Koteā ʼAē ʼe Kole Mai e Sehova Kia Tatou?
“Koteā ʼaē ʼe kole atu e Sehova kia te koe, ʼe mole koa la ko te maʼuliʼi ʼo te faitotonu, mo te manako ki te finegaloʼofa, pea mo te haʼele mo tou ʼAtua ʼaki he fia mālalo?”—Mikea 6:8.
1, 2. He koʼe ʼe feala ke lotovaivai ʼihi kaugana ʼa Sehova, kae koteā ʼaē ka tokoni anai kia nātou?
KO VERA ko he fakamoʼoni agatonu ʼe taʼu 75 pea mo mahamahaki. ʼE ina ʼui fēnei: “ ʼI ʼihi temi, ʼe ʼau sio ʼi te matapā fakamālama ki toku ʼu tēhina mo tuagaʼane ʼe nātou fai faka mafola ʼi te ʼu ʼapi. ʼE ʼau tagi heʼe ʼau fia fakatahi mo nātou, kae ʼuhi ko taku mahaki ʼe tuʼakoi taku tauhi kia Sehova.”
2 Neʼe kua koutou logoʼi koa te faʼahi ʼaia? ʼE mahino ia, ko nātou fuli ʼaē ʼe ʼoʼofa kia Sehova ʼe nātou fia haʼele ʼi tona huafa pea mo fakahoko tana ʼu fakamaʼua. Kae e feafeaʼi mokā tou mahamahaki, mokā kua tou matutuʼa, peʼe mokā ʼi ai totatou ʼu maʼua faka famili? ʼE lagi tou lotovaivai ʼuhi ko te ʼu ʼaluʼaga ʼaia, heʼe mole feala ai ke tou fai ia meʼa fuli ʼaē ʼe tou loto kiai ʼi te tauhi ki te ʼAtua. Kapau koia, pea ʼe fakaloto mālohi moʼoni anai ia tatou ʼaki tatatou vakaʼi te ʼu kapite 6 mo te kapite 7 ʼo Mikea. ʼE fakahā e te ʼu kapite ʼaia ʼe fakapotopoto te ʼu meʼa ʼaē ʼe fakamaʼua mai e te ʼAtua pea ʼe feala ke tou fakahoko.
Te Aga ʼa Te ʼAtua Ki Tana Hahaʼi
3. Neʼe feafeaʼi te aga ʼa Sehova ki te kau Iselaele ʼaē neʼe agatuʼu?
3 Tou ʼuluaki vakaʼi muʼa ia Mikea 6:3-5 pea mo tokagaʼi peʼe feafeaʼi te aga ʼa Sehova ki tana hahaʼi. Koutou manatuʼi ʼi te temi ʼo Mikea neʼe agatuʼu te kau Iselaele. Logola te faʼahi ʼaia, kae neʼe ʼui fēnei e Sehova kia nātou ʼaki he loto manavaʼofa: “Ê taku hahaʼi.” Neʼe ina kole fēnei: “Ê taku hahaʼi, fakalelei tokotou loto, kae koutou manatuʼi.” Neʼe mole ina fai he ʼu tukugakovi fefeka kia nātou, kae neʼe ina faigaʼi ke malave ki tonatou loto, ʼo ina fehuʼi fēnei: “Koteā koa ʼaē neʼe ʼau fai atu kia koe?” Neʼe ina fakaloto mālohiʼi nātou ke nātou “fai he fakamoʼoni moʼo fakafeagai kia te ia.”
4. ʼE tonu ke malave feafeaʼi kia tatou te faʼifaʼitaki ʼo te loto manavaʼofa ʼa te ʼAtua?
4 Ko he faʼifaʼitaki lahi ʼaia neʼe tuku mai e te ʼAtua kia tatou fuli! ʼAki he loto manavaʼofa, neʼe ina pāui te hahaʼi agatuʼu ʼo Iselaele pea mo Suta ʼo te temi ʼo Mikea ko ‘tana hahaʼi’ pea mo ina ʼui kia nātou “fakalelei tokotou loto.” Koia ʼe mahino ia ʼe tonu ke tou loto manavaʼofa pea mo agalelei kia nātou ʼo te kokelekasio. ʼE moʼoni, ʼe lagi mole faigafua hakita felogoi lelei mo ʼihi, peʼe lagi nātou vaivavai ʼi te faʼahi fakalaumālie. Kae kapau ʼe nātou ʼoʼofa kia Sehova, pea ʼe tou fia tokoni anai kia nātou pea mo tou loto manavaʼofa kia nātou.
5. Koteā te manatu tāfito ʼaē ʼe fakahā ia Mikea 6:6, 7?
5 Lua, tou lau ia Mikea 6:6, 7. Neʼe fai e Mikea te ʼu fehuʼi, ʼo ina ʼui fēnei: “ ʼE ʼau fakaōvi anai kia Sehova ʼaki teā? ʼE ʼau tulolo anai ʼaki teā kia muʼa ʼo te ʼAtua ʼaē ʼi ʼoluga? ʼE ʼau fakaōvi anai koa ki ʼona muʼa ʼaki he ʼu holokoseta, ʼaki he ʼu pipi mui e taʼu tahi? ʼE tali anai koa e Sehova he ʼu matuʼaʼi akeno e lauʼi afe, pea mo he ʼu vaitafe lolo e lauʼi hogofulu afe? ʼE ʼau foaki anai koa toku ʼuluaki foha ʼuhi ko taku fakafeagai, te fua ʼo toku fatu ʼuhi ko te agahala ʼo toku nefesi?” Kailoa, ʼe mole feala ke tou fakafiafia ia Sehova ʼaki “he ʼu matuʼaʼi akeno e lauʼi afe, pea mo he ʼu vaitafe lolo e lauʼi hogofulu afe.” Kae ʼe ʼi ai te meʼa ʼe fiafia ai anai. Koteā te meʼa ʼaia?
ʼE Tonu Ke Tou Maʼuliʼi Te Faitotonu
6. Koteā te ʼu fakamaʼua e tolu ʼa te ʼAtua ʼe tuʼu ia Mikea 6:8?
6 Ia Mikea 6:8, ʼe tou ako ai te ʼu meʼa ʼaē ʼe fakamaʼua mai e te ʼAtua kia tatou. ʼE fehuʼi fēnei e Mikea: “Koteā ʼaē ʼe kole atu e Sehova kia te koe, ʼe mole koa la ko te maʼuliʼi ʼo te faitotonu, mo te manako ki te finegaloʼofa, pea mo te haʼele mo tou ʼAtua ʼaki he fia mālalo?” Ko te ʼu fakamaʼua ʼaia e tolu ʼe pipiki kiai totatou loto, mo tatatou fakakaukau, pea mo te ʼu meʼa ʼaē ʼe tou fai. ʼE tonu ke tou fia fakahā te ʼu kalitate ʼaia, ke tou fakakaukauʼi peʼe feafeaʼi te fakahā ʼo te ʼu kalitate ʼaia, pea mo fakahā ʼi tatatou ʼu gāue. Tou vakaʼi takitokotahi te ʼu fakamaʼua ʼaia e tolu.
7, 8. (a) Koteā te faka ʼuhiga ʼo te “maʼuliʼi ʼo te faitotonu”? (b) Koteā te ʼu aga heʼe faitotonu neʼe mafola ʼi te temi ʼo Mikea?
7 Ko “te maʼuliʼi ʼo te faitotonu” ko tona faka ʼuhiga ke tou fai te meʼa ʼaē ʼe totonu. ʼE feala ke tou faʼifaʼitakiʼi te faitotonu ʼo tou mulimuli ki te ʼu faʼahiga meʼa ʼaē ʼe fai e te ʼAtua. Kae ko te hahaʼi ʼaē neʼe maʼuʼuli ʼi te temi ʼo Mikea, neʼe mole nātou maʼuliʼi te faitotonu kae neʼe nātou heʼe faitotonu. Neʼe koteā ʼaē neʼe nātou fai? Tou vakaʼi ia Mikea 6:10. ʼI te fakaʼosi ʼo te vaega ʼaia, ʼe ʼui ʼo ʼuhiga mo te hahaʼi faifakatau neʼe nātou fakaʼaogaʼi he “efa neʼe fakanounou,” ko he meʼa neʼe nounou fau. ʼE toe ʼui ʼi te vaega 11 neʼe nātou fakaʼaogaʼi “he ʼu meʼa fua neʼe kākāʼi.” Pea ohage ko tona ʼui ʼi te vaega 12, ko “tonatou ʼalelo ʼe kākā.” Koia ko te ʼu meʼa fakafuafua neʼe hala, mo te ʼu meʼa fua neʼe hala, pea ko te ʼu loi neʼe mafola ʼi te ʼu gāue faifakatau ʼi te temi ʼo Mikea.
8 Neʼe mole gata pe te ʼu aga heʼe faitotonu ʼi te ʼu gāue faifakatau. Neʼe toe fai ʼi te telepinale. ʼE fakahā ia Mikea 7:3 ko “te tama ʼaliki ʼe ina kole hana meʼa, pea ko ia ʼaē ʼe faifakamāu ʼe ina fai ke foaki age he meʼa.” Neʼe foaki te ʼu totogi ki te kau tuʼi fakamāu ke nātou fakatūʼa te hahaʼi ʼaē neʼe mole nātou fai he meʼa ʼe kovi. “Ko ia ʼaē ʼe lahi,” peʼe ko ia ʼaē ʼe maʼuhiga, ʼe toe kau mo ia ki te ʼu aga ʼaia. ʼI tona fakahagatonu, ʼe ʼui e Mikea ko te tama ʼaliki, te tuʼi fakamāu pea mo te tagata lahi ʼe nātou “faifaitahi,” peʼe nātou gāue tahi ki te ʼu meʼa ʼaē ʼe kovi.
9. Neʼe koteā tona ʼu fua ki Suta pea mo Iselaele te ʼu aga heʼe faitotonu ʼa te kau agakovi?
9 Ko te ʼu aga heʼe faitotonu ʼaia ʼaē neʼe fai e te kau takitaki agakovi neʼe fua kovi ki Suta pea mo Iselaele katoa. ʼE ʼui ia Mikea 7:5 ko te mole maʼu ʼo te faitotonu neʼe iku ki te mole kei fefalalaʼaki ʼa te hahaʼi, mo te ʼu kaumeʼa lelei pea mo te ʼu taumatuʼa. ʼE fakahā ʼi te vaega 6, neʼe iku te faʼahi ʼaia ki te fefehiʼaʼaki ʼa he loto fale, ohage ko te ʼu foha mo te ʼu tāmai, te ʼu taʼahine mo te ʼu faʼe.
10. ʼI te mālama ʼaenī ʼaē ʼe lahi ai te heʼe faitotonu, e feafeaʼi te aga ʼa te kau Kilisitiano?
10 E feafeaʼi ia ʼaho nei? ʼE mole tou sio koa la ki he ʼu ʼaluʼaga feiā? Ohage ko Mikea, ʼe lahi tatatou sio ki te heʼe faitotonu, mo te kua puli ʼa te falala, pea mo te mole kei felogoi ʼa te hahaʼi pea mo te famili. Kae ʼi totatou ʼuhiga kau kaugana ʼa te ʼAtua ʼaē ʼe maʼuʼuli ʼi te mālama heʼe faitotonu ʼaenī, ʼe mole tonu ke tou fakahū ki te kokelekasio te laumālie ʼo te mālama heʼe faitotonu ʼaenī. Kae ʼe tonu ke tou faiga ke tou lagolago ki te ʼu pelesepeto ʼo te aga fakahagatonu pea mo te agatonu, ʼo tou fakahā te ʼu faʼahi ʼaia ʼi te ʼu faʼahi fuli pe ʼo totatou maʼuli. ʼI tona fakahagatonu, ʼe tou “agatonu ia meʼa fuli pe.” (Hepeleo 13:18, MN ) ʼE mole koutou manatu koa la kapau ʼe tou faitotonu pea ʼe tou maʼu anai he ʼu tapuakina lahi mai te fefalalaʼaki ʼaē ʼe tou maʼu ʼi te fale tautēhina?
ʼE Logo Feafeaʼi Anai Te Hahaʼi Ki “Te Leʼo ʼo Sehova”?
11. Neʼe fakahoko feafeaʼi ia Mikea 7:12?
11 ʼE fakakikite ia Mikea, logola te ʼu ʼaluʼaga heʼe faitotonu, kae ʼe fakahoko pe anai te faitotonu ki he faʼahiga hahaʼi. ʼE fakakikite e te polofeta ʼe fakatahitahi anai te hahaʼi “mai te tai ki te tai, pea mo te moʼuga ki te moʼuga” ke nātou liliu ko he kau atolasio ʼa Sehova. (Mikea 7:12) Ia ʼaho nei, ʼi te fakahoko fakamuli ʼo te lea faka polofeta ʼaia, ʼe mole ko he puleʼaga pe, kae ko te ʼu hahaʼi mai te ʼu puleʼaga fuli pe ʼaē ka fua lelei kia nātou te faitotonu ʼa te ʼAtua ʼaē ʼe mole fakapalatahi. (Isaia 42:1) Neʼe hoko feafeaʼi te faʼahi ʼaia?
12. ʼE logo feafeaʼi ia te hahaʼi ia ʼaho nei ki “te leʼo ʼo Sehova”?
12 Moʼo tali kiai, tou vakaʼi te ʼu palalau ʼaē neʼe fai e Mikea ki muʼa atu. ʼE ʼui fēnei ia Mikea 6:9: “Ko te leʼo ʼo Sehova ʼe kalaga ki te kolo, pea ko ia ʼaē ʼe ina maʼu te poto ʼaoga ʼe manavasiʼi anai ki tou huafa.” ʼE lava logo feafeaʼi te ʼu puleʼaga fuli pe ki “te leʼo ʼo Sehova,” pea ʼe pipiki feafeaʼi te faʼahi ʼaia ki tatatou maʼuliʼi ia te faitotonu? ʼE moʼoni ʼe mole logo moʼoni ia te hahaʼi ki te leʼo ʼo te ʼAtua. Kae ʼaki tatatou gāue fai faka mafola ʼi te malamanei katoa, ʼe logo te hahaʼi kehekehe ki te leʼo ʼo Sehova. Koia, ko nātou ʼaē ʼe logo ʼe nātou ‘manavasiʼi ki te huafa ʼo te ʼAtua,’ ʼo nātou liliu ʼo fakaʼapaʼapa ki te huafa ʼaia. ʼE mahino ia ʼe tou fai anai te meʼa ʼaē ʼe faitotonu pea mo tou fakahā te ʼofa, ʼo tou tauhi ohage ko he ʼu hahaʼi fai faka mafola faiva ʼo te Puleʼaga. Kapau ʼe tou fakahā te huafa ʼo te ʼAtua ki te hahaʼi fuli pe ʼo mole tou fakapalatahi, pea ʼe tou “maʼuliʼi [ai] te faitotonu.”
ʼE Tonu Ke Tou Manako Ki Te Finegaloʼofa
13. Koteā te kehekehe ʼo te lotoʼofa pea mo te ʼofa?
13 Tou talanoa ki te lua fakamaʼua ʼaē ʼe tuʼu ia Mikea 6:8. ʼE ʼamanaki e Sehova ke tou “manako ki te finegaloʼofa.” Ko te kupu faka Hepeleo ʼaē neʼe fakaliliu ʼaki te kupu “finegaloʼofa” ʼe toe fakaliliu ʼaki te kupu “lotoʼofa,” peʼe ko te “ ʼofa agatonu.” Ko he tahi ʼe lotoʼofa ʼe tokaga ki te hahaʼi, ʼe mahino ki tonatou ʼaluʼaga. Ko te lotoʼofa ʼe mole tatau ia mo te kalitate ko te ʼofa. Koteā tona tupuʼaga? Ko te ʼofa ʼe ko he kupu ʼe tou mahino gafua kiai, ʼe feala ke kita ʼofa ki he ʼu meʼa peʼe ko he ʼu manatu. Ohage la, ʼe talanoa te Tohi-Tapu ʼo ʼuhiga mo he tahi ʼe “ ʼofa ki te vino pea mo te lolo” peʼe ko he tagata ʼe “ ʼofa ki te poto.” (Tāʼaga Lea 21:17; 29:3) Kae ko te lotoʼofa ʼe fakahā tuʼumaʼu pe ki te hahaʼi, tāfito ia nātou ʼaē ʼe tauhi ki te ʼAtua. Koia ʼe talanoa ai ia Mikea 7:20 ki te “lotoʼofa ʼaē neʼe fakahā kia Apalahamo”—ʼaē neʼe tauhi kia Sehova ʼAtua.
14, 15. ʼE fakahā feafeaʼi te finegaloʼofa, pea koteā ʼaē ʼe fakamoʼoni kiai, ohage ko tona tuʼu ʼi te palakalafe?
14 ʼO mulimuli kia Mikea 7:18, ʼe ʼui e te polofeta ko te ʼAtua “ ʼe fiafia ʼi te lotoʼofa.” Ia Mikea 6:8, ʼe mole ina ʼui mai pe ke tou fakahā te lotoʼofa, kae ʼe ina ʼui mai ke tou manako ki te kalitate ʼaia. Koteā ʼaē ʼe tou tāʼofi mai te ʼu vaega ʼaia? ʼE tou fia fakahā lahi te lotoʼofa heʼe tou loto ke tou fakahā. Ohage ko Sehova, ʼe tou fiafia ʼi te fakahā ʼo te lotoʼofa kia nātou ʼaē ʼe ʼaoga kiai.
15 Ia ʼaho nei, ko te lotoʼofa ʼaia ʼe ko te fakaʼiloga ʼo te hahaʼi ʼa te ʼAtua. Tou vakaʼi te faʼifaʼitaki pe e tahi. ʼI Sūnio ʼo te taʼu 2001, neʼe hoko te lōmaki ʼi Texas, ʼi Amelika ʼuhi ko te afā, ʼo ina maumauʼi te ʼu lauʼi afe ʼapi, ʼo kau ai mo te ʼu ʼapi e teau tupu ʼa te kau Fakamoʼoni ʼa Sehova. Moʼo tokoni ki tonatou ʼu tēhina ʼaē ʼi te faigataʼaʼia, ko te kau Fakamoʼoni ʼa Sehova ʼe teitei 10 000 neʼe nātou foaki tonatou temi pea mo tonatou mālohi moʼo tokoni, kae neʼe mole totogi nātou. ʼO laka ia māhina e ono, ko te hahaʼi lotolelei neʼe nātou gāue kinakina, ʼo nātou fakaʼaogaʼi tonatou ʼu ʼaho, mo te ʼu pōʼuli, pea mo te ʼu vāhaʼa moʼo toe laga te ʼu Fale ʼo Te Puleʼaga e 8, pea mo te ʼu ʼapi e 700 tupu maʼa tonatou ʼu tēhina. Ko nātou ʼaē neʼe mole feala ke nātou fai te ʼu gāue ʼaia, neʼe nātou foaki te meʼa kai, mo te ʼu meʼa ʼe ʼaoga ki te maʼuli, pea mo he falā. He koʼe neʼe tokoni te ʼu lauʼi afe kau Fakamoʼoni fuli ʼaia ki tonatou ʼu tēhina? ʼUhi ko tanatou “manako ki te finegaloʼofa.” Pea ʼe fakaloto fīmālie te ʼiloʼi ʼaē ko te ʼu gāue ʼaia, neʼe fai ʼaki te lotoʼofa e totatou ʼu tēhina ʼi te kele katoa! Ei, ko te fakahoko ʼo te fakamaʼua ʼaē ke “manako ki te finegaloʼofa” ʼe mole ko he kavega ia, kae ko he fiafia!
Tou Haʼele Mo Te ʼAtua ʼAki He Fia Mālalo
16. Koteā te faʼifaʼitaki ʼe ina fakahā lelei ai te ʼaoga ʼaē ke tou fia mālalo ʼi tatatou haʼele mo te ʼAtua?
16 Ko te tolu fakamaʼua ʼaē ʼe tou maʼu ia Mikea 6:8, ʼe ko te “haʼele mo tou ʼAtua ʼaki he fia mālalo.” Ko tona faka ʼuhiga ke tou ʼiloʼi totatou ʼu tuʼakoi pea mo tou fakalogo ki te ʼAtua. Koʼeni te faʼifaʼitaki: Koutou fakakaukauʼi age muʼa he kiʼi taʼahine ʼe ina puke mālohi te nima ʼo tana tāmai kae nā lolotoga haʼele ʼi te afā. ʼE ʼiloʼi lelei e te kiʼi taʼahine ʼe mole lahi tona mālohi, kae ʼe falala ia ki tana tāmai. Mo tatou ʼe tonu ke tou ʼiloʼi totatou ʼu tuʼakoi kae ke tou falala ki tatatou Tāmai ʼaē ʼe ʼi selo. ʼE tou lava taupau feafeaʼi te falala ʼaia? Mo kapau ʼe tou manatuʼi pe koʼe ʼe ko he aga poto takita nofo ōvi ki te ʼAtua. ʼE fakamanatuʼi mai e Mikea te ʼu tupuʼaga e tolu: ko Sehova ʼe ko totatou Hāofaki, totatou Takitaki, pea mo totatou Puipui.
17. Neʼe hāofaki, mo takitaki pea mo puipui feafeaʼi e Sehova tana hahaʼi ʼi te ʼu temi muʼa?
17 Ohage ko tona ʼui ia Mikea 6:4, 5, ʼe ʼui fēnei e te ʼAtua: “Neʼe ʼau fakamavae koe mai te fenua ʼo Esipito.” Ei, ko Sehova neʼe ko te Hāofakiʼaga ʼo Iselaele. ʼE ʼui fēnei e Sehova ki muli age: “Neʼe ʼau fekauʼi ki ʼou muʼa ia Moisese, mo Alone pea mo Miliame.” Neʼe fakaʼaogaʼi ia Moisese pea mo Alone moʼo takitaki te puleʼaga, pea neʼe ko Miliame neʼe fakaʼaogaʼi moʼo takitaki te meʼe ʼaē neʼe fai e te hahaʼi fafine Iselaele ʼo ʼuhiga mo te mālo. (Ekesote 7:1, 2; 15:1, 19-21; Teutalonome 34:10) Neʼe takitaki e Sehova tana hahaʼi ʼaki tana ʼu kaugana. ʼI te vaega 5, ʼe fakamanatuʼi e Sehova ki te puleʼaga ʼo Iselaele, neʼe ina puipui nātou mai ia Palake pea mo Palaame, pea neʼe puipui te kau Iselaele ʼi te fakaʼosi ʼo tanatou fagona mai Sitime ʼi Moape ki Kilekale ʼi te Kele ʼo Te Fakapapau.
18. Koteā ʼaē ʼe fai e te ʼAtua ke liliu ko totatou Hāofakiʼaga, mo Takitaki pea mo Puipui ia ʼaho nei?
18 ʼI tatatou haʼele mo te ʼAtua, ʼe ina hāofaki tatou mai te mālama ʼa Satana, mo ina takitaki tatou ʼaki tana Folafola pea mo tana kautahi, pea mo ina puipui tatou fuli mokā fakafeagai mai te hahaʼi kia tatou. Koia ʼe tonu ai ke tou puke mālohi te nima ʼo tatatou Tāmai ʼaē ʼi selo ʼi tatatou haʼele mo ia ʼi te koga fakaʼosi ʼo tatatou fagona ki te mālama foʼou pea mo faitotonu ʼa te ʼAtua, ʼaē ko he kele ʼe lahi age ʼi te Kele ʼo Te Fakapapau ʼo te temi muʼa.
19. Koteā te pikipikiga ʼo te fia mālalo pea mo totatou ʼu tuʼakoi?
19 Ko tatatou fia mālalo ʼi tatatou haʼele mo te ʼAtua ʼe tokoni mai ke tou sio ki te ʼaluʼaga moʼoni ʼo te ʼu meʼa ʼaē ʼe hoko kia tatou. ʼE feala te faʼahi ʼaia heʼe faka ʼuhiga te fia mālalo ki tatatou ʼiloʼi totatou ʼu tuʼakoi. Ko te matutuʼa peʼe ko he mahamahaki ʼe lagi faka tuʼakoi ai te ʼu meʼa ʼe feala ke tou fai ʼi te tauhi kia Sehova. ʼE mole tonu ke tou tuku te ʼaluʼaga ʼaia ke ina fakaloto vaivaiʼi tatou, kae ʼe tonu ke tou manatuʼi ko te ʼAtua ʼe ina tali tatatou ʼu faiga pea mo tatatou ʼu sakilifisio, ‘ ʼo mulimuli ki te meʼa ʼaē ʼe tou maʼu, kae mole mulimuli ki te ʼu meʼa ʼaē ʼe mole tou maʼu.’ (2 Kolonito 8:12) ʼI tona fakahagatonu, ʼe ʼamanaki ia Sehova ke tou tauhi kia te ia ʼaki totatou loto katoa, ʼo tou fai ia meʼa fuli ʼo mulimuli ki totatou ʼaluʼaga. (Kolose 3:23) Ka tou fai ia meʼa fuli pe ʼe tou lava fai ʼi te tauhi ki te ʼAtua ʼaki te fakamalotoloto pea mo te faʼafai, pea ʼe ina tapuakina lahi ia tatou.—Tāʼaga Lea 10:22.
Ko Te Fakatalitali ʼe Maʼu Ai Te ʼu Tapuakina
20. Koteā ʼaē ʼe tonu ke tou tokaga kiai ʼe tokoni mai anai ke tou fakahā he fia fakatalitali ohage ko Mikea?
20 Ko tatatou maʼu te ʼu tapuakina mai ia Sehova, ʼe ina uga ai tatou ke tou faʼifaʼitaki te manatu ʼa Mikea. ʼE ina tala fēnei: “ ʼE ʼau fia fakatalitali ki te ʼAtua ʼo toku hāofaki.” (Mikea 7:7) Koteā te pikipikiga ʼo te ʼu palalau ʼaia mo tatatou haʼele mo te ʼAtua ʼaki he fia mālalo? Ko te kātaki ʼo fakatalitali, ʼe tokoni mai kia tatou ke ʼaua naʼa tou lotovaivai ʼi te mole heʼeki hoko mai ʼo te ʼaho ʼo Sehova. (Tāʼaga Lea 13:12) ʼI tona fakahagatonu, ʼe tou loto fuli ke hoko mai la te fakaʼosi ʼo te mālama agakovi ʼaenī. Kae ʼi te vāhaʼa fuli ko te ʼu lauʼi afe hahaʼi ʼe nātou kamata haʼele mo te ʼAtua. ʼI tatatou ʼiloʼi te faʼahi ʼaia, ʼe tou maʼu ai he tupuʼaga ke tou fia fakatalitali. Ko te tēhina ko te Fakamoʼoni talu mai fualoa, neʼe ina ʼui ʼo ʼuhiga mo te faʼahi ʼaia: “ ʼI taku toe manatuʼi te ʼu taʼu e 55 ʼi te gāue fai faka mafola, ʼe ʼau tui papau neʼe mole ʼau hala ʼi he meʼa ʼi taku fakatalitali ʼaē kia Sehova. Kailoa ia, neʼe ʼau hāo mai te ʼatu ʼu ʼaluʼaga fakaloto mamahi.” Neʼe kua hoko koa kia koutou te ʼaluʼaga ʼaia?
21, 22. ʼE hoko feafeaʼi ia Mikea 7:14 ia ʼaho nei?
21 ʼE mahino ia ko te haʼele mo Sehova ʼe fua lelei kia tatou. Ohage ko tatatou lau ia Mikea 7:14, ʼe fakatatau e Mikea te hahaʼi ʼa te ʼAtua ki he ʼu ōvi ʼe nātou nonofo fīmālie mo tanatou tagata tauhi ōvi. ʼI te fakahoko ʼo te lea faka polofeta ʼaia ʼi hona ʼaluʼaga lahi age ʼi totatou temi, ko te toe ʼo te Iselaele fakalaumālie pea mo te “tahi ʼu ōvi,” ʼe nātou nonofo ʼi te fīmālie mo tanatou Tagata Tauhi Ōvi, ko Sehova, ʼaē ʼe nātou falala ki ai. ʼE nātou nonofo “tokotahi ʼi te vao matuʼa—ʼi te lotolotoiga ʼo te gāueʼaga,” ʼe nātou mavae kehe ʼi te faʼahi fakalaumālie mai te mālama ʼaē ʼe tuputupu ai te maveuveu pea mo te ʼu tuʼutāmaki.—Soane 10:16, MN; Teutalonome 33:28; Selemia 49:31; Kalate 6:16.
22 Ohage ko tona fakakikite e Mikea 7:14, ʼe maʼuli te hahaʼi ʼa Sehova ʼi te mahu. ʼI tana talanoa ʼo ʼuhiga mo te ʼu ōvi ʼa te ʼAtua, peʼe ko te hahaʼi, ʼe ʼui fēnei e Mikea: “Ke nātou kakai ʼi Pasane pea mo Kileate.” Ohage pe ko te kakai ʼa te ʼu ōvi ʼi Pasane pea mo Kileate ʼi te ʼu kele lalahi pea mo maʼuli, ko te hahaʼi ʼa te ʼAtua ʼe nātou mahu ʼi te faʼahi fakalaumālie—ko te tahi tapuakina ʼaia kia nātou ʼaē ʼe haʼele mo te ʼAtua ʼaki he fia mālalo.—Faka ʼau 32:1; Teutalonome 32:14.
23. Koteā te ako ʼe feala ke tou tāʼofi mai ia Mikea 7:18, 19?
23 Ia Mikea 7:18, 19, ʼe faka maʼuhigaʼi e te polofeta te loto ʼo Sehova ʼaē ke ina fakamolemole kia nātou ʼaē ʼe fakahemala. ʼE ʼui ʼi te vaega 18, ko Sehova ʼe “ina fakamolemole te hala” pea mo “fakalaka ʼi te talagataʼa.” Ohage ko tona ʼui ʼi te vaega 19, ʼe ina “lī anai tanatou ʼu agahala fuli ki te tai loloto.” Koteā te ako ʼe feala ke tou tāʼofi mai ai? ʼE feala ke tou feʼekeʼaki peʼe tou faʼifaʼitakiʼi ia Sehova ʼi te faʼahi ʼaia. ʼE tou fakamolemole koa te ʼu hala ʼaē ʼe fai mai e ʼihi kia tatou? Ka fakahemala te hahaʼi pea mo nātou kumi he fakatokatoka, pea ʼe tou fia fakakaukau moʼoni anai ki te fia fakamolemole katoa pea mo talu ai ʼaē ʼa Sehova.
24. Koteā ʼaē ʼe tonu ke koutou fai ke koutou maʼu te ʼu lelei ʼo te lea faka polofeta ʼa Mikea?
24 Koteā te ʼaoga kia tatou ia tatatou vakaʼi te lea faka polofeta ʼa Mikea? ʼE ina fakamanatuʼi mai ko Sehova ʼe ina foaki te ʼamanaki moʼoni kia nātou ʼaē ʼe fakaōvi kia te ia. (Mikea 2:1-13) Neʼe fakaloto mālohiʼi tatou ke tou fai ia meʼa fuli pe moʼo faka mafola te tauhi moʼoni ke feala hatatou haʼele ʼi te huafa ʼo te ʼAtua ʼo talu ai. (Mikea 4:1-4) Pea ʼe tou loto fīmālie, heʼe tatau aipe peʼe feafeaʼi totatou ʼaluʼaga, kae ʼe feala ke tou fakahoko te ʼu fakamaʼua ʼa Sehova. Ei neʼe fakaloto mālohi moʼoni ia tatou e te lea faka polofeta ʼa Mikea ke tou haʼele ʼi te huafa ʼo Sehova.
ʼE Koutou Tali Feafeaʼi Anai?
• ʼO mulimuli kia Mikea 6:8, koteā ʼaē ʼe fakamaʼua mai e Sehova kia tatou?
• Koteā ʼaē ʼe tonu ke tou fai mo kapau ʼe tou fia “maʼuliʼi te faitotonu”?
• ʼE tou lava fakahā feafeaʼi ʼe tou “manako ki te finegaloʼofa”?
• Koteā ʼaē ʼe tonu ke tou fai mo kapau ʼe tou ‘haʼele mo te ʼAtua ʼaki he fia mālalo’?
[Paki ʼo te pasina 21]
Logola te ʼu ʼaluʼaga agakovi ʼo tona temi, kae neʼe fakahoko e Mikea te ʼu fakamaʼua ʼa Sehova. Koia ʼe toe feala mo tatou ke tou fai te faʼahi ʼaia
[Paki ʼo te pasina 23]
Tou maʼuliʼi te faitotonu ʼo tou fagonogono ki te hahaʼi kehekehe
[Paki ʼo te pasina 23]
Tou fakahā tatatou manako ki te finegaloʼofa ʼo tou foaki te ʼu meʼa ʼaē ʼe ʼaoga ki te hahaʼi
[Paki ʼo te pasina 23]
ʼAki he fia mālalo, koutou fai ia meʼa fuli pe ʼe koutou lavaʼi ʼo mulimuli ki tokotou ʼu tuʼakoi