Kapite 39

Te Kau Agavaivai Pea Mo Te Kau Fialahi

ʼI TANA ʼosi vikiviki te ʼu kalitate ʼo Soane Patita, neʼe maliu ia Sesu ki te hahaʼi fialahi mo femaliuliu ʼaki ʼaē e ʼi ʼona tafa. “Te taʼiake ʼaenī, ko tana ʼui ʼaia, (...) ʼe tatau ia mo he kau tamaliki ʼe heheka ʼi he ʼu lapalasi faka tauʼaga meʼa, ʼe nātou kalaga ki ʼonatou kaugā gaoʼi ʼo ʼui maʼa nātou: ‘Neʼe mātou pupuhi fagufagu atu kia koutou, ka neʼe mole koutou meʼe; neʼe mātou tagilāulau, ka neʼe mole koutou tuki fatafata ʼi hokotou lotomamahi.’ ”

Koteā te faka ʼuhiga ʼo te palalau ʼa Sesu? Neʼe ina fakamahino age: “Ko Soane neʼe haʼu, neʼe mole kai pea neʼe mole ʼinu, kaʼe ʼui ia: ‘ ʼE ia te ia te temonio’; ko te Foha ʼo te tagata neʼe haʼu, ʼo kai pea mo ʼinu, kaʼe ʼui ia: ‘Koʼeni, ia te tagata ʼe kai fakavale pea ʼe ʼinu vino, ko he kaumeʼa ia ʼo te kau tānaki tukuhau pea mo te kau agahala.’ ”

ʼE mole feala te fakafimālieʼi ʼo te hahaʼi. ʼE mole ʼi ai he meʼa ʼe nātou leleiʼia. Neʼe maʼuli ia Soane ohage ko he nasilea, ʼo fakafisi ki te ʼu faʼahiga meʼa ʼe loto ia kiai, pea neʼe ina faka ʼalutahi tona maʼuli ki te palalau ʼa te ʼaselo ʼaē neʼe ʼui ai ‘ ʼe mole tonu ke ʼinu vino pe ko he kava mālohi’. Kae, neʼe ʼui ia e te hahaʼi ʼe ia ia te temonio. ʼI te tahi ia faʼahi, neʼe maʼuli ia Sesu ohage ko te tagata fuli pe, neʼe mole maʼuli fakamasiva ia, kae neʼe faka lākahalaʼi ia ʼo ʼui ʼe kai mo ʼinu fakavalevale.

ʼI faigataʼa leva ʼo te fakafimālieʼi ʼo te hahaʼi! ʼE nātou hage ko he ʼu tamaliki ʼo ʼi ai ʼihi ia nātou ʼe mole fia meʼe mokā pupuhi fagufagu age ʼonatou ʼu kaumeʼa peʼe nātou lotomamahi mokā tagilāulau age ʼonatou kaumeʼa. Kae neʼe ʼui e Sesu: “Ko te poto neʼe hā mai ia ʼe tonu ʼaki tana ʼu gāue.” ʼIo, ko te ʼu meʼa ʼaē neʼe hoko — te ʼu gāue — ʼe hā lelei mai ai ko te ʼu kovi ʼaē neʼe lau ʼo ʼuhiga mo Soane pea mo Sesu ʼe hala ia.

Neʼe hoko atu te palalau ʼa Sesu ʼo ina fakahagahaga ki te ʼu kolo e tolu: ko Kolasini, Petesaita mo Kapenaume, ʼaē neʼe lahi tana ʼu milakulo neʼe ina fai ai. Ohage ko tana ʼui, ka na pau neʼe hoko tana ʼu gāue ʼaia ʼi Tile pea mo Sitoni, ka na ʼaua la neʼe fakahemala te ʼu kolo faka fenisia ʼaia ʼi te taga pea mo te lefulefu. ʼI tana faka lākahalaʼi ia Kapenaume, te kolo ʼaia ʼe ʼiloga mai neʼe nofo kiai lolotoga tona minisitelio, neʼe tala fēnei e Sesu: “ ʼI te ʼAho ʼo te Fakamāu, ʼe maʼamaʼa age anai ki te fenua ʼo Sotoma ia te koe.”

ʼOsi ʼaia, pea fakavikiviki ia Sesu ki tana Tāmai ʼaē ʼi selo ia muʼa ʼo te hahaʼi. Neʼe ina fai te faʼahi ʼaia heʼe ko te ʼAtua neʼe ina fufū te ʼu moʼoni fakalaumālie maʼuhiga ʼaupito ki te kau poto pea mo te kau ʼatamai, kae neʼe ina fakahā te ʼu meʼa fakatalakitupua ʼaia ki te kau agavaivai, kia nātou ʼaia ʼaē ʼe feala ke ʼui ʼe liliki.

ʼO fakamuli ʼaia, pea fai e Sesu te fakaafe fakaloto fīmālie ʼaenī: “Koutou ʼōmai kia te ʼau, ia koutou fuli ʼaē ʼe kinakina pea mo mafasia, pea ʼe ʼau fakafimālie anai koutou. Koutou toʼo kia koutou taku ʼakau toho pea ke koutou ako ia te ʼau, heʼe ʼau agamālū pea mo loto agavaivai, pea ʼe koutou maʼu anai he fīmālie ki ʼokotou nefesi. Heʼe ko taku ʼakau toho ʼe mālū pea ko taku ʼāmoga ʼe maʼamaʼa.”

Ko te fakaloto fīmālie feafeaʼi ʼaē ʼe foaki e Sesu? ʼE ina faka ʼāteaina te hahaʼi mai te popūla ʼo te ʼu talatisio ʼaē neʼe fakamaʼua kia nātou e te kau takitaki lotu, ohage la ko te ʼu fakatotonu ʼaē ʼe fakamaʼumaʼua ʼo ʼuhiga mo te sapato. ʼE ina toe fakahā foki pe e feafeaʼi te faʼahiga maʼu ʼo te fakafimālie kia nātou ʼaē ʼe mafasia ʼi te mamafa ʼo te kavega ʼo te pule fakamālohi ʼaē ʼe fai e te kau takitaki faka politike, ʼo feiā aipe kia nātou ʼaē ʼe nātou logoʼi te mamafa ʼo tanatou ʼu agahala ʼuhi ko he leʼo ʼo loto ʼe mole tokalelei. Neʼe ina fakahā age kia nātou ʼaia ʼaē ʼe mamahi feiā, pe e feafeaʼi te feala ke fakamolemole ʼo tanatou ʼu agahala pea mo te feafeaʼi ʼo te fealagia ʼaē ke nātou maʼu he vāhaʼa lelei mo te ʼAtua.

Ko te ʼakau toho malū ʼaupito ʼaē ʼe fakaui mai e Sesu ko tona faka ʼuhiga ko te foaki totatou maʼuli katoa kia Sehova ʼo tauhi kia te ia, heʼe ko ia ko te Tāmai agaʼofa pea mo manavaʼofa. Kae ko te kavega maʼamaʼa ʼaē ʼe fakaui e Sesu kia nātou ʼaē ʼe ʼōmai kia te ia, ko te talagafua ki te ʼu pelesepeto ʼo te maʼuli ʼaē neʼe tuku mai e te ʼAtua, ʼaē ko Tana ʼu fakatotonu ʼe tuʼu ʼi te Tohi-Tapu. Pea ʼe mole ko he meʼa mamafa te talagafua ki te ʼu fakatotonu ʼaia. Mateo 11:16-30; Luka 1:15; 7:31-35; 1 Soane 5:3.

▪ Koteā ʼaē ʼi te taʼiake fialahi pea mo femaliuliu ʼaki ʼo Sesu, ʼe fakatatau ai ki he kau tamaliki?

▪ Koteā te tupuʼaga ʼo te vikiviki e Sesu tana Tāmai ʼaē ʼi selo?

▪ E feafeaʼi te mafasia ʼo te hahaʼi, pea koteā te fakafimālie ʼaē ʼe fakaui age e Sesu kia nātou?