Koutou Katoa Pea Mo Koutou Tui Mālohi

Te ʼu Fakatahi Lalahi—ʼE Fakahā Fakafiafia Ai Totatou ʼOfa Fakatautehina

KO JOSEPH F. Rutherford ʼi tona taʼu nimagofulu, ʼaē neʼe mahamahaki tupu ko tona pilisoniʼi kae neʼe mole ʼi ai hona lākahala, neʼe gāue fakafiafia ohage ko he tagata fai selevisi. Neʼe tokoni ki tona ʼu tēhina ki te fetuku ʼo tanatou ʼu pasikete ki tonatou ʼu kogafale ʼi te otele. Ko tona ʼu tēhina e lua—neʼe nā kau ki te kau Ako ʼo te Tohi-Tapu—neʼe nā fakahoahoa te hahaʼi tokolahi neʼe nātou fakatalitali ki honatou kogafale moe. Neʼe nātou feʼohoʼaki feiā ʼo fakalaka ʼi te māʼupō. Neʼe nātou hoha fuli. Neʼe koteā ʼaē neʼe nātou teuteu kiai?

Neʼe ko te taʼu 1919, pea neʼe hoki mālōlō pe te kau Ako ʼo te Tohi-Tapu (kua nātou higoa ʼi te temi nei ko te kau Fakamoʼoni ʼa Sehova) mai te ʼu fakataga ʼaē neʼe hoko kia nātou. Ke nātou toe maʼu he mālohi, neʼe nātou fai tanatou fakatahi ʼi Cedar Point, ʼi Ohio, ʼi Amelika, mai te ʼaho 1 ʼo aʼu ki te ʼaho 8 ʼo Sepetepeli 1919. ʼI te ʼaho fakaʼosi ʼo te fakatahi, ko te toko 7 000 ʼaē neʼe kau ai neʼe nātou fakalogo fakalelei ki te fakaloto mālohi ʼaenī neʼe fai e te Tēhina ko Rutherford kia nātou takitokotahi: “Ko koutou ko te kau fakafofoga ʼo te Hau ʼo te ʼu hau pea mo te ʼAliki ʼo te kau ʼaliki, ʼo koutou fagonogono ki te hahaʼi . . . te puleʼaga faka kolōlia ʼo totatou ʼAliki.”

ʼI te hahaʼi ʼa Sehova, neʼe kamata te ʼu fakatahi ʼaia mai te temi ʼo te Iselaele ʼāfea. (Ekesote 23:14-17; Luka 2:41-43) Ko te ʼu fakatahi ʼaia neʼe ko he ʼu lakaga fakafiafia, neʼe tokoni ai kia nātou fuli neʼe kau ai ke nātou tokagaʼi tāfito te Folafola ʼa te ʼAtua. ʼO toe feiā aipe ʼi te ʼu temi ʼaenī, ko te ʼu fakatahi ʼa te kau Fakamoʼoni ʼa Sehova ʼe fakatafito ki te ʼu meʼa fakalaumālie. Kia nātou ʼaē ʼe nātou tokagaʼi te ʼu taʼi fakatahi fakafiafia ʼaia, ʼe ko he fakamoʼoni ʼo te faifaitahi ʼa te kau Fakamoʼoni ʼuhi ko te ʼu noʼo mālohi ʼo te ʼofa fakatautehina faka Kilisitiano.

Te ʼu Faiga Ke Nātou Kau Ki Te ʼu Fakatahi

ʼE mahino ki te kau Kilisitiano ʼo te temi ʼaenī, ko tanatou ʼu fakatahi ʼe ko he ʼu lakaga ʼe nātou maʼu ai he fakafimālie fakalaumālie pea mo nātou ako ai te Folafola ʼa te ʼAtua. ʼE nātou faka ʼuhiga te ʼu fono lalahi ʼaia ko he ʼu puleʼaki maʼuhiga moʼo tokoni kia nātou ke nātou ‘katoa pea mo nātou tui mālohi ʼo ʼuhiga mo te finegalo katoa ʼo te ʼAtua.’ (Kolose 4:12) Koia ʼe lagolago mālohi ai te kau Fakamoʼoni ki te ʼu fakatahi ʼaia, ʼo nātou faiga mālohi ke nātou kau ai.

Ki ʼihi ia nātou, moʼo kau ki te ʼu fakatahi ʼe maʼua ke nātou tui pea mo nātou tauʼi he ʼu fihifihia ʼe hage ko he ʼu moʼuga. Ohage la, koutou tokagaʼi age muʼa te Fakamoʼoni kua mātuʼa ʼi Otilisia. Logope tana maʼu te mahaki ʼaē ko te suka pea ʼe tonu ke ina fai tana foʼi huki insuline ʼi te ʼaho fuli, neʼe ina fai te ʼu fakatuʼutuʼu lelei ke kau ki te ʼu ʼaho fuli ʼo te fakatahi faka tisitilike ʼi tona fenua. ʼI Initia, neʼe hage ki he famili kaugamālie ʼa te kau Fakamoʼoni neʼe faigataʼa ʼaupito tanatou kau ki te fakatahi, tupu ko tanatou māsisiva ʼaupito. Kae neʼe maʼu te puleʼaki e te tahi ʼo te famili. Neʼe ina ʼui fēnei: “ ʼI taku mole loto ʼaē ke mātou to ʼi te fakatahi ʼaia, neʼe ʼau fakatau taku ʼu foʼi hau aulo moʼo totogi ʼo te fagona ʼaia. Neʼe ko he sakilifisio ʼaoga, koteʼuhi ko te fakatahi ʼaia mo te ʼu fakamatala neʼe nātou fakamālohiʼi tamatou tui.”

ʼI Papua Niu-Kini, ko te kiʼi kūtuga ʼo te ʼu hahaʼi mole heʼeki nātou papitema, neʼe nātou faiga mālohi ke nātou kau ki te fakatahi faka tisitilike ʼi te kolo hau. Neʼe nātou ʼolo ki te tagata ʼo tonatou kolo, neʼe ʼi ai tana motokā moʼo fetuku ʼo te hahaʼi, ʼo nātou fehuʼi age peʼe fia te totogi moʼo fetuku ʼo nātou ki te fakatahi. Neʼe mole nātou maʼu he falā feʼauga moʼo totogi tanatou ʼolo ʼaia, koia neʼe nātou fai te ʼu fakatuʼutuʼu ke nātou gāue ʼi te ʼapi ʼo te tagata, moʼo toe gaohi tana fale kuka. Neʼe nātou lava ʼolo ai leva ki te fakatahi faka tisitilike pea mo maʼu ai he ʼu fua lelei ʼo te polokalama katoa.

Ko te mamaʼo ʼe mole ko he fihifihia maʼuhiga ia ki te kau Fakamoʼoni ʼa Sehova ʼaē ʼe nātou fia kau ki te ʼu fakatahi. ʼI te taʼu 1978, neʼe fagona lelue te tūpulaga mai Polonia ki Falani, ʼo ʼaho ono tana ʼalu lelue ʼi te ʼu kilometa e 1 200, ke kau ki te fakatahi ʼi Lille, ʼi Falani. Lolotoga te temi vela ʼo te taʼu 1997, neʼe fagona te ʼu Fakamoʼoni e lua ia kilometa e 1 200, mai Mongolie ki Irkoutsk ʼi Lusia, ke nā kau ki te fakatahi faka Kilisitiano.

Neʼe ʼIloga Te ʼOfa Fakatautehina Moʼoni

Kia nātou ʼaē ʼe nātou fakasiosio lelei, ʼe ʼiloga lelei te logo tahi pea mo te ʼofa fakatautehina ʼe fakahā e te kau Fakamoʼoni ʼi ʼanatou fakatahi. Tokolahi neʼe nātou punamaʼuli ʼi te mole fakapalatahi ʼa nātou neʼe kau ki te fakatahi, pea tatau aipe peʼe mole nātou feʼiloʼiʼaki kae neʼe toe ʼiloga pe foki ia nātou te ʼofa moʼoni.

ʼI te fakatahi faka malamanei ʼi Ositalalia, lolotoga te vāhaʼa katoa, ko te tagata ʼaē neʼe ina fakamamata te fenua ki te ʼu tēhina mo tuagaʼane ʼaē neʼe ʼōmai mai te tahi ʼu fenua, neʼe fia nofo fualoa mo nātou. Neʼe punamaʼuli ʼi tanatou feʼofani pea mo tanatou faifaitahi feiā, koteʼuhi tokolahi ia nātou neʼe ko te kau matāpule. ʼI te temi ʼaē neʼe mavete ai mo nātou, neʼe lea age kia nātou. Neʼe ina fakahigoaʼi nātou ko te ʼu “tēhina mo tuagaʼane,” neʼe kamata fakamālo age kia nātou kae neʼe mole ina lava fakaʼosi tana palalau pea neʼe tagi, koteʼuhi neʼe logo sino ia ia te ʼu meʼa ʼaē neʼe sio kiai.

ʼI te 1997, neʼe fai ʼi Sri Lanka te ʼuluaki fakatahi faka tisitilike ia lea e tolu ʼi te toe malaʼe faigaoʼi. Neʼe fai katoa te polokalama ʼi te Fakapilitānia, mo te faka Cinghalais, pea mo te faka Tamoul. ʼI he mālama ʼe tuputupu ai te fetauʼaki ʼa te ʼu lanu, ʼe tokagaʼi te taʼi fakatahi ʼaia ʼo he ʼu kūtuga e tolu ʼe nātou lea kehekehe. Neʼe fehuʼi fēnei e te tagata polisi ki te tēhina: “Ko ai te kūtuga ʼaē ʼe ina takitaki te fakatahi ʼaia—ko te kau Cinghalais, te kau Tamouls, peʼe ko te kau Pilitania?” Neʼe tali age e te tēhina: “ ʼE mole ʼi ai he kūtuga ʼe ina takitaki te fakatahi. Ko mātou fuli ʼe mātou fai fakatahi.” Neʼe mole fia tui kiai te tagata polisi. Kae ʼi te ʼosi ʼui fuli “Ameni” e te ʼu kūtuga ʼaia e tolu ʼi te faikole fakaʼosi ʼi te malaʼe fai gaoʼi, neʼe pasipasi fuli ia nātou neʼe kau ki te fakatahi. Neʼe teitei fetāgihi fuli ia nātou ʼo te fakatahi. Ei, ko te ʼu fakatahi ʼe ko he ʼu fakahāʼaga fakafiafia ʼo totatou ʼofa fakatautehina.—Pesalemo 133:1.a

[Kiʼi nota]