ʼE Lau Koa Tokotou Lelei e Te Hahaʼi?

‘ ʼE mole ʼau tokagaʼi ʼau te manatu ʼa te hahaʼi!’ Lagi neʼe kua koutou fai te ʼu palalau lotolahi ʼaia, ʼi te temi ʼaē neʼe koutou ʼita ai pe neʼe koutou lotomamahi ai. Kae ʼi te kua siʼisiʼi ʼo tokotou ʼita, neʼe lagi koutou lotohoha ai. Koteā tona tupuʼaga? Koteʼuhi, tokolahi ia tatou ʼe tou tuʼania moʼoni ki te manatu ʼa te hahaʼi ʼo ʼuhiga mo tatou.

EI, ʼE tonu ke tou tokagaʼi te manatu ʼa te hahaʼi. Tāfito ia tatou kau Kilisitiano, ʼaē ko te ʼu minisi ʼa Sehova ʼAtua, ʼe tonu ke tou tokagaʼi lelei te manatu ʼa te hahaʼi kia tatou. Koteʼuhi kua tou “liliu ko he mataga ki . . . te malama-nei.” (1 Kolonito 4⁠:⁠9) Ia 2 Kolonito 6⁠:​3, 4, ʼe tou maʼu ai te tokoni fakapotopoto ʼaenī ʼa te ʼapositolo ko Paulo: “E mole matou tuku he mea fakatupu higa ki he tahi, naʼa fakalaulauʼi tamatou gaue. Kae i te meafuape, e matou faiga ke falanaki mai kia matou ko te u faifekau a te Atua.”

Koteā te faka ʼuhiga ʼo te ʼui ʼaē ke lau e te hahaʼi totatou lelei? Ko tona faka ʼuhiga koa ke hikihiki tatou peʼe tokagaʼi fau tatou peʼe ko totatou poto? Kailoa, kae ko tona faka ʼuhiga ke tou maʼuliʼi te ʼu palalau ʼaē ʼe tuʼu ia 1 Petelo 2⁠:12: “Koutou mau he aga taulekaleka i te lotolotoga o te hahai pagani, koteuhi ka . . . natou mamata ki autou gaue lelei, pea e natou fakakololia ai ki te Atua i te aho o tana ahiahi mai.” ʼE vikiʼi e te hahaʼi te kau Kilisitiano ʼuhi ko te faʼifaʼitaki lelei ʼaē ʼe nātou tuku ʼi tanatou aga. Kae tāfito, ʼe mole vikiʼi tatou kae ko te ʼAtua. Kae ko te lau e te hahaʼi totatou lelei ʼe feala ke toe fua lelei kia tatou. Tou vakaʼi te ʼu faʼahi e tolu ʼaē ʼe lagi fua lelei ai anai kia koutou.

Kapau ʼe Koutou Fia ʼOhoana

Ohage la ko te nofo ʼohoana. ʼE ko he meʼa ʼofa mai ia Sehova ʼAtua, ia ia “ ʼaē ʼe maʼu ai e te famili katoa ʼi selo pea mo te kele tonatou higoa.” (Efeso 3⁠:​15, MN) ʼE lagi koutou fia ʼohoana anai ʼi he ʼaho. Kapau koia ʼaia, pea koteā koa ʼaē ʼe lau e te hahaʼi ʼo ʼuhiga mo koutou, ki te fealagia ʼaē ke koutou liliu ko he tagata peʼe ko he fafine ʼohoana? Ei, koteā te ʼui ʼa te hahaʼi ʼo ʼuhiga mo koutou ʼi te temi ʼaē ʼe kei koutou ʼeva ai?

ʼI ʼihi fenua, ʼe maʼuhiga te faʼahi ʼaia ki te ʼu famili. Ohage la ʼi Ghana, ka fia ʼohoana he toko lua, pea ʼe loto e te agaʼi fenua ke nā fakahā ki tanā ʼu mātuʼa. Pea ko te ʼu mātuʼa ʼaē ʼe nātou fakahā ki te famili. ʼE kamata kumikumi e te famili ʼo te tama pe koteā te ʼui ʼa te hahaʼi ʼo te vāhaʼa fale ʼo ʼuhiga mo te taʼahine. Ka ʼiloʼi papau e te ʼu mātuʼa te ʼuhiga lelei ʼo te taʼahine, pea ʼe nā fakahā anai ki te famili ʼo te taʼahine ʼe fia ʼohoanaʼi ia ia e tanā tama. ʼE vakavakaʼi ai leva e te famili ʼo te taʼahine te ʼui ʼa te hahaʼi ʼo ʼuhiga mo te tama ʼi muʼa ʼo tanatou tali ke ʼohoana. ʼE ʼi ai te tākuga ʼi Ghana ʼe ina ʼui fēnei: “ ʼI muʼa ʼo tau ʼohoana, fakalavelave muʼa kia nātou ʼaē ʼe nātou ʼiloʼi ia ia ʼaē ka ke ʼohoanaʼi.”

E feafeaʼi ki te ʼu fenua ʼo te potu Uesite, ʼaē ʼi te agamāhani, ʼe fakagafua ai ke kita filifili tokita ʼohoana? Māʼia mo te ʼu fenua ʼaia, ko he tama peʼe ko he taʼahine Kilisitiano kua fakapotopoto, ʼe ina fakalavelave kia nātou ʼaē ʼe nātou ʼiloʼi lelei te matagafua ʼo ia ʼaē ʼe ina fia ʼohoanaʼi, ohage la ko tana ʼu mātuʼa peʼe ko hona ʼu kaumeʼa kua fakapotopoto. Ohage ko tona ʼui e te tohi Te Kalavi ʼo Te Manuʼia Faka Famili, ʼe feala ke fai e he taʼahine te ʼu fehuʼi ʼaenī: “Koteā koa te ʼui ʼa te hahaʼi ʼo ʼuhiga mo ia? Ko ai koa tona ʼu kaumeʼa? ʼE ina maʼu koa te loto lolomi? E feafeaʼi tana aga ki te hahaʼi matutuʼa? E feafeaʼi koa te famili ʼaē ʼe haʼu mai ai? E feafeaʼi tana aga ki tona famili? Koteā tana manatu ʼo ʼuhiga mo te paʼaga? ʼE lahi koa tana ʼinu kava? ʼE hoko ʼita koa, pea mo agamālohi? Koteā koa tona ʼu pilivilesio ʼi te kokelekasio, pea e feafeaʼi tana fai tona ʼu maʼua? ʼE feala anai koa haku fakaʼapaʼapa katoa ki ai?’​—⁠Levitike 19⁠:32; Tāʼaga Lea 22⁠:29; 31⁠:23; Efeso 5:​3-5, 33; 1 Timoteo 5⁠:8; 6:​10; Tito 2:​6, 7.”a

ʼO toe feiā pe mo te tama Kilisitiano, ʼe ina fia kumikumi anai ke ina ʼiloʼi te taʼahine ʼaē ʼe ina fia ʼohoanaʼi. ʼE ʼui e te Tohi-Tapu, neʼe fai e Poase te faʼahi ʼaia ʼo ʼuhiga mo Lute, te fafine ʼaē neʼe ina ʼohoanaʼi ki muli age. ʼI te fehuʼi age e Lute: “Koteā ʼaē neʼe ʼau fai ke ke ʼofa kia te ʼau pea mo ke tokagaʼi ʼau, kae ko ʼau ko te matāpule?,” pea tali fēnei age e Poase: “Neʼe fakamatala mai ia meʼa fuli ʼaē neʼe ke fai.” (Lute 2⁠:​10-12) Ei, neʼe mole fakatokagaʼi pe e Poase te agatonu ʼo Lute, mo tana fakamalotoloto, pea mo tana gāue kinakina, kae neʼe toe palalau lelei foki te hahaʼi ʼo ʼuhiga mo Lute.

ʼO toe feiā pe, ʼe ʼi ai anai he pikipikiga ʼo takotou aga pea mo te faʼahiga sio ʼa te hahaʼi kia koutou, peʼe koutou liliu anai koa ko he tagata peʼe ko he fafine ʼohoana ʼe lelei. Koia, koteā ʼaē ʼe lau e te hahaʼi ʼo ʼuhiga mo koutou ʼi te faʼahi ʼaia?

ʼI Takotou Gāue

Ko tokotou fale gāue ʼe ko te tahi potu ʼaia ʼe feala ke fua lelei ai kia koutou takotou aga ʼaē ʼe lelei. ʼE lagi mālohi te fakataupiepie ki te gāue. ʼI te agamāhani, ʼe fakamavae te hahaʼi gāue ʼaē ʼe mole fia fakalogo, mo ʼōmai tauhala tuʼumaʼu, pea mo nima kaihaʼa. Ko te ʼu matani gāue ʼe lagi nātou fakamavae mo te ʼu hahaʼi ʼaē kua fualoa pea mo popoto ʼi te gāue, heʼe nātou totogi kovi. Ka kumi gāue te hahaʼi, pea ʼe nātou tokagaʼi ko te ʼu fale gāue ʼe nātou fakalavelave anai ki tonatou ʼu ʼuluaki patolo pe neʼe feafeaʼi tanatou gāue, mo tanatou aga pea mo tonatou poto gāue. ʼE lahi te kau Kilisitiano neʼe vikiʼi nātou e tonatou ʼu patolo, ʼuhi ko tanatou aga fakaʼapaʼapa, mo tanatou agavaivai, mo tanatou fiafia, pea mo tonatou ʼu kalitate faka Kilisitiano.

Ko te aga fakahagatonu, ʼe ko he kalitate lelei ʼaia​—⁠pea ʼe lahi te ʼu patolo ʼe nātou faka maʼuhigaʼi te faʼahi ʼaia. Ohage ko te ʼapositolo ko Paulo, ʼe tou fia “agatonu ia meʼa fuli pe.” (Hepeleo 13⁠:18, MN) ʼI te sosiete lameni ʼi Ghana, neʼe hoko ai te kaihaʼa. Ko te pule ʼo te fale gāue ʼaē ʼe gaohi ai te ʼu meʼa neʼe keli, neʼe ko te Fakamoʼoni ʼa Sehova pea neʼe ina taupau tana gāue kae fakamavae ʼihi. Koteā tona tupuʼaga? Neʼe tokagaʼi e te patolo tana agatonu lolotoga ni ʼu taʼu. Neʼe toe ʼiloʼi lelei mo tana faʼa gāue pea mo tana fakaʼapaʼapa ki te pule. Ei, ʼaki tana aga fakahagatonu ʼaia neʼe feala ai ke nofo maʼu ʼi tana gāue.

Koteā te tahi ʼu meʼa ʼaē ʼe feala ke fai e he Kilisitiano ke lau ai tona lelei ʼi te faʼahi ʼo te gāue? Koutou faiga ke koutou popoto ʼi te fai ʼo te gāue ʼaē ʼe tuku atu. (Tāʼaga Lea 22⁠:29) Koutou fakavilivili mo faʼa gāue pea mo tokaga fakalelei ki takotou gāue. (Tāʼaga Lea 10⁠:4; 13⁠:⁠4) Koutou fakaʼapaʼapa ki takotou patolo pea mo tokotou pule. (Efeso 6⁠:⁠5) ʼE maʼuhiga ʼaupito ki te ʼu patolo te ʼu kalitate ʼaē ko te tautonu, mo te aga fakahagatonu, mo te fakahaʼele ʼo te gāue, mo te faʼa gāue, pea ko te ʼu kalitate ʼaia ʼe lava tokoni atu ke koutou maʼu hakotou gāue logope la te kua tahitahiga ʼo te maʼu gāue.

Te ʼu Pilivilesio ʼi Te Kokelekasio

Tāfito ʼi te temi nei, ʼe ʼaoga ʼaupito he kau tagata kua fakapotopoto moʼo takitaki te kokelekasio faka Kilisitiano. Koteā tona tupuʼaga? Neʼe fakakikite fēnei e Isaia: “Fakalahi te potu ʼo tou fale fehikitaki. Pea ke faoʼi te ʼu tapoleni ʼo tou tapenakulo taulekaleka.” (Isaia 54⁠:⁠2) Kua hoko te lea faka polofeta ʼaia heʼe haga tuputupu te ʼu kokelekasio ʼa Sehova ʼi te malamanei.

Koia, kapau ko koutou ko he tēhina, ʼe lava feafeaʼi ke lau tokotou lelei ke lava tuku atu hokotou maʼua ʼi te kokelekasio? Koutou fakatokagaʼi te faʼifaʼitaki ʼo te tūpulaga ko Timoteo. ʼE fakahā mai e Luka ʼo ʼuhiga mo Timoteo, “nee lau tona lelei e te u tehina i Lisitala mo Ikoniume.” Ei, ʼuhi ko te lelei ʼo tana aga, neʼe lau te lelei ʼo te tūpulaga ʼaia ʼi te ʼu kolo kehekehe ʼaia e lua. Pea neʼe tupu ai te fakaafe ʼo Timoteo e Paulo ke kaugā folau mo ia ʼi tona minisitelio.​—⁠Gaue 16⁠:​1-4.

Ia ʼaho nei, ʼe lava feafeaʼi ki he tēhina ke ‘fakaʼamu ki he gāue taupau’ ʼi hona ʼaluʼaga lelei pea ʼuhi ko tana fia pipiki ki te ʼAtua? ʼE mahino ia, ʼe mole foaki age anai te maʼua ʼaia heʼe lagolago ki ai ʼihi, kae ʼuhi ko tana maʼu te ʼu kalitate fakalaumālie ʼaē ʼe ʼaoga ki te ʼu maʼua ʼaia. (1 Timoteo 3:​1-​10, 12, 13; Tito 1:​5-9) ʼE feala ke ina toe fakahā tana “fakaamu ki he gaue lelei” ʼi tana kau lahi ki te gāue fai faka mafola pea mo te fai ʼo he ʼu tisipulo. (Mateo 24⁠:14; 28⁠:​19, 20) Ko nātou ʼaē ʼe lau tonatou lelei ʼi tonatou ʼuhiga tagata Kilisitiano fakapotopoto, ʼe nātou tuʼania moʼoni ʼo ʼuhiga mo te faʼahi fakalaumālie ʼo tonatou ʼu tēhina. ʼE nātou mulimuli ki te tokoni ʼaenī ʼa te ʼapositolo ko Paulo: “Koutou tokoni ki te u mea e aoga ki te kaigalotu, mo mauliʼi te aga talitali kaiga.” (Loma 12⁠:13) Kapau ʼe ina fai te ʼu meʼa ʼaia, pea ʼe lava moʼoni ke ‘lau te lelei [ʼo te Kilisitiano ʼaia] ʼi tona ʼuhiga minisi ʼa te ʼAtua.’

ʼI Te Temi Fuli Pe

Ke lau e te hahaʼi totatou lelei, ʼe mole faka ʼuhiga ke tou fakahāhā peʼe tou fai “ke leleiʼia [tatou] e te hahai.” (Efeso 6⁠:⁠6) Kailoa, kae ko tona faka ʼuhiga ke lau totatou lelei e totatou Tupuʼaga, ia Sehova ʼAtua, heʼe tou mulimuli fakalelei ki tana ʼu lao pea mo tana ʼu pelesepeto. Kapau ʼe koutou tuputupu ʼi te faʼahi fakalaumālie pea mo faka mālohiʼi takotou felogoi mo Sehova ʼAtua, pea ʼe tokagaʼi anai e te hahaʼi te kua lelei ʼo takotou aga ki tokotou famili, mo tokotou ʼu kaugā gāue, pea mo te ʼu tēhina pea mo te ʼu tuagaʼane. ʼE nātou toe tokagaʼi anai ʼe koutou fakafuafua lelei te ʼu meʼa ʼaē ʼe koutou fai, kua koutou maʼu te fakasiosio tonu, mo lava fakahoko tokotou ʼu maʼua, pea kua koutou agavaivai. ʼE nātou ʼoʼofa anai kia koutou pea mo fakaʼapaʼapa atu, pea ko te meʼa ʼaē ʼe maʼuhiga tāfito, ʼe koutou maʼu anai te ʼofa ʼo Sehova ʼAtua heʼe lau e te hahaʼi tokotou lelei!

[Nota ʼi te lalo pasina]

[Paki ʼo te pasina 19]

Tokolahi te ʼu mātuʼa ʼe nātou aga fakapotopoto, ʼo nātou kumikumi te matagafua ʼo ia ka ʼohoana mo tanatou tama pe ko tanatou taʼahine

[Paki ʼo te pasina 20]

ʼE lava foaki he ʼu pilivilesio ki he tēhina ʼuhi ko tana fakaʼapaʼapa ki te hahaʼi