“Ko Te Moʼoni ʼe Ina Faka ʼĀteaina Anai Koutou”

“ ʼE koutou ʼiloʼi anai te moʼoni, pea ko te moʼoni ʼe ina faka ʼāteaina anai koutou.” Ko te ʼu palalau ʼaia neʼe fai e Sesu ʼi tana faiakonaki ki te hahaʼi ʼi te fale lotu ʼi Selusalemi. (Soane 8:​32) Neʼe faigafua ki te kau ʼapositolo ʼa Sesu hanatou ʼiloʼi, ko tana ʼu akonaki neʼe ko te moʼoni. Neʼe lahi te ʼu fakamoʼoni neʼe nātou sio kiai, ko tanatou tagata faiako neʼe haʼu ia mai te ʼAtua.

KAE ia ʼaho nei, ʼe faigataʼa ki ʼihi hanatou ʼiloʼi te moʼoni ʼaē neʼe talanoa kiai ia Sesu. Ohage ko te ʼu ʼaho ʼo te polofeta ko Isaia, ia ʼaho nei ʼe ʼi ai “ia nātou ʼaē ʼe nātou ʼui ko te meʼa ʼaē ʼe lelei ʼe kovi pea ko te meʼa ʼaē ʼe kovi ʼe lelei, mo nātou ʼaē ʼe nātou ʼui ko te fakapōʼuli ʼe ko te mālama pea ko te mālama ʼe ko te fakapōʼuli, pea mo nātou ʼaē ʼe nātou ʼui ko te meʼa ʼaē ʼe kona ʼe malie pea ko te meʼa ʼaē ʼe malie ʼe kona.” (Isaia 5:​20) ʼI te lahi ʼo te ʼu manatu, mo te ʼu filosofia, pea mo te ʼu faʼahiga maʼuli ʼaē ʼe maʼu ia ʼaho nei, ʼe tokolahi te hahaʼi ʼe nātou ʼui ko meʼa fuli ʼe feala pe ke fetogi, pea ʼe mole feala hakita ʼiloʼi te moʼoni.

ʼI te temi ʼaē neʼe ʼui ai e Sesu ki te hahaʼi ko te moʼoni ʼe ina faka ʼāteaina anai nātou, neʼe nātou tali fēnei age kia te ia: “Ko mātou ko te hōloga ʼo Apalahamo, pea neʼe mole heʼeki mātou kaugana ki he tahi. He koʼe ʼe ke ʼui mai koe, ‘ ʼE koutou liliu anai ʼo ʼāteaina’?” (Soane 8:​33) ʼI tanatou manatu, neʼe mole ʼaoga ke ʼi ai he tahi peʼe ko he meʼa moʼo faka ʼāteaina ʼo nātou. Kae neʼe fakamahino age leva e Sesu kia nātou: “ ʼE moʼoni ʼe ʼau tala atu kia koutou: Ko ʼaē ʼe ina maʼuliʼi te agahala, ʼe kaugana ia ki te agahala.” (Soane 8:​34) ʼAki te moʼoni ʼaē neʼe talanoa kiai ia Sesu, ʼe feala ke tou ʼāteaina mai te agahala. Neʼe ʼui fēnei e Sesu: “Kapau ko te foha ʼe ina faka ʼāteaina koutou, pea ʼe koutou ʼāteaina moʼoni anai.” (Soane 8:​36) Koia, ko te moʼoni ʼaē ʼe ina faka ʼāteaina te hahaʼi ʼe ko te moʼoni ʼo ʼuhiga mo Sesu Kilisito, te ʼAlo ʼo te ʼAtua. ʼE hoki feala hakita faka ʼāteaina mai te agahala pea mo te mate mo kapau ʼe kita faka tui ki te sakilifisio ʼo te maʼuli haohaoa ʼa Sesu.

ʼI te tahi lakaga, neʼe ʼui fēnei e Sesu: “Fakamaʼoniʼoniʼi ia nātou ʼaki te moʼoni, ko tau folafola ʼe moʼoni.” (Soane 17:17) Ko te ʼu folafola ʼa te ʼAtua ʼaē ʼe fakahā ʼi te Tohi-Tapu, ʼe ko te moʼoni ʼaia ʼaē ʼe feala ke ina faka ʼāteaina te hahaʼi mai te mataku faka lotu pea mo te tauhi hala. ʼE tuʼu ʼi te Tohi-Tapu te moʼoni ʼo ʼuhiga mo Sesu Kilisito, ʼaē ʼe ina uga te hahaʼi ke nātou tui kia te ia pea mo ina foaki he ʼamanaki taulekaleka ki te ka haʼu. ʼE ko he meʼa fakaofoofo hakita ʼiloʼi te moʼoni ʼo te Folafola ʼa te ʼAtua!

He koʼe ʼe maʼuhiga ke tou ʼiloʼi te moʼoni? ʼE lahi te ʼu lotu ia ʼaho nei ʼe nātou ʼui ʼe nātou mulimuli ki te Tohi-Tapu, kae ʼe nātou lagolago ki te ʼu filosofia fakatagata pea mo te ʼu talatisio. Ko te meʼa ʼaē ʼe tau hoko, ko te kau takitaki lotu ʼe mole nātou vakaʼi peʼe moʼoni te logo ʼaē ʼe nātou fakahā, kae ʼe nātou tokaga tāfito ke tali e te hahaʼi te logo ʼaia. ʼE manatu e ʼihi, ʼe tali e te ʼAtua te ʼu faʼahiga tauhi fuli pe, kapau ʼe fai fakamalotoloto. Kae neʼe fakamahino fēnei mai e Sesu Kilisito: “Kaʼe hoko mai te hola, pea ʼe ko te temi ʼaenī, ʼaia ka atolasio ai anai te kau atolasio moʼoni ki te Tāmai ʼaki te laumālie pea mo te moʼoni, heʼe ko te Tāmai ʼe ina kumi te taʼi kau atolasio ʼaia.”​—Soane 4:​23.

Kapau ʼe tou fia fai te tauhi ʼaē ʼe leleiʼia e te ʼAtua, pea ʼe tonu ke tou ʼiloʼi ia te moʼoni. ʼE maʼuhiga te faʼahi ʼaia, heʼe fakalogo kiai tatatou fiafia heʼegata. Koia, ʼe tonu ke tou fai fuli te fehuʼi ʼaenī kia tatou takitokotahi: ‘ ʼE leleiʼia koa e te ʼAtua taku faʼahiga tauhi kia te ia? ʼE ʼau fia ʼiloʼi moʼoni koa te moʼoni ʼo te Folafola ʼa te ʼAtua? Peʼe ʼau mataku koa ki te meʼa ʼaē ʼe feala ke ʼau maʼu mo kapau ʼe ʼau sivisivi fakalelei te faʼahi ʼaia?’