Te ʼu Fua Lelei ʼe Tou Mau Mai Te Lotoʼofa ʼo Sehova
“Ko ai ʼaē ʼe poto? ʼE ina . . . tokagaʼi anai te ʼu gāue lotoʼofa ʼo Sehova.”—Pesalemo 107:43.
1. Ko te temi fea ʼaē neʼe ʼuluaki fakaʼaogaʼi ai te kupu “lotoʼofa” ʼi te Tohi-Tapu, pea koteā te ʼu fehuʼi ʼe tou vakaʼi anai ʼo ʼuhiga mo te kalitate ʼaia?
IA TAʼU e 4 000 ki muʼa atu, neʼe ʼui fēnei e Lote te ʼilāmutu ʼo Apalahamo ʼo ʼuhiga mo Sehova: “ ʼE ke fakalahi tou lotoʼofa.” (Senesi 19:19) Ko te ʼuluaki fakaʼaogaʼi ʼaia ʼo te kupu “lotoʼofa” ʼi te Tohi-Tapu. Ko Sakopo, mo Naomi, mo Tavite, pea mo te tahi ʼu kaugana ʼa te ʼAtua neʼe nātou toe palalau ki te kalitate ʼaia ʼo Sehova. (Senesi 32:10; Lute 1:8; 2 Samuele 2:6) Ko te kupu “lotoʼofa” pea mo te ʼu “lotoʼofa,” ʼe tuʼa 250 tona maʼu ʼi te Tohi-Tapu Les Saintes Écritures — Traduction du monde nouveau. Kae koteā te lotoʼofa ʼo Sehova? Ko ai koa ʼaē neʼe fakahā ki ai ʼi te temi muʼa? Pea koteā tona fua lelei kia tatou ia ʼaho nei?
2. He koʼe ʼe faigataʼa fau te fakamahino ʼo te kupu faka Hepeleo ʼaē neʼe fakaliliu ʼaki te kupu “lotoʼofa,” pea e feafeaʼi hona tahi fakaliliu?
2 ʼI te Tohi-Tapu, ko te kupu “lotoʼofa” ʼe ko te fakaliliu ʼaia ʼo te kupu faka Hepeleo maʼuhiga, pea ʼe teitei pe ki te ʼu lea ke mole nātou maʼu he kupu totonu kiai. Koia, ʼe nātou fakaliliu ʼaki te ʼu kupu “ ʼofa,” “loto manavaʼofa” pea mo “agatonu,” ʼaē ko he ʼu kupu ʼe mole nātou fakaliliu fakahagatonu te ʼuhiga totonu ʼo te kupu ʼaia. Kae ʼe fakaliliu tuʼumaʼu ʼaki te kupu “lotoʼofa” heʼe ʼui e te tohi Theological Wordbook of the Old Testament ʼe “ōvi ki te faka ʼuhiga katoa ʼo te kupu ʼaia.” ʼI te Tohi-Tapu Les Saintes Écritures— Traduction du monde nouveau, ʼe ina fakaʼaogaʼi te kupu “ ʼofa agatonu” moʼo fetogi ʼaki te fakaliliu ʼo te kupu faka Hepeleo “lotoʼofa.”—Ekesote 15:13; Pesalemo 5:7; kiʼi nota ʼi te lalo pasina.
ʼE Mole Tatau Ia Mo Te ʼOfa Pea Mo Te Agatonu
3. He koʼe ʼe kehekehe te lotoʼofa mo te ʼofa?
3 Ko te lotoʼofa, peʼe ko te ʼofa agatonu, ʼe pipiki tāfito ki te ʼu kalitate ʼaē ko te ʼofa pea mo te agatonu. Kae ʼe kehekehe ʼosi ia mo te ʼu kalitate ʼaia. Tou vakaʼi age muʼa pe koe ʼe kehekehe te lotoʼofa pea mo te ʼofa. ʼI ʼihi lea, ʼe feala ke faka ʼuhiga te ʼofa ki he ʼu meʼa pea mo he ʼu fakatuʼutuʼu. ʼE talanoa te Tohi-Tapu ki te “ ʼofa ki te vino pea mo te lolo” pea mo te “ ʼofa ki te poto.” (Tāʼaga Lea 21:17; 29:3) Kae ʼe faka ʼuhiga te lotoʼofa ki te hahaʼi, kae mole fakaʼaogaʼi ki he ʼu fakatuʼutuʼu peʼe ko he ʼu meʼa. Ohage la, ʼe faka ʼuhiga ki te hahaʼi te ʼui ʼaē ia Ekesote 20:6 ko Sehova “ ʼe . . . lotoʼofa ki te lauʼi afe taʼiake.”
4. Koteā ʼaē ʼe kehekehe ai te lotoʼofa mo te agatonu?
4 Ko te kupu faka Hepeleo ʼaē ʼe fakaliliu ʼaki te kupu “lotoʼofa” ʼe maʼuhiga age ia ʼi te kupu “agatonu.” ʼI ʼihi lea, ʼe fakaʼaogaʼi māhani te kupu “agatonu” kia ia ʼe tonu ke fakalogo ki tona pule. Kae ohage ko te ʼui ʼa te fafine fai kumi, ko te lotoʼofa ʼaē ʼe talanoa kiai te Tohi-Tapu, “ ʼe faka ʼuhiga māhani ki he ʼu manatu ʼe mole ʼalutahi: ko ia ʼaē ʼe lahi ʼe agatonu kia ia ʼaē ʼe vaivai peʼe masiva peʼe fakalogo.” Koia neʼe feala ai ki te Hau ko Tavite ke faikole fēnei kia Sehova: “Faka gigila mai tou fofoga ki tau kaugana. Hāofaki ʼau ʼi tou lotoʼofa.” (Pesalemo 31:16) ʼE kole ʼi henī kia Sehova ʼaē ʼe mālohi ke ina fakahā tona lotoʼofa, peʼe ko tona ʼofa agatonu ki te tagata fakaʼofaʼofa ko Tavite. Koteʼuhi ko ia ʼaē ʼe fakaʼofaʼofa ʼe mole ina lava puleʼi ia ia ʼaē ʼe mālohi, pea ko te lotoʼofa ʼaē ʼe fakahā ʼi te taʼi lakaga ʼaia ʼe fai ʼaki te lotolelei, kae mole fai fakamālohiʼi.
5. (a) Koteā te ʼu agaaga ʼo te lotoʼofa ʼo te ʼAtua ʼaē ʼe fakahā ʼi tana Folafola? (b) Koteā anai te ʼu kupuʼi palalau ʼaē ka tou vakaʼi ʼo ʼuhiga mo te lotoʼofa ʼo Sehova?
5 “Ko ai ʼaē ʼe poto?” ko te fehuʼi ʼaia ʼa te tagata fai pesalemo. “ ʼE ina . . . tokagaʼi anai te ʼu gāue lotoʼofa ʼo Sehova.” (Pesalemo 107:43) Ko te lotoʼofa ʼo Sehova ʼe ina taki tatou ki te hāofaki pea mo te maʼuli. (Pesalemo 6:4; 119:88, 159) ʼE ko he puipui pea mo he fealagia ke kita maʼu ai he fīmālie mai totatou ʼu mamahi. (Pesalemo 31:16, 21; 40:11; 143:12) ʼAki te kalitate ʼaia ʼe feala ke ʼuʼufi ai te agahala. (Pesalemo 25:7) Kapau ʼe tou vakaʼi he tahi ʼu fakamatala ʼi te Tohi-tapu pea mo lau he tahi ʼu vaega ʼo te Tohi-Tapu, ʼe tou sio ai anai ko te lotoʼofa ʼo Sehova (1) ʼe pipiki ki te ʼu gāue maʼuhiga pea (2) ʼe maʼu e tana ʼu kaugana agatonu.
Ko Te Hāofaki ʼe Ko He Fakahā ʼAia ʼo Te Lotoʼofa
6, 7. (a) Neʼe faka maʼuhigaʼi feafeaʼi e Sehova tona lotoʼofa ʼo ʼuhiga mo Lote? (b) Ko te temi fea ʼaē neʼe talanoa ai ia Lote ki te lotoʼofa ʼo Sehova?
6 Ke tou ʼiloʼi lelei te fakahā lahi e Sehova tona lotoʼofa, ʼe lagi tonu anai ke tou vakaʼi te ʼu fakamatala faka Tohi-tapu ʼo ʼuhiga mo te kalitate ʼaia. Ia Senesi 14:1-16, ʼe tou lau ai ko Lote, te ʼilāmutu ʼo Apalahamo, neʼe ʼave e te kautau fakafeagai. Kae neʼe hāofaki e Apalahamo ia Lote. Neʼe toe tuʼutāmaki te maʼuli ʼo Lote ʼi te fakatuʼutuʼu ʼa Sehova ke ina fakaʼauha te kolo agakovi ko Sotoma, ʼaē neʼe maʼuʼuli ai ia Lote mo tona famili.—Senesi 18:20-22; 19:12, 13.
7 ʼI muʼa ʼo te fakaʼauha ʼo Sotoma, ko te kau ʼaselo ʼa Sehova neʼe nātou taki ia Lote pea mo tona famili ki tuʼa ʼo te kolo. ʼI te temi ʼaia, neʼe ʼui fēnei e Lote: “Kua ke ʼofa ki tau kaugana heʼe ke lolotoga fakalahi tou lotoʼofa, ʼaē neʼe ke fakahā kia te ʼau moʼo hāofaki toku nefesi.” (Senesi 19:16, 19) ʼAki te ʼu palalau ʼaia neʼe mahino ai kia Lote ko Sehova neʼe ina fakahā age te lotoʼofa makehe ʼi tana hāofaki ia ia. ʼI te ʼaluʼaga ʼaia, neʼe fakahā e te ʼAtua tona lotoʼofa he neʼe ina fakahoko te faka ʼāteaina pea mo te hāofaki.—2 Petelo 2:7.
Te Lotoʼofa ʼo Sehova Pea Mo Tana Takitaki
8, 9. (a) Neʼe koteā te gāue neʼe tonu ke fakahoko e te tagata kaugana ʼa Apalahamo? (b) He koʼe neʼe kole e te tagata kaugana te lotoʼofa ʼo te ʼAtua, pea koteā ʼaē neʼe hoko ʼi tana lolotoga faikole?
8 Ia Senesi kapite 24, ʼe tou lau ai te tahi lotoʼofa fakaʼatua, peʼe ko te ʼofa agatonu. ʼE tou lau ʼi te fakamatala, neʼe fekauʼi e Apalahamo tana tagata kaugana ke ʼalu ki te kolo ʼo tona famili, ʼo kumi ai he ʼohoana ʼo tona foha ko Isaake. (Vaega 2-4) Neʼe faigataʼa te gāue ʼaia neʼe hinoʼi age ki te tagata kaugana, kae neʼe fakapapauʼi age ʼe takitaki anai ia ia e te ʼaselo ʼa Sehova. (Vaega 7) Pea neʼe tō tonu tana tau atu ki te vai keli ʼi tuʼa ʼo “te kolo ʼo Naole” (peʼe ko Halane peʼe ko he koga meʼa neʼe ōvi atu) mo te fakaōvi mai ʼa te ʼu fafine ki te vai keli. (Vaega 10, 11) ʼI tana sio ki te fakaōvi mai ʼa te ʼu fafine, neʼe mahino ai ki te tagata kaugana kua hoko mai te temi ʼaē ka ina fakahoko ai tana gāue. Kae neʼe ina lava ʼiloʼi feafeaʼi te fafine ʼaē ke ina filifili?
9 ʼI tana mahino ʼaē neʼe ʼaoga kia ia te tokoni ʼa te ʼAtua, neʼe faikole fēnei te tagata kaugana ʼa Apalahamo: “Sehova, te ʼAtua ʼo toku ʼaliki ko Apalahamo, fakalelei siʼou loto, kae fakahoko te meʼa ʼaia ʼi ʼoku muʼa ʼi te ʼaho ʼaenī pea mo ke lotoʼofa ki toku ʼaliki ko Apalahamo.” (Vaega 12) ʼE fakahā feafeaʼi anai e Sehova tona lotoʼofa? Neʼe kole e te tagata kaugana he fakaʼiloga makehe ke feala ai hana ʼiloʼi te fafine ʼaē ka filifili e te ʼAtua. (Vaega 13, 14) Neʼe ʼi ai te fafine e tahi neʼe ina fai fuli te ʼu meʼa ʼaē neʼe ina kole kia Sehova. Neʼe hage pe neʼe logoʼi e te fafine ʼaia tana faikole! (Vaega 15-20) Neʼe ʼofolele te tagata kaugana ʼo “ina sioʼi ia ia ʼaki he loto punamaʼuli.” Kae neʼe tonu ke ina ʼiloʼi lelei te ʼu faʼahi maʼuhiga. Neʼe kau koa te fafine ʼaia ki te famili ʼo Apalahamo? Neʼe kei ʼeva koa? Koia ko te tagata kaugana neʼe nofo “fakalogologo, ke ina ʼiloʼi pe neʼe faka manuʼia koa e Sehova tona fagona peʼe kailoa.”—Vaega 16, 21.
10. He koʼe neʼe ʼui e te tagata kaugana ʼa Apalahamo ko Sehova neʼe ina fakahā tona lotoʼofa ki tona pule?
10 Mole fualoa kiai, neʼe fakahā age e te taʼahine ko ia ko “te ʼofafine ʼo Petuele te tama ʼa Milika, ia ia ʼaē neʼe ina fānauʼi kia Naole [te tēhina ʼo Apalahamo].” (Senesi 11:26; 24:24) ʼI te temi leva ʼaia neʼe mahino ai ki te tagata kaugana neʼe fakahoko e Sehova tana faikole. ʼI tana ōfo ʼi te meʼa ʼaia, neʼe tulolo ifo pea mo ʼui maʼana: “Fakafetaʼi kia Sehova te ʼAtua ʼo toku pule ko Apalahamo, ʼaē neʼe ina fakahā tona lotoʼofa pea mo tana agatonu ki toku pule. ʼI taku lolotoga haʼu ʼi te ala, neʼe taki mai ʼau e Sehova ki te ʼapi ʼo te ʼu tēhina ʼo toku pule.” (Vaega 27) ʼI tana takitaki te faʼahi ʼaia, neʼe fakahā e te ʼAtua tona lotoʼofa ki te pule ʼo te tagata kaugana ʼaē ko Apalahamo.
ʼE Maʼu ʼi Te Lotoʼofa Te Faka ʼĀteaina Pea Mo Te Puipui
11, 12. (a) Ko te ʼu ʼahiʼahiʼi fea ʼaē neʼe sio ai Sosefo ki te lotoʼofa ʼo Sehova? (b) Neʼe fakahā feafeaʼi te lotoʼofa ʼo te ʼAtua kia Sosefo?
11 Tou vakaʼi nei ia Senesi kapite 39. ʼE talanoa te kapite ʼaia ki te mokoliha ʼo Apalahamo ko Sosefo, ʼaē neʼe fakatau ke kaugana ʼi Esipito. Kae “ko Sehova neʼe nofo mo Sosefo.” (Vaega 1, 2) ʼO feiā mo Potifale te pule Esipito ʼo Sosefo neʼe ina ʼui ko Sehova neʼe nofo mo Sosefo. (Vaega 3) Kae neʼe tau Sosefo mo te fihifihia lahi. Neʼe tukugakoviʼi neʼe ina fakaʼalikiʼi te ʼohoana ʼo Potifale pea neʼe pilisoniʼi ai. (Vaega 7-20) ʼI te “fale pilisoni” “neʼe fakamamahiʼi tona ʼu vaʼe ʼaki te ʼu seini, pea ko tona nefesi neʼe nofo ʼi te ʼu ukamea.”—Senesi 40:15; Pesalemo 105:18.
12 Koteā te meʼa ʼaē neʼe hoko ʼi te temi faigataʼa ʼaia? “Neʼe nofo aipe Sehova mo Sosefo pea neʼe ina foaki aipe kia te ia tona lotoʼofa.” (Vaega 21a) Neʼe kamata ai leva te lotoʼofa makehe pea hoa atu kiai te tahi ʼu meʼa kehekehe, ʼo iku ai mo te faka ʼāteaina ʼo Sosefo mai te ʼu mamahi ʼaē neʼe tau mo ia. Ko Sehova neʼe ina faka fealagia kia Sosefo “ke ʼofainaʼi e te pule ʼo te fale pilisoni.” (Vaega 21b) Pea ko te pule neʼe ina fakanofo ia Sosefo ki te tuʼulaga maʼuhiga. (Vaega 22) Ki muli age, neʼe felāveʼi leva ia Sosefo mo te tagata ʼaē ka ina faka fealagia ke felāveʼi mo Falaone, te pule ʼo Esipito. (Senesi 40:1-4, 9-15; 41:9-14) Pea ko te hau neʼe ina fakanofo ia Sosefo ko te lua pule ʼi Esipito, pea neʼe hoko ai mo tana hāofaki ia te fenua ʼo Esipito mai te hoge. (Senesi 41:37-55) Ko te maʼuli mamahi ʼo Sosefo neʼe kamata ʼi tona taʼu 17 pea lolotoga taʼu e hogofulu-ma-lua tupu neʼe maʼuli mamahi ai! (Senesi 37:2, 4; 41:46) Kae ʼi te ʼu temi mamahi pea mo faka popūla ʼaia, neʼe fakahā aipe e Sehova tona lotoʼofa kia Sosefo ʼo ina puipui ia ia mai te malaʼia pea mo taupau ia ia ki he gāue maʼuhiga ʼi te fakatuʼutuʼu fakaʼatua.
Ko Te Lotoʼofa ʼo Te ʼAtua ʼe Mole Puli Ia
13. (a) Koteā te ʼu faʼahiga lotoʼofa ʼo Sehova ʼe tou maʼu ia Pesalemo 136? (b) Koteā te faka ʼuhiga ʼo te lotoʼofa?
13 Neʼe fakahā liuliuga e Sehova tona lotoʼofa ki te hahaʼi ʼo Iselaele. ʼE ʼui ia Pesalemo 136, ʼaki tona lotoʼofa neʼe ina hāofaki nātou (Vaega 10-15), mo takitaki ia nātou (Vaega 16), pea mo puipui ia nātou. (Vaega 17-20) Neʼe toe fakahā e te ʼAtua tona lotoʼofa ki te ʼu hahaʼi. Ko te tagata ʼaē ʼe ina fakahā tona lotoʼofa ki te hahaʼi, ʼe ina fai ʼaki tona lotolelei moʼo fakahoko he meʼa ʼe ʼaoga. ʼO ʼuhiga mo te lotoʼofa, ʼe ʼui fēnei e te tohi faka Tohi-Tapu: “ ʼE ko he aga ʼe lagolago ki te fakatuputupu ʼo te maʼuli. ʼE ko he tokoni ki he tahi ʼe maʼuli mamahi.” ʼE ʼui e te tagata fai Tohi-Tapu ʼo ʼuhiga mo te aga ʼaia ʼe “ko te maʼuliʼi ʼaia ʼo te ʼofa.”
14, 15. He koʼe ʼe tou tui papau ko Lote neʼe ko te tagata kaugana neʼe ʼofa ki ai te ʼAtua?
14 Ko te ʼu fakamatala ʼaē neʼe tou vakaʼi ia Senesi, ʼe nātou fakahā mai ko Sehova ʼe ina fakahā tuʼumaʼu tona lotoʼofa kia nātou ʼaē ʼe ʼoʼofa kia te ia. Ko Lote, mo Apalahamo, pea mo Sosefo neʼe kehekehe tonatou ʼu ʼaluʼaga pea mo te ʼu fihifihia ʼaē neʼe tau mo nātou. Neʼe nātou heʼe haohaoa, kae neʼe ko te ʼu kaugana neʼe ʼoʼofa ki ai Sehova, pea neʼe ʼaoga kia nātou te tokoni ʼa te ʼAtua. ʼE tou loto fīmālie ʼi tatatou ʼiloʼi ʼaē ko tatatou Tāmai ʼaē ʼe ʼi selo ʼe ina fakahā tona lotoʼofa ki te ʼu hahaʼi feiā.
15 Neʼe fai e Lote te ʼu tonu neʼe mole lelei ʼo iku ai ki te ʼu fihifihia. (Senesi 13:12, 13; 14:11, 12) Kae neʼe ina toe fakahā pe foki te ʼu kalitate maʼuhiga. ʼI te ʼolo age ʼa te ʼu ʼaselo e toko lua ʼa te ʼAtua ki Sotoma, neʼe fakahā age e Lote tana tali kāiga kia nāua. (Senesi 19:1-3) ʼAki te tui neʼe ina fakatokaga ki te ʼu ʼohoana ʼo tona ʼu ʼofafine kua ʼamanaki fakaʼauha ia Sotoma. (Senesi 19:14) ʼE tou maʼu te manatu ʼa te ʼAtua ʼo ʼuhiga mo Lote ia 2 Petelo 2:7-9 (MN ), ʼaē ʼe tou lau fēnei: “[Ko Sehova] neʼe ina fakahāo te tagata agatonu ko Lote, ʼaē neʼe lotomamahi ʼaupito ʼi te aga fakalialia ʼa te hahaʼi ʼaē ʼe nātou meʼa noaʼi te lao—heʼe ko te agatonu ʼaia, ʼi te ʼu meʼa ʼaē neʼe sio kiai pea mo fagono kiai ʼi tana nofo ʼi te lotolotoiga ʼo nātou, neʼe ina fakamamahiʼi tona nefesi ʼi te ʼaho fuli ʼuhi ko tanatou ʼu aga ʼaē ʼe nātou meʼa noaʼi te lao. ʼE ʼiloʼi e Sehova peʼe feafeaʼi te fakahāo mai te ʼahiʼahi te hahaʼi ʼaē ʼe pipiki ki te ʼAtua.” Ei, ko Lote neʼe ko te tagata agatonu, pea ʼe ʼasi mai ʼi te vaega ʼaenī neʼe ko te tagata neʼe pipiki ki te ʼAtua. Ohage ko Lote, ʼe tou maʼu te lotoʼofa ʼo te ʼAtua mo kapau ʼe tou fai “te aga fakamaʼoniʼoni pea mo te ʼu gāue ʼaē ʼe fakaʼiloga ʼaki [tatatou] pipiki ki te ʼAtua.”—2 Petelo 3:11, 12, MN.
16. Koteā te ʼu palalau lelei ʼe fai e te Tohi-Tapu ʼo ʼuhiga mo Apalahamo pea mo Sosefo?
16 ʼE tou mahino lelei ʼaki te fakamatala ia Senesi kapite 24, neʼe felogoi lelei ia Apalahamo mo Sehova. ʼE ʼui ʼi te ʼuluaki vaega ko “Sehova neʼe ina tapuakinaʼi Apalahamo ia meʼa fuli.” Ko te tagata kaugana ʼa Apalahamo neʼe ina ʼui ko Sehova “ko te ʼAtua ʼo toku pule ko Apalahamo.” (Vaega 12, 27) Pea ʼe ʼui e te tisipulo ko Sakopo ko Apalahamo neʼe “tala ʼe faitotonu,” pea neʼe “fakahigoaʼi ko te ‘kaumeʼa ʼo Sehova.’ ” (Sakopo 2:21-23, MN ) Ko te meʼa ʼaia ʼe toe moʼoni ʼo ʼuhiga mo Sosefo. Ko te felogoi lelei ʼa Sehova pea mo Sosefo ʼe fakahā lelei ia Senesi kapite 39. (Vaega 2, 3, 21, 23) Pea ʼo ʼuhiga mo Sosefo, neʼe ʼui fēnei e te tisipulo ko Setefano: “Nee fakatahi te Atua mo ia.”—Gaue 7:9.
17. Koteā te ako ʼe tou lava maʼu mai te ʼu faʼifaʼitaki ʼa Lote, mo Apalahamo pea mo Sosefo?
17 Ko te ʼu hahaʼi ʼaē neʼe hoki tou vakaʼi age neʼe nātou sio ki te lotoʼofa fakaʼatua, neʼe ko te ʼu hahaʼi neʼe nātou felogoi lelei mo Sehova ʼAtua pea neʼe nātou lagolago ki te fakatuʼutuʼu ʼa te ʼAtua ʼi te ʼu faʼahiga ʼaluʼaga kehekehe. Neʼe ʼi ai tonatou ʼu fihifihia neʼe mole feala ke nātou fakatokatoka ʼaki tonatou ʼu mālohi fakatagata. Neʼe tonu ke hāofaki te maʼuli ʼo Lote, ke hoholo atu te hōloga ʼo Apalahamo, pea mo puipui te tuʼulaga ʼo Sosefo. Ko Sehova tokotahi pe ʼaē neʼe ina lava foaki te ʼu meʼa ʼaē neʼe ʼaoga ki te ʼu tagata aga faka lotu ʼaia, pea neʼe ina fai te faʼahi ʼaia ʼaki he ʼu gāue lotoʼofa. Kapau ʼe tou fia maʼu ʼo talu ai te lotoʼofa ʼo Sehova ʼAtua, pea ʼe tonu foki ke tou felogoi lelei mo ia, pea mo tou haga fai tona finegalo.—Esitalasi 7:28; Pesalemo 18:50.
ʼE ʼOfainaʼi Te ʼu Kaugana ʼa Te ʼAtua
18. Koteā ʼaē ʼe fakahā e te ʼu koga tohi faka Tohi-Tapu ʼo ʼuhiga mo te lotoʼofa ʼo Sehova?
18 Ko te lotoʼofa ʼo Sehova “neʼe ina fakafonu te kele,” pea ʼe tou fakafetaʼi ʼi tatatou maʼu te kalitate ʼaia ʼo te ʼAtua! (Pesalemo 119:64) ʼE tou tali ʼaki totatou loto katoa ki te hiva ʼaenī ʼa te tagata fai pesalemo: “Ê! Ke tou fakafetaʼi kia Sehova ʼuhi ko tona lotoʼofa pea mo tana ʼu gāue fakaofoofo ki te ʼu foha ʼo te tagata.” (Pesalemo 107:8, 15, 21, 31) ʼE tou fakafiafia ʼi te fakahā e Sehova tona lotoʼofa ki tana ʼu kaugana ʼaē ʼe ʼoʼofa kia te ia—peʼe ki he tokotahi, peʼe ko he kūtuga. ʼI te faikole, neʼe palalau te polofeta ko Taniela kia Sehova ʼo ina ʼui “ko te ʼAtua moʼoni, ʼe Lahi pea mo Fakaofoofo, ʼe ina taupau te fuakava pea mo te lotoʼofa kia nātou ʼaē ʼe ʼoʼofa kia te ia pea mo nātou ʼaē ʼe nātou taupau tana ʼu fakatotonu.” (Taniela 9:4) Neʼe faikole fēnei te Hau ko Tavite: “Folahi atu tou lotoʼofa kia nātou ʼaē ʼe nātou ʼiloʼi koe.” (Pesalemo 36:10) ʼE tou loto fakafetaʼi ʼi te fakahā e Sehova tona lotoʼofa ki tana ʼu kaugana!—1 Hau 8:23; 1 Fakamatala 17:13.
19. ʼI te alatike ʼaē ka hoa mai, koteā anai te ʼu fehuʼi ka tou vakaʼi?
19 ʼE moʼoni, ʼe tou maʼu te ʼofa ʼo Sehova heʼe ko tatou ko tana hahaʼi! ʼO hilifaki mai ki te ʼofa ʼo te ʼAtua ʼaē neʼe ina fakahā ki te malamanei katoa, ʼe tou maʼu te ʼu tapuakina kehekehe mai te lotoʼofa, peʼe ko te ʼofa agatonu ʼo tatatou Tāmai ʼaē ʼe ʼi selo. (Soane 3:16) Pea tāfito la ʼi te ʼu temi ʼaē ʼe tou faigataʼa ai, ʼe tou maʼu ai te kalitate maʼuhiga ʼaia ʼo Sehova. (Pesalemo 36:7) Kae ʼe tou lava faʼifaʼitakiʼi feafeaʼi te lotoʼofa ʼo Sehova ʼAtua? ʼE tou fakahā koa ʼi totatou maʼuli takitokotahi te kalitate fakaofoofo ʼaia? Ko te ʼu fehuʼi ʼaia pea mo ʼaē ʼe pipiki mai kiai ʼe tou vakaʼi anai ʼi te alatike ʼaē ka hoa mai.
Kei Koutou Manatuʼi Koa?
• Koteā te tahi fakaliliu ʼo te kupu faka Hepeleo ʼaē neʼe fakaliliu ʼaki te kupu “lotoʼofa”?
• Koteā ʼaē ʼe kehekehe ai te lotoʼofa mo te ʼofa pea mo te agatonu?
• Koteā te ʼu ʼaluʼaga ʼaē neʼe fakahā ai e Sehova tona lotoʼofa kia Lote, mo Apalahamo pea mo Sosefo?
• Koteā te fakapapau ʼe tou maʼu mai te ʼu lotoʼofa ʼo Sehova ʼi te temi muʼa?
[Paki ʼo te pasina 13]
ʼE tou ʼiloʼi koa pe neʼe fakahā feafeaʼi e te ʼAtua tona lotoʼofa kia Lote?
[Paki ʼo te pasina 15]
ʼI tona lotoʼofa, neʼe takitaki e Sehova te tagata kaugana ʼa Apalahamo
[Paki ʼo te pasina 16]
Neʼe fakahā e Sehova tona lotoʼofa ʼi tana puipui ia Sosefo