Tanatou Fakatuʼutuʼu Pea Mo Tanatou Gāue ʼi Te Mālamanei Kātoa
ʼE LAHI te ʼu faʼahi ʼe ʼi ai tonatou pikipikiga mo te takitaki ʼo te gāue fai faka mafola ʼaē ʼe fakahoko iā fenua e 230 tupu. ʼE takitaki tāfito ia te gāue e te Kolesi Pule ʼi te ʼu pilo lalahi faka mālamanei ʼaē ʼe tuʼu ʼi Brooklyn, ʼi New York. ʼI te taʼu fuli, ʼe fekauʼi e te Kolesi Pule ia he ʼu tehina fakafofoga ki te ʼu fenua kehekehe ʼi te mālamanei, ke natou felōgoi mo te ʼu tehina ʼi te ʼu filiale ʼo te ʼu fenua ʼaia. ʼI te ʼu filiale, ʼe ʼi ai te ʼu Komitē ʼo te Filiale, ʼe natou toko tolu peʼe toko fitu, moʼo vakavakaʼi ia te gāue ʼaē ʼe fai ʼi te ʼu fenua ʼaē ʼe natou tōkakaga kiai. Ko ʼihi filiale ʼe ʼi ai tonatou ʼu fale tā tohi, pea ʼe maʼu e ʼihi filiale ia te ʼu foʼi masini tā tohi vave. Ko te fenua ʼaē ʼe fakalogo ki he filiale ʼe vaevae faka tisitilike, pea ko te ʼu tisitilike ʼe vaevae ko he ʼu silikō. ʼE maʼu ʼi te ʼu silikō ia te ʼu kōkelekāsio ʼe teitei 20. Ko te taupau ʼo te tisitilike ʼe ina ʼaʼahi ia te ʼu silikō takitahi ʼo tana tisitilike. Ko te ʼu fakatahi e lua ʼe fai ʼi te taʼu fuli maʼa te ʼu silikō fuli. ʼE toe ʼi ai mo te taupau ʼo te silikō, pea ʼe ina ʼaʼahi te ʼu kōkelekāsio takitahi ʼo tana silikō ʼo tuʼa lua ʼi te taʼu, ʼo tokoni ki te kau Fakamoʼoni ki te fakatuʼutuʼu pea mo te fakahoko ʼo te gāue fai faka mafola ʼi te telituale ʼo te kōkelekāsio.
Ko te kōkelekāsio pea mo tona Fale ʼo Te Puleʼaga ʼe ko te potu tāfito ʼaia ʼaē ʼe fakahā ai te logo lelei ʼi tokotou kolo. Ko te ʼu telituale ʼa te ʼu kōkelekāsio takitokotahi ʼe vaevae ʼi he ʼu kiʼi telituale liliki. ʼE foaki ia te ʼu kiʼi telituale ʼaia ki te kau Fakamoʼoni takitokotahi, pea mo natou faiga ke natou ʼaʼahi pea mo fai palalau mo te hahaʼi ʼi tonatou ʼu ʼapi. ʼI te ʼu kōkelekāsio fuli, ʼaē ʼe maʼu ai ia teitei kau Fakamoʼoni e toko 200, ʼe fakanofo ai ia he ʼu tagata ʼāfea ke natou fakahoko ia te ʼu gāue kehekehe. Ko te ʼu kaugā fai faka mafola ʼo te logo lelei ʼe natou maʼuhiga ʼi te kautahi ʼa te kau Fakamoʼoni ʼa Sehova. Ko te kau Fakamoʼoni fuli, peʼe natou gāue ʼi te ʼu pilo lalahi faka mālamanei, peʼe ʼi te ʼu filiale, peʼe ʼi te ʼu kōkelekāsio, ʼe natou ʼolo fuli ʼo palalau ki te hahaʼi ʼo ʼuhiga mo te Puleʼaga ʼo te ʼAtua.
Ki muli age, ko te ʼu tānaki gāue ʼo te fai faka mafola ʼe momoli ki te ʼu pilo lalahi faka mālamanei, ʼaē ʼe fakatahiʼi ai te ʼu gāue pea mo tā ai ia te Annuaire. Pea ʼi te taʼu fuli, ʼe tā ʼi Te Tule Leʼo ʼo te ʼaho 1 ʼo Sānualio ia te tānaki ʼo te gāue. Ko te tohi pea mo te nusipepa ʼaia ʼe nā fakahā fakalelei ai ia te gāue ʼaē neʼe fai ʼi te taʼu fuli, te faka mafola ʼo ʼuhiga mo Sehova pea mo tona Puleʼaga ʼaē ʼe takitaki e Kilisito Sesu. ʼI te ʼu taʼu pē ʼaenī kua hili atu, ko te toko 16 000 000 tupu kau Fakamoʼoni pea mo nātou ʼe fia logo ki te Tohi-Tapu, neʼe natou kau ki te Fakamanatu ʼo te mate ʼa Sesu, ʼaē ʼe fai ʼi te taʼu fuli. ʼI te taʼu fuli, ʼe fakaʼaogaʼi e te kau Fakamoʼoni ʼa Sehova ia hola e 1 000 000 000 tupu moʼo tala ia te logo lelei, pea ko te toko 300 000 tupu hahaʼi foʼou ʼe papitemaʼi. Ko te lahi ʼo te ʼu tohi ʼaē ʼe tufa ʼe ko tohi e lauʼi teau miliona.