Tou Haga Gāue Fakatahi ʼAki He Loto e Tahi

“ ʼE ʼau foaki anai ki te hahaʼi he fetogi, ʼe ko he lea maʼa, ke feala hanatou pāui fuli ki te huafa ʼo Sehova, ke feala hanatou tauhi fakatahi ʼaki he loto e tahi kia te ia.”—Sofonia 3:9.

1. Koteā ʼaē ʼe lolotoga hoko pea mo ʼalutahi mo te manatu ia Sofonia 3:9?

KO LEA e 6 000 ʼe fakaʼaogaʼi e te hahaʼi ʼi te malamanei. ʼE ʼi ai mo te tahi ʼu kiʼi faʼahiga lea, peʼe ko te ʼu kiʼi lea faka kolo. Tatau aipe peʼe palalau te hahaʼi ki te ʼu lea ohage ko te faka Alape pea mo te faka Zulu, kae neʼe foaki e Sehova te lea ʼe makehe tokotahi. Neʼe ina faka fealagia ki te hahaʼi ʼi te ʼu potu fuli ʼo te kele ke nātou ako pea mo palalau ki te lea maʼa e tahi. ʼE ʼalutahi te faʼahi ʼaia mo te fakapapau neʼe foaki age ki te polofeta ko Sofonia: “ ʼE ʼau foaki anai [ia Sehova ʼAtua] ki te hahaʼi he fetogi, ʼe ko he lea maʼa [peʼe ʼi tona ʼuhiga moʼoni, ko he laugutu maʼa], ke feala hanatou pāui fuli ki te huafa ʼo Sehova, ke feala hanatou tauhi fakatahi ʼaki he loto e tahi kia te ia.”—Sofonia 3:9.

2. Koteā te “lea maʼa,” pea koteā ʼaē ʼe ina faka fealagia?

² Ko te “lea maʼa” ʼe ko te moʼoni ʼo ʼuhiga mo te ʼAtua ʼaē ʼe tou maʼu ʼi tana Folafola, te Tohi-Tapu. Ko te moʼoni tāfito ʼo ʼuhiga mo te Puleʼaga ʼo te ʼAtua, ʼaē ka ina fakamaʼa anai te huafa ʼo Sehova, mo fakatonuhia anai tana tuʼi pule faʼitaliha, pea mo foaki anai te ʼu tapuakina ki te malamanei. (Mateo 6:9, 10) ʼUhi ko te lea pe ʼaia e tahi ʼi te kele katoa ʼe maʼa ʼi te faʼahi fakalaumālie, ko te lea maʼa ʼe fakaʼaogaʼi e te hahaʼi ʼo te ʼu puleʼaga pea mo te ʼu lanu kehekehe. ʼAki te lea ʼaia ʼe nātou lava tauhi “ ʼaki he loto e tahi” kia Sehova. Koia ʼe nātou tauhi kia te ia ʼaki te logo tahi peʼe “ko he faiga e tahi.”—TOB.

ʼE Mole ʼi Ai Te Fakapalatahi

3. Koteā ʼaē ʼe ina faka fealagia ai ke tou tauhi kia Sehova ʼi te logo tahi?

³ ʼI totatou ʼuhiga Kilisitiano ʼe tou fakafetaʼi ki tatatou faifaitahi logola te ʼu lea kehekehe ʼaē ʼe tou fakaʼaogaʼi. Logola ʼe tou faka mafola ʼi te ʼu lea kehekehe ia te logo lelei ʼo te Puleʼaga, kae ʼe tou logo tahi ʼi tatatou tauhi ki te ʼAtua. (Pesalemo 133:1) ʼE lava te faʼahi ʼaia, heʼe logola te ʼu potu ʼaē ʼe tou maʼuʼuli ai ʼi te kele, ʼe tou palalau ʼi te lea maʼa e tahi moʼo fakavikiviki kia Sehova.

4. He koʼe ʼe mole tonu ke fakapalatahi te hahaʼi ʼa te ʼAtua?

⁴ ʼE mole tonu ke fakapalatahi te hahaʼi ʼa te ʼAtua. ʼE fakahā lelei e te ʼapositolo ko Petelo te faʼahi ʼaia, ʼi tana faka mafola ki te famili ʼo te tagata solia Senitile ʼi te taʼu 36 ʼo totatou temi, neʼe ina ʼui fēnei: “ ʼE moʼoni, kua ʼau mahino ko te ʼAtua ʼe mole fakapalatahi; kae ʼi te puleʼaga fuli pe ko te tagata ʼaē ʼe manavasiʼi kia te ia pea mo ina maʼuliʼi te faitotonu ʼe ina tali leleiʼi ia ia.” (Gaue 10:34, 35, MN ) ʼE moʼoni te faʼahi ʼaia, koia ʼe mole tonu ai ke maʼu ʼi te kokelekasio faka Kilisitiano ia te fakapalatahi, te faka kaugā pe ki te hahaʼi ʼaē ʼe tou leleiʼia, peʼe ko te fakakehekeheʼi ʼo te hahaʼi.

5. He koʼe ʼe kovi hatatou lagolago ki ni ʼu faka kaugā pe ki te hahaʼi ʼe tou leleiʼia ʼi te kokelekasio?

⁵ ʼI tana ʼaʼahi te Fale ʼo Te Puleʼaga, neʼe ʼui fēnei e te kiʼi finemui ako: “ ʼI te agamāhani, ʼe ʼi ai te ʼu lotu ʼe nātou tali he faʼahiga lanu pe ko he faʼahiga hahaʼi. . . . Ko te kau Fakamoʼoni ʼa Sehova ʼe nātou heheka fakatahi pea ʼe mole nātou fakakehekeheʼi te hahaʼi.” Kae ʼi te kokelekasio ʼo Kolonito ko ʼihi neʼe nātou fakakehekeheʼi te hahaʼi. Koia neʼe tupu ai te ʼu fihi, neʼe nātou fakafeagai ki te gāue ʼo te laumālie maʼoniʼoni ʼo te ʼAtua, ʼaē ʼe ina faka fealagia te logo tahi pea mo te tokalelei. (Kalate 5:22) Kapau ʼe tou lagolago ki ni ʼu faka kaugā pe ki te hahaʼi ʼe tou leleiʼia ʼi te kokelekasio, ʼe tou fakafeagai anai ki te gāue ʼa te laumālie. Koia tou taupau maʼu ʼi totatou ʼatamai te ʼu palalau ʼaenī ʼa te ʼapositolo ko Paulo ki te kau Kolonito: “ ʼE ʼau tokoni atu kia koutou, ʼu tēhina, ʼaki te huafa ʼo totatou ʼAliki ko Sesu Kilisito, ke koutou palalau fuli ʼi he logo tahi, pea ke ʼaua naʼa ʼi ai he ʼu maveuveu ia koutou, kae ke koutou logo tahi fakalelei ʼi he laumālie pe e tahi pea mo he manatu e tahi.” (1 Kolonito 1:10, MN ) Neʼe toe faka maʼuhigaʼi e Paulo te logo tahi ʼi tana faitohi ki te kau Efeso.—Efeso 4:1-6, 16.

6, 7. Koteā te tokoni neʼe fai e Sakopo ʼo ʼuhiga mo te fakakehekeheʼi ʼo te hahaʼi, pea ʼe ʼaoga feafeaʼi kia tatou?

⁶ Neʼe fakamaʼua tuʼumaʼu ki te kau Kilisitiano ke mole nātou fakapalatahi. (Loma 2:11) ʼUhi he neʼe leleiʼia pe e ʼihi ʼi te kokelekasio ʼo te ʼuluaki sēkulō te hahaʼi maʼu koloā, neʼe ʼui fēnei e te tisipulo ko Sakopo kia nātou: “Naʼi oku tēhina, ʼe koutou maʼu koa te tui ʼo totatou ʼAliki ko Sesu Kilisito, totatou kolōlia, ʼaki ni ʼu gāue fakakehekehe? Heʼe kapau ʼe hū mai ki takotou fakatahi he tagata mo ni ʼu mama aulo ʼi tona ʼu kauʼi tuhi pea mo he teu matalelei, pea hū mai mo he tagata masiva mo he teu ʼuli, kae koutou faka maʼuhigaʼi age koutou ia ia ʼaē ʼe teu matalelei pea mo ʼui maʼa koutou: ‘Nofo koe ʼi te hekaʼaga lelei ʼaenī,’ pea ʼui maʼa koutou ki te tagata masiva: ‘Tuʼu koe,’ peʼe koutou ʼui age: ‘Nofo age koe ki lalo ʼi toku meʼa hilihiliʼaga vaʼe,’ ʼe maʼu ia koutou te ʼu faʼahiga kalasi pea kua koutou liliu ko te ʼu tuʼi fakamāu ʼe foaki tūʼa kovi, kaeā koa la?”—Sakopo 2:1-4, MN.

⁷ Kapau neʼe ʼōmai ki he fono ʼa te kau Kilisitiano he ʼu hahaʼi heʼe tui maʼu koloā mo he ʼu mama aulo pea mo he ʼu teu matalelei, pea toe haʼu mo ni ʼu hahaʼi heʼe tui māsisiva ʼe nātou teu ʼuli, neʼe faka maʼuhigaʼi pe te hahaʼi maʼu koloā. Neʼe foaki age kia nātou te ʼu nofoʼaga “lelei,” kae neʼe ʼui age ki te kau māsisiva ke nātou tutuʼu peʼe ke nātou nonofo ʼi te ʼu hiliʼaga vaʼe ʼo he tahi. Kae ko te ʼAtua neʼe ina foaki fakatatau te sakilifisio faitotogi ʼo Sesu ki ʼaē ʼe maʼu koloā pea mo ʼaē ʼe masiva. (Sopo 34:19; 2 Kolonito 5:14) Koia kapau ʼe tou loto ke leleiʼia tatou e Sehova pea mo tou tauhi kia te ia ʼaki he loto e tahi, ʼe mole tonu ke tou fakakehekeheʼi te hahaʼi peʼe ‘tou vikiʼi ni hahaʼi ʼuhi pe ke nātou leleiʼia tatou.’—Suta 4, 16.

ʼE Mole Tonu Ke Tou Muhumuhu

8. Koteā ʼaē neʼe hoko ki te kau Iselaele ʼi tanatou muhumuhu?

⁸ Ke tou taupau te logo tahi pea mo maʼu tuʼumaʼu te ʼofa fakaʼatua, ʼe tonu ke tou tokagaʼi te tokoni ʼaenī ʼa Paulo: “Koutou haga fai ia meʼa fuli ʼo mole koutou muhumuhu.” (Filipe 2:14, 15, MN ) Ko te kau Iselaele heʼe agatonu ʼaē neʼe hāofaki mai tanatou nofo popūla ʼi Esipito neʼe nātou muhumuhu ʼo ʼuhiga mo Moisese, mo Alone, ʼo toe feiā pe kia Sehova ʼAtua. Koia la ʼaē, gata pe ki te kau agatonu ko Sosue pea mo Kalepe pea mo te kau Levite, kae ko te ʼu tagata fuli mai te taʼu 20 ʼo laka atu neʼe mole nātou hū ki te Kele ʼo Te Fakapapau, neʼe nātou mamate ʼi te ʼu taʼu e 40 ʼaē neʼe nātou feʼoloʼaki ai ʼi te toafa. (Faka au 14:2, 3, 26-30; 1 Kolonito 10:10) ʼE ko he tūʼa lahi neʼe hoko kia nātou ʼi tanatou muhumuhu!

9. Koteā te meʼa neʼe hoko kia Miliame he neʼe muhumuhu?

⁹ Koia ʼe hā mai ʼi te faʼifaʼitaki ʼaia ia te meʼa ʼe feala ke hoko ki he puleʼaga katoa ʼe muhumuhu. E feafeaʼi kia nātou ʼaē ʼe muhumuhu takitokotahi? Ko Miliame te tuagaʼane ʼo Moisese, pea mo tona tēhina ko Alone neʼe nā muhumuhu: “Neʼe ko Moisese tokotahi pe koa ʼaē neʼe palalau ki ai ia Sehova? Neʼe mole toe palalau koa la kia tāua?” ʼE toe ʼui fēnei ʼi te fakamatala: “Neʼe fakalogo Sehova.” (Faka au 12:1, 2) Koteā tona fua? Neʼe fakalainoaʼi e te ʼAtua ia Miliame he neʼe ko ia ʼaē neʼe tupu ai te meo ʼaia. ʼO feafeaʼi? Neʼe kilia pea neʼe fekauʼi ke ʼalu ʼo nofo ia ʼaho e fitu ʼi tuʼa ʼo te nofoʼaga ʼo aʼu ki te puli ʼo tona kilia.—Faka au 12:9-15.

10, 11. Kapau ʼe mole tuku te ʼu muhumuhu, koteā anai ka hoko? Koutou tuku mai he faʼifaʼitaki.

¹⁰ Ko te muhumuhu ʼe mole ko he meo pe ki he meʼa ʼe kovi. Ko te hahaʼi ʼaē ʼe muhumuhu tuʼumaʼu ʼe nātou fia faka maʼuhigaʼi fau tanatou ʼu manatu peʼe ko tonatou ʼu ʼuhiga totonu, ke hikihiki nātou kae meʼa noaʼi te ʼAtua. Kapau ʼe mole tuku te ʼu muhumuhu ʼaia, ʼe feala pe ke tupu he ʼu maveuveu ʼi te lotolotoiga ʼo te ʼu tēhina fakalaumālie, pea mo tāʼofi ai tanatou ʼu faiga ʼaē ke nātou tauhi kia Sehova ʼaki he loto e tahi. ʼE hoko te ʼu meʼa feiā, heʼe ko nātou ʼaē ʼe muhumuhu tuʼumaʼu, ʼe lagi nātou fakaʼamu ʼe lagolago age anai niʼihi ki tanatou ʼu meo.

¹¹ Ohage la ko he tahi ʼe ina fatufatuʼi he tagata ʼāfea ʼo ʼuhiga mo tana fakahoko ʼo tona ʼu maʼua ʼi te kokelekasio. Kapau ʼe tou fakalogo ki tana meo ʼaia, ʼe lagi tou kamakamata manatu anai ohage ko ia. ʼI muʼa ʼo tatatou logo ki te meo ʼaia, neʼe tou leleiʼia pe te ʼu gāue ʼa te tagata ʼāfea. Kae ʼi te temi nei ʼe mole kei tou leleiʼia he meʼa ʼe fai e te tagata ʼāfea, pea kua lagi tou kamata meo mo tatou. ʼE mole tonu ke maʼu te taʼi aga ʼaia ʼi te kokelekasio ʼa te hahaʼi ʼa Sehova.

12. ʼE malave feafeaʼi ki tatatou felogoi mo te ʼAtua mokā ʼe tou muhumuhu?

¹² Kapau ʼe tou muhumuhu ki te ʼu tagata ʼaē neʼe fakanofo ke nātou leʼoleʼo te faga ōvi ʼa te ʼAtua, ʼe feala ke faka ʼuhiga ʼe tou lea kovi kia nātou. ʼE fakatupu kovi ki tatatou ʼu felogoi mo Sehova ia tatatou ʼu muhumuhu peʼe ko tatatou ʼu fasituʼu. (Ekesote 22:28) ʼE mole maʼu anai e nātou ʼaē ʼe nātou lea kovi ia te Puleʼaga ʼo te ʼAtua. (1 Kolonito 5:11; 6:10) Neʼe faitohi te tisipulo ko Suta ʼo ʼuhiga mo te hahaʼi muhumuhu ʼaē neʼe nātou “meʼa noaʼi te pule ʼaliki pea mo laukovi ki te kau kolōlia,” peʼe ko te ʼu tagata neʼe fakanofo ʼi te kokelekasio. (Suta 8, MN ) Ko te hahaʼi muhumuhu ʼaia neʼe mole nātou maʼu te tapuakina ʼa te ʼAtua, pea ke tou tokakaga ʼo fakamamaʼo mai ia nātou ʼaia.

13. ʼE kovi koa te ʼu meo fuli?

¹³ Kae ʼe ʼi ai te ʼu meo ʼe mole koviʼia e te ʼAtua. Neʼe mole ina meʼa noaʼi “te tagi mamahi” neʼe fai ʼo ʼuhiga mo Sotoma pea mo Komola kae neʼe ina fakaʼauha te ʼu kolo agakovi ʼaia. (Senesi 18:20, 21; 19:24, 25) Mole faʼa fualoa ki te ʼosi ʼo te Penikosite ʼo te taʼu 33 ʼo totatou temi, ʼi Selusalemi “neʼe hoko te meo ʼi te kau Sutea ʼaē neʼe lea faka Keleka ki te kau Sutea ʼaē neʼe lea faka Hepeleo, koteʼuhi neʼe mole faʼa tokagaʼi tanatou ʼu fafine vitua ʼi te tufa ʼaē neʼe fai ʼi te ʼaho fuli.” Pea ko te “toko hogofulu-ma-lua” neʼe nātou fakatokatoka te faʼahi ʼaia ʼo nātou hinoʼi “te ʼu tagata fakaʼapaʼapaʼi e toko fitu” ki te “tuʼulaga” ʼaē ko te tufa ʼo te meʼa kai. (Gaue 6:1-6, MN ) ʼE tonu ki te ʼu tagata ʼāfea ʼo te temi nei ke nātou ‘tokagaʼi’ te ʼu meo ʼaē ʼe lelei. (Tāʼaga Lea 21:13) Ko te kau tagata ʼāfea ʼe tonu ke nātou fakaloto mālohiʼi pea mo hikihiki te tui ʼo tonatou ʼu tēhina kae mole tonu ke nātou fakavaivaiʼi.—1 Kolonito 8:1.

14. Ko te kalitate fea ʼaē ʼe ʼaoga kia tatou ke ʼaua naʼa tou muhumuhu?

¹⁴ ʼE tonu ke tou fakamamaʼo mai ia nātou ʼaē ʼe muhumuhu, heʼe ko te taʼi aga ʼaia ʼe fakatupu kovi ʼi te faʼahi fakalaumālie. ʼE ina maumauʼi tatatou logo tahi. Koteʼuhi ʼe tonu ke tou tuku tuʼumaʼu te laumālie maʼoniʼoni ke ina fakatuputupu ia tatou te ʼofa. (Kalate 5:22) ʼE tou haga tauhi anai kia Sehova ʼaki he loto e tahi mokā ʼe tou mulimuli ki te ‘lao maʼuhiga ʼo te ʼofa.’—Sakopo 2:8; 1 Kolonito 13:4-8; 1 Petelo 4:8.

Tou Tokaga Ki Te Fasituʼu

15. ʼE feafeaʼi hakotou fakakehekeheʼi ia te fatufatu pea mo te fasituʼu?

¹⁵ ʼE tonu ke tou tokakaga ki te ʼu meʼa ʼaē ʼe tou palalau kiai, heʼe feala ke liliu te muhumuhu ko he fatufatu ʼe fakatupu lotomamahi. Ko te fatufatu ʼe ko he palalau noa ʼe fai ʼo ʼuhiga mo te ʼu meʼa ʼaē ʼe fai e te hahaʼi. Kae ko te fasituʼu ʼe ko he palalau ʼe mole moʼoni ʼe fai moʼo ʼulihi te matagafua ʼo he tahi. Ko te ʼu palalau ʼaia ʼe fakatupu lotomamahi pea ʼe mole lelei. Koia neʼe ʼui fēnei ai e te ʼAtua ki te kau Iselaele: “ ʼE mole tonu ke ke feʼaluʼaki ʼi tau hahaʼi moʼo fasituʼu.”—Levitike 19:16.

16. Koteā ʼaē neʼe ʼui e Paulo ʼo ʼuhiga mo nātou ʼe fatufatu, pea ʼe tonu ke malave feafeaʼi kia tatou tana tokoni?

¹⁶ ʼE feala ki he palalau noa ke iku ki he fasituʼu, koia neʼe fakatonutonuʼi mālohiʼi ai e Paulo ia nātou ʼaē ʼe fatufatu. ʼI tana ʼosi talanoa ki te ʼu vitua ʼaē neʼe ʼaoga kiai te tokoni ʼa te kokelekasio, neʼe palalau ki te kau vitua ʼaē neʼe nātou akoako “te piko, pea toe fatufatu pea mo fia ʼiloʼi meʼa fuli ki te ʼu meʼa ʼa ʼihi, ʼo nātou palalau ki te ʼu meʼa ʼe mole tonu ke nātou talanoa kiai.” (1 Timoteo 5:11-15, MN ) Kapau ʼe ʼiloʼi e he fafine ko hona vaivaiʼaga te fasituʼu, ʼe tonu anai ke ina tokagaʼi te tokoni ʼa Paulo ʼo ʼuhiga mo te ʼu fafine ʼaē ke nātou “aga fakaʼapaʼapa, kae ʼaua naʼa nātou fasituʼu.” (1 Timoteo 3:11, MN ) ʼE mahino ia, ʼe tonu foki mo te ʼu tēhina ke nātou tokakaga ki te ʼu fatufatu ʼaē ʼe fakatupu lotomamahi.—Tāʼaga Lea 10:19.

Tuku Takotou Fakamāu

17, 18. (a) Koteā neʼe ʼui e Sesu mo kapau ʼe tou fakamāuʼi totatou ʼu tēhina? (b) ʼE tou lava maʼuliʼi feafeaʼi te tokoni ʼa Sesu ʼo ʼuhiga mo te fakamāu?

¹⁷ Tatau aipe mo kapau ʼe mole tou fasituʼu ki he tahi, kae tonu ke tou tokakaga naʼa tou fakamāuʼi he tahi. Neʼe tauteaʼi e Sesu te taʼi aga ʼaia ʼi tana ʼui ʼaenī: “Aua tautou fakamau, pea e mole fakamaui koutou: He ko te faahiga fakamau ae e koutou fai, e fakamauʼi aki anai koutou, pea ko te meafua e koutou fakaaoga, e fua aki anai koutou. Kotea te tupuaga o tau sioʼi te moi otaota i te mata o tou tehina, kae e mole ke vakai te lalago i tou mata? Pe feafeai hau leaʼage anai ki tou tehina: ‘Fakagafua mai, ke au puhiʼi ki tuà te otaota i tou mata’, kae e i ai he lalago i to ou? Malualoi, fua too ki tuà te lalago mai tou mata, pea ke sio lelei leva o too ki tuà te otaota i te mata o tou tehina?”—Mateo 7:1-5.

¹⁸ ʼAua naʼa tou ʼui ʼe tonu anai ke tou toʼo te “otaota” ʼi te mata ʼo totatou tēhina kae ko tatou totonu ʼaē ʼe kovi tatatou fakamāu heʼe tou nofo mo te “lalago” ʼi totatou ʼu mata. Kapau ʼe tou mahino ki te loto fakamolemole ʼa te ʼAtua, pea ʼe mole tou fakamāuʼi anai totatou ʼu tēhina fakalaumālie. ʼE ko tatatou Tāmai pe ʼe ʼi selo ʼe ina ʼiloʼi lelei ia nātou. Koia ko Sesu neʼe ina fakatokagaʼi tatou ke ‘tuku tatatou fakamāu ke ʼaua naʼa fakamāuʼi mo tatou’! Kapau ʼe tou vakavakaʼi fakalelei totatou ʼu vaivaiʼaga, pea ʼe mole tou fakamāuʼi anai niʼihi heʼe mole leleiʼia anai tatou e te ʼAtua.

ʼE Nātou Vaivai Kae Nātou Maʼuhiga

19. ʼE tonu ke tou feafeaʼi ki totatou ʼu tēhina mo tuagaʼane?

¹⁹ Kapau ʼe tou fakatotonu ke tou tauhi mo totatou ʼu tēhina ki te ʼAtua ʼaki he loto e tahi, ʼe mole tonu anai ke tou fakamāuʼi nātou. ʼE tou tuku anai he faʼifaʼitaki lelei, ʼo tou fakahā ʼe tou faka maʼuhigaʼi ia nātou. (Loma 12:10) ʼIo, ʼe tou kumi anai te ʼu meʼa ʼaē ʼe lelei kia nātou, pea ʼe tou fiafia anai ʼi tatatou fai te ʼu meʼa ʼaē ʼe lelei maʼa nātou. (Soane 13:12-17; 1 Kolonito 10:24) Koteā ʼaē ka tokoni mai kia tatou ke tou taupau he manatu ʼe lelei ʼo ʼuhiga mo totatou ʼu tēhina? Mo kapau ʼe tou manatuʼi ʼe nātou maʼuhiga takitokotahi kia Sehova, pea ʼe nātou ʼaoga kia tatou, ohage pe ko te gāue fakatahi ʼo te ʼu koga kehekehe ʼo te sino.—1 Kolonito 12:14-27.

20, 21. Koteā te faka ʼuhiga kia tatou ia te ʼu palalau ʼaē ia 2 Timoteo 2:20, 21?

²⁰ ʼE moʼoni, ko te kau Kilisitiano ʼe ko te ʼu ipu kele ʼe vaivai pea neʼe foaki kia nātou te koloā faka kolōlia ʼo te minisitelio. (2 Kolonito 4:7) Kapau ʼe tou fai te gāue taputapu ʼaia moʼo fakavikiviki kia Sehova, ʼe tonu ke tou aga fakaʼapaʼapa ʼi ʼona muʼa pea mo tona ʼAlo. ʼE hoki feala ke fakaʼaogaʼi e te ʼAtua ia tatou ko he ipu lelei mo kapau ʼe tou maʼa ʼi te ʼu aga ʼaē ʼe tonu ke fai pea mo te faʼahi fakalaumālie. Ki te faʼahi ʼaia, neʼe tohi fēnei e Paulo: “ ʼI he fale lahi, ʼe mole gata ʼaki pe he ʼu ipu aulo pea mo siliva, ʼe toe ʼi ai foki mo te ʼu ipu ʼakau pea mo te ʼu ipu kele neʼe taʼo; pea ko ʼihi ʼe fakaʼaoga ki he meʼa ʼe lelei, ka ko ʼihi ʼe fakaʼaoga ki he meʼa ʼe kovi. Koia kapau ʼe tuʼu mamaʼo he tahi mai te ʼu ipu ʼaenī, pea ʼe liliu ia ko he ipu ʼe fakaʼaoga ki he meʼa ʼe lelei, he ipu kua fakatapuʼi, ʼe ʼaoga kia ia ʼaē ʼaʼana te ipu, pea kua teuteuʼi ia ki te gāue lelei fuli pe.”—2 Timoteo 2:20, 21, MN.

²¹ Ko te hahaʼi ʼaē ʼe mole nātou mulimuli ki te ʼu lekula fakaʼatua ʼe nātou liliu ‘ko te ʼu ipu ʼe fakaʼaogaʼi ki he meʼa ʼe kovi.’ Kae kapau ʼe tou mulimuli ki te ʼu lekula ʼa te ʼAtua, ʼe tou liliu anai ‘ko te ʼu ipu ʼe fakaʼaogaʼi ki he meʼa ʼe lelei, neʼe fakatapuʼi, pe neʼe tuku keheʼi, ki te gāue ʼa Sehova pea neʼe teuteuʼi ki he ʼu gāue ʼe lelei.’ Koia ʼe feala ke tou fai te ʼu fehuʼi ʼaenī: ‘Ko ʼau koa “ko he ipu ʼe fakaʼaogaʼi ki he meʼa ʼe lelei”? Ko toku ʼu tēhina ʼe nātou lotomālohi koa mokā ʼe ʼau felogoi mo nātou? ʼE ʼau gāue fakatahi koa mo toku ʼu tēhina ʼaki he loto e tahi ʼi te kokelekasio?

Tou Haga Tauhi Fakatahi ʼAki He Loto e Tahi

22. Koteā ʼaē ʼe lava fakatatau kiai te kokelekasio faka Kilisitiano?

²² Ko te kokelekasio faka Kilisitiano ʼe hage ko he famili. ʼE tou maʼu ai te ʼofa, te tokoni, pea mo te fiafia mo kapau ʼe tou tauhi fuli kia Sehova. ʼI he famili, ʼe lagi faʼufaʼu e te ʼu faʼahiga hahaʼi ʼe agaaga kehekehe, kae ʼe nātou ʼaoga fuli pe. ʼE toe feiā pe mo te kokelekasio. Logola te kehekehe ʼo totatou ʼu ʼulugaaga—pea ʼe tou heʼe haohaoa—kae ko te ʼAtua ʼe ina taki mai tatou kia te ia ʼaki ia Kilisito. (Soane 6:44; 14:6) Ko Sehova pea mo Sesu ʼe nā ʼoʼofa kia tatou, pea ohage ko he famili logo tahi, ʼe tonu ke tou fefakahāʼaki totatou ʼofa.—1 Soane 4:7-11.

23. Koteā anai ʼe tonu ke tou manatuʼi pea koteā ʼaē ʼe tonu ke tou fakatotonu ke tou fai?

²³ Ohage pe ko he famili, ʼe tou fakaʼamu ke tou maʼu ʼi te kokelekasio faka Kilisitiano te agatonu. Neʼe tohi fēnei e te ʼapositolo ko Paulo: “ ʼE ʼau loto ʼi te potu fuli pe ke haga faikole te tagata, ʼo hiki he ʼu nima agatonu, ʼaua naʼa ʼiʼita peʼe mo kē.” (1 Timoteo 2:8, MN ) Koia neʼe fakapipiki ai e Paulo te agatonu mo te faikole ʼi muʼa ʼo te kaugamālie “ ʼi te potu fuli” ʼaē ʼe fakatahi kiai te kau Kilisitiano. ʼE gata pe ki te ʼu tagata agatonu ʼe tonu ke nātou fakafofoga te kokelekasio ʼi he faikole ʼi muʼa ʼo te kaugamālie. ʼIo, ko te ʼAtua ʼe ina loto ke tou agatonu fuli age kia te ia, pea kia tatou fuli. (Tagata Tānaki 12:13, 14) Koia, tou fakatotonu ke tou gāue fakatahi, ohage ko te ʼu koga kehekehe ʼo te sino. ʼOfa pe ke tou toe tauhi ʼaki te logo tahi heʼe tou kau ki te famili ʼo te kau atolasio ʼa Sehova. Kae ʼi te ʼu meʼa fuli ʼaia, tou manatuʼi ʼe ʼi ai totatou ʼaoga kia tatou fuli pea ʼe tou maʼu anai te ʼofa pea mo te tapuakina ʼa te ʼAtua mo kapau ʼe tou haga tauhi kia Sehova ʼaki he loto e tahi.

ʼE Koutou Tali Feafeaʼi Anai

• Koteā ʼaē ʼe ina faka fealagia ki te hahaʼi ʼa Sehova ke nātou tauhi kia te ia ʼaki he loto e tahi?

• He koʼe ʼe tekeʼi e te kau Kilisitiano ia te fakapalatahi?

• Koteā ʼaē ʼe kovi ʼi te muhumuhu?

• He koʼe ʼe tonu ke tou faka maʼuhigaʼi totatou ʼu tēhina mo tuagaʼane ʼi te tui?

[Paki ʼo te pasina 15]

Neʼe mahino kia Petelo “ko te ʼAtua ʼe mole fakapalatahi”

[Paki ʼo te pasina 16]

ʼE koutou ʼiloʼi koa pe koʼe neʼe fakalainoaʼi ia Miliame e te ʼAtua?

[Paki ʼo te pasina 18]

Ko te kau Kilisitiano agatonu ʼe nātou tauhi fakafiafia kia Sehova ʼaki he loto e tahi