‘ ʼE Nātou Palalau ʼo ʼUhiga Mo Te Agalelei Pea Mo Te ʼOfa’

ʼI TE ʼu taʼu ʼaenī, neʼe fai te ʼu fasituʼu mālohi ʼo ʼuhiga mo te kau Fakamoʼoni ʼa Sehova ʼaē ʼi Falani. Ko te hahaʼi fakafeagai neʼe nātou fai mo te ʼu fakamatala loi. ʼI te kamataʼaga ʼo te taʼu 1999, neʼe tufa haʼele e te kau Fakamoʼoni ʼa Sehova ʼi Falani te ʼu kiʼi pepa lotu ʼe lauʼi 12 miliona, ʼe fēnei tona kupu tāfito: Français, on vous trompe! ʼI te kiʼi pepa lotu ʼaia, neʼe nātou tala ai te ʼu fasituʼu ʼaē neʼe fai ʼo ʼuhiga mo nātou.

Hili kiai ni ʼu ʼaho ʼo te tufa ʼaia, ko te tagata ʼe higoa ko Jean Bonhomme, ko te tōketā pea mo teputē ʼāfea ʼo te Puleʼaga, neʼe ina momoli tana tohi ki te sulunale ʼo tona kolo. Neʼe ina tohi fēnei: “ ʼE tautau ʼōmai te kau Fakamoʼoni ʼa Sehova ki toku ʼapi. ʼE nātou ʼōmai ʼo palalau mai ʼo ʼuhiga mo te agalelei pea mo te ʼofa ʼi te malamanei. . . . ʼE mole nātou fakakinauʼi ʼau. ʼE nātou palalau mai ʼaki he agamālū pea ʼe nātou fakalogo lelei ki taku ʼu manatu lotolotolua.”

ʼO ʼuhiga leva mo te fakakaukau fakalaumālie ʼa te kau Fakamoʼoni ʼa Sehova, neʼe ʼui fēnei e Bonhomme: “ ʼO ʼuhiga mo nātou, ko tanatou mole lagolago katoa ki te ʼu meʼa ʼo te malamanei, ʼe mole ʼi ai hona fua kovi ki he tahi. Kae ʼi te tahi faʼahi, ko te mole lagolago katoa ʼa ʼihi tagata fai politike ki te ʼu meʼa ʼa te mālama, ʼe lahi tanatou fakatupu tuʼutāmaki ki te tokalelei ʼa te hahaʼi pea mo te haʼele lelei ʼa te sosiete fakatagata.”