ʼE Feafeaʼi Hatatou Lava Tuku Tatatou ʼAmanaki Ki Te ʼAtua?

1. He ko ʼe ʼe feala ke tou fiu ʼi te fakatalitali?

KO TE ʼu ʼaho fakamuli ʼo te malama ʼa Satana neʼe kamata ʼi te taʼu 1914 ʼae neʼe fakanofo Hau ai ia Kilisito ʼi selo. ʼI te taʼu ʼaia, neʼe hoko te tau ʼi te lagi, pea neʼe li ifo e Sesu ia te Tevolo pea mo ʼana temonio ki te kele. (Lau ia Apokalipisi 12:7-9.) ʼE iloʼi e Satana “kua nounou pe tona temi.” (Apk. 12:12) Kaʼe ko te temi “nounou” ʼaia kua loaloaga ia ki ʼihi. Kua tou fiu koa ʼi te fakatalitali ke haga la ia Sehova ʼo fakaʼauha te malama ʼa Satana?

2. Ko te ʼu fehuʼi fea ʼae ka tali anai ki ai te alatike ʼaeni?

² Moka tou fiu ʼi te fakatalitali, pea ʼe feala ke fakatupu tuʼutamaki kia tatou. Kotea tona tupuʼaga? Koteʼuhi ʼe feala ʼaki ai ke tou fai he meʼa kaʼe ʼe mole tou fakakaukau leleiʼi muʼa. Koia, kotea ʼae ʼe lava tokoni mai ke tou fakatalitali ai? ʼE tokoni mai anai te alatike ʼaeni heʼe tali anai ki te ʼu fehuʼi ʼaeni: (1) Kotea ʼae ʼe tou lava ako ʼo ʼuhiga mo te kataki fualoa ʼa te polofeta ko Mikea? (2) Kotea te ʼu aluʼaga ʼae ʼe ha anai kua ovi mai te fakaʼosi? (3) ʼE tou lava fakaha feafeaʼi ʼe tou lotofakafetaʼi ki te kataki fualoa ʼa Sehova?

KOTEA ʼAE ʼE TOU LAVA AKO MAI TE FAʼIFAʼITAKI ʼO MIKEA?

3. Neʼe feafeaʼi te ʼu aluʼaga ʼo Iselaele ʼi te temi ʼo Mikea?

³ Lau ia Mikea 7:2-6. Ko te polofeta ʼa Sehova ʼae ko Mikea neʼe sio ia ki te liliu mamalie ʼa te kau Iselaele ʼo heʼe agatonu kia Sehova, pea lolotoga te ʼafio ʼo te Hau ko Akase, neʼe natou liliu ai leva ʼo heʼe agatonu ʼosi. Neʼe fakatatau e Mikea te kau Iselaele heʼe agatonu ʼaia ki he fuʼu ʼakau talatala ʼe feala ke lavea ai he tahi. Neʼe fakatatau natou ki he fuʼu ʼakau talatala he neʼe natou gaohi koviʼi pea mo fakamamahiʼi ʼihi. Neʼe kovi ʼaupito te ʼu aluʼaga ʼo Iselaele heʼe maʼia mo ʼihi famili neʼe mole kei natou feʼofaʼofani. Neʼe mahino kia Mikea neʼe mole feala hana fetogi e ia totonu te ʼu aluʼaga ʼaia, koia ʼae neʼe faikole ai kia Sehova ʼaki tona loto katoa. Pea ʼaki he kataki fualoa neʼe fakatalitali ai ke fakahoko e te ʼAtua te ʼu fetogi. Neʼe tui papau ia Mikea ʼe fakatonutonuʼi anai e Sehova ia te ʼu aluʼaga ʼaia ʼi Tona temi totonu.

4. Kotea te ʼu fihifihia ʼae ʼe tou tau mo ia?

⁴ Ohage ko Mikea, ʼe tou toe maʼuʼuli ʼi te lotolotoiga ʼo he hahaʼi ʼe manatu pe kia natou. Tokolahi ʼe natou “maʼuli galo, heʼe  agatonu, heʼe ʼofa.” (2 Tim. 3:2, 3, MN) ʼE feala ke tou maʼuli tuʼania ʼuhi ko ʼotatou kauga gaue, mo kauga ako pea mo vahaʼa fale ʼae ʼe natou manatu pe kia natou totonu. Kaʼe ʼe maʼu e ʼihi ia tatou ia he fihifihia ʼe lahi age. Neʼe ui e Sesu ʼe haʼu anai te fakafeagai ʼo ʼana tisipulo mai ʼonatou famili. ʼE tatau ʼana palalau mo ʼae ʼe tou lau ia Mikea 7:6. Neʼe ui fenei e Sesu: “Nee au hau o veteki te tama mo tana tamai, te taahine mo tana fae, te fafine ohoana mo te fae o tona ohoana; pea e mau anai e te tagata ona fili i te hahai o tona api.” (Mat. 10:35, 36) ʼE ko he aluʼaga faigataʼa ʼaupito moka fakalainoaʼi tatou mo fakafeagai mai he tahi ʼo totatou famili ʼe mole tauhi kia Sehova. Kapau koia, pea ʼe tonu ke tou katakiʼi te aluʼaga ʼaia. Pea ʼe tonu ke tou nofo agatonu kia Sehova pea mo fakatalitali ʼaki he kataki fualoa ke ina fakatonutonuʼi te aluʼaga ʼaia. Kapau ʼe tou haga kole ia tana tokoni, pea ʼe ina foaki mai anai te malohi mo te poto ʼae ʼe feala ʼaki ai ke tou nofo agatonu kia te ia.

5, 6. Neʼe fakapale feafeaʼi e Sehova ia Mikea? Kotea ʼae neʼe mole sio ki ai Mikea?

⁵ Neʼe fakapale e Sehova ia Mikea ʼuhi ko tana kataki fualoa. Neʼe sio ia Mikea ki te pulihi ʼo te Hau agakovi ko Akase pea mo tona ʼuhiga pule. Neʼe sio ia ki te fakanofo hau ʼo te foha ʼo Akase, ia Esekiasi, pea mo tana tokoni ki te kau Iselaele ke natou toe liliu ki te tauhi maʼa. Neʼe toe sio foki ia Mikea ki te hoko ʼo te lea fakapolofeta ʼae neʼe ina tohi ʼo ʼuhiga mo Samalia, ʼi te temi ʼae neʼe maʼu ai e te kau Asilia te potu noleto ʼo te puleʼaga ʼo Iselaele.—Mik. 1:6.

⁶ Kaʼe neʼe mate ia Mikea ʼi muʼa ʼo hana sio ki te fakahoko ʼo te ʼu lea fakapolofeta fuli ʼae neʼe ina tohi ʼaki te takitaki ʼa Sehova. Ohage la, neʼe tohi fenei e Mikea: “I he temi ki amuli, e lagai anai te mouga o te fale o [Sehova] i te tumutumu o te atu mouga, e malaga anai ia ia i oluga o te atu mouga liliki, pea e holo mai anai ki ai te hahai. E alu anai ki ai ni hahai kaugamalie, pea e natou ui anai: Koutou omai, pea ke tou hahake ki te mouga o [Sehova].” (Mik. 4:1, 2) Tatau aipe pe kotea ʼae neʼe fai e te hahaʼi ʼi ʼona tafaʼaki, kaʼe neʼe fakatotonu e Mikea ʼe nofo agatonu anai kia Sehova ʼo kaku ki tona mate. Neʼe ina tohi fenei: “E haele anai te hahai fuli pe i te huafa o tona atua, ko matou, e matou haele anai i te huafa o [Sehova], tomatou Atua, i te taitupu mo te taitupu, o heegata.” (Mik. 4:5) ʼAki he kataki fualoa neʼe tuku e Mikea tana ʼamanaki kia Sehova lolotoga te ʼu temi faigataʼa, koteʼuhi neʼe tui papau ia ʼe ina fakahoko fuli anai ʼAna fakapapau. Neʼe falala te polofeta agatonu ʼaia kia Sehova.

7, 8. (1) Ko te tupuʼaga fea ʼae ʼe tou falala ai kia Sehova? (2) Kotea ʼae ʼe hage ai anai ʼe fakalaka vave te temi?

⁷ ʼE tou falala koa kia Sehova ohage ko Mikea? ʼE ʼi ai tona tupuʼaga lelei heʼe tou sio moʼoni ki te hoko ʼo te lea fakapolofeta ʼa Mikea. Lolotoga te ʼu ʼaho fakamuli ʼaeni, ko te toko lau ʼi miliona hahaʼi mai te ʼu puleʼaga fuli mo telepi pea mo lea kehekehe ʼe natou ʼomai ki “te mouga o te fale o [Sehova].” Logo pe ʼe ʼomai te kau atolasio ʼaia mai te ʼu puleʼaga ʼe fetauʼaki tuʼumaʼu, kaʼe ʼe natou fai ʼaki “anatou heleta ni huo mataloa,” pea ʼe natou fakafisi te toe ako ʼo “te tau.” (Mik. 4:3) ʼE ko he toe pilivilesio ia tatatou kau ki te hahaʼi tokalelei ʼa Sehova.

⁸ ʼE tou loto fuli ke fakaʼauha la e Sehova te malama agakovi ʼaeni. Kaʼe ke tou fakatalitali ʼaki he kataki fualoa, ʼe ʼaoga ke tatau tatatou faʼahiga manatu mo te faʼahiga manatu ʼa Sehova. Neʼe ina filifili ia Sesu Kilisito moʼo fakamauʼi te hahaʼi, pea kua ina fakakatofa he ʼaho moʼo fakahoko te faʼahi ʼaia. (Gaue 17:31) Kaʼe ʼi muʼa ʼo te hoko mai ʼo te ʼaho ʼaia, ʼe foaki e te ʼAtua ki te hahaʼi fuli te faiga malie ʼae ke natou “iloi katoa . . . te mooni,” mo maʼuliʼi te ʼu faʼahi ʼae ʼe natou ako pea mo natou hao ai. ʼE tonu ke tou manatuʼi ʼe tuʼutamakiʼia te maʼuli ʼo te hahaʼi. (Lau ia 1 Timoteo 2:3, 4.) Kua tau ovi pe te fakaʼosi. Kapau ʼe tou maʼumaʼua ʼi te tokoni ki te hahaʼi ke natou iloʼi ia Sehova, pea ʼe hage anai te temi ʼae ʼe kei toe ʼe fakalaka vave. Pea moka hoko mai anai te fakaʼosi, ʼe tou fiafia anai he neʼe tou maʼumaʼua ʼi te gaue faifakamafola!

KOTEA TE ʼU ALUʼAGA ʼAE ʼE HA ANAI KUA OVI MAI TE FAKAʼOSI?

9-11. Kua hoko koa ia te lea fakapolofeta ʼae ia 1 Tesalonika 5:3? Kotou fakamahino.

⁹ Lau ia 1 Tesalonika 5:1-3. Kua vave ui pe anai “Tokalelei mo fimalie!” Kapau ʼe mole tou loto ke fakahalaʼi tatou ʼaki te logo ʼaia, pea ʼe ʼaoga ke “tou alaala pea tou fakapotopoto.” (1 Tes. 5:6) ʼE tou talanoa anai ki he ʼu aluʼaga neʼe tonu ke hoko ʼi muʼa pe ʼo te tala ʼo te logo maʼuhiga ʼaia.

¹⁰ ʼI te hili ʼo te ʼu tau fakamalamanei ʼe lua, neʼe loto ʼaupito te ʼu puleʼaga ki te tokalelei. Hili te ʼuluaki tau fakamalamanei, neʼe fakatuʼu te Sosiete ʼo Te ʼu Puleʼaga moʼo maluʼi te tokalelei. Ki muli age, ʼi te ʼosi ʼo te lua tau fakamalamanei, neʼe ko te ʼamanaki ʼa te hahaʼi ʼe lava fakatuʼu anai e te Kautahi ʼo Te ʼu Puleʼaga Fakatahi ia te tokalelei. Neʼe falala te ʼu takitaki ʼo te ʼu puleʼaga mo te ʼu lotu ki te ʼu kautahi ʼaia ʼe lua. Ohage la, neʼe tala e te ʼu Puleʼaga Fakatahi ko te taʼu 1986 ʼe ko te Taʼu ʼo Te Tokalelei ʼi Te Malamanei. ʼI te taʼu ʼaia, neʼe fakatahi ai te kau taki fakapolitike mo fakalotu pea mo te Tuʼi Tapu ke natou faikole ʼo ʼuhiga mo te tokalelei.

¹¹ Kaʼe ko te lea fakapolofeta ʼae ia 1 Tesalonika 5:3, ʼe mole hoko ia ʼaki te logo ʼo ʼuhiga mo te tokalelei mo te fimalie pea mo ʼihi atu logo feia. Kotea tona tupuʼaga? Koteʼuhi ʼe mole heʼeki hoko te fakakikite ʼo ʼuhiga mo “he tuutamaki fakapunamauli.”

12. Kotea ʼae ʼe tou iloʼi ʼo ʼuhiga mo te logo “Tokalelei mo fimalie”?

¹² Ko ai anai ka ina tala te logo maʼuhiga ʼo ʼuhiga mo te “Tokalelei mo fimalie!”? ʼE kau feafeaʼi anai ki ai te kau takitaki lotu ʼae ʼe natou ui ʼe natou Kilisitiano pea mo ʼihi atu lotu? ʼE kau feafeaʼi anai ki ai te ʼu puleʼaga? ʼE mole fakaha mai te faʼahi ʼaia ʼi te Tohi-Tapu. Kaʼe ko te faʼahi ʼae ʼe tou tui papau ki ai, ʼe mole ʼi ai moʼoni anai he “tokalelei mo fimalie,” tatau aipe pe feafeaʼi anai tona faʼahiga tala pea mo tona hage mai ʼe moʼoni. Pea ko te tuʼu ʼaeni ʼe kei puleʼi pe anai e Satana. Ko tona malama ʼe kakā ʼaupito pea ʼe mole fetogi anai. ʼE ko he meʼa fakaʼofaʼofa anai mo kapau ʼe tou tui ki te ʼu loi ʼaia ʼa Satana pea mo tou kau ki te ʼu meʼa fakapolitike!

13. He ko ʼe ʼe taʼofi e te ʼu ʼaselo te ʼu matagi ʼo te fakaʼauha?

¹³ Lau ia Apokalipisi 7:1-4. ʼI tatatou fakatalitali ki te fakahoko ʼo 1 Tesalonika 5:3, ʼe lolotoga taʼofi e te ʼu ʼaselo malolohi te ʼu matagi ʼo te fakaʼauha ʼo te mamahi lahi. Kotea ʼae ʼe natou fakatalitali ki ai? Neʼe tohi e te apositolo ko Soane ʼe tonu ke maʼu e “te u tagata faifekau [fakanofo] o totatou Atua” ia tonatou fakaʼiloga fakaʼosi.a Moka kua ʼosi te aluʼaga maʼuhiga ʼaia, pea hoki tuku age leva e te ʼu ʼaselo te ʼu matagi ʼo te fakaʼauha. Pea kotea ʼae ka hoko anai?

14. Kotea ʼae ʼe ha mai ai kua vave fakaʼauha pe anai ia Papilone Lahi?

¹⁴ Ko Papilone Lahi, ia te kautahi fakamalamanei ʼo te ʼu lotu hala, ʼe tuha anai ke fakaʼauha. Moka hoko mai anai ia tona fakaʼauha, ʼe mole feafeala anai ke tokoni ki ai he tahi. Pea kua feala hatatou sio ki te kua ovi mai ʼo tona fakaʼosi. (Apk. 16:12; 17:15-18; 18:7, 8, 21) ʼAki te valokiʼi ʼo te ʼu lotu pea mo tana kau taki ʼi te ʼu talalogo, ʼe tou tokagaʼi ai te mole kei kauga malie ʼo natou ʼae ʼe lagolago ki ai. Logo pe te faʼahi ʼaia, kaʼe ʼe ui pe ia e te kau takitaki lotu ʼe mole feala ke hoko kia natou he tuʼutamaki. ʼI ʼanatou faihala leva! Hili te tala ʼo te logo “Tokalelei mo fimalie,” ʼe ʼohofi fakapunamaʼuli anai pea mo fakaʼauha katoa anai ia te ʼu lotu hala e te ʼu puleʼaga. Ko Papilone Lahi ʼe pulihi anai ʼo talu ai! ʼE mahino papau ia, ʼe lelei hatatou fakatalitali ʼaki he kataki fualoa ki te ʼu aluʼaga maʼuhiga ʼaia.—Apk. 18:8, 10.

TOU FAKAHA ʼE TOU LOTOFAKAFETAʼI KI TE KATAKI FUALOA ʼA TE ʼATUA

15. He ko ʼe ʼe fakatalitali ia Sehova ʼaki he kataki fualoa?

¹⁵ Logo pe te manukiʼi e te hahaʼi ia te huafa ʼo Sehova, kaʼe ʼe fakatalitali ia ʼaki he kataki fualoa moʼo fakatonutonuʼi te aluʼaga ʼaia ʼi tona temi totonu. ʼE mole loto e Sehova ke fakaʼauha fuli te hahaʼi ʼae ʼe fakamalotoloto. (2 Pet. 3:9, 10) ʼE kotou manatu feia koa? ʼI muʼa ʼo te hoko mai ʼo te fakaʼosi, ʼe tou lava fakaha ʼi he ʼu aluʼaga kehekehe tatatou lotofakafetaʼi ki te kataki fualoa ʼa Sehova.

16, 17. (1) He ko ʼe ʼe tonu ke tou fia tokoni kia natou ʼae ʼe mole kei tauhi kia Sehova? (2) He ko ʼe ʼe maʼuhiga kia natou ʼaia ke natou toe liliu mai kia Sehova ʼi te temi nei?

¹⁶ Tou tokoni kia natou ʼae ʼe mole kei tauhi ki te ʼAtua. Neʼe ui e Sesu ʼe ʼi ai anai he fiafia lahi ʼi te lagi moka toe maʼu he ovi pe ʼe tahi neʼe kua puli. (Mat. 18:14; Luka 15:3-7) ʼE tokaga lelei ia Sehova kia natou ʼae ʼe ʼoʼofa kia te ia, tatau aipe pe ʼe mole kei natou tauhi kia te ia ʼi te temi nei. ʼE fiafia ia Sehova mo te kau ʼaselo moka tou tokoni ki te hahaʼi ke natou toe liliu mai kia Sehova.

¹⁷ ʼE kotou kau koa ia natou ʼae ʼe mole kei tauhi ki te ʼAtua ʼi te temi nei? Lagi ʼe mole kei kotou kau ki te ʼu fono ʼuhi he neʼe fakamamahiʼi koutou e he tahi ʼi te kokelekasio. Pea lagi kua fakalaka nei ki ai he temi. Koia kotou fai te ʼu fehuʼi ʼaeni kia koutou: “Kua lelei age koa toku maʼuli pea mo au fiafia age? Neʼe ko Sehova koa ʼae neʼe ina fakamamahiʼi au, peʼe ko he tagata agahala pe ia? Neʼe kua fai mai koa e Sehova ʼAtua he meʼa ke au lotomamahi ai?” Ko Sehova neʼe tokaga lelei tuʼumaʼu pe ia kia tatou. Logo pe ʼe lagi mole tou fakahoko tatatou fakapapau ʼae ke tou tauhi kia te ia ʼi te temi nei, kaʼe ʼe kei ina fakagafua pe ke tou maʼu te ʼu meʼa lelei ʼae ʼe ina foaki mai. (Sakp. 1:16, 17) Kaʼe kua vave hoko mai pe te ʼaho ʼo Sehova. ʼE ko te temi ʼaeni ʼae ʼe tonu ke tou toe liliu ai ki tatatou Tamai ʼofa, ia Sehova, pea mo te kokelekasio. Ko te koga meʼa pe ʼaia ʼe tahi ʼe feala ke tou hao ai ʼi te ʼu ʼaho fakamuli ʼaeni.—Tet. 33:27; Hep. 10:24, 25.

18. He ko ʼe ʼe tonu ke tou lagolago kia natou ʼae ʼe takitaki?

¹⁸ Tou lagolago agatonu kia natou ʼae ʼe takitaki. Ohage pe ko he Tauhi Ovi ʼofa, ko Sehova ʼe ina takitaki pea mo puipui tatou. Neʼe ina fakanofo ia tona ʼAlo ko te Pule Tauhi Ovi ʼo te faga ovi. (1 Pet. 5:4) Ko te kau tagata ʼafeā ʼae ia kokelekasio ʼe 100 000 tupu, ʼe natou toʼo he temi moʼo tokaga ki te ʼu ovi takitahi ʼa te ʼAtua. (Gaue 20:28) Moka tou lagolago agatonu kia natou ʼae ʼe takitaki, pea ʼe tou fakaha ai kia Sehova mo Sesu ia tatatou lotofakafetaʼi ki te ʼu meʼa fuli neʼe nā fai maʼa tatou.

19. ʼE tou lava fakaovi feafeaʼi ki ʼotatou tehina?

¹⁹ Tou fakaovi ki ʼotatou tehina. Kotea tona fakaʼuhiga? Ohage la ʼi te tau, moka ʼohofi he kau solia faiva e tonatou fili, pea ʼe natou haʼele fakapupu. ʼAki tanatou fai te faʼahi ʼaia, pea ʼe faigataʼa ai anai ki tonatou fili hana malo. Kua toe malohi age te ʼohofi e Satana ia te hahaʼi ʼa te ʼAtua. ʼE mole ko te temi ʼaeni ke tou fakafeagai ai ki ʼotatou tehina. Kaʼe ʼe ko te temi ʼaeni ke tou felogoʼi lelei ai mo ʼotatou tehina, mo fakalaka ʼi ʼonatou vaivaiʼaga pea mo falala kia Sehova.

20. Kotea ʼae ʼe tonu ke tou fai ʼi te temi nei?

²⁰ Koia tou haga taupau ke malohi ʼatatou felogoʼi mo Sehova, pea mo tou tuku tatatou ʼamanaki kia te ia. Tou fakatalitali ʼaki he kataki fualoa ki te tala ʼo te logo “Tokalelei mo fimalie!” pea mo te fakaʼiloga fakaʼosi ʼa te kau fakanofo. Hili te ʼu aluʼaga ʼaia, pea ʼe tuku age anai e te ʼu ʼaselo ʼe tokofa ia te ʼu matagi ʼo te fakaʼauha, pea ʼe fakaʼauha anai ia Papilone Lahi. ʼI tatatou lolotoga fakatalitali ki te ʼu aluʼaga maʼuhiga ʼaia, tou mulimuli ki te takitaki ʼa te kau tagata ʼafeā ʼi te kautahi ʼa Sehova. Tou fakaovi ki ʼotatou tehina ke feala ai hatatou tauʼi ia te Tevolo pea mo ʼana temonio! ʼE ko te temi ʼaeni ke tou mulimuli ai ki te tokoni ʼaeni ʼa te tagata faipesalemo: “Ke koutou loto toa, pea ke fakamalohii okotou loto, koutou fuli ae e amanaki . . . [kia Sehova]!”—Pes. 31:25[Pes. 31:24, MN].