ʼE Maʼu e Te ʼu Kaugana ʼa Sehova Te ʼAmanaki Moʼoni
“Ko te hahaʼi ʼaē ʼe toe mai ia Sakopo ʼe nātou liliu anai, ʼi te lotolotoiga ʼo te hahaʼi kaugamālie, ohage ko he hahau ʼe haʼu mai ia Sehova . . . ʼe mole nātou tuku tanatou ʼamanaki ki te tagata.”—Mikea 5:7.
1. ʼE liliu feafeaʼi te Iselaele fakalaumālie ko he tapuakina?
KO SEHOVA te Tupuʼaga lahi ʼo te ʼua pea mo te hahau. ʼE mole tou ʼamanaki ke foaki mai e te tagata te hahau peʼe ko te ʼua. Neʼe tohi fēnei e te polofeta ko Mikea: “Ko te hahaʼi ʼaē ʼe toe mai ia Sakopo ʼe nātou liliu anai, ʼi te lotolotoiga ʼo te hahaʼi kaugamālie, ohage ko he hahau ʼe haʼu mai ia Sehova, ohage ko he ʼu ʼua lalahi ki te vao, ʼe mole nātou ʼamanaki ki te tagata peʼe nātou atalitali ki te ʼu foha ʼo te tagata kelekele.” (Mikea 5:7) Ko ai ia ʼaho nei ia “te hahaʼi ʼaē ʼe toe mai ia Sakopo”? ʼE ko te kau Iselaele fakalaumālie, te toe ʼo “te Iselaele a te Atua.” (Kalate 6:16) ʼE nātou hage maʼa te “hahaʼi kaugamālie” ʼo te kele ko “he hahau ʼe haʼu mai ia Sehova” pea mo “he ʼu ʼua lalahi ki te vao.” Koia ko te kau Kilisitiano fakanofo ʼaē kei maʼuʼuli ʼi te temi nei ʼe ko he tapuakina ʼe foaki e te ʼAtua ki te hahaʼi. ʼI tonatou ʼuhiga kau fai faka mafola ʼo te Puleʼaga, ʼe fakaʼaogaʼi nātou e Sehova moʼo foaki ki te hahaʼi tana logo ʼo ʼuhiga mo te ʼamanaki moʼoni.
2. He koʼe ʼe tou maʼu he ʼamanaki ʼe moʼoni logola tatatou maʼuʼuli ʼi he mālama ʼe maveuveu?
2 ʼE mole tou punamaʼuli ki te mole maʼu ʼi te mālama ʼaenī he ʼamanaki moʼoni. Ko te ʼu fetogi ʼaē ʼe hoko ʼi te faʼahi faka politike, te mole kei mulimuli ʼa te hahaʼi ki te aga ʼaē ʼe tonu ke fai, te fai fakapō, te ʼu faigataʼaʼia faka ekonomika, te tau—ʼe ko te ʼu meʼa ʼaia ʼaē ʼe tonu ke hoko ʼi te mālama ʼaē ʼe puleʼi e Satana te Tevolo. (1 Soane 5:19) Tokolahi ʼe nātou tuʼania ʼo ʼuhiga mo te ka haʼu. Kae ʼi totatou ʼuhiga kau Fakamoʼoni ʼa Sehova, ʼe mole tou matataku, heʼe tou maʼu he ʼamanaki mālohi ʼo ʼuhiga mo te ka haʼu. ʼE ko he ʼamanaki moʼoni heʼe fakatafito ki te Folafola ʼa te ʼAtua. ʼE tou tui kia Sehova pea mo tana Folafola heʼe ina fakahoko tuʼumaʼu tana ʼu fakapapau.
3. (a) He koʼe neʼe fai e Sehova he meʼa moʼo fakafeagai ki Iselaele pea mo Suta? (b) He koʼe ʼe faka ʼuhiga te ʼu palalau ʼa Mikea ki totatou temi?
3 Ko te lea faka polofeta ʼa Mikea ʼaē ʼe haʼu mai te ʼAtua, ʼe ina fakaloto mālohiʼi tatou ke tou haʼele ʼi te huafa ʼo Sehova, pea mo ina foaki mai he fakatafito ki te ʼamanaki moʼoni. ʼI te valu sēkulō ʼi muʼa ʼo totatou temi, ʼi te temi ʼaē neʼe fai fakakikite ai ia Mikea, neʼe vaheʼi lua te hahaʼi ʼaē neʼe fuakava mo te ʼAtua—ko Iselaele pea mo Suta—pea ko nāua toko lua neʼe nā meʼa noaʼi te fuakava ʼa te ʼAtua. Neʼe mole kei nātou mulimuli ki te ʼu aga ʼaē ʼe tonu ke fai, neʼe hoko mo te ʼapositasia faka lotu, pea mo te toe mānumānu ki te ʼu koloā. Koia neʼe fakatokagaʼi age e Sehova ʼe ina fai anai he meʼa kia nātou. ʼE moʼoni, neʼe fai te ʼu fakatokaga ʼa te ʼAtua ki te hahaʼi ʼaē neʼe maʼuʼuli ʼi te temi ʼo Mikea. Kae ʼe toe faka ʼuhiga tana ʼu palalau ki totatou temi, heʼe ko te ʼaluʼaga ia ʼaho nei ʼe tatau mo te temi ʼo Mikea. ʼE tou sio anai ki te faʼahi ʼaia mokā tou vakaʼi te ʼu manatu maʼuhiga ʼo te ʼu kapite e fitu ʼo te tohi ʼo Mikea.
Te ʼu Meʼa ʼAē ʼe Fakahā e Te ʼu Manatu Maʼuhiga ʼo Te Tohi ʼa Mikea
4. Koteā te ʼu manatu ʼaē ʼe tou maʼu ʼi te kapite 1 ki te kapite 3 ʼa Mikea?
4 Tou vakaʼi fakanounou te ʼu manatu ʼaē ʼe tuʼu ʼi te tohi ʼa Mikea. ʼI te kapite 1, ʼe fakahā ai e Sehova te agatuʼu ʼa Iselaele pea mo Suta. ʼUhi ko tanatou aga ʼaia, ʼe fakaʼauha anai ia Iselaele pea ko te fakatūʼa ʼo Suta ʼe aʼu anai ki te ʼu matapā ʼo Selusalemi. ʼE fakahā ʼi te kapite 2 ko te hahaʼi maʼu koloā pea mo te ʼu pule, ʼe nātou gaohi koviʼi ia te hahaʼi vaivavavai pea mo nātou ʼaē ʼe mole honatou tokoni. Kae ʼe toe fai e te ʼAtua tana fakapapau. ʼE fakatahiʼi anai te hahaʼi ʼa te ʼAtua ʼi te logo tahi. ʼE tohi ʼi te kapite 3 te ʼu fakamāu ʼaē ʼe fai e Sehova ki te kau takitaki ʼo te fenua, pea mo te kau polofeta ʼaē ʼe nātou maumauʼi te lao. ʼE mole fakahoko lelei e te kau takitaki te faitotonu, pea ʼe fakamatala te ʼu loi e te kau polofeta. Logola te ʼu faʼahi ʼaia, kae ʼe foaki e te laumālie maʼoniʼoni te mālohi kia Mikea ke ina tala te fakamāu ʼaē ka fakahoko e Sehova.
5. Koteā te manatu tāfito ʼo te kapite 4 pea mo te kapite 5 ʼa Mikea?
5 ʼE fakakikite ʼi te kapite 4 ʼi te fakaʼosi ʼo te ʼu ʼaho fakamuli, ʼe ʼolo anai te ʼu fenua fuli pe ki te moʼuga māʼoluga ʼo te ʼapi ʼo Sehova ke ina akoʼi nātou. ʼI muʼa ʼo te hoko ʼo te faʼahi ʼaia, ʼe ʼave anai ia Suta ke ʼaunofo ʼi Papiloni, kae ʼe faka ʼāteainaʼi anai ia ia e Sehova. ʼI te kapite 5 ʼe fakahā ai ʼe tupu anai te Mesia ʼi Petelehemi ʼo Suta. ʼE liliu anai ko te tagata tauhi ōvi ʼo tana hahaʼi, pea ʼe ina hāofaki anai nātou mai te ʼu puleʼaga agakovi.
6, 7. Koteā te ʼu puani ʼaē ʼe fakamatala ʼi te kapite 6 pea mo te kapite 7 ʼo te lea faka polofeta ʼa Mikea?
6 ʼE fakahā ʼi te kapite 6 ʼa Mikea te ʼu palalau ʼaē ʼe fai e Sehova ki tana hahaʼi ohage ko he fakamāu ʼi he telepinale. Koteā koa ʼaē neʼe ina fai ke tupu ai tanatou agatuʼu kia te ia? Neʼe mole ina fai he meʼa ʼe kovi. ʼI tona fakahagatonu, ko te ʼu meʼa ʼaē neʼe ina kole age kia nātou neʼe mole faigataʼa fau. ʼO ʼuhiga mo tana kau atolasio, neʼe ina loto ke nātou faitotonu mo agalelei pea mo haʼele mo ia ʼaki he fia mālalo. Neʼe mole fai e Iselaele pea mo Suta te ʼu faʼahi ʼaia, kae neʼe nā agatuʼu pea mo nā utu ai te ʼu fua kovi.
7 ʼI te kapite fakaʼosi ʼo tana lea faka polofeta, ʼe tala e Mikea te agakovi ʼa te hahaʼi ʼo tona temi. Kae neʼe mole lotovaivai ai, he neʼe “fia fakatalitali” moʼoni kia Sehova. (Mikea 7:7) ʼE fakaʼosi e Mikea tana tohi ʼo ina fakahā ʼe falala ko Sehova ʼe loto manavaʼofa anai ki tana hahaʼi. ʼE fakamoʼoni e te hisitolia neʼe hoko te ʼu meʼa ʼaē neʼe ʼamanaki kiai. ʼI te 537 ʼi muʼa ʼo totatou temi, ʼi te ʼosi fakatonutonuʼi e Sehova tana hahaʼi, neʼe loto manavaʼofa ʼo ina toe fakaliliu he toe ʼo te kau Iselaele ki tonatou fenua.
8. Moʼo fakanounou, koteā ʼaē ʼe tou maʼu ʼi te tohi ʼa Mikea?
8 ʼE ko he ʼu manatu maʼuhiga ʼaē neʼe fakahā e Sehova kia Mikea. ʼE tou maʼu ʼi te tohi faka Tohi-Tapu ʼaia, he ʼu faʼifaʼitaki moʼo fakatokagaʼi ʼo tatou, ʼo ʼuhiga mo te meʼa ʼaē ka fai e te ʼAtua kia nātou ʼaē ʼe ʼui ʼe nātou tauhi kia te ia kae nātou heʼe agatonu. ʼE ina fakakikite te ʼu meʼa ʼaē ʼe hoko ʼi te temi nei. Pea ʼe ina foaki he ʼu tokoni fakaʼatua ʼo ʼuhiga mo tatatou aga ke mālohi ai tatatou ʼamanaki ʼi te ʼu temi faigataʼa ʼaenī.
ʼE Palalau Te Tuʼi ʼAliki Ko Sehova
9. Ohage ko tona ʼui ia Mikea 1:2, neʼe koteā ʼaē neʼe ʼamanaki ke fai e Sehova?
9 ʼI te temi nei, tou vakavakaʼi lelei te ʼu manatu ʼaē ʼe tou maʼu ʼi te tohi ʼa Mikea. Ia Mikea 1:2, ʼe tou lau fēnei: “Koutou logo mai, ia koutou fuli ʼu hahaʼi, tokaga mai, Ê kele pea mo meʼa fuli ʼaē ʼe nātou fakafonu ia koe, pea ke liliu ko he fakamoʼoni ia te Tuʼi ʼAliki ko Sehova ʼo fakafeagai kia koutou, ia Sehova mai tona fale lotu taputapu.” Kanapaula neʼe koutou maʼuʼuli ʼi te temi ʼo Mikea, ʼe mahino ia ʼe koutou tokagaʼi anai te ʼu palalau ʼaia. ʼI tona ʼuhiga moʼoni, ʼe tonu ke koutou tokagaʼi te ʼu palalau ʼaia heʼe palalau ia Sehova mai tona fale taputapu pea ʼe mole ina fai pe tana ʼu palalau ki Iselaele pea mo Suta, kae ki te hahaʼi ʼi te potu fuli pe. ʼI te temi ʼo Mikea, neʼe kua fualoa fau te mole kei tokagaʼi e te hahaʼi ia te Tuʼi ʼAliki ko Sehova. Mole fualoa, pea fetogi te ʼaluʼaga ʼaia. Neʼe fakatotonu e Sehova ke ina fakahoko he fetogi.
10. He koʼe ʼe maʼuhiga kia tatou te ʼu palalau ʼa Mikea 1:2?
10 ʼE toe feiā ia ʼaho nei. ʼE fakahā ia Apokalipesi 14:18-20, ʼe toe foaki e Sehova he ʼu logo mai tona fale lotu taputapu. Kua ōvi mai te temi ʼaē ka ina fakahoko anai tana ʼu gāue, pea ʼe ʼi ai te ʼu meʼa maʼuhiga ʼe nātou toe fakamaveuveu anai te malamanei. ʼI te temi ʼaia, ko te “vite ʼo te kele” ʼaē ʼe agakovi, ʼe lī anai ki te meʼa lomi vite ʼo te hāūhāū ʼo Sehova, ke fakaʼauha katoa ai te tuʼu ʼo te ʼu faʼahiga meʼa ʼa Satana.
11. Koteā te faka ʼuhiga ʼo te ʼu palalau ia Mikea 1:3, 4?
11 Koutou fakalogo ki te meʼa ʼaē ʼe ʼamanaki fai e Sehova. ʼE tou lau fēnei ia Mikea 1:3, 4: “Koʼeni ʼe hū ia Sehova ki tuʼa mai te koga meʼa ʼaē ʼe nofo ai, ʼio ʼe hifo anai pea ʼe haʼele anai ʼi te ʼu potu māʼoluga ʼo te kele. Pea ʼe huhuʼa anai te ʼu moʼuga ʼi ʼona lalo vaʼe, pea mo makafaʼafaʼa anai te ʼu telea mālalo ohage ko te sela ʼi te afi, ohage ko he ʼu vai ʼe mafola ʼi he mahifo.” ʼE līaki anai koa e Sehova tona nofoʼaga ʼaē ʼi selo pea mo haʼele moʼoni ʼi te ʼu moʼuga pea mo te ʼu telea mālalo ʼo te Kele ʼo Te Fakapapau? Kailoa. ʼE mole ʼaoga ke ina fai te faʼahi ʼaia. ʼE tonu pe anai ke ina tokaga mai ki te kele moʼo fakahoko tona finegalo. Tahi ʼaē meʼa, ko te ʼu meʼa ʼaē ʼe fakamatala ʼi te ʼu vaega ʼe mole hoko anai ki te fenua kae ki te hahaʼi ʼaē ʼe nonofo ai. Ka fakahoko anai e Sehova te faʼahi ʼaia, ʼe ina fakaʼauha katoa anai te hahaʼi heʼe agatonu—ʼe huhuʼa anai te ʼu moʼuga ohage ko te sela pea mo makafaʼafaʼa te ʼu telea ʼi te mafuike.
12, 13. Ohage ko tona ʼui ia 2 Petelo 3:10-12, ʼe hoko moʼoni feafeaʼi anai tatatou ʼamanaki?
12 Ko te ʼu palalau ʼo te lea faka polofeta ʼa Mikea 1:3, 4 ʼe lagi ina fakamanatuʼi atu te tahi ʼu lea faka polofeta fakaʼatua, ʼe fakakikite ai te ʼu meʼa fakamataku ʼe hoko anai ki te kele. Ohage ko tona fakamatala ia 2 Petelo 3:10 (MN ), neʼe tohi fēnei e te ʼapositolo ko Petelo: “Ko te ʼaho ʼo Sehova ʼe haʼu anai ohage ko he tagata kaihaʼa, pea ʼi te ʼaho ʼaia ko te ʼu lagi ʼe puli anai ʼi he logoaʼa, kae ko te ʼu meʼa ʼaē kua kakaha ʼe mavetevete anai, pea ko te kele pea mo te ʼu gāue ʼaē ʼe fai ai ʼe hā anai.” Ohage ko te lea faka polofeta ʼa Mikea, ko te ʼu palalau ʼa Petelo ʼe mole faka ʼuhiga ki te ʼu lagi pea mo te kele moʼoni. ʼE faka ʼuhiga ki te mamahi lahi ʼaē ka hoko anai ki te tuʼu ʼaenī ʼaē ʼe mole pipiki ki te ʼAtua.
13 Logola te maumau ʼaia ka hoko, kae ʼe feala ke falala te kau Kilisitiano ki te ka haʼu, ohage pe ko Mikea. ʼO feafeaʼi? ʼAki tanatou mulimuli ki te tokoni ʼaē ʼe tou maʼu ʼi te ʼu vaega ki muli age ʼo te tohi ʼa Petelo. ʼE ʼui fēnei e te ʼapositolo: “Ko te ʼu faʼahiga tagata feafeaʼi anai ia koutou ʼi te ʼu aga fakamaʼoniʼoni pea mo te ʼu gāue ʼaē ʼe ʼiloga ai ʼe koutou pipiki ki te ʼAtua, ʼo talitali pea mo koutou taupau tuʼumaʼu ʼi tokotou ʼatamai te hoko mai ʼo te ʼaho ʼo Sehova.” (2 Petelo 3:11, 12, MN ) ʼE moʼoni anai kia tatou tatatou ʼamanaki mo kapau ʼe tou maʼu he loto ʼe fakalogo, pea mo tokaga ke maʼa tatatou aga pea mo fonu ʼi totatou maʼuli ʼaki he ʼu gāue ʼe hā ai tatatou pipiki ki te ʼAtua. Pea ʼe tonu ke tou manatuʼi tuʼumaʼu ʼe hoko moʼoni anai te ʼaho ʼo Sehova.
14. He koʼe neʼe tonu ke fakatūʼa ia Iselaele pea mo Suta?
14 ʼE fakamahino e Sehova pe koʼe neʼe tonu ke fakatūʼa tana hahaʼi ʼo te temi muʼa. ʼE ʼui fēnei ia Mikea 1:5: “Neʼe tupu te ʼu meʼa fuli ʼaia ʼuhi ko te agatuʼu ʼa Sakopo, ei ʼuhi ko te ʼu agahala ʼo te ʼapi ʼo Iselaele. Koteā te agatuʼu ʼa Sakopo? ʼE mole koa la ko Samalia? Pea koteā te ʼu potu māʼoluga ʼo Suta? ʼE mole koa la ko Selusalemi?” Neʼe ko Sehova ʼaē neʼe ina fakatupu te ʼu kolo ʼo Iselaele pea mo Suta. Kae neʼe nātou agatuʼu kia te ia, pea neʼe toe agatuʼu mo te kolo muʼa ʼo Iselaele ʼaē ko Samalia pea mo te kolo muʼa ʼo Suta ʼaē ko Selusalemi.
ʼE Lahi Te Fai ʼo Te Agakovi
15, 16. Koteā te ʼu aga kovi neʼe fai e te hahaʼi ʼaē neʼe maʼuʼuli ʼi te temi ʼo Mikea?
15 ʼE fakamatala ia Mikea 2:1, 2 te faʼifaʼitaki ʼo te agakovi ʼa te hahaʼi ʼi te temi ʼo Mikea. ʼE tou lau fēnei ai: “Malaʼia kia nātou ʼaē ʼe nātou fakakaukauʼi te meʼa ʼaē ʼe kovi, pea mo nātou ʼaē ʼe nātou fai te meʼa ʼaē ʼe kovi, ʼi tonatou ʼu moeʼaga! ʼI te mālama ʼo te uhu ʼe nātou fakatuʼutuʼu ke nātou fakahoko, heʼe nātou maʼu te mālohi ʼi tonatou nima. Pea neʼe nātou loto ki he ʼu gāueʼaga pea neʼe nātou toʼo fakamālohi; pea neʼe nātou toʼo foki mo he ʼu ʼapi; neʼe nātou kaihaʼa te tagata mālohi pea mo tona loto fale, te tagata pea mo tona tofiʼa.”
16 Ko te ʼu hahaʼi mānumānu ʼe nātou nonofo ʼalaʼala ʼi te pōʼuli moʼo fakakaukauʼi peʼe feafeaʼi anai tanatou toʼo fakamālohi te gāueʼaga pea mo te ʼapi ʼo tonatou kāiga. ʼI te uhu, ʼe nātou fakahoko fakavilivili tanatou ʼu fakatuʼutuʼu. ʼE mole nātou fai anai te ʼu aga kovi ʼaia mo kanapaula neʼe nātou manatuʼi tanatou fuakava mo Sehova. ʼE tuʼu ʼi te Lao ʼa Moisese te ʼu fakatotonu moʼo puipui ia ia ʼaē ʼe masiva. Neʼe fakatotonu e te Lao ke mole foaki e he famili tona tōfiga ʼo talu ai. Kae ko te hahaʼi mānumānu ʼaia neʼe nātou meʼa noaʼi te lao. Neʼe mole nātou fia tokagaʼi te ʼu palalau ʼaē ʼe tou maʼu ia Levitike 19:18, ʼaē ʼe ʼui fēnei ai: “ ʼE tonu ke ke ʼofa ki tou kāiga ohage pe ko koe totonu.”
17. Koteā ʼaē ʼe feala ke hoko kia nātou ʼaē ʼe nātou ʼui ʼe nātou tauhi ki te ʼAtua kae nātou fakamuʼamuʼa te ʼu koloā ʼi tonatou maʼuli?
17 ʼE fakahā ai te meʼa ʼaē ʼe feala ke hoko mokā mole kei tokagaʼi e te hahaʼi ʼaē ʼe nātou ʼui ʼe nātou tauhi ki te ʼAtua te ʼu fakatuʼutuʼu fakalaumālie kae nātou ʼuluaki kumi muʼa te ʼu koloā. Neʼe fakatokagaʼi fēnei e Paulo te kau Kilisitiano ʼo tona temi: “Ko nātou ʼaē kua nātou fakapapau ke nātou maʼu koloā ʼe nātou higa ki te fakahala, ki he hele pea mo te ʼu holi fakavale lahi pea mo fakatupu kovi, ʼe nātou fakauku te tagata ki te fakaʼauha pea mo te pulinoa.” (1 Timoteo 6:9, MN ) Kapau ʼe tokaga tāfito pe he tahi ke maʼu paʼaga ʼi tona maʼuli, pea ʼi tona ʼuhiga moʼoni, ʼe tauhi ki te ʼatua hala—te ʼu Koloā. ʼE mole foaki e te ʼatua hala ʼaia he ʼamanaki moʼoni ki te ka haʼu.—Mateo 6:24.
18. Koteā ʼaē neʼe hoko kia nātou ʼaē ʼe mānumānu koloā ʼi te temi ʼo Mikea?
18 Tokolahi te hahaʼi ʼi te temi ʼo Mikea neʼe nātou tau mo te ʼu mamahi he neʼe nātou falala ki te ʼu koloā ʼaē ʼe vaʼiganoa. Ohage ko tona ʼui ia Mikea 2:4, ʼe ʼui fēnei e Sehova: “ ʼI te ʼaho ʼaia, ʼe lau anai kia koutou he tākuga lea pea ʼe lotomamahi moʼoni anai te hahaʼi, ʼaki he lotomamahi. ʼE ʼui anai e he tahi: ‘Neʼe kaihaʼa tamatou ʼu meʼa fuli! ʼE ina fetogi te vahe ʼo taku hahaʼi. ʼE lahi ʼaupito te ʼu meʼa ʼaē ʼe ina toʼo ia te ʼau! Kia ia ʼaē ʼe heʼe agatonu, ʼe ina tufa ki ai tamatou ʼu gāueʼaga.’ ” Ei ko te hahaʼi ʼaia ʼaē ʼe nātou kaihaʼa te ʼu ʼapi pea mo te ʼu gāueʼaga neʼe puli mo tonatou tōfiga. Neʼe ʼave nātou ki he fenua matāpule, pea neʼe maʼu tonatou ʼu koloā e “ia ʼaē ʼe heʼe agatonu,” ʼaē ʼe faka ʼuhiga ki te hahaʼi ʼo te ʼu puleʼaga. Neʼe mole kei ʼi ai he ʼamanaki ki te temi ka haʼu.
19, 20. Koteā ʼaē neʼe hoko ki te kau Sutea ʼaē neʼe nātou falala kia Sehova?
19 Kae ko te ʼamanaki ʼo nātou ʼaē ʼe falala kia Sehova ʼe hoko moʼoni anai. ʼE agatonu Sehova ki te ʼu fuakava ʼaē neʼe ina fai mo Apalahamo pea mo Tavite, pea neʼe loto manavaʼofa kia nātou ʼaē, ohage ko Mikea, ʼe ʼoʼofa kia te ia pea mo lotomamahi ʼuhi ko te fakamamaʼo ʼa te hahaʼi mai te ʼAtua. Maʼa te kau agatonu, ʼe hoko anai he fakatokatoka ʼi te temi ʼaē kua fakakatofa e te ʼAtua.
20 Neʼe hoko te faʼahi ʼaia ʼi te taʼu 537 ʼi muʼa ʼo totatou temi, ʼi te ʼosi tō ʼo Papiloni pea ʼi te toe liliu ʼa te toe ʼo te kau Iselaele ki tonatou fenua. ʼI te temi ʼaia, neʼe ʼuluaki hoko ai ia Mikea 2:12. ʼE ʼui fēnei e Sehova: “ ʼE ʼau tānaki moʼoni anai te toe ʼo te kau Iselaele. ʼE ʼau fakatahiʼi anai nātou ke nātou logo tahi ohage ko he kiʼi faga manu ʼi te lotoʼā, ohage ko he faga ōvi ʼi tana gāueʼaga; ʼe nātou logoaʼa anai ʼuhi ko he ʼu hahaʼi tagata.” ʼE ʼofa lahi ia Sehova! ʼI tana ʼosi fakatonutonuʼi tana hahaʼi, ʼe ina tuku he toega hahaʼi ke toe liliu pea mo tauhi kia te ia ʼi te fenua ʼaē neʼe ina foaki ki tanatou ʼu kui.
ʼE Toe Tatau Ia ʼAho Nei
21. ʼE lava tatau feafeaʼi te ʼu ʼaluʼaga ʼo te temi nei pea mo te temi ʼo Mikea?
21 ʼI tatatou vakaʼi te ʼu ʼuluaki kapite e lua ʼo Mikea, ʼe mole koutou punamaʼuli koa la ki te tatau ʼo te ʼu meʼa ʼaia pea mo te ʼu meʼa ʼaē ʼe hoko ʼi totatou temi? Ohage ko te temi ʼo Mikea, e tokolahi te hahaʼi ʼe nātou ʼui ʼe nātou tauhi ki te ʼAtua. Kae ohage ko Suta pea mo Iselaele, ʼe nātou mavetevete pea mo nātou fetauʼaki. Tokolahi te hahaʼi ʼaē ʼe maʼu koloā ʼi te Keletiate ʼe nātou agakovi ki te hahaʼi ʼaē ʼe māsisiva. ʼE lahi te ʼu aga ʼaē ʼe fakagafua e te kau takitaki lotu kae tauteaʼi fakahagatonu ʼi te Tohi-Tapu. ʼE mole tou punamaʼuli ai ki te kua ōvi mai ʼo tana pulihi feiā anai te toe ʼo ‘Papiloni Lahi,’ te kautahi faka malamanei ʼo te lotu hala! (Apokalipesi 18:1-5) Kae ʼo mulimuli ki te ʼu meʼa ʼaē neʼe hoko ʼi te temi ʼo Mikea, ʼe ʼi ai te ʼu kaugana agatonu ʼa Sehova ʼe maʼuʼuli anai ʼi te kele.
22. Ko ai te ʼu kūtuga e lua ʼaē ʼe nātou tuku tanatou ʼamanaki ki te Puleʼaga ʼo te ʼAtua?
22 ʼI te taʼu 1919, neʼe mavae katoa te kau Kilisitiano fakanofo agatonu mai te Keletiate pea mo nātou kamata faka mafola ai te logo lelei ʼo te Puleʼaga ki te ʼu fenua fuli pe. (Mateo 24:14) Moʼo kamata, neʼe nātou kumi te toe ʼo te Iselaele fakalaumālie. Pea neʼe kamata fakatahitahiʼi te “tahi ʼu ōvi,” pea liliu te ʼu kūtuga ʼaia e lua ko “he faga ōvi pe e tahi, mo he tagata tauhi ōvi pe e tahi.” (Soane 10:16, MN ) Logola ʼe nātou tauhi ki te ʼAtua ia fenua e 234, kae ko te kau atolasio agatonu fuli ʼaia ʼa Sehova neʼe “fakatahiʼi” moʼoni nātou. ʼI te temi nei, ko te ʼu lotoʼā ʼa te ʼu ōvi ‘ ʼe logoaʼa ai te ʼu hahaʼi tagata,’ mo fafine pea mo te ʼu tamaliki. ʼE mole tuku tanatou ʼamanaki ki te tuʼu ʼaenī, kae ki te Puleʼaga ʼo te ʼAtua, ʼaē ka ina fakatuʼu anai he palatiso ʼi te kele.
23. He koʼe ʼe koutou tui papau ʼe hoko moʼoni anai takotou ʼamanaki?
23 ʼO ʼuhiga mo te kau atolasio agatonu ʼa Sehova, ʼe ʼui fēnei e te vaega fakaʼosi ʼa Mikea kapite 2: “ ʼE fakalaka anai tonatou hau ʼi ʼonatou muʼa, pea ko Sehova ʼaē ʼe ina takitaki.” ʼE koutou haʼele fakatahi koa mo te hahaʼi ʼaia, ʼo mulimuli ki tokotou Hau, ia Sesu Kilisito, pea mo Sehova te takitaki? Kapau ʼe koia ʼaia, pea ʼe feala ke koutou tui papau ʼe mālo anai pea ʼe moʼoni takotou ʼamanaki. ʼI tatatou vakaʼi te tahi ʼu fakamahino ʼo te lea faka polofeta ʼa Mikea, ʼe tou fakatokagaʼi ʼe hoko moʼoni anai te ʼu faʼahi ʼaia.
ʼE Koutou Tali Feafeaʼi Anai?
• ʼI te temi ʼo Mikea, he koʼe neʼe fakafeagai ia Sehova kia Suta pea mo Iselaele?
• Koteā ʼaē ʼe feala ke hoko kia nātou ʼaē ʼe nātou ʼui ʼe nātou tauhi ki te ʼAtua kae nātou fakamuʼamuʼa te ʼu koloā ʼi tonatou maʼuli?
• ʼI takotou ʼosi vakaʼi te kapite 1 pea mo te kapite 2 ʼa Mikea, he koʼe ʼe koutou tui papau ʼe hoko moʼoni anai takotou ʼamanaki?
[Paki ʼo te pasina 9]
Ko te lea faka polofeta ʼa Mikea ʼe feala ke ina fakaloto mālohiʼi tatou ʼi te faʼahi fakalaumālie
[Paki ʼo te pasina 10]
Ohage ko te toe ʼo te kau Sutea ʼi te taʼu 537 ʼi muʼa ʼo totatou temi, ko te kau Iselaele fakalaumālie pea mo tonatou ʼu kaumeʼa ʼe nātou lagolago ki te tauhi moʼoni