Tou Faʼifaʼitakiʼi Te Kau Polofeta—Mikea
1. He ko ʼe ʼe tou lava tui papau ʼe fakaʼauha anai e Sehova ia te tuʼu agakovi ʼaeni ʼi tona temi totonu?
1 ‘ ʼE hoko anai ʼafea te fakaʼauha ʼo te tuʼu agakovi ʼaeni?’ Neʼe lagi fai e te polofeta ko Mikea ia te fehuʼi ʼaia ʼi tana tala te ʼu fakamau ʼa Sehova ki te ʼu puleʼaga ʼo Iselaele pea mo Suta. Pea neʼe hoko te ʼu faʼahi ʼae neʼe tui ki ai ia Mikea. ʼI te taʼu 740 I.M.T.S., lolotoga te kei maʼuli ʼa Mikea, neʼe hoko te ʼu palalau ʼae neʼe fai e Sehova ʼo ʼuhiga mo Samalia. (Mik. 1:6, 7) Pea ki muli age, ʼi te taʼu 607 I.M.T.S. neʼe fakaʼauha ia Selusalemi. (Mik. 3:12) ʼE tou lava faʼifaʼitakiʼi feafeaʼi ia Mikea ʼi tatatou fakaʼatalitali ke fakahoko e Sehova ʼana fakamau ia ʼaho nei?
2. ʼE tou lava fakaha feafeaʼi te faʼa kataki ʼi tatatou fakaʼatalitali ki te ʼaho ʼo Sehova, pea kotea tona tupuʼaga?
2 Tou Faʼa Kataki: Neʼe tohi fenei e Mikea: “Kia au, e au maliu anai [kia Sehova], e au tuku anai taku amanaki lelei [peʼe au fakaʼatalitali] ki te Atua o toku fakamauli.” (Mik. 7:7) ʼE mahino ia, neʼe mole fakaʼaoʼaoganoa ia Mikea ʼi tana fakaʼatalitali ʼae ki te fakaʼosi. Kaʼe neʼe maʼumaʼua ia ʼi tona ʼuhiga polofeta ʼa Sehova. ʼO toe feia mo tatou, ʼi tatatou fakaʼatalitali ki te ʼaho ʼo Sehova, ʼe tonu ke tou fai “te ʼu aga fakamaʼoniʼoni pea mo te ʼu gaue ʼae ʼe fakaʼiloga ʼaki [tatatou] pipiki ki te ʼAtua.” (2 Pet. 3:11, 12, MN) ʼAki te faʼa kataki ʼa Sehova, ʼe feala ai ki te hahaʼi ke natou fakahemala. (2 Pet. 3:9) Koia ʼe tou mulimuli ai ki te tokoni Fakatohi-tapu ʼae ke tou faʼifaʼitakiʼi te faʼa kataki ʼa te kau polofeta.—Sakp. 5:10.
3. He ko ʼe ʼe tonu ke tou kole kia Sehova ia tona laumalie maʼoniʼoni?
3 Tou Falala Ki Te Malohi ʼo Sehova: Logo la neʼe faigataʼa te gaue ʼae neʼe tonu ke fai e Mikea, kaʼe neʼe falala ia ki te malohi ʼo Sehova moʼona fakahoko. (Mik. 3:8) ʼE mole tou punamaʼuli ai ki te fakalotomalohiʼi ʼo tatou ʼi te Folafola ʼa Sehova ke tou falala ki te malohi ʼo te ʼAtua. ʼE ina foaki lahi ia tona malohi kia natou ʼae ʼe gaʼegaʼe ke feala hanatou fakahoko ʼanatou gaue fakateokalatike. (Pes. 84:6, 8; Esa. 40:28-31) Neʼe kua lagi kotou logoʼi te faʼahi ʼaia ʼi takotou gaue taputapu. ʼE kotou kole tuʼumaʼu koa kia Sehova ke tokoni atu ʼaki tona laumalie maʼoniʼoni malohi?—Luka 11:13.
4. ʼI te ʼaho fuli, ʼe tou fakaha feafeaʼi ʼe ko Sehova totatou ʼAtua?
4 ʼI tona maʼuli katoa, neʼe fakamuʼamuʼa pe e Mikea ia te fakahoko ʼo te finegalo ʼo te ʼAtua. Neʼe lotomalohi ʼo nofo agatonu logo la te ʼu aga fakalialia ʼa te hahaʼi. ʼI te ʼaho fuli, ʼe toe ʼahiʼahiʼi feia tatatou nofo agatonu. Koia, ke malohi tatatou fakatotonu ʼae ke tou ‘haʼele ʼi te huafa ʼo Sehova totatou ʼAtua ʼo heʼe gata.’—Mik. 4:5.