He Fakaloto Fīmālie Kia Ia ʼe Mamahi
ʼI TE temi ʼaē neʼe lotomamahi ai te hahaʼi tagata pea mo fafine agatonu ʼo te temi muʼa, neʼe nātou faikole fakamalotoloto ki te ʼAtua ke ina takitaki nātou. Kae neʼe nātou toe fai he meʼa moʼo fakamaʼamaʼa tonatou mamahi, ʼo nātou aga fakapotopoto ke nātou hāo mai te hahaʼi agakovi. Ohage la ko Tavite, ʼi tana falala kia Sehova pea mo tana ʼu faiga neʼe ina lava kātakiʼi ai tona ʼu fihifihia. E feafeaʼi kia tatou ia ʼaho nei?
Ka hoko mai he meʼa fakaloto mamahi, ʼe lagi koutou faiga ke koutou fakatokatoka ʼe koutou totonu tokotou fihifihia. Ohage la, kapau ʼe mole kei koutou gāue, pea ʼe mole koutou faiga anai koa ke koutou maʼu he gāue ʼe lelei ke koutou lava taupau ai tokotou maʼuli pea mo te maʼuli ʼo tokotou famili? (1 Timoteo 5:8) Peʼe kapau ʼe koutou mahaki, ʼe mole koutou kumi anai koa he faitoʼo ʼe lelei? ʼE lelei ke tou tokagaʼi, ko Sesu, ʼaē neʼe ina maʼu te mālohi mai te ʼAtua ke ina fakamālōlō te ʼu faʼahiga mahaki fuli pe, neʼe ina ʼui totonu ʼe ko ‘te hahaʼi mahahaki ʼaē ʼe ʼaoga kia nātou he tōketā.’ (Mateo 9:12) Kae ʼe mole pulihi tuʼumaʼu ai tokotou ʼu fihifihia; ʼe lagi tonu anai ke koutou haga kātakiʼi ʼi hona faʼahiga ʼaluʼaga.
He koʼe koa ʼe mole koutou fakahā te faʼahi ʼaia kia Sehova ʼAtua ʼi te faikole? Ohage la, ka tou kumi gāue, tou faikole ʼaki he loto falala ki te ʼAtua, ke tokoni mai ke tou fakafisi ki he gāue ʼe fakafeagai ki te ʼu pelesepeto ʼo te Tohi-Tapu. Pea ʼaua naʼa tou “hehe mamao mai te tui” ʼuhi ko te loto mānumānu peʼe ko te manako ki te paʼaga. (1 Timoteo 6:10) ʼE moʼoni, ka tou fai he ʼu tonu maʼuhiga ʼo ʼuhiga mo he gāue peʼe ko he faitoʼo maʼa totatou famili, pea ʼe feala ke tou mulimuli ki te tokoni ʼaenī ʼa Tavite: “Tuku tau kavega kia Sehova totonu, pea ko ia totonu ʼe lagolago anai kia te koe. ʼE mole ina fakagafua anai ke tūkia ia ia ʼaē ʼe faitotonu.”—Pesalemo 55:22.
Ko te faikole fakamalotoloto ʼe toe tokoni mai ke tou taupau ke tokalelei tatatou fakakaukau, ke mole lahi fau tokita loto mamahi. Ko te Kilisitiano moʼoni ko te ʼapositolo ko Paulo, neʼe ina tohi fēnei: “I te meafuape aki te faikole mo te lauga fakatahi mo te u fakafetai, koutou fakaha ki te Atua autou u kole.” ʼE tou maʼu feafeaʼi te fīmālie mo kapau ʼe tou faikole fakamalotoloto? “Ko te tokalelei o te Atua aia e fakalaka i te atamai fuape, e ina malui anai outou loto mo autou fakakaukau ia Kilisito Sesu.” (Filipe 4:6, 7) Ko te tokalelei ʼo te ʼAtua “e fakalaka i te atamai fuape.” Koia, ʼe feala ke tou taupau ai he tokalelei ʼi te temi ʼaē ʼe tou lotohoha lahi ai. ʼE ina ‘malui anai totatou loto mo tatatou fakakaukau,’ ʼo tokoni mai ke ʼaua naʼa tou fai he ʼu meʼa ʼaki te ʼita pea ʼe mole fakapotopoto, heʼe feala ke ʼāsili age tatatou mamahi.
ʼE feala ke maʼuhiga te faikole ʼo ʼuhiga mo te ikuʼaga ʼo he ʼaluʼaga. ʼI te temi ʼaē neʼe pilisoniʼi ai te ʼapositolo ko Paulo ʼi Loma, ʼaki he agavaivai, neʼe ina kole ki te kau Kilisitiano ke nātou hūfakiʼi ia ia. He koʼe neʼe fai e Paulo te kole ʼaia? Neʼe ina tohi fēnei kia nātou: “ ʼE ʼau fakaloto mālohiʼi koutou ke koutou fai tāfito te meʼa ʼaia, ke feala haku toe liliu vave atu kia koutou.” (Hepeleo 13:19, MN ) Ko tona faka ʼuhiga, neʼe ʼiloʼi e Paulo ko Sehova ʼe fakalogo anai ki te ʼu faikole fakamalotoloto ʼo tona ʼu tēhina, koia neʼe feala ai ke tokoni ʼo ʼuhiga mo te temi ʼaē ka faka ʼāteainaʼi ai ia ia.—Filemone 22.
ʼE pulihi koa e te faikole totatou mamahi? ʼE feala. Kae ʼe tonu ke tou ʼiloʼi ʼe feala ke tali e Sehova ʼAtua ki tatatou ʼu faikole ʼi he ʼaluʼaga ʼe lagi mole tou leleiʼia. Neʼe faikole tuʼa lahi ia Paulo ʼo ʼuhiga mo tona “tala ʼi te kakano,” lagi neʼe ko hona mahaki. Neʼe mole toʼo e te ʼAtua tona mamahi, kae neʼe ina ʼui fēnei kia Paulo: “Ko toku ʼofa makehe ʼe feʼauga kia koe; heʼe ko toku mālohi ʼe lolotoga fakaliliu ʼo haohaoa ʼi te vaivai.”—2 Kolonito 12:7-9, MN.
Koia ʼe mole lagi pulihi atu aipe totatou loto mamahi. Kae ʼe tou maʼu anai he faigamālie ke tou fakamoʼoni ai tatatou falala ki tatatou Tāmai ʼaē ʼi selo. (Sakopo 1:2-4) Ke tou ʼiloʼi papau, tatau aipe peʼe mole pulihi e Sehova ʼAtua te mamahi, kae ʼe feala ke ina foaki mai “te faigamalie ke [tou] hao ai pea mo te malohi ke [tou] faa tali.” (1 Kolonito 10:13) ʼE lelei ke tou tokagaʼi ko Sehova ʼe fakahigoa ko “te Atua o te u fakafimalie; iaʼia e ina fakafimalieʼi tatou i otatou mamahi fuape.” (2 Kolonito 1:3, 4) ʼE feala ke foaki mai e te ʼAtua te meʼa ʼaē ʼe ʼaoga kia tatou ke tou kātakiʼi, pea ʼe tou maʼu te ʼamanaki ki te maʼuli heʼegata.
Ko te Folafola ʼa te ʼAtua, te Tohi-Tapu, ʼe ina fakapapau mai ko Sehova “ ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he kekē, he mamahi.” (Apokalipesi 21:3, 4, MN ) ʼE faigataʼa koa hakotou tui ʼe fakatuʼu anai he mālama ʼe pulihi ai te mamahi? ʼE feala ke faigataʼa mo kapau kua koutou māhani ʼi te maʼuli mamahi. Kae ko te faka ʼāteaina mai te mataku pea mo te malaʼia ʼe ko te fakapapau ʼaia ʼa te ʼAtua, pea ʼe hoko moʼoni anai tana fakatuʼutuʼu.—Isaia 55:10, 11.
[Paki ʼo te pasina 9]
Mai te lotomamahi ki te fakafimālie