Ko Te Maʼuli ʼo Te Kau Faka Mafola ʼo Te Puleʼaga
ʼE Nātou Fakamū Tonatou Mālama ʼi Initia
KO TE logo lelei ʼo te Puleʼaga ʼe fagonogono ʼi Initia e te kau Fakamoʼoni fiafia e toko 11 524 (Mateo 24:14). Ko te toko 1 066 neʼe papitema lolotoga te taʼu gāue 1991 neʼe ko te kau faka mafola ʼo te Puleʼaga, neʼe nātou fakamū te mālama ki ʼihi. Ko he meʼa fakafiafia ko te sio ki te toko 28 866 hahaʼi neʼe kau ki te ʼaho ʼo te Fakamanatu ʼo te mate ʼo Kilisito!
◻ Tokolahi neʼe nātou ʼuluaki logo ki te ʼamanaki ʼo te Puleʼaga ʼi te fagonogono faiga mālie. Ohage la ko te meʼa ʼaenī, ko te Fakamoʼoni neʼe palalau ki te Puleʼaga ki tona ʼu kaugā gāue, neʼe toe gāue tufuga ʼakau mo nātou. Neʼe ʼi ai te tahi ia nātou neʼe ina tali pea neʼe ina kamata fakamū te mālama ki tana famili pea mo tona ʼu kaumeʼa. Ko nātou ʼaia kua fiafia pea kua nātou fakahoko atu te logo taulekaleka ʼo te Puleʼaga ki ʼihi. Ki te ʼu fakamatala, ia kiʼi taʼu siʼisiʼi ʼaia, neʼe ‘laka ʼi te toko 30 hahaʼi kua nātou tali te moʼoni’. Ko Sehova neʼe ina tapuakiʼi ia ia pea mo tona ʼu tēhina fakalaumālie ʼi tanatou fakamū te mālama.
◻ ʼI te tahi kokelekasio, ko te tēhina ʼe kei ʼeva neʼe ina fakamū te mālama ʼi tana fagonogono faiga mālie ki tona ʼu kaugā ako ʼi te faleako. Ko ʼihi ia nātou neʼe nātou leleiʼia te ʼamanaki ʼo te Puleʼaga, pea neʼe ina tau fakamahino age kia nātou te Tohi-Tapu ʼo laka ʼi te māʼupō. Neʼe ʼi ia te tahi ia nātou, ko te katolika, neʼe ina fakahā tana tali te moʼoni logope te fakahā age e te pelepitelo te ʼu ikuʼaga kovi ka ina maʼu anai ʼi tana haga fakatahi mo te Fakamoʼoni ʼaia. Ko te tama ako kua tui papau ia ki te moʼoni ʼo te Tohi-Tapu ʼaē ʼe akoʼi age e te kau Fakamoʼoni, pea neʼe hoko tana ako. Ki muli age, ko te tama ʼaia neʼe papitema pea kua gāue nei ko he tagata faifekau faka minisitelio ʼi te kokelekasio. Kua fiafia ʼi te ʼamanaki ʼaē ʼe haʼu mai te mālama taulekaleka ʼo te moʼoni!—Loma 12:12.
◻ ʼI te kau fakalogo ki te Fakamoʼoni ʼaia neʼe kau ai te tama ako ʼiloa, ʼe mole tui ki te ʼAtua, ʼe na tau vāʼi nātou ʼaē ʼe nātou ʼui ʼe nātou tui ki te ʼAtua. Kae hoko te tahi ʼaho, neʼe haʼu ʼo kau ʼi te fai palalau pea neʼe lahi tana ʼu fehuʼi neʼe ina fai. Neʼe puna’maʼuli ki te lelei ʼo te tali ki tana ʼu fehuʼi pea neʼe ina ʼui ai ko te Tohi-Tapu ko te Folafola ʼa te ʼAtua. Neʼe tuputupu ʼi tana ako te Tohi-Tapu pea kua papitema nei. Ko tana tāmai ʼaē ʼe lotu Inituisi neʼe kovi tana fakafeagai ʼo aʼu ai mo tana kapu te tama ʼi tona ʼapi. Ko te faiga ʼa te tama ʼaia ki te moʼoni neʼe fakatokagaʼi e tona ʼu tēhina e lua ʼo feiā mo tona ʼu kaumeʼa e lua. Neʼe nātou tali te moʼoni pea kua nātou papitema. ʼI tona ʼu tēhina, ʼe gāue nei te tahi ʼi te filiale ʼo Initia.
◻ Neʼe ʼi ai te tama ako, ʼe kau ʼi te kau fai fakatuʼutuʼu, neʼe haʼu mo ia ʼo kau ʼi te ʼu fai palalau mo te Fakamoʼoni ʼaia. Neʼe fakalialia tana suluka feiā mo tana ʼinu kava. ʼI te tahi temi, neʼe ina fia ta tona ʼu kaugā ako e lua neʼe ako mo te Fakamoʼoni ʼaia. ʼUhi ko tanatou tali te moʼoni, neʼe nātou fakafisi ki te kau ki te lakeleve neʼe fai ʼi te faleako pea neʼe mole nātou fia foaki tonatou toto lolotoga te fakatuʼutuʼu ko te tae ʼo te toto ʼaē neʼe fakaʼaluʼalu e te tama ako ʼaia. Ko te tama ʼeva ʼaia kua fiafia nei he kua liliu ko he “kavelogo ʼo te mālama” pea ko he Fakamoʼoni ʼa Sehova.
◻ Fakatahiʼi ʼaia, ko te tama ako ʼaē neʼe ina ʼuluaki fakamū te mālama neʼe liliu ko he meʼa gāue ʼi tana tokoni ki te toko 15 ʼi tona ʼu kaumeʼa ke nātou foaki tonatou maʼuli pea hoko atu ai mo tanatou papitema ʼuhi pe ko tana fagonogono faiga mālie.
Ko he meʼa fakafiafia ko te sio ʼe ʼi ai te tokolahi ʼi te toe fenua ʼaia ʼe nātou tali te ʼamanaki faka tohi-tapu ʼo te mālama foʼou ʼa te ʼAtua pea mo fakatahi ki te kautahi fakatautehina pea mo faka malamanei ʼaē ʼe haga ia Sehova ʼo fakatahiʼi ke nātou maʼuli ʼo talu ai i tona Puleʼaga.