“ ʼE ʼAu Maʼuhiga Kia Mata ʼo Sehova!”

ʼI TE ʼu “temi maʼuhiga ʼaupito mo faigataʼa” ʼaenī, tokolahi te ʼu kaugana agatonu ʼa Sehova ʼe nātou ʼutaki te ʼu manatu ʼaē, ko nātou ʼe mole honatou ʼaoga. (2 Timoteo 3:1) ʼE mole fakapunamaʼuli te faʼahi ʼaia, heʼe ko te tahi ʼaia “puleʼaki fakakākā” ʼa Satana, ke tou ʼui ʼe mole ʼofainaʼi tatou e te hahaʼi, māʼia mo totatou Tupuʼaga ʼe mole ʼofa kia tatou! (Efesi 6:11, vakaʼi te kiʼi nota ʼi te lalo pasina, tā fakapilitānia.) Koia la ʼaē, ʼi Te Tule Leʼo ʼo te ʼaho 1 ʼo ʼApelili 1995, neʼe tā ai te ʼu alatike ako e lua ki te kokelekasio, ko tona ʼu kupu tāfito ʼaenī “ ʼE Koutou Maʼuhiga Kia Mata ʼo Te ʼAtua!” pea ko te tahi “Ke Tou Uga Ia Tatou Ki Te ʼOfa Pea Mo Te ʼu Gāue Matalelei—ʼO Feafeaʼi?” Neʼe tā te ʼu alatike ʼaia moʼo fakamanatuʼi mai kia tatou ʼe tokagaʼi e Sehova tatatou ʼu faiga. Koʼeni te ʼu palalau fakafetaʼi ʼa ʼihi neʼe nātou tohi ki te Sosiete:

“Neʼe heʼeki ʼi ai he alatike kua malave feiā kia ʼau talu taku liliu ko he Fakamoʼoni ʼa Sehova ia taʼu e 27. Neʼe mole feala haku tātāʼofi taku tagi—ko te ʼu alatike ʼaia neʼe fakatupu fīmālie kia ʼau. ʼI te temi nei, ʼe ʼau logoʼi te ʼofa lahi ʼo Sehova kia ʼau. Neʼe hage ko he kavega ʼe toʼo ʼi ʼoku fugaʼuma.”—C. H.

“Neʼe ʼau lau tuʼa fā te nusipepa ʼaia ʼi te ʼaho katoa. Neʼe ʼau leleiʼia te ʼui ʼaē e te alatike, kapau ʼe koutou tui ʼe mole hokotou ʼaoga pea ʼe ko he loi neʼe fai atu kia koutou. ʼE ʼau fakaʼaogaʼi anai te alatike ʼaia ʼi taku gāue tauhi ōvi pea mo taku fai faka mafola.”—M. P.

“Neʼe gāue lelei Satana ʼi tana fakatupu ʼi te loto ʼo te hahaʼi ʼaē ʼe ʼoʼofa kia Sehova, te manatu ʼaē ʼe mole honatou ʼaoga pea ʼe mole ʼofainaʼi nātou. Ko te fakamanatuʼi mai e te kalasi ʼo te ‘kaugana agatonu’ ʼaē ko Sehova ʼe ʼofa ʼaupito kia tatou pea ʼe ina leleiʼia te ʼu kihiʼi meʼa fuli ʼaē ʼe tou fai maʼa ia, ko te meʼa ʼaia neʼe ʼau lau ʼe faka lotomālohi ʼaupito. Lolotoga te ʼu taʼu neʼe ʼau maʼu te ʼu manatu ʼaē ʼe koutou talanoa kiai ʼi te ʼu alatike ʼaia. Neʼe hage kia ʼau ʼe mole tau mo ʼau te ʼofa ʼo Sehova, koia neʼe ʼau faiga ai ke ʼāsili taku gāue kia ia ke ʼau maʼu te ʼofa ʼaia. Kae ko te ʼu meʼa ʼaē neʼe nātou uga ʼau ke ʼau fai he ʼu meʼa, neʼe ko taku tukugakoviʼi ia ʼau totonu pea mo toku ufiufi. Logope te ʼu hola ʼaē neʼe ʼau fai ʼi te minisitelio, peʼe ko te toko fia ʼaē neʼe ʼau tokoni kia nātou, neʼe hage kia ʼau ʼe mole feʼauga. Neʼe ʼau tokagaʼi tāfito pe te mole feʼauga ʼo te ʼu meʼa ʼaē neʼe ʼau fai. ʼI te temi nei, ʼi taku tauhi ʼaē kia Sehova ʼaki toku ʼofa, ʼe ʼau fakakaukauʼi ʼe malimali mai pea ʼe fiafia kia ʼau. ʼO fakatupu ʼaki ai te lahi ʼo toku ʼofa ʼaē kia ia, pea ʼe lahi te ʼu meʼa ʼaē ʼe ʼau fia fai maʼa ia. ʼI te temi nei ʼe ʼau maʼu he fiafia lahi ʼi taku tauhi kia Sehova.”—R. M.

“Ko te ʼu alatike ʼaia ʼe lelei ʼaupito, pea mo fakaloto mālohi, ʼio ko te ʼu alatike ʼe mole ʼi ai honatou fakatatau, ʼe malave ki ʼotatou ʼu loto pea neʼe heʼeki ʼau lau he ʼu alatike feiā! Kua taʼu 55 taku lau ia Te Tule Leʼo, pea neʼe lahi te ʼu Tule Leʼo maʼuhiga. Kae ko Te Tule Leʼo ʼaia ʼe mole hona fakatatau mo te ʼu Tule Leʼo ki muʼa atu, heʼe ina fakasiʼisiʼi tatatou lotolotolua, tatatou tuʼania, pea mo tatatou mataku, ʼi tatatou manatu ʼaē ʼe mole hotatou ‘ ʼaoga’ pea ʼe ‘mole ʼofainaʼi’ tatou, pea mo te manatu ʼaē ʼe mole feala ʼi he temi ke feʼauga te meʼa ʼaē ʼe tou fai moʼo ‘maʼu’ te ʼofa ʼo Sehova. ʼE tuʼu ʼi Te Tule Leʼo ʼaia te taʼi tokoni fakalaumālie ʼaē ʼe ʼaoga ki ʼotatou ʼu tēhina ʼaē ʼe lotovaivai. ʼE ʼau fakatuʼutuʼu ke ʼau fakaʼaoga tuʼumaʼu te ʼu alatike ʼaia mokā ʼe ʼau fai taku gāue tauhi ōvi.”—F. K.

“Kia tatou ʼaē ʼe tou manatu ʼe mole hotatou ʼuhiga, pea mo tou fehiʼa kia tatou totonu, ʼe feala ke mole tou maʼu he mālohi moʼo hoko atu tatatou tauhi ʼi te moʼoni. Ko te alatike ʼaia neʼe ina fakahā he loto manavaʼofa pea mo he lotomahino lahi, neʼe hage ko he faitoʼo ʼe fakamālōlō, he fakafimālie, ʼe lelei ki te loto. ʼI meʼa fakaloto fīmālie he lau ʼo te ʼu taʼi palalau ʼaia ʼi Te Tule Leʼo pea mo mahino lelei kia tatou ko Sehova ʼe mahino ki totatou ʼaluʼaga! ʼE ʼau fakamālo atu ʼi takotou fakamanatuʼi mai ko Sehova ʼe mole faiga ke ina uga tana hahaʼi ʼaki te tukugakoviʼi ʼo nātou, te fakaufiufi, peʼe ko te tuʼania. Logope neʼe siʼisiʼi taku kau ki te gāue fai faka mafola ʼi te ʼu ʼaho ki muli mai ʼaenī, ʼuhi he neʼe ʼau tau mo te ʼu faigataʼaʼia ʼi te faʼahi ʼo te falā pea mo te mahamahaki ʼo toku famili, kae ʼe kei feala aipe haku fakahoko te ʼu gāue ʼi te ʼu gāue ʼaē ʼe feala ke ʼau fai. ʼE ʼau fiafia lahi ʼi te selevisi mokā ʼe ʼau faiga ke ʼau tuku te ʼofa ke liliu ko hoku meʼa fakaloto mālohi.”—D. M.

“Neʼe hoki ʼosi age pe taku lau ia te alatike ‘ ʼE Koutou Maʼuhiga Kia Mata ʼo Sehova!’ Neʼe ʼau tagi ʼi te ʼu palakalafe fuli ʼaē neʼe ʼau lau. Neʼe ʼau maʼuli ʼi te famili neʼe mole lahi ai te fakahā ʼo te ʼofa. Neʼe fakatō laloʼi ʼau, neʼe faka galivaleʼi ʼau, pea neʼe vāʼi ʼau. Koia, ʼi taku kei veliveli neʼe ʼau logoʼi toku mole ʼaoga. ʼE kei ʼau maʼu te ʼu manatu ʼe fakatupu tūkia mai toku maʼuli ʼāfea, ʼaē ʼe fakatupu hoha kia ʼau ʼi te temi ʼaē ʼe ʼau tau ai mo he ʼu faigataʼaʼia. ʼI te temi ʼaē neʼe mole kei ʼau tagata ʼāfea ai ʼi te kokelekasio, neʼe ʼau logoʼi ʼi toku loto ʼe mole hoku ʼaoga, ohage ko te meʼa ʼaē neʼe ʼau logo māhani kiai ʼi toku loto, neʼe ʼau logoʼi ʼe mole hoku ʼaoga—ki te ʼAtua, ki toku famili, pea ki toku ʼu tēhina ʼi te kokelekasio. Ko te ʼu manatu ʼaia ʼe mole feala ke puli ʼosi atu aipe, kae ko te alatike ʼaia ʼaē neʼe tau tonu mai, neʼe tokoni kia ʼau ke ʼau toe maʼu he fakafuafua fakapotopoto. Neʼe ina toe fakainaina taku fakakaukau.”—D. L.

“ ʼE ʼau fakamālo atu ʼo ʼuhiga mo te alatike ‘ ʼE Koutou Maʼuhiga Kia Mata ʼo Te ʼAtua!’ ʼE ʼau tauʼi toku loto fehiʼa lahi kia ʼau pea mo te manatu lahi ʼaē ʼe mole hoku ʼaoga, te manatu neʼe ʼau taupau talu mai taku kei veliveli, ʼuhi he neʼe gaohi koviʼi ʼau. ʼE ko he meʼa ʼe lelei tatatou faka ʼuhiga te manatu hala ʼaia ohage ko he puleʼaki fakakākā ʼa Satana. Ko te manatu ʼaia ʼe feala ke ina uga he tahi ke fakamate. ʼE tonu ke ʼau tauʼi ʼi te ʼaho fuli te loi ʼaē ʼe mole ʼofainaʼi ʼau. ʼE mole feala ke koutou mahino ki te maʼuhiga ʼo te alatike ʼaia kia ʼau.”—C. F.

“Ia ʼaho nei, ʼe lave gafua ki te ʼu tēhina te manatu ʼaē ʼe leleiʼia e Sehova te ʼu meʼa ʼaē ʼe nātou fai ʼaki te ʼofa, kae mole ʼaki he fakamālohiʼi. Ko te mahino ʼaē ki te agalelei ʼa Sehova pea mo tona ʼuhiga ʼofa, tana tokaga ki tana hahaʼi takitokotahi, pea mo te ʼofa ʼaē ʼe ina folahi kia nātou, ʼe ko he meʼa fakatupu fīmālie pea mo fakaloto mālohi. ʼO ʼuhiga mo te faʼahi ʼaia, ʼi te temi pe ʼaē neʼe mātou maʼu ai te alatike ʼaenī ‘ ʼE Koutou Maʼuhiga Kia Mata ʼo Te ʼAtua!’ tokolahi neʼe nātou fakahā tanatou leleiʼia ia te alatike ʼaia. ʼE hage ko he faka fealagia ki te tokolahi ke nātou fakaʼāʼāsili tanatou ʼu felogoi takitokotahi mo Sehova. ʼE ma fakahā atu, toku ʼohoana pea mo ʼau, tomā loto fakafetaʼi ki te alatike ʼaia pea mo te lototokaga ʼaē neʼe hā ʼi te ʼu nusipepa fakamuli ʼo Te Tule Leʼo. ʼE ma faiga ke ma maʼuliʼi te ʼu manatu ʼaia ʼi tamā ʼaʼahi te ʼu kokelekasio.”—Te tohi mai te tagata taupau feʼaluʼaki.

“Kua teitei taʼu 30 taku lau tuʼumaʼu te ʼu nusipepa, kae neʼe mole heʼeki he meʼa feiā neʼe ʼau lau ʼe ina uga pea mo fakaloto mālohiʼi ʼau. Ko te mālohi pea mo te poto ʼaē ʼi te maʼuliʼi ʼo te Tohi-Tapu, neʼe tokoni mai kia ʼau ke ʼau pulihi te ʼu loi ʼaē neʼe ʼau taupau, ke feala ke ʼau maʼu he ʼu felogoi lelei mo Sehova. Lolotoga ni ʼu taʼu neʼe ʼau tauhi kia Sehova ʼaki taku tukugakoviʼi pe ia ʼau totonu. Neʼe mole loloto taku mahino ki te faitotogi pea mo te ʼofa ʼa te ʼAtua. ʼE ʼau fakamālo atu ki te ʼu taʼi alatike ʼaia ʼaē ʼe fakamahinohino lelei pea mo loloto. ʼE ʼau fakaʼamu ke ʼau lau ʼihi ʼu alatike feiā.”—M. S.

“Ia taʼu e 29 ʼi taku nofo ʼi te moʼoni, neʼe mole heʼeki ʼau maʼu he alatike neʼe ina fakatupu ia ʼau he loto fakafetaʼi pea mo lave loloto kia ʼau. Logope neʼe ʼau lahilahi ake ʼi he famili ʼofa pea mo tokaga lelei, neʼe ʼau manatu neʼe mole tau mo ʼau ke ʼau maʼuli, pea neʼe ʼau manatu ʼe mole tau mo ʼau ke ʼau tauhi kia Sehova. ʼI taku ʼosi lau te alatike ʼaia, neʼe ʼau tuʼutuli, pea neʼe ʼau tagi lahi ʼo ʼau fakamālo ʼaupito kia Sehova. ʼE mole feala anai ʼi he temi ke ʼau galoʼi te alatike ʼaia. ʼE ʼau maʼu anai he manatu kehe ʼo ʼuhiga mo ʼau koteʼuhi, ʼi te temi nei, kua ʼau mahino ʼe ʼau maʼuhiga kia mata ʼo Sehova.”—D. B.