He Koʼe Koa ʼe Tonu Ke Tou Tokakaga Ki Te Lotu?

ʼI TE ʼu fenua fuli ʼo te malamanei, ʼe nātou tokakaga ki te lotu. Pea ʼi te tahi ia faʼahi, ʼe toe tokolahi pe foki mo nātou ʼaē ʼe nātou fakahā fakahagatonu tanatou mole tokakaga ki te lotu. Kae ʼi te agamāhani neʼe feiā pe koa tanatou manatu?

ʼE mole fīmālie pe te natula ʼo te tagata ʼi te ʼu meʼa fakamālama. ʼE ʼaoga kia ia he ʼu meʼa fakalaumālie. Ko te maʼuli ʼaē ʼe faʼufaʼu ʼi te ʼaho fuli ʼaki pe te ʼu meʼa ʼaē ʼe ʼaoga ki te maʼuli fakasino, ʼo toe feiā ki te ʼu temi mālōlō ʼaē tautau hoko, ʼe mole nātou fakafimālieʼi te ʼu meʼa ʼaē ʼe ʼaoga tāfito ki te tagata. Ko te tagata ʼe kehekehe ia mo te manu, heʼe fia mahino ia, ‘Pe koteā te ʼuhiga ʼo te maʼuli?’ ‘Te nounou ʼo te maʼuli ʼaia, ʼaē ko he meʼa ʼe matalelei ʼaupito kae ʼe toe fakaloto mamahi pe foki, ʼe ko te gataʼaga pe koa ʼaia ʼo te maʼuli?’ Neʼe mole heʼeki koutou fai koa la he ʼu fehuʼi feiā?

Kae, ko te toko miliona hahaʼi ʼe kei maʼuʼuli pe ia ʼaho nei, neʼe nātou maʼuʼuli ʼi te ʼu ʼaluʼaga ʼe mole fakatupu kia nātou ia te tokaga ʼaē ki te lotu. Ko te faʼahi ʼaia neʼe feala pe ke tupu mai tanatou ʼu mātuʼa, mai tanatou ʼu faiako, mai tanatou ʼu kaumeʼa, peʼe mai te puleʼaga.

Neʼe fakamatala e Skalabrino, ko te talavou mai Alepania, ʼi te temi ʼaē neʼe kei pule ai te faʼahi Komunisi, neʼe akoʼi ki te hahaʼi ʼe mole ʼi ai he ʼAtua. Koia ʼaē, neʼe ko he meʼa fakatupu tuʼutāmaki kia nātou hanatou palalau ʼo ʼuhiga mo te lotu; ko he faʼahi neʼe feala aipe ke pilisoniʼi ai nātou. Kae ʼi te taʼu 1991, ʼi tana nofo nono ʼaē ʼi Suisi, neʼe ina maʼu te fealagia ke ina ako te Tohi-Tapu. ʼO ina tali. Koteā tona tupuʼaga?

ʼI tana nofo ʼi Alepania neʼe logo ia ʼe ʼi ai te tohi ko te Tohi-Tapu, kae neʼe mole ina ʼiloʼi pe la he meʼa ʼo ʼuhiga mo te tohi ʼaia. Pea neʼe mole ina ako te Tohi-Tapu ʼuhi he neʼe fia mahino ki te tohi ʼaia. Kae neʼe ina ʼui pe ʼi tona loto, ʼe akoʼi age anai kia ia te fakatuʼutuʼu ʼa te ʼAtua ʼo ʼuhiga mo te tagata pea mo te kele, pea neʼe hage kia ia ko he fealagia pe ʼaia ke ʼāsili age te lelei ʼo tana palalau ʼi te lea ʼo te fenua. Kae neʼe vave pe tana mahino, ko te meʼa ʼaē neʼe ina lolotoga ako ʼe fakafimālie ki te meʼa fakalaumālie loloto ʼi tona loto. Neʼe fiafia ʼi tana ʼiloʼi ʼaē ko te fakapapau ʼa te ʼAtua ʼo ʼuhiga mo he mālama foʼou ʼe maʼu ai anai te tokalelei, ko he mālama ʼe feala ai leva ki te hahaʼi ke nātou maʼuʼuli heʼegata pea mo fakafiafia ʼi te mahu ʼo te ʼu meʼa fuli ʼaē ʼe ʼaoga ki te maʼuli. Neʼe ʼāsili age ʼosi tana fia mahino ʼi tana ʼiloʼi ʼaē ko ia pea mo tona famili ʼe feala ke nātou kau ki te mālama foʼou ʼaia. ʼI tana mole kei matāʼofi te logo lelei maʼa ia pe tokotahi, neʼe telefoni ki tona famili ʼi Alepania ʼo fakahā te logo lelei ʼaia kia nātou.

Ko Aleksei ʼe nofo ʼi Lusia, neʼe toe punamaʼuli ki te fua lelei ʼe feala ke maʼu e he tahi ʼaki te ʼatamai mālama ʼaē haʼu mai te Tohi-Tapu. ʼI te lahi fau ʼo tona ʼu fihifihia pea ʼi tana mole maʼu ʼaē he ʼuhiga ʼo te maʼuli, neʼe fia fakamate ia. Kae ʼi muʼa neʼe ʼalu ʼo fakasiosio ki tona kaumeʼa ʼi Finilani. ʼI tana ʼalu ʼaia ʼi te saliote afi, neʼe palalau ki te ʼu hahaʼi neʼe kaugā folau mo ia ʼo ʼuhiga mo tana ʼu faigataʼaʼia. ʼI te ʼu hahaʼi ʼaia neʼe ʼi ai te Fakamoʼoni ʼa Sehova, neʼe ina uga ia ia ke ina ako te Tohi-Tapu heʼe ko te tohi pe ʼaia ʼe ina foaki te ʼu puleʼaki ki te ʼu taʼi faʼahiga faigataʼaʼia ʼaia. Neʼe lotolotolua ia. ʼI tana liliu mai Finilani, neʼe toe hoko pe te meʼa feiā. ʼI te temi leva ʼaia neʼe ko te tahi age Fakamoʼoni ʼaē neʼe palalau mo ia, ʼo ina fakahā age, mo ia totonu pe la neʼe tau mo te ʼu faigataʼaʼia feiā kae ko te Tohi-Tapu neʼe tokoni kia te ia ke ina fakatokatoka tona ʼu faigataʼaʼia. Ko te tuagaʼane ʼaia neʼe ina toe fakaloto mālohiʼi ia ia ke ina ako te Tohi-Tapu. ʼI tana aʼu ki tona ʼapi, neʼe tagi te telefoni. Ko tona tahi age kaumeʼa fafine, ʼaē neʼe lolotoga ako mo te kau Fakamoʼoni pea neʼe fiafia ʼaupito tona kaumeʼa. ʼO kamata mahino ai leva ki te tagata ʼaia, ʼe mahalo pe ko te Tohi-Tapu ʼe feala ke ina foaki moʼoni age te meʼa ʼaē neʼe ʼaoga kia te ia, kae neʼe ina toe ʼiloʼi pe foki ka mole tokoni he tahi kia te ia ʼe mole feala anai hana mahino ki te Tohi-Tapu. Neʼe ina tali ke fai hana ako Tohi-Tapu mo te kau Fakamoʼoni ʼa Sehova, pea neʼe kamata tatuʼu ki tanatou ʼu fono. ʼO mahino ai leva kia te ia, te tupuʼaga ʼaē ʼo te fiafia ʼaupito ʼo nātou ʼaē ʼe nātou faʼufaʼu tonatou maʼuli ki te Tohi-Tapu, logope la tanatou felāveʼi ʼaē mo te ʼu faigataʼaʼia ʼe tau mo te hahaʼi fuli pe.

ʼAki he fakasiosio loloto ʼo ʼuhiga mo te natula ʼo te tagata, neʼe ʼui fēnei e Sesu Kilisito: “Ko te tagata ʼe mole tonu ke maʼuli ʼaki pe te pane.” (Mateo 4:4, The New English Bible) Neʼe ina toe ʼui fēnei: “Manuʼia ia nātou ʼaē ʼe nātou ʼiloʼi te maʼuhiga ʼo te ʼu meʼa fakalaumālie kia nātou.” (Mateo 5:3) ʼE nātou fiafia koteʼuhi ʼe nātou ʼiloʼi te maʼuhiga ʼaē ʼo te ʼu meʼa ʼe ʼaoga kia nātou, pea ʼe nātou fai te ʼu fakatuʼutuʼu ki te faʼahi ʼaia, ʼo nātou maʼu ai te tapuakina ʼa te ʼAtua. Kae ko ʼatatou ʼu meʼa fakalaumālie ʼe mole maʼu pe ʼaki te fakatahitahi ki he ʼēkelesia peʼe ki he ʼu fono faka lotu. Ko te lotu ʼe lahi ai te ʼu toʼotoʼoga ʼe feala pe ke fakalave loto, kae ʼe ina foaki koa he ʼu puleʼaki ʼe ʼaoga ki te ʼu faigataʼaʼia ʼo te maʼuli? Māʼiape la mo kapau ʼe lagolago e he lotu ni ʼu faʼahiga pelesepeto ʼe ʼaoga, kapau ʼe mole ina faʼa fakamahino fakalelei te ʼuhiga ʼo te maʼuli, ʼe feafeaʼi anai hana fakafimālieʼi te ʼu meʼa fakalaumālie ʼaē ʼe ʼaoga kia koutou? Tahi ʼaē meʼa, ko te tauhi ki te taʼi lotu ʼaia ʼe ina taki anai koa ki he ʼu felogoi lelei mo te ʼAtua? Kapau ʼe mole maʼu he felogoi lelei mo te ʼAtua, ko te fīmālie moʼoni ʼe mole maʼu anai ia.

ʼO ʼuhiga mo te faʼahi ʼaia, tokolahi ʼe nātou lolotoga kumi he meʼa ʼe mole heʼeki nātou maʼu pe la.

[Paki ʼo te pasina 3]

Ko te ʼu meʼa fakalaumālie ʼaē ʼe ʼaoga kia koutou ʼe fakafimālieʼi anai koa ʼi takotou fakatahi ʼaē ki he ʼēkelesia?

[Paki ʼo te pasina 4]

Tokolahi ʼaki tanatou mālama ʼaē ki te Tohi-Tapu, neʼe nātou ʼui kua ʼi ai te ʼuhiga foʼou ʼo tonatou maʼuli