Kei Koutou Manatuʼi Koa?

Neʼe koutou leleiʼia koa te ʼu Tule Leʼo fakamuli? Pea koutou vakaʼi peʼe koutou lava tali ki te ʼu fehuʼi ʼaenī:

• Ko kapite e fia ʼe maʼu ʼi te tohi ʼa Mikea, ko te temi fea ʼaē neʼe tohi ai, pea neʼe koteā te ʼaluʼaga ʼaē neʼe fai ai te tohi?

ʼE tou maʼu te ʼu kapite e fitu ʼi te tohi ʼa Mikea. Neʼe tohi e te polofeta ko Mikea ʼi te valu sēkulō ʼi muʼa ʼo totatou temi, ʼi te temi ʼaē neʼe vaheʼi lua ai te puleʼaga ʼaē neʼe fuakava mo te ʼAtua​—te puleʼaga ʼo Iselaele pea mo te puleʼaga ʼo Suta.​—15/8, pasina 9.

• Ia Mikea 6⁠:​8, koteā ʼaē ʼe fakamaʼua mai e te ʼAtua kia tatou?

ʼE maʼua ke tou “maʼuliʼi te faitotonu.” ʼE feala ke tou faʼifaʼitakiʼi te faitotonu ʼo tou mulimuli ki tona faʼahiga fai e te ʼAtua, koia ʼe tonu ai ke tou lagolago ki tana ʼu pelesepeto ʼo te aga fakahagatonu pea mo te agatonu. ʼE ina ʼui mai ke tou “manako ki te lotoʼofa.” Ko te kau Kilisitiano ʼe nātou lotoʼofa ʼo nātou tokakaga ki te ʼu meʼa ʼe ʼaoga ki te hahaʼi, ohage la mokā hili he ʼu tuʼutāmaki. Ke feala hatatou ‘haʼele ʼaki he fia mālalo’ mo Sehova, ʼe tonu ke tou ʼiloʼi totatou ʼu tuʼakoi pea mo tou fakalogo kia ia.​—15/8, pasina 20 ki te 22.

• Kapau ʼe mole kei gāue he Kilisitiano, koteā ʼaē ʼe feala ke ina fai?

ʼE lagi lelei hana toe vakavakaʼi tona faʼahiga maʼuli. ʼE feala pe hana fakamaʼamaʼa tona maʼuli, ʼo kumi hana ʼapi ʼe veliveli age peʼe fakaisi ki he ʼu koloā ʼe mole hona ʼaoga. ʼE mahino ia, ʼe maʼuhiga ke tuku tana hoha ki te ʼu meʼa ʼaoga ʼo te ʼaho fuli, ʼo falala ʼe foaki anai e te ʼAtua ia te ʼu meʼa ʼaē ʼe ʼaoga kia ia. (Mateo 6⁠:​33, 34)​—1/9, pasina 14 ki te 15.

• Koteā ʼaē ʼe tonu ke tou manatuʼi mokā tou foaki meʼa ʼofa ki he fai ʼohoana, peʼe ka foaki mai he ʼu meʼa ʼofa ʼi hakita fai ʼohoana?

ʼE mole ʼaoga ke foaki he ʼu meʼa ʼofa totogi kovi, peʼe tou ʼamanaki ke foaki mai he ʼu meʼa ʼofa feiā. Ko te meʼa ʼaē ʼe maʼuhiga tāfito ʼe ko te loto ʼo ia ʼaē ʼe ina foaki tona meʼa ʼofa. (Luka 21⁠:​1-4) ʼE mole ko he meʼa lelei ke tala te higoa ʼo ia ʼaē neʼe fai meʼa ʼofa, heʼe feala ke fakatupu ufiufi. (Mateo 6⁠:⁠3)​—1/9, pasina 29.

• He koʼe ʼe tonu ke tou faikole tuʼumaʼu?

Ko te faikole tuʼumaʼu ʼe ina fakamālohiʼi tatatou ʼu felogoi mo te ʼAtua pea mo teuteuʼi tatou ki te ʼu ʼahiʼahi faigataʼa. ʼE feala ke nounou peʼe loaloaga tatatou ʼu faikole, ʼo fakalogo pe ki tona ʼaoga pea mo te ʼu ʼaluʼaga. ʼAki te faikole ʼe tuputupu ai tatatou tui pea mo tokoni mai ke tou fakaʼaluʼalu te ʼu faigataʼaʼia.​—15/9, pasina 15 ki te 18.

• ʼE tonu ke tou mahino feafeaʼi kia 1 Kolonito 15⁠:​29, ʼaē ʼe fakaliliu fēnei ʼi ʼihi Tohi-Tapu ko te “papitema ʼa te kau mate”?

Neʼe fia ʼui e te ʼapositolo ko Paulo ko te kau Kilisitiano fakanofo ʼe nātou papitema, peʼe nātou uku, ki he maʼuli ʼe iku anai ki he mate agatonu ohage ko Kilisito. Hili ʼaia pea hoki fakatuʼuake ia nātou ki he maʼuli fakalaumālie ohage ko Kilisito.​—1/10, pasina 29.

• ʼE tou ʼiloʼi feafeaʼi ko te liliu ko he Kilisitiano ʼe mole faka ʼuhiga pe ke tuku te fai ʼo te ʼu aga heʼeʼaoga ʼaē ʼe tuʼu ia 1 Kolonito 6⁠:​9-11?

Neʼe mole ʼui pe e te ʼapositolo ko Paulo ke tou tuku te ʼu meʼa kovi ohage ko te fai folonikasio, mo te tauhi tamapua pea mo te konahia. Kae moʼo fakahā ʼe ʼaoga ke fai he tahi ʼu fetogi, neʼe ina ʼui fēnei ʼi te vaega ʼaē ʼe hoko mai: “ ʼE gafua ia meʼa fuli pe kia te ʼau, kae ʼe mole ʼaoga ia meʼa fuli pe.”​—15/10, pasina 18 ki te 19.

• Ko ai te ʼu fafine ʼo te temi muʼa neʼe nātou fakafiafia te loto ʼo te ʼAtua?

ʼE kau ai te ʼu fafine faifānau ko Sifala mo Pua, ʼaē neʼe mole nā fakalogo ki te fakatotonu ʼa Falaone ke matehi te tamaliki tagata Iselaele. (Ekesote 1⁠:​15-20) Ko te fafine paomutu Kanaane ko Laape neʼe ina puipui te ʼu malomu Iselaele. (Sosue 2⁠:​1-13; 6⁠:​22, 23) ʼAki tana fakapotopoto, neʼe hāofaki e Apikaela ia te maʼuli ʼo te ʼu hahaʼi pea mo fakahāo ia Tavite mai he ligi toto. (1 Samuele 25⁠:​2-35) ʼE ko he ʼu faʼifaʼitaki ki te hahaʼi fafine ʼi te temi nei.​—1/11, pasina 8 ki te 11.

• ‘Neʼe hoko feafeaʼi ‘te tau ʼa te ʼu fetuʼu mai te lagi’ ʼo fakafeagai kia Sisela, ohage ko tona fakamatala ia Kau Fakamāu 5⁠:⁠20?

ʼE ʼui e ʼihi ʼe faka ʼuhiga te faʼahi ʼaia ki te tokoni mai ʼa te ʼAtua. Ko ʼihi ʼe nātou ʼui ko te kau ʼaselo neʼe nātou tokoni ki Iselaele, peʼe ko te ʼu maka neʼe fetōki mai te lagi, peʼe ko te falala ʼa Sisela ki te ʼu fakakikite ʼe fakatafito ki te ʼu fetuʼu. ʼI tatatou mole maʼu he tahi ʼu fakamatala mai te Tohi-Tapu ʼo ʼuhiga mo te faʼahi ʼaia, ʼe feala pe ke tou mahino ohage pe ko tona ʼui ʼi te vaega, neʼe ko he gāue ʼa te ʼAtua moʼo tokoni ki te kautau ʼo Iselaele.​—15/11, pasina 30.

• Logola te fakahaʼuhaʼu ʼo kaugamālie ia te hahaʼi ʼaē ʼe mole fia kau ki he lotu pea mole nātou fia palalau kiai, kae he koʼe koa ʼe kei hahaʼi feiā ia nātou ʼaē ʼe nātou ʼui ʼe nātou tui ki te ʼAtua?

Ko ʼihi ʼe ʼolo ki te ʼēkelesia heʼe nātou fia maʼu te tokalelei ʼo te fakakaukau. Ko te tahi ʼu hahaʼi ʼe nātou ʼamanaki ki te maʼuli heʼegata ʼi tanatou ʼosi mate, pea ko te tahi vaega ʼe fia maʼuli lelei, mo maʼu koloā pea mo maʼuli manuʼia. ʼI te tahi ʼu koga meʼa, ʼe ʼolo te hahaʼi ki te ʼu ʼēkelesia heʼe nātou fia maʼu he ʼu manatu fakalaumālie, he neʼe mole kei nātou maʼu ʼuhi ko te fetogi ʼo te kominisi ʼaki te capitalisme. ʼAki te mahino ʼa te Kilisitiano ki te ʼu tupuʼaga ʼaia, ʼe feala ke ina fakatupu he ʼu fai palalau mo ia ʼo te loto fale ki he meʼa ʼe ʼaoga kia ia.​—1/12, pasina 3.