Te ʼu Fehuʼi ʼa Te Kau Lautohi

Ka mahaki he kilisitiano peʼe folau, ʼo mole feala ai leva hana kau ki te ʼaho ʼo te Fakamanatu, ʼe tonu koa ke ina fakamanatu te ʼaho ʼaia kae kua hili ki ai he māhina?

ʼI te Iselaele ʼāfea, neʼe fai te Pāsikate ʼi te taʼu fuli ʼi te ʼaho 14 ʼo te ʼuluaki māhina, ʼaē ʼe fakahigoaʼi ko te māhina ʼo Nisani (peʼe Abib). Kae ʼe tou maʼu te puani makehe ia Faka au 9:10,11 ʼe ʼui ai: “Palalau ki te ʼu foha ʼo Iselaele, ʼo ke ʼui age: ‘Māʼia peʼe ko he tagata ia koutou peʼe ʼi tokotou taʼiake ʼe heʼemaʼa ʼuhi ko he nefesi peʼe ʼi he folau mamaʼo, ʼe tonu anai mo ia ke ina teuteuʼi te sakilifisio ʼo te pāsikate maʼa Sehova. Ko te lua māhina [ʼaē ʼe fakahigoaʼi Iyyar peʼe Ziv], ʼi te hogofulu-ma-fā ʼaho, ʼi te vaha ʼo te ʼu afiafi e lua, ʼaē ʼe tonu ai anai ke nātou teuteuʼi. ʼE tonu anai ke nātou kai ʼaki te ʼu keke ʼe mole hona meʼa fakatupu pea mo te ʼu lau ʼakau — kona.’ ”

Koutou fakatokagaʼi ʼe mole tuʼu mai he ʼu ʼaho e lua ʼo ʼuhiga mo te Pāsikate (ʼaho 14 ʼo Nisani peʼe ko te ʼaho 14 ʼo Ziv), pea ʼe ʼāteaina pe ki te Iselaelite peʼe ki he loto fale hana fili tona ʼaho. Ko te fakatuʼutuʼu ʼaē ʼo te taumafa ʼo te Pāsikate ʼi te lua māhina neʼe ko he meʼa neʼe faka tuʼakoi. Neʼe ko he meʼa neʼe tahitahiga, ohage pe la ko he Iselaelite ʼe heʼemaʼa ʼi te ʼaho 14 ʼo Nisani peʼe nofo ia ʼi he koga meʼa mamaʼo ʼi tona faiʼaga māhani.

Ko te fakamatala pe e tahi ʼo ʼuhiga mo he faiʼaga feiā neʼe hoko ʼi te temi ʼaē neʼe haga ai te Hau agatonu ko Esekiasi ʼo toe fakatuʼu ai te ʼaho ʼo te ʼu Keke ʼe mole hona meʼa fakatupu. Neʼe mole maʼu he temi moʼo teuteuʼi ʼi te ʼuluaki māhina (ko te kau pelepitelo neʼe mole heʼeki nātou teuteu ki te toʼotoʼoga ʼaia pea ko te hahaʼi neʼe mole heʼeki fakamāʼopoʼopo), koia neʼe hoko te fakamanatu ʼaia ʼi te ʼaho 14 ʼo te lua māhina. — 2 Fakamatala 29:17; 30:1-5.

Gata pe mokā ko he ʼu lakaga makehe, ko te kau Sutea neʼe nātou taupau maʼu te Pāsikate ʼi te ʼaho ʼaē neʼe hinoʼi e te ʼAtua (Ekesote 12:17-20, 41, 42; Levitike 23:5). Ko Sesu mo tana kau tisipulo neʼe nātou fai te fakamanatu ʼo nātou mulimuli ki te Lao, kae neʼe mole nātou hoʼi fai noa pe. ʼE fakamatala e Luka: “Pea hoko mai te ʼaho ʼo te ʼu Keke ʼe mole hona meʼa fakatupu, ʼaē neʼe tonu ai ke sakilifisioʼi te vikitima ʼo te pāsikate; pea [ko Sesu] neʼe ina fekauʼi ia Petelo pea mo Soane, ʼo ina ʼui age: ‘Koulua ʼolo ʼo teuteuʼi te Pāsikate maʼa tatou, ke tou taumafa fakatahi.’ ” — Luka 22:7, 8.

Ko te lakaga ʼaia neʼe fakatuʼu ai e Sesu te fakamanatu ʼaē ʼe fai ʼi te taʼu fuli pe, ʼaē ʼe ʼiloʼi e te kau kilisitiano ko te Taumafa ʼo te ʼAliki ʼi te afiafi. Ko te kau ʼa te kau kilisitiano ki te Taumafa ʼo te ʼAliki ʼi te afiafi ʼe ko he meʼa maʼuhiga ia. Ki te kau Fakamoʼoni ʼa Sehova, ko te ʼaho maʼuhiga ʼaupito ʼaia ʼi te taʼu. ʼE fakahā e Sesu te tupuʼaga ʼo te maʼuhiga ʼo te meʼa ʼaia, ʼi tana ʼui ʼaē: “Koutou haga fai te meʼa ʼaenī moʼo fakamanatu kia te ʼau.” (Luka 22:19). Koia, ʼe tonu ai ki te Fakamoʼoni ʼa Sehova ke ina fakatuʼutuʼu ʼi te ʼu māhina ʼi muʼa atu ke ina taupau te ʼaho ʼo te fakamanatu ke ʼāteaina mai tana tahi atu ʼu fakatuʼutuʼu. ʼE fakamanatu anai te ʼaho ʼo te Taumafa ʼo te ʼAliki ʼi te afiafi ʼo te ʼaho 6 ʼo ʼapelili 1993, ʼi te kua ʼosi to ʼo te laʼā.

ʼE tahitahiga pe te ʼu ʼaluʼaga fakapuna’maʼuli, ohage la ko te mahaki peʼe ko he faigataʼaʼia ʼo te folau, ʼo mole feala ai leva ki he kilisitiano ke kau ki te fakamanatu ohage pe la ko te meʼa neʼe kua ina fakatuʼutuʼu. Koteā leva te meʼa ʼe feala ke fai ʼi te taʼi ʼaluʼaga ʼaia?

Lolotoga ʼo te toʼotoʼoga, ko te pane ʼe mole hona meʼa fakatupu pea mo te vino kula ʼe feʼaveʼaki, pea ko nātou ʼaē neʼe fakanofo e te laumālie maʼoniʼoni pea mo fili ki te maʼuli ʼi selo ʼe nātou kakai pea mo ʼiʼinu ki te ʼu meʼa ʼaia (Mateo 26:26-29; Luka 22:28-30). Kapau ko he tahi neʼe kau ki te kai ʼo te pane pea mo ʼinu ki te vino ʼi te taʼu fuli pe, ʼe takoto mahaki ʼi tona ʼapi peʼe ʼi te lopitali, ʼe fai anai e te ʼu tagata ʼāfea ʼo te kokelekasio ʼo te koga meʼa ʼaia he fakatuʼutuʼu ke ʼalu he tahi ʼo ʼave te pane pea mo te vino kia ia ʼaē ʼe mahaki, pea mo palalau ki te ʼu kogaʼi tohi faka tohi-tapu ʼe talanoa ki te faʼahi ʼaia, pea mo foaki age kia ia te pane mo te vino. Ka nofo he kilisitiano fakanofo ʼi tuʼa atu ʼi tana kokelekasio, ʼe tonu ke ina faigaʼi ke kau ki te fono ʼo te kokelekasio ʼo te koga meʼa ʼi te ʼaho ʼaia.

ʼO mulimuli ki te ʼu meʼa ʼaia, ʼe gata pe anai ki he ʼu ʼaluʼaga makehe ʼaē hoki tonu ai ki he kilisitiano fakanofo ke ina fakamanatu te Taumafa ʼo te ʼAliki ʼi te afiafi kua hili ki ai te māhina, ʼo mulimuli ki te meʼa ʼaē ia Faka au 9:10, 11 pea mo te fakamatala ʼaē ia 2 Fakamatala 30:1-3, 15.

Ko nātou ʼaē ʼe kau ki te “tahi ʼu ōvi” ʼa Sesu, ʼaki te ʼamanaki ʼo te maʼuli heʼegata ʼi te palatiso fakakelekele, ʼe mole nātou kai nātou ki te pane pea mo ʼinu ki te vino (Soane 10:16). ʼE maʼuhiga tanatou kau ki te toʼotoʼoga ʼaia ʼi te taʼu fuli, kae ʼe mole nātou kai te pane pea mo ʼinu ki te vino. Koia, ka mahaki he tahi ia nātou ʼaia peʼe folau ʼo tupu ai hana mole kau ki te fono ʼo te ʼaho ʼaia, ko te tagata peʼe ko te fafine ʼaia ʼe feala pe hana lau tokotahi pe te kogaʼi tohi ʼo te ʼaho ʼaia (feiā mo te fakamatala ʼo te fakatuʼu e Sesu ʼo te ʼaho ʼaia) pea mo faikole ki te tapuakina ʼa Sehova ʼo ʼuhiga mo te toʼotoʼoga ʼaia ʼe fai ʼi te malamanei katoa. Kae ʼi te faʼahi leva ʼaia, ʼe mole ʼaoga ke fai he fakatuʼutuʼu makehe ki he fono peʼe fai leva he fai palalau makehe kua hili he māhina ki te ʼaho totonu.