʼi au e toku famili.” Kae neʼe tui papau ia Biniam ʼe tokaga tuʼumaʼu ia Sehova kia natou ʼae ʼe ʼoʼofa kia te ia. ʼE ui fenei e Biniam: “Neʼe au fakakaukauʼi te faʼahiga tokoni ʼa Sehova ki ʼihi ke natou tauʼi te ʼu fihifihia fakaekonomika mo te fakapalatahi mo te agamalohi ʼa te hahaʼi. Neʼe au iloʼi kapau ʼe au nofo pea mo Sehova pea ʼe ina tapuakinaʼi ai au. Ka tuʼa lahi hoku pilisoniʼi peʼe gaohi koviʼi, neʼe au tokagaʼi ʼe tokoni tuʼumaʼu mai ia Sehova mo kapau ʼe tou nofo agatonu kia te ia.” Kua liliu ia Sehova ko he Tamai ʼa Biniam pea ko Tana hahaʼi kua liliu ko hona famili.

TE MATAKU KI TE MATE

15. He koʼe ʼe tou matataku ki te mate?

¹⁵ ʼE ui ʼi te Tohi-Tapu ko te mate ʼe ko he fili. (1 Ko. 15:25, 26) ʼE tou tuʼania moka ʼe tou manatu ki te mate, tafito la moka ʼe tou tau mo he mahaki kovi pe ʼe ko he tahi ʼi totatou famili. He koʼe ʼe tou matataku ki te mate? He neʼe fakatupu tatou e Sehova ʼaki te holi ʼae ke tou maʼuli fiafia ʼo talu ai. (Ekl. 3:11) Ka tou maʼu he manatu fakapotopoto ʼo ʼuhiga mo te mataku ki te mate, ʼe tokoni mai anai ke tou puipui totatou maʼuli. Ohage la, ʼe feala ke tou tokaga ki te ʼu meʼa ʼae ʼe tou kai, mo faigaoʼi, mo kole tokoni ki he ʼu toketa mo toʼo he ʼu faitoʼo moka ʼe ʼaoga. Pea ʼaua naʼa tou fai he meʼa pe ke tuʼutamakiʼia ai totatou maʼuli.

16. Kotea ʼae ʼe fai e Satana ke tou matataku ai ki te mate?

¹⁶ ʼE iloʼi e Satana ʼe tou leleiʼia te maʼuli. Pea ʼe manatu ʼe tou liʼaki anai ʼatatou felogoi lelei mo Sehova kae ke tou maʼuʼuli. (Sopo 2:4, 5) Kae ʼe faihala Satana ia. ʼE ko “ia ʼae ʼe feala ke ina fakatupu te mate,” koia ʼe faiga ai ke tou matataku ki te mate ke tou liʼaki ai ia Sehova. (Hep. 2:14, 15) ʼI ʼihi temi, ʼe fakamatakuʼi tatou e te hahaʼi ke natou matehi tatou mo kapau ʼe tou nofo agatonu kia Sehova. ʼE natou fai te faʼahi ʼaia, he ʼe puleʼi natou e Satana. Peʼe ʼi ʼihi temi, ʼe feala ke tokagaʼi e Satana ʼe ʼaoga he faitoʼo fakavilivili kia tatou. Pea ʼe feala ke ina fakaʼaogaʼi te faʼahi ʼaia, ke tou maumauʼi ai te ʼu lao ʼa Sehova. ʼE feala ki te ʼu toketa peʼe ko natou ʼo te famili ʼae ʼe mole tauhi kia Sehova ke natou uga tatou ke tou tali ia te toto. Pea kapau ʼe tou fai te faʼahi ʼaia, ʼe tou maumauʼi anai te lao ʼa te ʼAtua. Peʼe lagi fakaneke anai tatou e he tahi ke tou fai he tahi age faitoʼo ʼe fakafeagai ki te ʼu pelesepeto Fakatohi-tapu.

17. Ka tou lau ia Loma 8:37-39, he koʼe ʼe mole tonu ke tou matataku ki te mate?

¹⁷ Tatau aipe pe ʼe tou fia maʼuʼuli kae ʼe tou iloʼi ʼe ʼofa anai ia Sehova ia tatou maʼia pe ʼe tonu ke tou mamate. (Lau ia Loma 8:37-39.) Ka mamate te ʼu kaumeʼa ʼo Sehova, ʼe ina manatuʼi natou, ʼe hage pe kei natou maʼuʼuli. (Luka 20:37, 38) ʼE fakaʼamu ia ke ina fakatuʼuake natou. (Sopo 14:15) Neʼe momoli mai e Sehova ia tona ʼAlo ke tou ‘maʼu ai te maʼuli heʼe gata.’ (Soa. 3:16) ʼE tou iloʼi ʼe ʼofa mamahi mo tokaga lelei ia Sehova kia tatou. Koia ʼe mole tonu ke tou lituʼa kia Sehova moka ʼe tou mahahaki peʼe faiga e he tahi ke ina matehi tatou. Kae tou tuku tatatou falala kia te ia he ʼe tou maʼu ai ia te fakalotofimalie mo te poto pea mo te malohi. Pea ko te aluʼaga ʼaia, neʼe fai e Valérie pea mo tona ʼohoana.​—Pes. 41:3.

18. Kotea ʼae ʼe ke ako mai te faʼifaʼitaki ʼo Valérie?

¹⁸ ʼI te taʼu 35 ʼo Valérie, neʼe fakaha age ki ai kua ina maʼu he kosea ʼe kovi. Tou vakaʼi pe neʼe tokoni feafeaʼi ki ai ia te ʼofa ke ina tauʼi tana mataku ki te mate. ʼE ina ui fenei: “ ʼI te fakaha mai ʼae kua au kosea, neʼe faikehe ʼosi kia maua taumatuʼa pea neʼe ma punamaʼuli ʼosi. Neʼe tonu ke fai hoku tafa lahi ke au maʼuli. Neʼe lahi te ʼu toketa neʼe au felogoi mo ia. Kae neʼe natou fakafisi fuli ki te fai ʼae toku tafa kae ʼe mole ʼai ki ai he toto. Neʼe au mataku kae neʼe au fakafisi ki te ʼai ʼo he toto ʼuhi ko te fakatotonu ʼa te ʼAtua. Neʼe fakaha tuʼumaʼu mai pe e Sehova ia tona ʼofa kia au. Koia neʼe ko te lakaga leva ʼaia ke au fakaha ai toku ʼofa ʼae kia te ia. Ka fakaha mai he ʼu logo ʼe kovi pea neʼe toe ʼasili age ia taku fakatotonu ʼae ke au fakafiafiaʼi ia Sehova pea ke mole malo ia Satana. Neʼe lava fai leva hoku tafa kae ʼe mole ʼai ki ai he toto. Logo la ʼe au tau tuʼumaʼu pe mo he ʼu fihifihia ʼo ʼuhiga mo te mahaki kae ʼe foaki tuʼumaʼu mai pe e Sehova te ʼu meʼa ʼae ʼe ʼaoga kia maua. Ohage la, ʼi te fono ʼo te fakaʼosi vahaʼa ʼi muʼa ʼo te fakaha mai ʼo toku mahaki, neʼe matou ako ai te alatike ʼaeni ‘Tou Tauʼi ʼAki Te Lotomālohi Ia Te ʼu Faigataʼaʼia ʼo Te Temi Nei.’c Neʼe fakalotomalohi ʼosi kia maua ia te alatike ʼaia. Neʼe tuʼa lahi tamā lau te alatike ʼaia. Neʼe tokoni mai kia maua taumatuʼa ia te taʼi ʼu alatike ʼaia pea mo tamā kau tuʼumaʼu ki te faifakamafola, mo te ʼu fono ke ma maʼu ia te tokalelei ʼo te loto pea mo toʼo he ʼu tonu ʼe lelei.”

TOU TAUʼI TOTATOU MATAKU

19. Kotea ʼae kua vave hoko?

¹⁹ Neʼe tokoni ia Sehova ki te ʼu tehina mo tuagaʼane fuli ʼi te malamanei ke natou tauʼi he ʼu aluʼaga faigataʼa pea mo lava fakafeagai ki te Tevolo. (1 Pet. 5:8, 9) Pea ʼe toe feala pe mo koe ke ke fai ia te faʼahi ʼaia. ʼE kua vave fakatotonu pe e Sehova kia Sesu mo natou ʼae ʼe kaugā hau mo ia ke natou “maumauʼi te ʼu gaue ʼa te Tevolo.” (1 Soa. 3:8) Hili ia, ʼe mole kei ʼaoga leva ki te hahaʼi ʼa te ʼAtua ʼae ʼi te kele ke natou ‘tuʼania mo mataku ki he meʼa.’ (Esa. 54:14; Mik. 4:4) Kae ʼi te temi nei, ʼe tonu ke tou faiga malohi ke tou tauʼi totatou mataku.

20. Kotea ʼae ʼe tokoni mai anai ke tou tauʼi totatou mataku?

²⁰ ʼE tonu ke tou haga tui malohi ʼe ʼofa mo puipui e Sehova ʼana kaugana. ʼE tou lava fakahoko anai te faʼahi ʼaia moka ʼe tou metitasio pea mo palalau ki te faʼahiga puipui e Sehova ʼana kaugana ʼi te temi muʼa. Pea ʼe feala ke tou manatuʼi pe neʼe tokoni feafeaʼi mai kia tatou takitokotahi ke tou tauʼi he ʼu aluʼaga fakalotomamahi. Koia ʼe feala ke tou tauʼi totatou mataku ʼaki te tokoni ʼa Sehova.—Pes. 34:4.