Ke Haga “Te Lao ʼo Te Lotoʼofa” ʼo Puipui Ia Tokotou ʼAlelo

“Neʼe ina ʼavahi tona gutu ʼaki te poto, pea ko te lao ʼo te lotoʼofa ʼe nofo ʼi tona ʼalelo.”—TAAG. 31:26.

1, 2. (a) Ko te kalitātē fea ʼaē ʼe fakalotomālohiʼi te kau ʼatolasio ʼa Sehova ke natou gāueʼi? (b) Koteā ʼaē kā tou vakaʼi anai ʼi te ʼalatike ʼaenī?

ʼI TE logo maʼuhiga ʼaē neʼe maʼu e te Hau ko Lemuele mai tana faʼē, neʼe kau ai ia te kalitātē maʼuhiga ʼo he fafine ʼohoana lelei. Neʼe ʼui fēnei age kiā Lemuele: “Neʼe ina ʼavahi tona gutu ʼaki te poto, pea ko te lao ʼo te lotoʼofa ʼe nofo ʼi tona ʼalelo.” (Taag. 31:1, 10, 26) ʼE matalelei te lotoʼofa ʼaē ʼe haʼu mai te gutu ʼo he fafine ʼe poto, ʼo toe fēia pē kiā nātou fuli ʼaē ʼe natou fia fakafiafia ia te loto ʼo Sehova ʼAtua. (Lau ia Tāʼaga Lea 19:22.) ʼE tonu ke ʼasi ʼi te ʼu palalau ʼa te kau ʼatolasio moʼoni fuli ia tanatou lotoʼofa.

² Koteā koa ia te lotoʼofa? Pea ʼe fakahā kiā ai ia te kalitātē ʼaia? Koteā ʼaē kā tokoni mai ke tou tuku “te lao ʼo te lotoʼofa” ki totatou ʼalelo? ʼE malave feafeaʼi anai te kalitātē ʼaia ki tatatou ʼu felōgoi ʼaē mo totatou fāmili pea mo totatou ʼu tehina mo tuagaʼane fakalaumālie?

Kā Fakahā Ia Te Agalelei ʼUhi Ko Te ʼOfa Moʼoni

3, 4. (a) Koteā koa ia te lotoʼofa? (b) Koteā ʼaē ʼe kehekehe te lotoʼofa ʼi te agalelei māhani ʼaē ʼe maʼu e te hahaʼi?

³ ʼE maʼu ʼi te lotoʼofa ia te ʼu agaaga ʼo te ʼofa pea mo te agalelei. ʼE hā ʼi te lotoʼofa ia te agalelei, ko tona fakaʼuhiga ʼaē ke tou tokaga fakalelei ki niʼihi pea mo fakahā te tokaga ʼaia, ʼaki he ʼu aga ʼe lelei pea mo he ʼu palalau neʼe fakakaukau lelei. Mai tona ʼaluʼaga ʼaē, ʼe toe kau kiai ia te ʼofa, ko te fakahā ʼo te lotoʼofa ʼe fakaʼuhiga ke tou tōkakaga ki te fīmālie ʼo ʼihi heʼe tou ʼoʼofa kiā nātou. Kae ko te haʼuʼaga ʼo te kupu lotoʼofa ʼe mole fakaʼuhiga pē ki te agalelei ʼaē ʼe haʼu mai te ʼofa. ʼE kau kiai ia te agalelei, ko tona fakaʼuhiga ke tou lotolelei pea mo agatonu ʼo fakahā ia te agalelei ki he tahi, ʼo aʼu ki te kua fakahoko kātoa ia te fakatuʼutuʼu ʼo ʼuhiga mo ia ʼaia.

⁴ Kae ʼe ʼi ai te ʼu ʼaluʼaga ʼe kehekehe ai te lotoʼofa ʼi te agalelei. Ko te agalelei ʼaē ʼe maʼu māhani e te hahaʼi, ʼe feala hona fakahā ki ni hahaʼi kehe. Ko te ʼapositolo ko Paulo pea mo te toko 275 hahaʼi ʼaē neʼe ʼafāsia mo ia, neʼe natou maʼu te faʼahiga agalelei ʼaia mai te hahaʼi ʼaē neʼe nofo ʼi te motu ʼo Maleta, ko te hahaʼi neʼe mole feʼiloʼiʼaki mo nātou. (Gāue 27:37–28:2) Kae ʼo ʼuhiga leva ia mo te lotoʼofa ʼe pipiki ki te ʼofa agatonu ʼe femaʼuʼaki e niʼihi neʼe kua natou maʼu he ʼu felōgoi lelei.a Ko te faʼahi ʼaia neʼe fakahā e te hahaʼi Kenite ki “te ʼu foha fuli ʼo Iselaele ʼi te temi ʼaē neʼe natou hake ai mai Esipito.”—1 Sam. 15:6.

ʼE Maʼuhiga Ia Te Metitāsio Pea Mo Te Faikole

5. Koteā ʼaē kā tokoni mai ke tou lolomi totatou ʼalelo?

⁵ ʼE mole faigafua hatatou fakahā ia te lotoʼofa ʼi tatatou ʼu palalau. ʼO ʼuhiga mo te ʼalelo, neʼe ʼui fēnei e te tisipulo ko Sake: “ ʼE mole he tagata ʼe feala ke ina puleʼi [te ʼalaelo]. ʼE ko he meʼa ia ʼe kovi, ʼe vale ia, ʼe fonu ia ko te kafo kona ʼe feala ke ina matehi he tahi.” (Sake 3:8) Koteā ʼaē ʼe feala ke tokoni mai ke tou lolomi te koga ʼaia ʼo totatou sino, ʼaē ʼe faigataʼa ʼaupitō hona lolomi? Ko te ʼu palalau ʼa Sesu ki te kau takitaki lotu ʼi tona temi, ʼe tokoni mai ke tou mahino ki te faʼahi ʼaia. Neʼe ina ʼui fēnei: ‘ ʼAki te mahu ʼo te loto ʼe palalau ai te gutu.’ (Mat. 12:34) Ke lava puipui totatou ʼalelo e te lotoʼofa, ʼe tonu ke tou fakahū te kalitātē ʼaia ki totatou loto. Tou vakaʼi age muʼa peʼe tokoni feafeaʼi mai te metitāsio pea mo te faikole ke tou fai te faʼahi ʼaia.

6. He koʼē ʼe tonu ke tou metitāsioʼi ʼaki he loto fakafetaʼi ia te ʼu gāue lotoʼofa ʼa Sehova?

⁶ ʼE ʼui ʼi te Tohi-Tapu, ko te ʼAtua ko Sehova ʼe “mahu ʼi te lotoʼofa.” (Eke. 34:6) Neʼe hiva fēnei ia te tagata fai pesalemo: “Ko tou lotoʼofa, Ê Sehova, neʼe fonu ʼi te kele.” (Pes. 119:64) ʼE lahi te ʼu fakamatala ʼi te Tohi-Tapu ʼo ʼuhiga mo te fakahā e Sehova ia tona lotoʼofa ki tana ʼu kaugana. Kapau ʼe tou toʼo ia he temi moʼo metitāsioʼi ʼaki he loto fakafetaʼi ia te ‘ ʼu faʼahiga gāue ʼaē neʼe fai e Sehova,’ pea ʼe feala ke fakatuputupu ai iā tātou hatatou fia gāueʼi ia te kalitātē fakaʼatua ʼaia.—Lau ia Pesalemo 77:12.

7, 8. (a) Koteā te lotoʼofa ʼaē neʼe fakahā e Sehova kiā Lote pea mo tona fāmili? (b) Koteā ʼaē neʼe logoʼi e Tavite ʼi te fakahā age ʼaē e Sehova kiā ia tona lotoʼofa?

⁷ Ohagē lā, kotou fakakaukauʼi age muʼa pe neʼe feafeaʼi ia te fakaʼāteainaʼi e Sehova ia te fakafotu ʼa Apalahamo ʼaē ko Lote mo tona fāmili, ʼi te temi ʼaē neʼe ina tauteaʼi ai Sotoma, te kolo ʼaē neʼe natou māʼuʼuli ai. ʼI te fakaovi mai ʼo te temi fakaʼauha, ko te ʼu ʼāselo ʼaē neʼe ʼomai kiā Lote, neʼe natou uga ia ia ke ina toʼo tona fāmili pea ke natou foimo mavae ʼi te kolo. ʼE ʼui fēnei ʼi te Tohi-Tapu: “ ʼUhi ko tana fakatuatuai, neʼe ʼofa ai Sehova kiā ia, pea neʼe puke e te ʼu [ʼāselo] tona nima, mo te nima ʼo tona ʼohoana, pea mo te ʼu nima ʼo tona ʼu ʼofafine e lua, pea neʼe natou fakahū nātou ki tuʼa, ʼo ʼave ki te tuʼa kolo.” ʼE mole malave koa ʼi totatou loto mokā tou fakakaukauʼi ia te fakatuʼutuʼu haofaki ʼaia neʼe fai e te ʼAtua, pea mo uga ai tātou ke tou mahino neʼe ko he faʼahiga fakahā ʼaia ʼo tona lotoʼofa?—Sen. 19:16, 19.

⁸ Tou toe fakatokagaʼi mo te faʼifaʼitaki ʼa te Hau ko Tavite ʼo te Iselaele ʼāfea, ʼaē neʼe hiva fēnei: “[Ko Sehova] aē ʼe ina fakamolemole tau ʼu agahala fuli, . . . ʼe ina fakamālōlō tou ʼu mahaki fuapē.” Neʼe lagi loto fakafetaʼi Tavite ʼi te fakamolemole ʼaē e Sehova ia tana agahala ʼaē mo Pati-Sepa! Neʼe fakavikiviki kiā Sehova, ʼo ʼui fēnei: “Ohagē pē ko te māʼoluga ʼo te lagi ʼi te kele, ko tona finegaloʼofa ʼe māʼoluga ia ʼo ʼuhiga mo nātou ʼaē ʼe manavasiʼi kiā te ia.” (Pes. 103:3, 11) Ko te metitāsioʼi ʼo te ʼu ʼaluʼaga ʼaia pea mo ʼihi age fakamatala Fakatohi-tapu, ʼe fonu ai ʼotatou loto ʼi te loto fakafetaʼi ki te lotoʼofa ʼo Sehova, pea mo uga tātou ke tou fakavikiviki pea mo fakafetaʼi kiā te ia. Kapau ʼe lahi totatou loto fakafetaʼi, pea ʼe toe lahi age mo tatatou fia faʼifaʼitakiʼi ʼaē ia te ʼAtua moʼoni.—Efe. 5:1.

9. Koteā te tupuʼaga mālohi ʼaē ke fakahā ai e te kau ʼatolasio ʼa Sehova ia te lotoʼofa ʼi tonatou maʼuli ʼaē ʼi te ʼaho fuli?

⁹ ʼE fakahā ʼi te ʼu faʼifaʼitaki Fakatohi-tapu, ko Sehova ʼe lotoʼofa, peʼe ʼofa agatonu, kiā nātou ʼaē kua felōgoi lelei mo ia. ʼE feafeaʼi kiā nātou ʼaē ʼe mole natou maʼu he ʼu felōgoi fēia mo te ʼAtua maʼuli? ʼE loto fefeka koa ia Sehova peʼe agakovi kiā nātou? Kailoa ia. ʼE ʼui fēnei iā Luka 6:35: “[Ko te ʼAtua ʼe] agalelei ia ki te kau maʼuli galo pea mo te kau agakovi.” “[ʼE] ina fakahopo ake tona laʼā ki te kau agakovi pea mo te kau agalelei, pea ʼe ina fakatō te ʼua ki te kau agatonu pea mo te kau heʼe agatonu.” (Mat. 5:45) ʼI muʼa ʼo tatatou ako te moʼoni pea mo maʼuliʼi, neʼe agalelei te ʼAtua kiā tātou, ko te agalelei ʼaia ʼaē ʼe ina fakahā māhani ki te hahaʼi fuli. Kae ʼi tatatou kua liliu leva ʼaē ko tana ʼu kau ʼatolasio, ʼe ina fakahā mai kiā tātou ia tona ʼofa agatonu, peʼe ko tona lotoʼofa mālohi. (Lau ia Isaia 54:10.) ʼE tou loto fakafetaʼi ʼaupitō ki te faʼahi ʼaia! Pea ʼe ko he tupuʼaga mālohi ʼaia, ke tou fakahā ai ʼi tatatou ʼu palalau ia te lotoʼofa, ʼo fēia pē ki ʼihi atu faʼahi ʼo totatou maʼuli ʼaē ʼi te ʼaho fuli!

10. He koʼē ko te faikole ʼe ko he faʼahi maʼuhiga moʼo tokoni mai kiā tātou ke liliu te lotoʼofa ko he kalitātē ʼe tou maʼu ʼi totatou ʼulugaaga?

¹⁰ Ko te faikole ʼe ko he faʼahi maʼuhiga moʼo tokoni mai kiā tātou ke tou fakatuputupu te lotoʼofa. Koteʼuhi ko te ʼofa pea mo te agalelei, ʼaē ʼe ko te ʼu koga ʼo te lotoʼofa, ʼe ko he ʼu kalitātē ʼo te fua ʼo te laumālie māʼoniʼoni ʼo Sehova. (Kal. 5:22) ʼE tou lava fakahū te lotoʼofa ki ʼotatou loto ʼaki hatatou tuku ia tātou totonu ke takitaki e te laumālie ʼaia. Ke tou maʼu fakahagatonu ia te laumālie māʼoniʼoni ʼo Sehova, ʼe tonu ke tou kole te laumālie ʼi te faikole. (Luka 11:13) ʼE ʼaoga ke tou kole liuliuga ia te laumālie ʼo te ʼAtua pea mo tali ia tana takitaki. ʼEī, ko te metitāsio pea mo te faikole ʼe maʼuhiga mo kapau ʼe tou fia maʼu te lao ʼo te lotoʼofa ʼi totatou ʼalelo.

Ke Femaʼuʼaki e Te Taumātuʼa Te Lotoʼofa ʼi Tanā ʼu Felōgoi

11. (a) ʼE tou ʼiloʼi feafeaʼi ʼe loto e Sehova ke fakahā e te ʼu tagata ʼohoana ia te lotoʼofa ki ʼonatou hoa? (b) Ko te ʼaluʼaga fea ʼaē ʼe feala ai ki te lao ʼo te lotoʼofa ke tokoni ki he tagata ʼohoana ke ina puipui tona ʼalelo?

¹¹ Neʼe tokoniʼi fēnei e te ʼapositolo ko Paulo te ʼu tagata ʼohoana: “Ke kotou haga ʼofa ki ʼokotou ʼohoana, ohagē ko te ʼofa ʼa Kilisito ki te kōkelekāsio pea mo ina foaki ia ia totonu maʼa te kōkelekāsio.” (Efe. 5:25) Neʼe toe fakamanatuʼi age kiā nātou e Paulo te ʼu palalau ʼaē neʼe fai e Sehova kiā Atama mo Eva. ʼE tohi fēnei e te ʼapositolo: “ ʼE mavae anai te tagata ʼi tana tamai pea mo tana faʼē, pea ʼe pipiki anai ki tona ʼohoana, pea ʼe nā liliu anai ko te kakano e tahi.” (Efe. 5:31) ʼE mahino ia, ʼe loto e Sehova ke nofo agatonu te ʼu tagata ʼohoana ki ʼonatou hoa, ʼo fakahā tuʼumaʼu kiā nātou tonatou lotoʼofa. Ko he tagata ʼohoana ʼe takitaki e te ʼofa agatonu ia tana ʼu palalau, ʼe mole ina fakahā te ʼu vaivaiʼaga ʼo tona ʼohoana ʼi muʼa ʼo te kaugamālie peʼe ina fai he ʼu palalau kovi ʼo ʼuhiga mo ia. ʼE fiafia ia ʼi tona vikiʼi. (Taag. 31:28) Kapau ʼe hoko he ʼu fihifihia ʼi tanā ʼu felōgoi fakataumātuʼa, ko te lotoʼofa ʼe ina uga te tagata ʼohoana ke ina lolomi tona ʼalelo ke mole ina fakalainoaʼi tona hoa ʼaki tana ʼu palalau.

12. ʼE fakahā feafeaʼi e he fafine ʼohoana ʼi tana palalau, ko te lao ʼo te lotoʼofa ʼe ina puleʼi tona ʼalelo?

¹² ʼE tonu foki ki te lao ʼo te lotoʼofa ke ina takitaki te ʼalelo ʼo te fafine ʼohoana. ʼE mole tonu ke hā ʼi tana ʼu palalau te manatu ʼa te mālama. ʼI tana “fakaʼapaʼapa lahi ki tona ʼohoana,” ʼe palalau lelei ʼo ʼuhiga mo tona hoa ʼi muʼa ʼo te kaugamālie pea ko te fakaʼapaʼapa ʼa te hahaʼi ki tona ʼohoana ʼe toe lahi age anai, logolā tana kua maʼu tanatou fakaʼapaʼapa ʼaē ki ai. (Efe. 5:33) ʼE mole ina fia fakasiʼisiʼi te fakaʼapaʼapa ʼaē ʼo tanā fānau ki tanatou tamai, ʼo mole fakafeagai anai kiā ia peʼe fakafihiʼi hana manatu ʼi muʼa ʼo tanā fānau. Ko te ʼu fihifihia ʼaia, ʼe ina fakatokatoka mokā ko nāua toko lua pē. ʼE ʼui fēnei ʼi te Tohi-Tapu: “Ko te fafine ʼaē ʼe poto moʼoni neʼe ina laga tona fale.” (Taag. 14:1) Ko tona loto fale ʼe ko he koga meʼa fakafiafia pea mo fakalotofīmālie ki te fāmili kātoa.

13. Kofea tāfito ʼaē ʼe tonu ke mālohi ai te lao ʼo te lotoʼofa, pea ʼe lava fakahoko feafeaʼi?

¹³ Tatau aipē peʼe ko nāua ʼāteaina pē ʼi tonā loto fale, kae ko te taumātuʼa ʼe tonu ke hoko atu tanā fefakaʼapaʼapaʼaki ʼi tanā ʼu faʼahiga palalau. Neʼe tohi fēnei e Paulo: “Kotou situʼa kiā meʼa fuli: te ʼita, te agakovi, te lea kovi, te ʼu palalau heʼeʼaoga ʼaē ʼe haʼu mai tokotou gutu.” Pea neʼe ina toe ʼui fēnei: “Kotou kofuʼi te ʼu ʼofa mamahi ʼo te manavaʼofa, pea mo te agalelei, te manatu agavaivai, te agamalū pea mo te kātaki fualoa. . . . Kotou kofuʼi ia te ʼofa, he ko he noʼo haohaoa ia ki te logotahi.” (Kol. 3:8, 12-14) Kā māhani te fānau ʼi te logo ʼi te loto fale ki he ʼu palalau ʼe fai ʼaki te ʼofa pea mo te agalelei, pea ʼe mole natou faiga pē anai ke natou faʼifaʼitakiʼi kae ʼe lagi natou toe fia faʼifaʼitakiʼi anai ia te faʼahiga palalau ʼo tanatou ʼu mātuʼa.

14. Ko te ʼaluʼaga fea ʼaē ʼe feala ai ki te ʼu pule fāmili ke natou fakaʼaogaʼi tonatou ʼalelo moʼo fakalotofīmālieʼi ia nātou ʼaē ʼe natou tōkakaga ki ai?

¹⁴ Neʼe tohi fēnei e te tagata fai pesalemo ʼo ʼuhiga mo Sehova: “ ʼOfa pē ke fakalotofīmālieʼi au e tou lotoʼofa.” (Pes. 119:76) Ko he faʼahi fakatalakitupua ʼaē ʼe fakafīmālieʼi ai e Sehova ia tana hahaʼi, ʼe ko tana foaki ʼaē kiā nātou he ʼu tokoni pea mo ina takitaki nātou. (Pes. 119:105) ʼE lava maʼu feafeaʼi e te ʼu pule fāmili ia te ʼu fua lelei mai te faʼifaʼitaki ʼo tatatou Tamai ʼaē ʼe ʼi selō pea mo fakaʼaogaʼi tonatou ʼalelo moʼo fakalotofīmālieʼi ia nātou ʼaē ʼe natou tōkakaga ki ai? ʼE natou lava fai te faʼahi ʼaia, ʼaki hanatou foaki kiā nātou ia he takitaki ʼe ʼaoga pea mo he fakalotomālohi. ʼE ko he faigamālie lelei ia te Tauhi Fakafāmili ʼaē ʼe fai ʼi te afiafi ke maʼu ai he ʼu koloa fakalaumālie maʼuhiga!—Taag. 24:4.

Kotou Fakahā Te ʼOfa Agatonu Ki Tokotou ʼu Tehina Mo Tuagaʼane ʼi Te Tui

15. ʼE lava fakaʼaogaʼi feafeaʼi e te ʼu tagata ʼāfea pea mo ʼihi atu ʼu tehina mo tuagaʼane kua fakapotopoto ʼi te faʼahi fakalaumālie tonatou ʼalelo moʼo puipui niʼihi ʼi te kōkelekāsio?

¹⁵ Neʼe faikole fēnei te Hau ko Tavite: “Ke taupau tuʼumaʼu au e tou lotoʼofa pea mo tau moʼoni.” (Pes. 40:11) Ko te ʼu tagata ʼāfea pea mo ʼihi tehina mo tuagaʼane kua fakapotopoto ʼi te faʼahi fakalaumālie ʼi te kōkelekāsio, ʼe natou lava faʼifaʼitakiʼi feafeaʼi Sehova ʼi te faʼahi ʼaia? ʼE mahino ia ʼaki tatatou fakaʼaogaʼi totatou ʼalelo moʼo fakahā he manatu Fakatohi-tapu, ʼe tou fakahā ai ia te lotoʼofa.—Taag. 17:17.

16, 17. Ko te ʼu faʼahi fea ʼaē ʼe feala ai ke tou fakahā ko tatatou ʼu palalau ʼe takitaki ʼaki te lao ʼo te lotoʼofa?

¹⁶ Koteā ʼaē ʼe tonu anai ke tou fai mo kapau ʼe tou fakatokagaʼi ʼe mole mulimuli he Kilisitiano ki te ʼu pelesepeto ʼo te Tohi-Tapu? ʼE mole uga anai koa tātou e te lotoʼofa ke tou fakaʼaogaʼi totatou ʼalelo moʼo fakatonutonuʼi ia ia? (Pes. 141:5) Kapau ʼe tou ʼiloʼi he agahala mamafa neʼe fai e hokita tehina, ʼe uga tātou e te ʼofa agatonu ke tou fakalotomālohiʼi te tagata agahala ke ina “pāui ke ʼomai kiā te ia te ʼu tagata ʼāfea ʼo te kōkelekāsio” ke feala hanatou “faikole ʼo ʼuhiga mo ia, ʼo natou tākai ia ia ʼaki te lolo ʼi te huafa ʼo Sehova.” (Sake 5:14) Kapau ʼe mole fai e te tagata agahala te faʼahi ʼaia, pea ʼe mole tou lotoʼofa anai ki ai ʼi tatatou mole fakahā tana agahala. Ko ʼihi iā tātou ʼe feala ke natou lotovaivai, mo logoʼi ʼe natou tokotahi, peʼe natou mamahi ʼi tanatou manatu ʼaē ʼe mole kei tuha mo nātou te moʼoni, peʼe kua lahi fau tanatou lotovaivai. ʼE tou fakahā ko te lao ʼo te lotoʼofa ʼe nofo ʼi totatou ʼalelo, ʼaki tatatou “fai he ʼu palalau fakafīmālie ki te kau nefesi lotovaivai.”—1 Tes. 5:14.

¹⁷ Koteā ʼaē ʼe tonu ke tou fai mokā ʼe feʼaveʼaki he ʼu logo e te ʼu fili ʼo te ʼAtua ʼo ʼuhiga mo ʼotatou tehina? ʼE mole tonu ke tou loto mahalohalo ʼo ʼuhiga mo te nofo agatonu ʼaē ʼo totatou ʼu tehina, kae ʼe tonu ke tou situʼa ki te ʼu taʼi palalau ʼaia, ʼo mole tou tali age kiā nātou peʼe tou kumi kiā ia ʼaē ʼe ina feʼāveʼaki te ʼu logo ʼaia, mo kapau ʼe fakapotopoto, peʼe ʼe ina ʼiloʼi papau ʼe ʼi ai he fakatafitoʼaga ʼo tana ʼu palalau ʼaia. Kapau ko te ʼu fili ʼo te hahaʼi ʼo te ʼAtua ʼe natou kumikumi ke natou ʼiloʼi peʼe ʼifea totatou ʼu tehina ke natou gaohi koviʼi, pea ko totatou ʼofa agatonu ʼaē ki totatou ʼu tehina ʼe ina uga tātou ke mole tou fakahā te faʼahi ʼaia kiā nātou.—Taag. 18:24.

Ko Te Tagata ʼAē ʼe “Lotoʼofa ʼe Ina Maʼu Anai Te Maʼuli”

18, 19. He koʼē ʼe mole tonu ke puli ʼi totatou ʼalelo ia te lao ʼo te lotoʼofa ʼi tatatou ʼu felōgoi ʼaē mo totatou ʼu tehina mo tuagaʼane fakalaumālie?

¹⁸ ʼE tonu ke hā tokita ʼofa agatonu ʼi te ʼu faʼahi fuli ʼo tatatou ʼu felōgoi ʼaē mo ʼotatou ʼu tehina ʼaē ʼe tauhi kiā Sehova. Māʼiapē lā mo te ʼu ʼaluʼaga faigataʼa, ʼe mole tonu ke puli ʼi totatou ʼalelo ia te lao ʼo te lotoʼofa. ʼI te temi ʼaē neʼe liliu ai te lotoʼofa ʼo te ʼu foha ʼo Iselaele “[ohagē] ko te hahau ʼaē ʼe puli vave,” neʼe lotomamahi Sehova. (Osea 6:4, 6) ʼI te tahi age faʼahi, ʼe fiafia Sehova ʼi te fakahā tuʼumaʼu ʼaē ʼo te lotoʼofa. Tou vakaʼi age muʼa peʼe tapuakinaʼi feafeaʼi e te ʼAtua ia nātou ʼaē ʼe natou muliʼi te faʼahi ʼaia.

¹⁹ ʼE ʼui fēnei iā Tāʼaga Lea 21:21: “Ko ʼaē ʼe ina kumi fakamālotoloto te faitotonu pea mo te lotoʼofa ʼe ina maʼu anai te maʼuli, te faitotonu pea mo te kolōlia.” ʼI te ʼu tapuakina ʼaē ʼe maʼu anai e he tahi, ʼe ina maʼu anai te maʼuli, ʼe mole ko he maʼuli ʼe nounou kae ko he maʼuli ʼe mole ʼi ai anai hona gataʼaga. ʼE tokoni Sehova ki ai ke ina “puke maʼu ia te maʼuli moʼoni.” (1 Tim. 6:12, 19) Koia, tou “fefakahāʼaki iā tātou te lotoʼofa.”—Sakl. 7:9.

[Nota]

ʼE Feala Koa Hakotou Fakamahino?

• ʼE feafeaʼi anai hakotou fakamahino ia te lotoʼofa?

• Koteā ʼaē kā tokoni mai anai ke tou maʼu ʼi totatou ʼalelo ia te lao ʼo te lotoʼofa?

• ʼE lava fakahā feafeaʼi e te ʼu taumātuʼa tonatou ʼofa agatonu ʼi tanatou ʼu palalau?

• Koteā ʼaē ʼe hā ʼaki ai ko te lao ʼo te lotoʼofa ʼe nofo ʼi totatou ʼalelo, mokā tou felōgoi mo totatou ʼu tehina mo tuagaʼane fakalaumālie?

[Paki ʼo te pasina 25]

Neʼe vikiʼi e Tavite ia te lotoʼofa ʼo Sehova

[Paki ʼo te pasina 26]

ʼE kotou fai tuʼumaʼu koa takotou Tauhi Fakafāmili ʼi te afiafi?