Te ʼAho Taulekaleka ʼAē Neʼe Tufa Ai Tanatou ʼu Pepa
“ ʼE TAPUAKINA tatou heʼe ko te ʼaho taulekaleka ʼaenī. ʼE laʼā, mo lau lelei te lagi, pea mo matalelei te luna. ʼE tagi te ʼu misi. ʼE ko te ʼaho taulekaleka, pea ʼe mātou fiafia anai ʼi te ʼaho ʼaenī. Ko Sehova ʼe ko he ʼAtua ʼe mole ina fakaloto mamahi. Ko te ʼAtua ʼo te ʼu tapuakina.”
ʼAki te ʼu palalau ʼaia, ko te Tēhina ko Samuel Herd, ʼo te Kolesi Pule ʼa te kau Fakamoʼoni ʼa Sehova, neʼe ina avahi ai te polokalama ʼo te tufa ʼo te ʼu pepa ako ʼo te 117 kalasi ʼo te Faleako Faka Tohi-Tapu ʼo Kileate ʼo te Watchtower. Neʼe hoko te faʼahi ʼaia ʼi te ʼaho 11 ʼo Sepetepeli 2004. Neʼe fakahā ʼi te polokalama lelei ʼaia te ʼu tokoni faka Tohi-Tapu fakaloto mālohi, mo te ʼu ʼaluʼaga neʼe hoko ki te kau ako ʼo Kileate, pea mo te ʼu fakamatala ʼo te gāue ʼa te kau misionea. Ei, neʼe ko te ʼaho taulekaleka maʼa te toko 6 974 ʼaē neʼe kau ki te fakatahi ʼi te Faleako ʼo te Sosiete Watchtower ʼi Patterson, ʼi New York, pea ʼi te ʼu fale ʼo Brooklyn pea mo Wallkill, ʼaē neʼe feala ai ke fakalogo kiai peʼe muliʼi ʼi te ʼu televisio.
Ko He ʼu Palalau Fakaloto Mālohiʼi Ki Te Kau Ako
Ko John Kikot, ʼaē ʼe kau ki te Komite ʼo te Filiale ʼo Amelika, neʼe ina foaki he ʼu fakaloto mālohi ʼi tana akonaki ʼaē ko tona kupu tāfito ʼaenī: “Misionea, Taupau Tau Fiafia.” Neʼe ina fakahā lelei ʼe ʼiloa te kau ako ʼo Kileate ʼuhi ko tanatou fiafia, ohage ko tona hā lelei ʼi te ʼaho ʼaia neʼe foaki ai te ʼu pepa. Neʼe fiafia te kau ako ʼuhi ko te ako Tohi-Tapu ʼaē neʼe foaki kiā nātou, pea ʼi te temi nei, kua feala ke nātou tokoni ki te tahi ʼu hahaʼi ke nātou fiafia mo nātou. ʼO feafeaʼi? ʼAki tanatou foaki lahi ʼi tanatou fai faka mafola ʼi tonatou ʼuhiga kau misionea. Neʼe ʼui fēnei e Sesu: “ ʼE lahi age te fiafia ʼi takita foaki, ʼi takita tali.” (Gaue 20:35, MN ) ʼE feala anai ki te kau misionea foʼou ʼaia ke nātou taupau tanatou fiafia, heʼe nātou faʼifaʼitakiʼi ia Sehova ʼAtua, “te ʼAtua fiafia” pea mo loto fia foaki, ʼaē ʼe ina faka fealagia ki te hahaʼi ke nātou maʼu te moʼoni.—1 Timoteo 1:11.
Neʼe hoko atu leva ia te polokalama, ʼaki te tahi tēhina ʼe kau ʼi te Kolesi Pule, ko David Splane, ʼaki tana akonaki ko tona kupu tāfito ʼaenī: “ ʼE Lava Feafeaʼi Hakotou Felogoi Mo Te Hahaʼi?” ʼE mahino ia ʼe ko he meʼa lelei pea mo fakafiafia hatatou felogoi tahi, kae ʼe fakamaʼua kiai ke tou liliu “ko te mea fuli ki te tagata fuape.” (1 Kolonito 9:22; Pesalemo 133:1) Neʼe fakahā e te Tēhina ko Splane ʼe felāveʼi anai te kau ako maʼu pepa mo te ʼu hahaʼi tokolahi ʼi tanatou gāue faka misionea—te hahaʼi ʼo te telituale, mo te tahi kau misionea, mo te ʼu tēhina mo tuagaʼane ʼi tanatou kokelekasio foʼou, pea mo nātou ʼo te filiale ʼaē ʼe nātou takitaki te gāue fai faka mafola pea mo faiako. Neʼe ina foaki te ʼu tokoni ʼaoga ke feala hanatou felogoi lelei ai mo te hahaʼi: ʼe tonu ke nātou ʼiloʼi te lea ʼo te fenua, ke nātou ʼiloʼi te ʼu agaʼi fenua pea mo nātou māhani kiai, ke nātou fakaʼapaʼapa ki te maʼuli takitokotahi ʼa te kau misionea, pea mo nātou fakalogo kiā nātou ʼaē ʼe takitaki.—Hepeleo 13:17.
Neʼe hoa kiā ia te tēhina faiako ʼo Kileate ko Lawrence Bowen, neʼe ko te kupu tāfito ʼo tana akonaki: “Koteā Takotou Manatu?” Neʼe ina fakamanatuʼi age ki te kau ako ko nātou ʼaē ʼe nātou ‘fakamāu ʼo fai ki te meʼa ʼaē ʼe hā mai ki tuʼa,’ ʼe mole nātou fakamoʼoni ko Sesu te Mesia. (Soane 7:24) ʼI totatou ʼuhiga agahala, ʼe tonu ke tou tōkakaga fuli ki ‘te ʼu manatu ʼaē ʼe manatu kiai te kau tagata’ kae mole ko “te ʼu manatu ʼa te ʼAtua.” (Mateo 16:22, 23, MN ) Māʼia mo te hahaʼi ʼaē ʼe manatu fakalaumālie, ʼe tonu ke nātou fakatonutonuʼi tuʼumaʼu tanatou fakakaukau. Ohage pe ko te takitaki ʼo he vaka, kapau ʼe tou fai te ʼu fetogi ʼi te temi nei, pea ʼe feala ke tou fakahoko tatatou fakatuʼutuʼu peʼe feala ke tou moū ʼi te faʼahi fakalaumālie. Ko te haga akoʼi ʼo te ʼu meʼa ʼaē ʼe fakamatala ʼi te Tohi-Tapu ʼe tokoni mai anai ke tou maʼu “te ʼu manatu ʼa te ʼAtua.”
Ko Wallace Liverance, te tahi tēhina faiako ʼi te Faleako ʼo Kileate, neʼe ina fakaʼosi te koga ʼaia ʼo te polokalama. Ko te kupu tāfito ʼaenī ʼo tona akonaki “Koteā Anai Te Meʼa ʼAē Ka Koutou Totogi?”, neʼe fakatafito kiā Isaia 55:1. Neʼe ina fakaloto mālohiʼi te kau ako ke nātou “totogi” te faka fīmālie, mo te fiafia, pea mo te meʼa kai ʼaē ʼe haʼu mai te logo faka polofeta ʼa te ʼAtua ia ʼaho nei. Neʼe fakatatau e te lea faka polofeta ʼo Isaia ia te folafola ʼaia ʼa te ʼAtua ki he vai, mo he vino, pea mo he huʼa pipi. ʼE lava totogi feafeaʼi te meʼa ʼaia kae ‘mole he paʼaga mo he totogi’? Neʼe fakamahino e te Tēhina ko Liverance ʼe feala te faʼahi ʼaia ʼaki te tokaga ʼaē ki te lea faka polofeta ʼa te Tohi-Tapu, pea mo fetogi te ʼu manatu pea mo te ʼu ala ʼaē ʼe mole fakalaumālie, kae tou maʼu te ʼu manatu pea mo te ʼu ala ʼa te ʼAtua. (Isaia 55:2, 3, 6, 7) Kapau ʼe fai e te kau misionea foʼou te faʼahi ʼaia, pea ʼe tokoni anai kiā nātou ʼi tanatou telituale foʼou. Ko te hahaʼi agahala ʼe nātou tau manatu ʼe fiafia he tahi mo kapau ʼe lahi tana ʼu koloā. Neʼe ʼui fēnei e te tēhina faiakonaki: “ ʼAua naʼa koutou tui kiai. ʼAua naʼa koutou kamata manatu feiā. Koutou tōkakaga lelei ʼo fakaʼaogaʼi he temi ke koutou ako ai te Folafola faka polofeta ʼa te ʼAtua, ke koutou mahino lelei kiai. ʼE koutou mālolohi ai anai pea mo fiafia ʼi takotou telituale misionea.”
Te ʼu Meʼa Lelei Neʼe Hoko Ki Te Kau Ako Pea Mo He ʼu Fakafehuʼi
Neʼe kau te kau ako ki te gāue fai faka mafola. Ko te tahi tēhina faiako ʼo Kileate, ko Mark Noumair, neʼe fai palalau mo ʼihi ʼo te kalasi ʼaē neʼe nātou faʼifaʼitakiʼi te ʼu meʼa neʼe hoko, ʼo mulimuli ki te kupu tāfito ʼo tana akonaki: “Neʼe Mole Nātou Ufiufi ʼi Te Logo Lelei.” (Loma 1:16) Neʼe fiafia te nofoʼaki ʼi tanatou fakalogo pe neʼe feafeaʼi tanatou fai faka mafola ʼi te ʼu ʼapi, ʼi te ala, pea mo te ʼu fale koloā. Ko te kau ako ʼaē neʼe popoto ʼi te palalau ʼi te tahi ʼu lea neʼe nātou ʼolo ʼo fai faka mafola ʼi te telituale ʼo tanatou kokelekasio ki te hahaʼi ʼaē ʼe palalau ʼi te ʼu lea ʼaia. Neʼe fakaʼaogaʼi lelei e ʼihi te ʼu tohi faka Tohi-Tapu ʼaē ʼe tā e te kau Fakamoʼoni ʼa Sehova, ʼo nātou fakaʼaogaʼi ʼi tanatou ʼu ʼaʼahi pea mokā nātou kamata he ʼu ako Tohi-Tapu. Neʼe mole nātou “ufiufi” ʼi te faka mafola ʼo te logo lelei.
Ko te Tēhina ko William Nonkes, ʼaē ʼe kau ʼi te Selevisi Gāue, neʼe ina fakafehuʼi te kau misionea kua māhani lelei ʼi te gāue faka misionea, mai Burkina Faso, mo Letonia, pea mo Lusia. Neʼe nātou foaki he ʼu tokoni ʼaoga neʼe pipiki ki te kupu tāfito “Ko Sehova, ʼAki Te ʼOfa, ʼe Ina Fakapale Te Kau Agatonu.” Ko te tahi ʼi te ʼu tēhina ʼaē neʼe fakafehuʼi neʼe ina fakaloto mālohiʼi te kau ako ke nātou manatuʼi ia te kau solia e toko 300 ʼo Kiteone. Neʼe foaki ki te kau solia takitahi te gāue ke nātou fai, ʼo lava ai te mālo ʼa Kiteone. (Kau Tuʼi Fakamāu 7:19-21) ʼO toe feiā, ʼe fakapale te kau misionea ʼaē ʼe nātou mulimuli ki te gāue ʼaē neʼe foaki age kiā nātou.
Ko te kupu tāfito “Koutou Liliu Ko Meʼa Fuli Pe Maʼa Te ʼu Hahaʼi Kehekehe,” neʼe hā lelei ʼi te ʼu fakafehuʼi ʼaē neʼe fai ki muli age e Samuel Roberson, ʼaē ʼe ko he tēhina faiako ʼi Patterson. Neʼe ina fakafehuʼi te ʼu tēhina e toko fā ʼe nātou kau ki te Komite ʼo te Filiale, mai Senekale, mo Guam, mo Lipelia, pea mo Madagascar. Ko te toko 170 kau misionea ʼe nātou gāue ʼi te ʼu fenua ʼaia. Ko te kau ako ʼaē neʼe maʼu pepa neʼe nātou ako mai te ʼu fakamatala te tokoni ʼa te ʼu Komite ʼo te Filiale ki te kau misionea foʼou ke nātou māhani mo tanatou telituale foʼou. ʼI te agamāhani, ʼe tonu ke nātou ʼiloʼi te ʼu agaʼi fenua ʼaē ʼe mole fai māhani ʼi te ʼu fenua ʼo te Potu Uesite. Ohage la, ʼi ʼihi fenua ʼe ko he meʼa māhani te sio ʼaē ki he ʼu kaumeʼa tagata, ʼo feiā pe mo te ʼu tēhina ʼo te kokelekasio, ʼe nātou tapiki nima mokā nātou haʼele fakatahi. ʼI ʼihi koga meʼa ʼo te filiale ʼo Guam, ʼe teuteuʼi te ʼu faʼahiga meʼa kai ʼe mole nātou māhani kiai. Kae kua māhani ʼihi kiai, pea ʼe toe feala pe foki mo te kau misionea foʼou.
Neʼe fai e Guy Pierce, ʼe kau ki te Kolesi Pule te akonaki ko tona kupu tāfito ʼaenī “Koutou Nonofo Agatonu Ki ‘Te Puleʼaga ʼo Totatou ʼAliki.’ ” Neʼe ina fakamanatuʼi te faʼahi ʼaenī kiā nātou ʼaē neʼe fakalogo: “Ko Sehova neʼe ina fakatupu ia meʼa fuli ʼaki he fakatuʼutuʼu. Neʼe ʼi ai tana fakatuʼutuʼu ʼo ʼuhiga mo tana fakatupu. Mole heʼeki fetogi tana fakatuʼutuʼu ʼo ʼuhiga mo te malamanei. ʼE hoko moʼoni anai. ʼE mole he meʼa ʼe feala ke ina tāʼofi te hoko ʼo tona fakatuʼutuʼu ʼaia.” (Senesi 1:28) Neʼe fakaloto mālohiʼi e te Tēhina ko Pierce te hahaʼi fuli ke nātou agatonu ʼo fakalogo ki te pule faʼifaʼitaliha ʼa te ʼAtua, logola te ʼu fihifihia ʼaē ʼe hoko ʼuhi ko te agahala ʼo te ʼuluaki tagata ko Atama. Neʼe fai te fakaloto mālohi ʼaenī e te Tēhina ko Pierce: “ ʼE tou maʼuʼuli ʼi te hola ʼo te fakamāu. ʼE veliveli te temi ʼaē ʼe kei toe ke tou palalau ai ki te hahaʼi loto fakamalotoloto, ke tou tokoni kiā nātou ke nātou ʼiloʼi te moʼoni. Tou fakaʼaogaʼi lelei te temi ke tou palalau ai ki te hahaʼi ʼo ʼuhiga mo te logo ʼo te Puleʼaga.” Ko nātou ʼaē ʼe agatonu ʼo lagolago ki te Puleʼaga ʼe feala ke nātou falala ki tana tokoni.—Pesalemo 18:25.
ʼI te koga fakaʼosi, neʼe lau e te pelesita te ʼu fakamālo pea mo te ʼu fakaloto mālohi mai te ʼu filiale kehekehe ʼi te malamanei. Neʼe ina foaki leva te ʼu pepa ʼo te kau ako, pea ko te tēhina ia nātou neʼe ina lau te tohi ʼaē neʼe fai e te kalasi, moʼo fakahā tanatou fakafetaʼi ki te ako ʼaē neʼe nātou maʼu. Neʼe ko he ʼu palalau fakaʼosi neʼe ʼalutahi mo te ʼaho taulekaleka ʼaē ka mole galoʼi anai e nātou ʼaē neʼe kau kiai.
[Talanoa ʼo te pasina 23]
KO TE ʼU AGAAGA ʼO TE KALASI
ʼE nātou ʼōmai mai te ʼu fenua e: 11
ʼE nātou ʼolo ki te ʼu fenua e: 22
Ko te kau ako e: 48
Te Fakafuafua ʼo tonatou ʼu taʼu: 34,8
Te Fakafuafua ʼo tanatou ʼu taʼu ʼi te moʼoni: 18,3
Te Fakafuafua ʼo tonatou ʼu taʼu ʼi te gāue temi kātoa: 13,4
[Paki ʼo te pasina 24]
Ko Te 117 Kalasi ʼo Te Faleako Faka Tohi-Tapu ʼo Kileate ʼo Te Watchtower
ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoa ʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu.
(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.