Tonatou Maʼuli
Neʼe Fakapale He Neʼe Pipiki Ki Te ʼAtua
NEʼE FAKAMATALA E WILLIAM AIHINORIA
Neʼe ʼau ʼala ake ʼi te vaeluaʼi po ʼuhi ko te tau tagi ʼa Papa. Neʼe femafulifuliʼaki mo puke tona fatu. Ko Mama, mo toku tuagaʼane lahi pea mo ʼau neʼe mātou tutuʼu ʼi ʼona tafa. ʼI te hage kua siasiaʼa tona mamahi, neʼe tuʼu ake ʼo heka, mo mānava mālohi, pea mo ʼui fēnei: “ ʼE gata pe ki te kau Fakamoʼoni ʼa Sehova ʼe nātou maʼu te tokalelei ʼi te kele nei.” Neʼe fakapunamaʼuli tana palalau, kae neʼe malave kia ʼau koteʼuhi ko taku hoki logoe ki te kau Fakamoʼoni ʼa Sehova. Neʼe ʼau fia ʼiloʼi pe koteā te faka ʼuhiga ʼo tana palalau.
KO TE meʼa ʼaia neʼe hoko ʼi te taʼu 1953 kae neʼe ʼau taʼu ono. Neʼe ʼau tupu ʼi Ewossa, ʼi te potu uesite, ko he kiʼi kolo ʼe gāue kele ai te hahaʼi, pea ko taku tāmai neʼe lahi tona ʼu ʼohoana. Neʼe ʼau tuʼulaga lua ʼi te famili, kae neʼe ko ʼau te ʼuluaki tamasiʼi tagata ʼo te famili ʼo te ʼu ʼohoana e tolu pea mo te fānau e toko 13 ʼa Papa. Neʼe mātou nonofo fuli ʼi te ʼapi ʼo tamatou kui tagata. Neʼe toe nofo ai foki ia tamatou kui fafine pea mo te ʼu tēhina e toko tolu ʼa Papa mo ʼonatou famili.
Neʼe fakaʼofaʼofa toku maʼuli ʼi taku kei veliveli. Neʼe tupu tamatou maʼuli fakaʼofaʼofa koteʼuhi neʼe mahamahaki ia Papa. Neʼe mahaki fatu, pea neʼe mate pe ʼi te mahaki ʼaia hili kiai te ʼu taʼu. Ko te ʼu faitoʼo fuli ʼe lavaʼi e he famili Afelika masiva, neʼe mole feala ke lelei ai tona mahaki ʼaē neʼe mole ʼiloʼi tona tupuʼaga. Neʼe lahi te ʼu po neʼe mātou nonofo ai ia tafa ʼo Papa mokā femafuliʼaki ʼi tona mamahi, ʼo aʼu pe ki te ʼuʼua ʼo te moa ʼi te ʼaho ake. ʼI tana kumi he faitoʼo ki tona mahaki, neʼe tau ʼalu mo Mama, kae nā tuku ia ʼau mo te famili ke leʼoleʼo kiai tamatou kui fafine.
Neʼe maʼuli tomatou famili ki tamatou to magisi pea neʼe mātou fakatau te ʼufi, te mānioka, pea mo te ʼu faʼahiga niu liliki. Neʼe mātou toe tae foki mo te kausu moʼo fakalahilahi age te kiʼi falā ʼaē neʼe mātou maʼu. Neʼe mātou kai tāfito te ʼufi. Neʼe mātou kai ʼufi ʼi te uhu, pea mātou kai hoʼatā ki te ʼufi neʼe kili ke lailai, pea mātou toe kai ʼufi ʼi te afiafi. ʼI ʼihi temi, ʼe fetogi tamatou meʼa kai, mokā mātou kai he ʼu fusi neʼe tunu.
ʼE lahi tomatou temi ʼe fakaʼaogaʼi ki te tauhi ki te ʼu kui ʼaē kua mamate. Neʼe momoli e te famili te meʼa kai ʼi te ʼu kauʼi ʼakau ʼe pipiki ai te ʼu gaʼasi figota. Neʼe tauhi foki ia Papa ki te tamapua, moʼo tekeʼi te ʼu laumālie kovi pea mo te ʼu hahaʼi gaohi meʼa fakatemonio.
ʼI toku taʼu nima, neʼe mātou mavae faka temi mai tomatou kolo ʼo mātou ʼolo ki te kolo ʼe tuʼu ia kilometa e 11, ʼe gāue kele ai te hahaʼi. Neʼe maʼu ai e Papa te mahaki ʼo te filaire de Médine (ko te kiʼi ʼunufe ʼe hū ki te sino), ko he tahi ʼaia mahaki neʼe hilifaki ki tona mamahi fatu. Neʼe mole lava gāue lolotoga te ʼaho, pea ko tona mamahi fatu neʼe fai hoholo ʼo aʼu ki te pōʼuli. Neʼe ʼau maʼu ai te faʼahiga mahaki ko te chique, ʼe hage ko te typhus. ʼUhi ko te faʼahi ʼaia, neʼe mātou maʼuʼuli ʼaki te ʼu meʼa ʼofa neʼe foaki mai e te ʼu famili. ʼI tamatou mole fia mamate ʼi te pakupaku pea mo māsisiva, neʼe mātou toe liliu ki tomatou kolo ko Ewossa. Neʼe mole loto e Papa ʼo ʼuhiga mo ʼau, tona foha ʼuluaki, ke ʼau liliu ko he tagata ʼe gāue kele pe moʼo taupau tona maʼuli. Maʼa ia, kapau ʼe lelei taku ako pea ʼe feala anai ke ʼau hikihiki toku maʼuli pea mo faka fealagia ke ʼau taupau toku ʼu tēhina mo tuagaʼane.
Ko Taku Felāveʼi Mo Te ʼu Lotu Kehekehe
ʼI tamatou toe liliu ki tomatou kolo, neʼe ʼau kamata ako. Neʼe ʼau felāveʼi ai mo te ʼu lotu ʼo te Keletiate. ʼI te ʼu taʼu 1950, ko te ako faka papālagi neʼe pipiki ki te lotu ʼa te ʼu puleʼaga papālagi ʼaē neʼe nātou puleʼi te fenua. Neʼe ʼau ako ʼi te faleako Katolika, koia neʼe tonu ai ke ʼau Katolika.
ʼI te 1966, ʼi toku taʼu 19, neʼe fakahū ʼau ki te faleako lahi Polotesita ʼi te kolo ʼo Ewohimi, ʼe vaha ia kilometa e 8 mo Ewossa. Neʼe ʼau fetogi ai taku lotu. Neʼe ʼau ako ʼi te faleako Polotesita, koia neʼe mole loto ai e te ʼu patele Katolika ke ʼau ʼalu age ki te ʼu misa ʼo te ʼAhotapu.
Ko te temi ʼaia ʼo taku ako ʼi te faleako Polotesita ʼaē neʼe ʼau ʼuluaki sio ai ki te Tohi-Tapu. Logope neʼe ʼau haga ʼalu ki te ʼēkelesia Katolika, kae neʼe ʼau lau te Tohi-Tapu ʼi te ʼAhotapu fuli ʼi te hili misa. Neʼe ʼau leleiʼia te ʼu akonaki ʼa Sesu Kilisito, pea neʼe ʼau fia fetogi toku maʼuli ke ʼau maʼuli faka lotu. ʼI te lahi ʼo taku lau te Tohi-Tapu, neʼe tupu ai taku fakalialia ki te malualoi ʼo ʼihi takitaki lotu mo te maʼuli heʼemaʼa ʼo te tokolahi ʼo te hahaʼi fakalogo. Neʼe ʼau sio ai ko nātou ʼe nātou ʼui ko te kau Kilisitiano, ʼe kehe ʼosi tanatou ʼu aga mo te ʼu meʼa neʼe akoʼi pea mo fai e Sesu Kilisito mo tana kau tisipulo.
Neʼe ʼi ai te ʼu faʼahiga meʼa neʼe ʼau punamaʼuli ai. ʼI te tahi lakaga neʼe ʼau ʼalu ki te fale koloā ʼo te ʼēkelesia, moʼo toʼo ai he lōsalio, pea neʼe ʼau sio ki te ʼu meʼa fakatemonio ʼe tautau ʼi te hūʼaga. ʼI te tahi lakaga, neʼe faigaʼi e te tagata pule ʼo te faleako Polotesita ke ina fakaʼalikiʼi ʼau. Neʼe hoki ʼau ʼiloʼi age ki muli age ʼe ko he tagata ʼe moe mo te hahaʼi tagata pea neʼe kua ina fakaʼalikiʼi ʼihi. Neʼe ʼau fakakaukauʼi te ʼu faʼahi ʼaia, pea mo feʼekeʼaki, ‘ ʼE tali koa e te ʼAtua he ʼu lotu ʼe mole fai he ʼu fakatūʼa ki te ʼu hahaʼi pea mo te kau takitaki ʼaē ʼe nātou fai he ʼu agahala mamafa?’
ʼE ʼAu Fetogi Lotu
Kae neʼe ʼau leleiʼia te lau ʼo te Tohi-Tapu, pea neʼe ʼau hoko atu tona lau. Neʼe ko te temi ʼaia neʼe ʼau kamata fakakaukauʼi ai te ʼu palalau ʼaē neʼe fai e Papa kua hili nei kiai taʼu e 15: “ ʼE gata pe ki te kau Fakamoʼoni ʼa Sehova ʼe nātou maʼu te tokalelei ʼi te kele nei.” Kae neʼe ʼau tuʼania koteʼuhi ko te kau Fakamoʼoni ʼi toku faleako neʼe fakalainoaʼi nātou pea neʼe ʼi ai te ʼu uhu neʼe fakatūʼa ai nātou heʼe mole nātou kau ki te ʼu faikole uhu. Pea neʼe ʼi ai tanatou ʼu akonaki neʼe mata faikehe kia ʼau. Ohage la, neʼe faigataʼa kia ʼau haku tui ʼe gata pe ki te toko 144 000 ʼe ʼolo anai ki selo. (Apokalipesi 14:3) Mai te ʼaluʼaga ʼaē neʼe ʼau fia ʼalu ki selo, neʼe ʼau feʼekeʼaki peʼe kua katoa ʼapē te hahaʼi ʼaia ʼi muʼa ʼo taku tupu.
Neʼe ʼiloga lelei te kehe ʼa te kau Fakamoʼoni ʼa Sehova ʼi tanatou aga. Neʼe mole nātou fai he ʼu aga heʼeʼaoga pea mo agamālohi mo te kau tūpulaga ʼaē ʼi te faleako. Maʼa ʼaku, neʼe nātou ʼāteaina moʼoni mai te mālama, ohage ko te meʼa ʼaē neʼe ʼau lau ʼi te Tohi-Tapu ʼo ʼuhiga mo te aga ʼaē ʼe tonu ke maʼu e nātou ʼaē ʼe nātou maʼuliʼi te lotu moʼoni.—Soane 17:14-16; Sakopo 1:27.
Neʼe ʼau fakatotonu ke ʼau fai he tahi ʼu kumi. ʼI Sepetepeli 1969, neʼe ʼau maʼu te tohi “La vérité qui conduit à la vie éternelle.” ʼI te māhina neʼe hoa mai kiai, neʼe kamata taku ako e te pionie, ko te higoa ʼaia ʼe fakatoʼo ki te kau Fakamoʼoni ʼa Sehova ʼaē ʼe gāue temi katoa. ʼI taku leleiʼia taku ʼuluaki ako, neʼe ʼau kamata lau te tohi Vérité ʼi te po ʼo te Moeaki, pea neʼe ʼau fakaʼosi tona lau ʼi te ʼAhotapu hili hoʼatā. Neʼe ʼau kamata atu aipe te fakamatala ki toku ʼu kaugā ako ia te ʼu meʼa fakaofoofo ʼaē neʼe ʼau lau. Neʼe ʼui e te kau ako pea mo te kau faiako kua ʼau vale ʼuhi ko taku lotu foʼou. Kae neʼe ʼau ʼiloʼi neʼe mole ʼau vale.—Gaue 26:24.
Neʼe fakahā ki taku ʼu mātuʼa, ʼe ʼau faka mafola te lotu foʼou. Neʼe nā kole mai ke ʼau foimo liliu age ki fale ke nātou ʼiloʼi pe koteā toku fihifihia. Neʼe mole ʼi ai he tahi ke ʼau kumi tokoni ki ai, koteʼuhi neʼe kua ʼolo fuli te kau Fakamoʼoni ʼa Sehova ki tanatou fakatahi faka tisitilike ʼi Ilesha. ʼI taku tau ki fale, neʼe fai mai te ʼu tuʼuga fehuʼi pea mo te ʼu manuki e taku faʼe pea mo te ʼu famili. Neʼe ʼau faigaʼi fakamalotoloto ke ʼau fakahā age te meʼa ʼaē neʼe ʼau ako ʼi te Tohi-Tapu.—1 Petelo 3:15.
ʼI te ʼosi ʼo te ʼu faiga noa ʼo taku faʼe tagata ke ina fakamoʼoni mai ko te kau Fakamoʼoni ʼa Sehova ʼe ko te kau faiakonaki hala, neʼe fetogi leva tana faʼahiga palalau mai. Neʼe ina kole fēnei mai: “Manatuʼi, neʼe ke ʼalu ki te fale ako ke lelei taku ako. Kapau ʼe mole ke ʼalu koe ʼo ako kae ke ʼalu koe ʼo fai faka mafola, ʼe tuku kovi anai tau ako. He koʼe koa ʼe mole fakaʼosi muʼa tau ako pea hoki ke hū leva ki te lotu foʼou ʼaia?” ʼI te temi ʼaia neʼe hage neʼe mata fakapotopoto te tonu ʼaia, koia neʼe ʼau tuku ai taku ako mo te kau Fakamoʼoni.
ʼI Tesepeli 1970, ʼi taku ʼosi maʼu taku pepa ʼo te ako, neʼe ʼau foimo hagatonu ki te Fale ʼo te Puleʼaga, pea neʼe ʼau kau ki te ʼu fono ʼa te kau Fakamoʼoni ʼa Sehova talu mai ai. ʼI te ʼaho 30 ʼo ʼAukusito 1971, neʼe ʼau papitema ʼo fakahā te kua foaki ʼo toku maʼuli ki te ʼAtua. Neʼe mole tali leleiʼi taku tonu e taku ʼu mātuʼa ʼo feiā mo te kolo ʼaē ʼe nā nonofo ai. Neʼe nātou ʼui neʼe ʼau fakaloto mamahiʼi nātou, koteʼuhi ko te hoki maʼue e he tahi ʼo te kolo ʼo Ewossa he ako faka puleʼaga feiā. Tokolahi neʼe lahi tonatou fakaʼamu kia ʼau. Neʼe nātou ʼui ʼe ʼau fakaʼaogaʼi anai taku poto mai te ako moʼo hikihiki te faʼahiga maʼuli ʼo te kolo.
Te ʼu Fua ʼo Taku Fetogi
Neʼe fekauʼi mai e toku famili pea mo te kau tagata matutuʼa ʼo te kolo ia te kau fakafofoga ke nātou ʼōmai ʼo fakalotoʼi ʼau ke ʼau lītuʼa ki taku tui. Neʼe nātou faigaʼi ke nātou fakalotoʼi ʼau ʼaki te ʼu faitutuku. Neʼe nātou ʼui fēnei: “Kapau ʼe mole ke mavae ʼi te lotu ʼaia, ʼe tuʼutāmaki anai tou ka haʼu. ʼE mole ke maʼu anai hau gāue. ʼE mole laga anai hou ʼapi. ʼE mole ke lava ʼohoana anai pea mo faʼufaʼu hou maʼuli faka famili.”
Neʼe mole iku tanatou ʼu faitutuku, koteʼuhi hili te ʼu māhina e hogofulu ʼo taku ʼosi ako, neʼe ʼau maʼu taku gāue tagata faiako. ʼI ʼOketopeli 1972, neʼe ʼau ʼohoanaʼi ia Veronica. Ki muli age, neʼe akoako ʼau e te puleʼaga ke ʼau liliu ko he tagata ʼe fakalahi tona poto ki te ʼu gāue ʼo te kele. Neʼe ʼau totogi taku ʼuluaki motokā, pea neʼe ʼau kamata laga tomā ʼapi. ʼI te ʼaho 5 ʼo Novepeli 1973, neʼe tupu tamā ʼuluaki taʼahine ko Victory, pea ki te ʼu taʼu ʼaē neʼe hoa kiai neʼe tupu ia Lydia, mo Wilfred, pea mo Joan. ʼI te 1986 neʼe tupu tama tamasiʼi muli ko Micah. Ko nātou fuli neʼe ko te fānau maʼuhiga, ko he tofiʼa mai ia Sehova.—Pesalemo 127:3.
Ka ʼau fakakaukauʼi toku maʼuli, ʼe feala haku ʼui ko te ʼu fakaʼamu kovi ʼa te kolo kua liliu fuli ko he ʼu tapuakina. Koia neʼe ʼau fakahigoaʼi toku ʼuluaki ʼofafine ko Victory (ko tona faka ʼuhiga ko Mālo). Mole heʼeki faʼa fualoa, neʼe faitohi mai te kolo pea mo kole fēnei mai: “ ʼOfa mai ʼo toe liliu mai, ʼo kau ki te lagalaga ʼo te kolo, koteʼuhi kua tapuakina koe e te ʼAtua.”
Ko Te Akoʼi ʼo Te Fānau ʼi Te ʼu Ala ʼo Te ʼAtua
Neʼe mahino ki toku ʼohoana mo ʼau neʼe mole feala hamā faka ʼalutahi tomā maʼua ʼaē neʼe foaki mai e te ʼAtua, ʼaē ko te taupau ʼo te fānau, pea mo te faiga ki te ʼu koloā fakamālama. Koia, neʼe ma ako ia te maʼuli fakafeauga. ʼE lelei kia māua hamā mulimuli ki te faʼahiga maʼuli ʼaia ʼi hamā mulimuli ki he faʼahiga maʼuli ʼe fua kovi anai kia māua.
ʼE ko he meʼa māhani ki tomatou faʼahiga maʼuli ʼi henī te vaevae ʼo he ʼapi mo he tahi ʼu famili, mo fakaʼaogaʼi te fale maʼanu e tahi, mo te fale kuka e tahi pea mo te tahi ʼu meʼa fakatahi. Neʼe mātou fiafia ʼi te maʼu ʼo te ʼu taʼi meʼa ʼaia maʼa mātou ʼāteaina mokā mātou ʼolo ki he tahi kolo ʼuhi ko taku gāue maʼa te puleʼaga. ʼE moʼoni, ko te ʼu taʼi meʼa ʼaia ʼe totogi kovi, kae ʼe ina faka fealagia ki tamā fānau ke ʼaua naʼa mamili mo te fakakaugā ʼo tuʼa. ʼE ʼau fakamālo kia Sehova ki te ʼu taʼu kua hili, ʼi tamā lava taupau tamā fānau ʼi he maʼuli fakalaumālie lelei.
Pea tahi ʼaē meʼa, neʼe nofo toku ʼohoana ʼi fale ke fakatahi mo tamā fānau pea mo taupau nātou. Ka ʼosi taku gāue, pea ʼe mātou faigaʼi ke mātou fai faka famili he ʼu faʼahiga meʼa kehekehe. Ko he faʼahiga meʼa pe ʼe mātou fai, ʼe mātou fai fakatahi. Ohage ko te ako faka famili ʼo te Tohi-Tapu, mo te teuteuʼi pea mo te kau ki te ʼu fono ʼo te kokelekasio, mo te kau ki te minisitelio faka Kilisitiano, pea mo te ʼu fakafiafia.
Neʼe ma faigaʼi ke ma mulimuli ki te tokoni ʼaē ʼe tuʼu ia Teutalonome 6:6, 7, ʼaē ʼe uga ai te ʼu mātuʼa ke nātou akoʼi tanatou fānau ʼi te temi fuli pe. Neʼe tupu ai te fia kumi tokoni ʼo tamā fānau kia māua kae mole ʼolo ʼo kumi ki tuʼa. Neʼe nātou ako ʼaki te faʼifaʼitaki ʼaē neʼe ma tuku age, ke nātou tokakaga ki tanatou ʼu fakakaugā mo he ʼu hahaʼi ʼe mole nātou lotu tahi mo mātou.—Tāʼaga Lea 13:20; 1 Kolonito 15:33.
ʼE moʼoni ia, neʼe mole gata pe ki tamā takitaki pea mo te akoʼi ʼaē neʼe ma tuku age kia nātou ʼaē neʼe tupu ai te lelei te maʼuli ʼo tamā fānau. Ko tamatou loto fale neʼe tali kāiga ʼo aʼu mai ki te temi nei, ki te kau Kilisitiano ʼaē ʼe gāue mālohi ʼi te faka mafola, ohage ko te kau taupau feʼaluʼaki. Ko te temi ʼaē neʼe mātou nonofo ai mo te kau Kilisitiano fakapotopoto ʼaia, neʼe ko he faigamālie ki tamā fānau ke nātou sivisivi pea mo tokagaʼi tonatou faʼahiga maʼuli faka sakilifisio. Ko te koga ʼaia neʼe ina fakamālohiʼi ai te ako ʼe ma fai ki te fānau, pea neʼe ina faka fealagia ke tauʼaka te Tohi-Tapu ʼi tonatou maʼuli.
Toku Fakapale ʼi Taku Pipiki Ki Te ʼAtua
ʼI te temi nei, ko ʼau mo toku ʼohoana pea mo te toko fā ʼo tamā fānau ʼe mātou kau ki te gāue faka pionie. Neʼe ʼau kamata pionie ʼi te taʼu 1973. Lolotoga te ʼu taʼu, neʼe ʼau tuku taku gāue pionie ʼuhi ko te ʼu ʼaluʼaga faka ekonomika. Neʼe ʼau toe maʼu mo te pilivilesio ʼaē ko te kau ki te Ako ʼo te Minisitelio ʼo te Puleʼaga, ko te ako ki te kau tagata taupau ʼa te kau Fakamoʼoni ʼa Sehova. ʼE ʼau maʼu nei te pilivilesio ʼaē ko te kau ki te komite felogoi tahi mo te lopitali, pea ʼau lolotoga taupau faka kolo ʼi Uhomora.
Kua ʼohoana toku ʼu ʼofafine lalahi ko Victory pea mo Lydia ki te ʼu tagata ʼāfea agalelei. ʼE nātou lolotoga gāue nei ʼi te filiale ʼa te kau Fakamoʼoni ʼa Sehova ʼi Igieduma, ʼi Niselia. Ko tamā tama lahi ʼaē ko Wilfred ʼe tagata faifekau faka minisitelio, pea ko tamā tama veliveli ʼaē ko Micah, ʼe tautau pionie vaeluaʼi temi. ʼI te taʼu 1997, neʼe fakaʼosiʼosi te ako ʼa Joan pea kua kau ki te gāue pionie katoa.
Ko te meʼa ʼaē neʼe maʼuhiga ʼaupito kia ʼau ʼi toku maʼuli, ko taku tokoni ki te hahaʼi ke nātou tauhi kia Sehova ʼAtua. Ia nātou ʼaia, neʼe kau ai ʼihi ʼo toku famili. Neʼe faiga taku tāmai ke tauhi kia Sehova, kae neʼe faigataʼa koteʼuhi neʼe kaugamālie tana ʼu ʼohoana. Talu mai taku kei veliveli ʼe ʼau ʼofa ki te hahaʼi. Ka ʼau sio ki he ʼu hahaʼi ʼe nātou maʼuli kinakina, pea ʼe hage kia ʼau ʼe mole faʼa maʼuhiga toku ʼu fihifihia. ʼE ʼau mahalo pe ʼe nātou tokagaʼi taku fakamalotoloto ʼi taku tokoni age kia nātou, pea ko te koga ʼaia ʼe ina faka faigafua tanatou palalau mo ʼau.
Ia nātou ʼaē neʼe ʼau tokoniʼi ke nātou maʼu te ʼatamai mālama ʼo ʼuhiga mo te ʼu fakatuʼutuʼu ʼa te ʼAtua, ʼe kau ai te tūpulaga ʼe palalisia. Neʼe gāue ʼi te sosiete fai hila pea neʼe piki ʼi te hila ʼo palalisia ai. Neʼe ina tali ke fai hana ako faka Tohi-Tapu pea māmālie pe pea neʼe ina muliʼi te ʼu meʼa ʼaē neʼe ina ako. ʼI tana papitema ʼi te ʼaho 14 ʼo ʼOketopeli 1995, ʼi te vaitafe ʼe ōvi ki tamatou ʼapi, neʼe ko tana hoki mavae ʼaē ʼi tona palepale talu mai taʼu e 15. Neʼe ina ʼui neʼe ko te ʼaho fakafiafia ʼaupito kia ia. ʼI te temi nei, ʼe tagata faifekau faka minisitelio ʼi tana kokelekasio.
Kua taʼu 30 nei taku filifili ke ʼau tauhi kia Sehova mo tana hahaʼi logo tahi, pea ʼe mole ʼau fakahemala ki he meʼa. Neʼe ʼau sio ʼe nātou maʼuliʼi te ʼofa moʼoni. Tatau aipe pe neʼe mole kau te ʼamanaki ʼo te maʼuli heʼegata ʼi te fakapale ʼaē ʼe foaki e Sehova ki tana kau kaugana agatonu, kae ʼe ʼau fia fai aipe ke ʼau pipiki ki te ʼAtua. (1 Timoteo 6:6; Hepeleo 11:6) Neʼe ko te faʼahi ʼaia ʼaē neʼe ina faʼufaʼu pea mo takitaki toku maʼuli, ʼo ʼau maʼu ai mo toku famili te fiafia, te fīmālie pea mo te manuʼia.
[Paki ʼo te pasina 25]
Ko ʼau mo toku ʼohoana mo taku fānau ʼi te 1990
[Paki ʼo te pasina 26]
Ko ʼau mo toku ʼohoana mo te ʼu ʼohoana ʼo toku ʼu ʼofafine