Malaʼia Ki Te Taʼiake ʼAe Neʼe Mole Fia Fakalogo

Neʼe fakaʼapaʼapa lahi ia Sesu kia Soane Patita. Kaʼe neʼe kotea te manatu ʼa te hahaʼi ʼo ʼuhiga mo Soane? Neʼe ui fenei e Sesu ʼo ʼuhiga mo “te taʼiake” ʼaia: “ ʼE natou hage ko he ʼu fanau ʼe heheka ʼi te ʼu fakatauʼaga koloa pea mo natou kalaga fenei ki te tahi ʼu fanau: ‘Neʼe matou puhi fagufagu maʼa koutou kaʼe neʼe mole kotou memeʼe, neʼe matou tagilaulau kaʼe neʼe mole kotou tuki fatafata ʼi te lotomamahi.’ ”—Mateo 11:16, 17.

Kotea tona fakaʼuhiga? Neʼe fakamahino fenei e Sesu: “Neʼe haʼu ia Soane, neʼe mole kai pea neʼe mole inu, kaʼe neʼe ui fenei e te hahaʼi: ‘ ʼE nofo mo he temonio.’ Pea neʼe haʼu te Foha ʼo te tagata ʼo kai pea mo inu, kaʼe neʼe ui fenei e te hahaʼi: ‘Ko te tagata ʼaeni ʼe kai pea mo inu fakavale, pea ʼe kaumeʼa mo te kau tanaki tukuhau mo te kau agahala.’ ” (Mateo 11:18, 19) Ko Soane neʼe maʼuli fakafeʼauga, ohage ko he Nasilea, pea neʼe mole inu vino, kaʼe neʼe ui e te taʼiake ʼaia neʼe ulu sino ia ia he temonio. (Numelo 6:2, 3; Luka 1:15) Pea ko Sesu, neʼe maʼuli pe ia ohage ko te hahaʼi fuli. Neʼe inu pea kai fakapotopoto, kaʼe neʼe ui e te hahaʼi, neʼe inu pea kai fakavale ia. Neʼe mole pauga he meʼa ki te hahaʼi.

Neʼe fakatatau e Sesu te taʼiake ʼaia ki he ʼu fanau neʼe heheka ʼi te ʼu fakatauʼaga koloa. Neʼe mole natou memeʼe ʼi te puhi fagufagu ʼa ʼihi age fanau, pea neʼe mole natou lotomamahi ʼi te tagilaulau ʼa ʼihi age fanau. Neʼe ina ui fenei: “Kaʼe ʼe ha te poto ʼi ʼana gaue.” (Mateo 11:16, 19) ʼEi, ko te ʼu “gaue,” ʼae ʼe fakaʼuhiga ki te ʼu gaue neʼe fai e Soane pea mo Sesu, neʼe natou fakamoʼoni ia te hala ʼo te ʼu tukugakovi ʼae neʼe fai kia naua.

ʼI te ʼosi fakaha e Sesu te mole fia fakalogo ʼa te taʼiake ʼaia, neʼe ina valokiʼi te ʼu kolo ko Kolasini, mo Petesaita pea mo Kapenaume, ʼae neʼe ina fakahoko ai ʼana gaue lalahi. Neʼe ui e Sesu ka na pau la neʼe ina fakahoko te ʼu gaue ʼaia ʼi te ʼu kolo ʼo Fenisia ko Tile mo Sitoni, ʼe mahino ia neʼe fakahemala te hahaʼi ʼo te ʼu kolo ʼaia. Pea neʼe toe talanoa ʼo ʼuhiga mo Kapenaume, ʼae neʼe tau nofo ai. Maʼia pe la ʼi te kolo ʼaia, neʼe tokosiʼi natou ʼae neʼe natou tali ia ia. Neʼe ui fenei e Sesu ʼo ʼuhiga mo te hahaʼi ʼo te kolo ʼaia: “ ʼI te ʼAho ʼo Te Fakamau, ʼe ʼataʼata age anai ia te fakatuʼā ʼo te fenua ʼo Sotoma ia koutou.”—Mateo 11:24.

Neʼe fakavikiviki leva ia Sesu ki tana Tamai, koteʼuhi neʼe ina fufu te ʼu moʼoni fakalaumalie maʼuhiga ki “te kau popoto pea mo te kau ʼatamai,” kaʼe neʼe ina fakaha kia natou ʼe agavaivai, ʼae ʼe hage ko he ʼu fanau liliki. (Mateo 11:25) Neʼe ina fai kia natou te fakaafe fakafiafia ʼaeni: “Kotou ʼomai kia te au, ia koutou fuli ʼae ʼe kinakina mo mafasia, pea ʼe au fakafimalieʼi anai koutou. Kotou toʼo taku ʼakau ʼamo pea mo kotou ako mai ia te au, koteʼuhi ʼe au agamalū mo agavaivai, pea ʼe kotou maʼu anai he fakafimalie. Koteʼuhi ʼe malū taku ʼakau ʼamo pea ʼe maʼamaʼa taku kavega.”—Mateo 11:28-30.

Neʼe fakafimalieʼi feafeaʼi e Sesu te hahaʼi? Neʼe mafasia te hahaʼi ʼi tanatou popula ki te ʼu talatisio ʼae neʼe fakatuʼu e te kau takitaki lotu, ohage ko te ʼatu meʼa ʼae neʼe tapuʼi ʼi te Sapato. Kaʼe neʼe fakafimalieʼi natou e Sesu ʼi tana akoʼi age kia natou te moʼoni ʼo ʼuhiga mo te ʼAtua, ʼae neʼe mole maʼu ai te ʼu talatisio ʼaia. Pea kia natou ʼae neʼe taʼomia ʼuhi ko te kau takitaki fakapolitike pea mo natou ʼae neʼe lotomamahi ʼaupito ʼuhi ko te agahala, neʼe ina toe fakaha foki pe ʼe feafeaʼi tanatou maʼu ia te fakafimalie. ʼEi, neʼe fakaha e Sesu kia natou pe ʼe lava fakamolemole feafeaʼi ʼanatou agahala pea mo hanatou fakatokatoka mo te ʼAtua.

Ko natou fuli ʼae ʼe natou tali te takitaki ʼofa ʼa Sesu, ʼae ʼe hage ko he ʼakau ʼamo ʼe malū, ʼe feala ke natou foaki tonatou maʼuli ki te ʼAtua pea mo natou tauhi ki tatatou Tamai manavaʼofa ʼae ʼi selo. ʼE mole ko he kavega mamafa tanatou fai te faʼahi ʼaia, koteʼuhi ko te ʼu fakatotonu ʼa te ʼAtua ʼe mole faigataʼa fau.—1 Soane 5:3.