Ko Te Kau Fai Faka Mafola ʼo Te Puleʼaga
ʼE ʼOlo Te Kau Fakamoʼoni Ki Te Hahaʼi ʼo Falani
ʼO KAMATA ʼi te uhuuhu ʼo te Feliafā, ʼaho 29 ʼo Sanualio 1999, pea hoko atu ʼi te Moeaki pea mo te ʼAhotapu, ko te kau Fakamoʼoni ʼa Sehova ʼo Falani neʼe nātou tufa fakafiafia ʼi te ʼu ala pea mo te ʼu ʼapi, te ʼu kiʼi pepa lotu e 12 miliona ko tona kupu tāfito ʼaenī, Français, on vous trompe! (Hahaʼi ʼo Falani, ʼe kākāʼi koutou!) He koʼe neʼe nātou fai ia te faʼahi ʼaia?
Ko te fono neʼe fai mo te hahaʼi tā sulunale ʼi Palesi ʼi te Feliaono uhu, neʼe fakahā ai te tupuʼaga ʼo te gāue ʼaia. Ko te tēhina fakafofoga ʼa te kau Fakamoʼoni ʼa Sehova neʼe ina fakamahino fēnei: “Ko te meʼa ʼaē ʼe mātou fia fai ʼi te ʼaho nei, ko te fakahā ki te hahaʼi tomatou ʼuhiga moʼoni pea ke mātou fakagata te ʼu loi ʼaē ʼe mafola ʼo ʼuhiga mo mātou. ʼE mātou tali ke valokiʼi mātou, kae ʼe mole mātou toe tali anai ke mafola he ʼu loi ʼo ʼuhiga mo mātou pea mo he ʼu palalau ʼe fakatupu kovi ki tomatou matagafua.”
Logope la ko te kau Fakamoʼoni ʼa Sehova ʼe tuʼulaga tolu ʼi te ʼu lotu Faka Kilisitiano lalahi ʼi Falani, kae tokolahi te ʼu tamaliki Fakamoʼoni ʼa Sehova neʼe tauveleʼi pea mo gaohi koviʼi ʼi te faleako. Ko nātou lalahi neʼe fakamavae nātou ʼi tanatou gāue, pea neʼe fai kia nātou he ʼu fakamataku ʼuhi ko tanatou lotu. Meʼa fakapunamaʼuli foki, he ko te ʼu meʼa ʼofa ʼaē ʼe fai ki tonatou lotu, neʼe fakafuafua e te puleʼaga ʼe tonu ke nātou huʼi age te vahe e onogofulu ʼi te teau. Neʼe koteā te ʼui ʼa te kau Fakamoʼoni ʼa Sehova ʼo ʼuhiga mo te ʼu fakafeagai ʼaia?
ʼE ʼui fēnei e te kiʼi pepa lotu ʼaē neʼe tufa: “Ko te toko 250 000 kau Fakamoʼoni ʼa Sehova pea mo tonatou ʼu kaumeʼa ʼaē ʼe nonofo ʼi Falani, ʼe nātou FAKAFEAGAI ki te faiga fakakākā ʼa ʼihi talu mai te taʼu 1995, ke nātou fakapipiki tanatou Lotu Faka Kilisitiano ʼaē neʼe fakatuʼu ʼi Falani talu mai te taʼu 1900, pea mo te ʼu magaʼi lotu agakovi. . . . ʼE nātou FAKAFEAGAI ki te ʼu fakafeagai hoholo ʼaē neʼe fai kia nātou.” Neʼe fakahā ai te ʼu tūʼa heʼe faitotonu ʼaē neʼe fai ki te kau Fakamoʼoni ʼa Sehova ʼi Falani, pea mo te ʼu puleʼaki fakakākā ʼaē neʼe fai e te kau fakafeagai moʼo ʼulihi tonatou matagafua. Neʼe fakaʼosi fēnei e te kiʼi pepa lotu: “Ia ʼaho nei, ʼe maʼuʼuli ʼi Eulopa te toko lua miliona tupu kau Fakamoʼoni ʼa Sehova pea mo tonatou ʼu kaumeʼa. ʼE nātou fakalogo ki te ʼu lao ʼo te ʼu puleʼaga ʼaē ʼe nātou nonofo ai, ʼi tanatou mulimuli ki te ʼu pelesepeto ʼa te Evaselio. Hahaʼi ʼo Falani, koʼena te moʼoni. Neʼe ko tomatou maʼua ke mātou fakahā atu te moʼoni ʼaia!”
ʼE Tali Leleiʼi Atu Aipe Te Logo ʼAia
Ko te ʼu kiʼi pepa lotu ʼe lauʼi miliona neʼe tufa ʼi te ʼuluaki ʼaho. ʼI te fetapā ʼi te kolo ʼo Palesi, neʼe kua tufa ki te hahaʼi te ʼu pepa e 1 300 000 tupu e te kau Fakamoʼoni ʼa Sehova e toko 7 000. ʼE mahino ia, neʼe ko te hoki sioe ʼa te hahaʼi ki he kau Fakamoʼoni tokolahi ʼi te ʼu ala ʼe nātou tufa he ʼu kiʼi pepa lotu. Ko te hahaʼi tala logo, ʼo kau kiai te ʼu nusipepa pea mo te televisio faka puleʼaga, neʼe nātou lagolago ki te faka mafola ʼaia. Neʼe ʼui fēnei e te nusipepa Le Progrès de Lyon: “Ko te fakatuʼutuʼu ʼaia . . . ʼe ina fakahā te mahino hala ʼa te hahaʼi ki he kupu. ʼI te ʼu taʼu e hogofulu ʼaenī kua hili atu, ko te kupu ‘magaʼi lotu’ . . . neʼe liliu ʼo faka ʼuhiga ki he ʼu meʼa fakalialia, mo fakatupu tuʼutāmaki. . . . Ko te kau Fakamoʼoni ʼa Sehova ʼe mole ko he ʼu hahaʼi ʼe fakatupu tuʼutāmaki pea mo fakatupu kovi ki te sosiete.”
Ko nātou ʼaē ʼe nātou ʼiloʼi te kau Fakamoʼoni ʼa Sehova ʼe nātou ʼiloʼi tonatou maʼuli tokalelei pea mo tanatou fakaʼapaʼapa ki te puleʼaga. Koia, neʼe tokolahi te hahaʼi ʼi te ala neʼe nātou fakahā tanatou leleiʼia pea mo tanatou lagolago ki te kau Fakamoʼoni ʼe lauʼi afe ʼaē neʼe nātou tufa te kiʼi pepa lotu ʼaia. Mole tuai, pea neʼe telefoni te hahaʼi ki te sosiete, peʼe nātou momoli age he ʼu fax, pea mo he ʼu tohi ʼo nātou fakahā ai tanatou fakafetaʼi ki te kiʼi pepa lotu ʼaia. Kae ko te meʼa ʼaē ʼe maʼuhiga tāfito, he neʼe maʼu e te hahaʼi fakamalotoloto te fealagia ʼaē ke nātou ʼiloʼi te moʼoni ʼo ʼuhiga mo te kau Fakamoʼoni ʼa Sehova, ʼaē ʼe fakafeagai ki te ʼu palalau vale pea mo hala ʼaē neʼe fai ʼo ʼuhiga mo nātou, pea ko nātou ʼaē neʼe laukoviʼi tanatou lotu neʼe feala ke nātou fakahā tonatou ʼofa ki tanatou tauhi.