Tonatou Maʼuli

ʼE Au Fiafia ʼi Taku Kau Ki Te Akoʼi ʼo Te Tohi-Tapu ʼi Te Kele Kātoa

NEʼE FAKAMATALA E ANNA MATHEAKIS

Neʼe vela te sitima. Kapau ʼe mou te sitima ʼaia ʼe meta 171, pea ʼe au malemo anai. Neʼe au kāuga mālohi he neʼe hou te tai. Ke ʼaua naʼa au malemo neʼe au tapiki ki te teu faka maʼanu ʼa te tahi fafine. Ko te meʼa pe e tahi neʼe feala ke au fai, ko te faikole ki te ʼAtua ke ina foaki mai te mālohi pea mo te faʼa kātaki.

NEʼE hoko te tuʼutāmaki ʼaia ʼi te taʼu 1971, ʼi taku toe liliu ki Italia, taku tolu telituale misionea. ʼI te tuʼutāmaki ʼaia, neʼe teitei puli ai toku ʼu koloā fuli. Kae ko te ʼu meʼa maʼuhiga tāfito ʼaē neʼe au hāofaki​—ʼe ko toku maʼuli, te ʼofa fakatautehina, pea mo te pilivilesio ʼaē ke au tauhi kiā Sehova. ʼAki te gāue misionea ʼaia, neʼe kua au ʼalu ki te ʼu fenua lalahi e tolu, pea ko te tuʼutāmaki ʼaē neʼe mou ai te sitima, neʼe kau ki te ʼu tuʼuga tuʼutāmaki ʼaē neʼe hoko ki toku maʼuli.

Neʼe au tupu ʼi te taʼu 1922. Neʼe maʼuli toku famili ʼi Ramallah, iā teitei kilometa e 16 ʼi te potu noleto ʼo Selusalemi. Neʼe tutupu taku ʼu mātuʼa ʼi te motu ʼo Kelete, kae neʼe lahilahi ake taku tāmai ʼi Nasaleti. Neʼe mātou toko nima, ko te toko tolu tagata pea mo te toko lua fafine, pea neʼe ko au te muli. Neʼe mamahi ʼaupito toku famili ʼi te mate ʼo toku tēhina ʼaē neʼe tuʼulaga lua, he neʼe malemo ʼi te Vaitafe ʼo Solotane, ʼi tana ʼalu mo te kalasi ʼo tana faleako. Hili te tuʼutāmaki ʼaia, neʼe mole fia nofo taku faʼē ʼi Ramallah, pea neʼe mātou ʼolo ai ki Ateni, ʼi Keleka, ʼi toku taʼu tolu.

Neʼe Logo Toku Famili Ki Te Moʼoni

Mole fualoa ʼi tamatou ʼosi tau ki Keleka, ko toku tēhina lahi, ia Nikos, ʼaē neʼe taʼu 22 ʼi te temi ʼaia, neʼe felāveʼi mo te kau Fakamoʼoni ʼa Sehova, ʼaē neʼe fakahigoaʼi ʼi te temi ʼaia ko te kau Ako ʼo Te Tohi-Tapu. Neʼe fiafia ʼaupito ʼi tana maʼu te ʼatamai mālama ʼo te Tohi-Tapu, pea neʼe faʼafai ʼaupito ʼi te minisitelio faka Kilisitiano. Neʼe ʼita kovi ai taku tāmai, pea neʼe ina kapu ai ia Nikos. Kae ʼi te temi ʼaē neʼe ʼalu ai taku tāmai ki Palesitina, ko taku faʼē, mo toku taʼokete, pea mo au neʼe mātou kāuga ʼolo mo Nikos ki te ʼu fono. ʼE kei au manatuʼi lelei te ʼu fai palalau fakafiafia ʼo taku faʼē ʼo ʼuhiga mo te ʼu manatu ʼaē neʼe logo kiai ʼi te ʼu fono ʼaia. Kae mole fualoa ki muli age, neʼe mate ʼi te kosea ʼi tona taʼu 42. ʼI te ʼu temi faigataʼa ʼaia, ko toku taʼokete, ia Ariadne, neʼe ʼofa lahi ʼo taupau tomatou famili. Logola neʼe kei finemui, kae lolotoga ni ʼu taʼu neʼe liliu ia ohage ko haku faʼē.

ʼI tana ʼi Ateni, neʼe ʼave tuʼumaʼu au e taku tāmai ki te ʼu misa ʼo te Lotu Orthodoxe, pea ʼi tana ʼosi mate, neʼe tahitahiga leva taku ʼalu kiai. Pea ki muli age, neʼe au tuku taku ʼalu ki te ʼu misa ʼaia, he neʼe au sio ko te hahaʼi neʼe mole nātou tauhi fakamalotoloto.

ʼI te ʼosi mate ʼo taku tāmai, neʼe au maʼu taku gāue lelei ʼi te minisitelio faka paʼaga ʼo te puleʼaga. Kae ko toku tokolua lahi neʼe ina foaki tona maʼuli kātoa ki te gāue fai faka mafola ʼo te Puleʼaga, ʼo gāue lolotoga ni ʼu taʼu ʼi Keleka. ʼI te taʼu 1934, neʼe ʼalu ki Sipele. ʼI te temi ʼaia, neʼe mole he Fakamoʼoni ʼa Sehova kua papitema ʼi te motu ʼaia, koia neʼe ina maʼu te pilivilesio ʼaē ke ina fakatuputupu te gāue faka mafola ʼi ai. ʼI tana ʼosi ʼohoana, neʼe toe kau tona ʼohoana ko Galatia ki te minisitelio temi kātoa lolotoga ni ʼu taʼu.a Neʼe tautau momoli mai e Nikos te ʼu tohi faka Tohi-Tapu pea mo te ʼu nusipepa, kae neʼe tahitahiga tamatou lau te ʼu tohi ʼaia. Neʼe nofo ʼi Sipele ʼo aʼu ki tona mate.

ʼE Au Tali Te Moʼoni

ʼI te taʼu 1940, ko George Douras, ko te Fakamoʼoni faʼafai ʼi Ateni pea neʼe kaumeʼa mo Nikos, neʼe ina ʼaʼahi mātou pea mo fakaafe mātou ke mātou ʼolo age ki tona ʼapi, ke mātou ako fakatahi ai te Tohi-Tapu mo te kiʼi kūtuga. Neʼe mātou tali fakafiafia te fakaafe ʼaia. Mole tuai, pea neʼe mātou kamata fakamatala ki te hahaʼi te ʼu meʼa ʼaē neʼe mātou ako. ʼI tamā maʼu te ʼatamai mālama ʼo te Tohi-Tapu, ko au mo toku taʼokete neʼe mā foaki ai leva tomā maʼuli kiā Sehova. Neʼe papitema ia Ariadne ʼi te taʼu 1942, kae au papitema au ʼi te taʼu 1943.

ʼI te fakaʼosi ʼo te Lua Tau Faka Malamanei, neʼe fakaafe māua e Nikos ke mā ʼolo age ki Sipele, pea ʼi te taʼu 1945 neʼe mā ʼolo ai ki Nicosie. ʼO mole hage ko Keleka, neʼe gafua te gāue fai faka mafola ʼi Sipele. Neʼe mātou kau ki te fai faka mafola ʼi te ʼu ʼapi pea mo te fai fagonogono ʼi te ʼu ala.

Hili taʼu e lua, neʼe toe liliu ia Ariadne ki Keleka. Neʼe felāveʼi ai mo te tuagaʼane neʼe tauhi kiā Sehova, pea ki muli neʼe nā ʼohoana, pea nofo ai ia Ariadne ʼi Ateni. Mole fualoa, pea neʼe fakaloto mālohiʼi au e toku taʼokete pea mo tona ʼohoana, ke au toe liliu ki Keleka pea ke au pionie kātoa ʼi te kolo taulaga. Mai tona ʼaluʼaga ʼaē neʼe kua fualoa taku fia kau ki te selevisi pionie, koia neʼe au toe liliu ai ki Ateni, ʼaē neʼe ʼaoga lahi ai he kau fai faka mafola.

Ko He ʼu Faigamālie Foʼou

ʼI te ʼaho 1 ʼo Novepeli 1947, neʼe au kamata taku gāue pionie, ʼo au fai faka mafola ʼi te māhina fuli, ia hola e 150. Neʼe lahi ʼaupito te telituale ʼo tamatou kokelekasio, pea neʼe lahi taku haʼele lalo. Kae neʼe lahi taku ʼu tapuakina. Neʼe tau puke e te kau polisi te ʼu Fakamoʼoni ʼaē neʼe lolotoga fai faka mafola peʼe ko te kau Fakamoʼoni ʼaē neʼe kau ki te ʼu fono, pea mole fualoa ki muli age, neʼe puke au.

Neʼe tukugakoviʼi au ʼe au fakatafoki te hahaʼi, pea ʼi te temi ʼaia neʼe ko he hala mamafa ʼaupito ʼaia ki te lao. Neʼe fakatūʼā au kiā māhina e lua ʼi te Fale Pilisoni ʼa Te Kau Fafine ʼi Averof, ʼi Ateni. Neʼe kua nofo ai te tahi tuagaʼane, pea neʼe mā fiafia pea mo lotomālohi ʼi tamā fakatahi, logola tamā nonofo pilisoni. ʼOsi te ʼu taʼu ʼo toku temi pilisoni, neʼe au toe hoko atu taku pionie ʼaki he loto fiafia. Tokolahi ʼo nātou ʼaē neʼe au fai tanatou ako Tohi-Tapu ʼi te temi ʼaia, ʼe kei nātou tauhi agatonu pe kiā Sehova, pea ʼe ko he meʼa fakafiafia ʼaupito kiā au.

ʼI te taʼu 1949, neʼe fakaafe au ke au kau ki te 16 kalasi ʼo te Faleako Faka Tohi-Tapu ʼo Kileate ʼo te Watchtower ʼi Amelika, ʼaē neʼe akoʼi ai te ʼu pionie kātoa ki te gāue faka misionea. Neʼe au fiafia ʼo feiā mo toku famili. Neʼe au fakatuʼutuʼu ke au kau ki te fakatahi faka malamanei ʼi New York ʼi te temi vela ʼo te taʼu 1950 pea ke au hū leva ki Kileate.

ʼI taku ʼosi tau ki Amelika, neʼe au maʼu te pilivilesio ke au gāue ʼi he ʼu kiʼi māhina ʼi te selevisi fakamaʼa ʼi te Petele ʼi New York. Neʼe maʼa te ʼu fale, mo fakaloto fiafia pea mo fakaloto mālohi, pea neʼe fiafia te ʼu tēhina mo te ʼu tuagaʼane. ʼE mole au galoʼi anai te ʼu māhina ʼaia e ono ʼaē neʼe au gāue ai! Neʼe kua hoko mai leva te ʼaho ʼaē neʼe tonu ai ke mātou kau ki te Faleako ʼo Kileate, ʼaē neʼe mātou nonofo ai lolotoga māhina e nima ʼo faiga mālohi ʼi te ako pea mo tali te ʼu fakamahino. Ko mātou kau ako neʼe mātou mahino ki te maʼuhiga pea mo te taulekaleka ʼo te ʼatamai mālama ʼo te Tohi-Tapu, pea neʼe tuputupu ai tamatou fiafia pea mo tamatou fia vaevae mo te hahaʼi te ʼatamai mālama ʼo te moʼoni ʼaē ʼe ina hāofaki te maʼuli ʼo te hahaʼi.

Toku ʼUluaki Telituale Misionea

ʼI te Faleako ʼo Kileate, ʼi muʼa ʼo te fakahā mai ʼo tamatou telituale misionea, neʼe feala ke mātou filifili te tēhina ʼaē ka kaugā gāue mo kita. Neʼe au kaugā gāue mo te tēhina ʼe agalelei ʼaupito, ko Ruth Hemmig (ʼi te temi nei ko Bosshard). Ko au mo Ruth neʼe mā fiafia ʼi te fakahā mai ko tamā telituale ko Istanbul, ʼi Tulukia​—ʼaē ʼe fakalaka ai te ʼu ala ki te ʼu fenua ʼo Asia pea mo te tahi ʼu ala ki Eulopa! Neʼe mā ʼiloʼi neʼe mole heʼeki gafua ke fai ai te gāue fai faka mafola, kae neʼe mā falala ʼe tokoni mai anai Sehova kiā māua.

Ko Istanbul ko te fenua matalelei ʼe maʼu ai te ʼu hahaʼi mai te ʼu fenua kehekehe. Neʼe mā maʼu ai te ʼu tuʼuga koloā faifakatau, mo te ʼu meʼa kai kano lelei mai te ʼu fenua kehekehe, mo te ʼu fale tānaki mātaga, mo he ʼu hahaʼi agalelei, pea mo te ʼu ʼuafu matalelei. Kae ko te meʼa ʼaē neʼe maʼuhiga tāfito, ko tamā maʼu ia te ʼu hahaʼi fakamalotoloto neʼe nātou fia ʼiloʼi te ʼAtua. Ko nātou tāfito ʼo te kiʼi kūtuga veliveli ʼo te kau Fakamoʼoni ʼi Istanbul neʼe ko te kau Alamenia, mo te kau Keleka, pea mo te kau Sutea. Kae neʼe toe ʼi ai mo te hahaʼi mai te ʼu fenua kehekehe, pea neʼe ko he meʼa lelei te ʼiloʼi ʼo te ʼu lea kehekehe, ʼo kau ai mo te faka Tulukia. Neʼe mā fiafia ʼi te felāveʼi mo te ʼu hahaʼi mai te ʼu fenua kehekehe neʼe nātou fia ʼiloʼi lelei ia te moʼoni. Tokolahi iā nātou ʼe kei nātou tauhi agatonu nei kiā Sehova.

Kae neʼe tonu leva kiā Ruth ke mavae ʼi te fenua, he neʼe mole feala ke ina fakafoʼou tana pepa ʼaē neʼe ina fakagafua tana nofo. ʼE kei hoko atu pe tana selevisi pionie kātoa ʼi Suisi. Hili te ʼu taʼu ʼaia, ʼe kei au manatuʼi te ʼu temi fakafiafia pea mo fakaloto mālohi ʼaē neʼe mā gāue fakatahi ai.

ʼE Au ʼAlu Ki Te Tahi Fenua

ʼI te taʼu 1963, neʼe mole fakafoʼou taku pepa ʼaē neʼe ina fakagafua ke au nofo ʼi Tulukia. Neʼe faigataʼa taku mavae mai toku ʼu tēhina mo tuagaʼane ʼaē neʼe au sio ki tanatou tuputupu ʼi te faʼahi fakalaumālie logola te ʼu tuʼuga faigataʼaʼia ʼaē neʼe tau mo nātou. Moʼoku fakaloto mālohiʼi, neʼe totogi e toku famili taku folau ʼaē ki New York ke feala haku kau ki te fakatahi ʼaē neʼe fai ʼi ai. Neʼe mole heʼeki fakahā mai te telituale ʼaē ka au ʼalu kiai.

Hili te fakatahi, neʼe hinoʼi au ki Lima, ʼi Pelu. ʼAki te tahi kiʼi tēhina, neʼe au mavae mai New York ʼo ʼalu ki toku telituale foʼou. Neʼe au ako te lea faka Sepania pea mo nofo ʼi te ʼapi ʼa te kau misionea ʼaē neʼe tuʼu ʼi te laufata ʼo te filiale ʼa te kau Fakamoʼoni ʼa Sehova. Neʼe ko he meʼa lelei ʼaupito te fai faka mafola ʼi ai pea mo te feʼiloʼiʼaki mo te ʼu tēhina mo tuagaʼane.

Te Tahi Telituale, Pea Mo Te Tahi Lea

ʼAki te temi, ko toku famili ʼi Keleka neʼe fakahaʼuhaʼu tanatou mātutuʼa pea mo mahamahaki. Neʼe mole he temi neʼe nātou kole mai ke au tuku taku selevisi kātoa ke au fai toku maʼuli ohage ko te hahaʼi fuli, ke feala haku tokoni age kiā nātou. Kae ʼi taku ʼosi fakakaukau fakalelei pea mo faikole mālohi, neʼe mahino kiā au neʼe lelei age haku gāue ʼi he koga meʼa ʼe au feōvi ai mo toku famili. Neʼe tali lelei e te ʼu tēhina ʼo te filiale pea nātou hinoʼi au ki Italia, pea neʼe totogi e toku famili taku folau ʼaē ki Italia. Meʼa lelei foki, he neʼe ʼaoga ke kaugamālie he kau fai faka mafola ʼi Italia.

Neʼe tonu ke au toe ako te tahi lea foʼou, te faka Italia. Neʼe ʼuluaki hinoʼi au ki te kolo ʼo Foggia. Ki muli age, neʼe hinoʼi au ki Naples, ʼaē neʼe lahi ai te gāue. Neʼe au gāue ʼi te telituale ʼo Posilipo, ko te kiʼi koga meʼa matalelei ʼo Naples. Neʼe lahi taku telituale, pea neʼe ko te kaugā fai faka mafola pe e tahi ʼo te Puleʼaga. Neʼe au leleiʼia ʼaupito te gāue, pea neʼe tokoni mai Sehova ke au kamata he ʼu tuʼuga ako Tohi-Tapu. ʼAki te temi, neʼe fakahaʼu ʼo hahaʼi ia te kokelekasio ʼo te koga meʼa ʼaia.

ʼI te ʼu hahaʼi ʼaē neʼe au fai tanatou ako Tohi-Tapu ʼi te koga meʼa ʼaia, neʼe ʼi ai te faʼē mo tana ʼu tamaliki e toko fā. Ko ia mo tana ʼu taʼahine e toko lua, ʼe kei nātou kau pe ki te kau Fakamoʼoni ʼa Sehova. Neʼe au fai mo te ako ʼa te taumātuʼa mo tanā kiʼi taʼahine. Neʼe tuputupu te famili ʼaia ʼi te moʼoni pea neʼe nātou papitema. ʼI te temi nei, kua ʼohoana te taʼahine mo te kaugana agatonu ʼa Sehova, pea ʼe nā tauhi toko lua ki te ʼAtua ʼaki he loto faʼafai. ʼI taku ako te Tohi-Tapu mo te famili kaugamālie, neʼe au punamaʼuli ai ki te mālohi ʼo te Folafola ʼa te ʼAtua. Neʼe mātou lau te ʼu vaega Tohi-Tapu ʼe fakahā ʼe mole tali e te ʼAtua te tauhi ki te ʼu fakatātā, pea neʼe mole ʼatali e te faʼē ke ʼosi te ako. ʼI te temi pe ʼaia neʼe ina līaki te ʼu fakatātā fuli ʼaē neʼe ʼi tona loto fale!

Te ʼu Tuʼutāmaki ʼi Te Tai

ʼI taku ʼalu ʼaē ki Keleka pea mo taku toe liliu ki Italia, neʼe au folau tuʼumaʼu pe ʼi te sitima. ʼI te agamāhani, neʼe lelei te folau. Kae neʼe kehe leva te tahi folau ʼi te temi vela ʼo te taʼu 1971. Neʼe ko taku toe liliu ʼaia ki Italia ʼi te sitima ʼe higoa ko te Heleanna. ʼI te ʼaho 28 ʼo ʼAukusito, ʼi te kei ʼuhuʼuhu, neʼe vela te fale kuka ʼo te sitima. Neʼe mafola te vela pea ko te hahaʼi ʼo te vaka kua hē noa pe nātou. Neʼe pogia te hahaʼi fafine, neʼe fetāgihi te ʼu kiʼi tamaliki, pea neʼe mumuna te hahaʼi tagata ʼi tanatou ʼiʼita pea mo nātou tauvele. Neʼe feleleʼi te hahaʼi ki te ʼu kiʼi vakapā ʼaē neʼe ʼi te ʼu tafaʼaki ʼo te sitima. Kae neʼe mole feʼauga te ʼu teu faka maʼanu, pea neʼe mole haʼele lelei te ʼu masini ʼaē ʼe nātou fakahifo ki te tai ia te ʼu kiʼi vakapā. Neʼe mole ʼi ai hoku teu faka maʼanu, kae neʼe mafola lahi ia te vela, pea ko te meʼa pe e tahi neʼe tonu ke au fai ko te fakatoto ki te tai.

ʼI taku ʼosi fakatoto ki te tai, neʼe au sio ki te fafine mo tona teu faka maʼanu ʼi ʼoku tafa. Neʼe hage ia neʼe mole feala ke kāuga, ʼo au puke ai tona nima ʼo fakamamaʼo ia ia mai te vaka ʼaē neʼe mou. Neʼe tokakovi te tai, pea neʼe kua au gaʼegaʼe ʼaupito ʼi taku kakau ʼaē ke mole au malemo. Neʼe hage ia kia au ʼe au mate anai, kae neʼe au haga kole kiā Sehova he lotomālohi, pea neʼe au toe mālohi ai. Neʼe au manatuʼi ia te ʼapositolo ko Paulo ʼi tana folau ʼaē neʼe mou ai te vaka.​—Gaue kapite 27.

ʼI taku puke te fafine, neʼe au kāuga ʼo fakatau ki te ʼu peau lolotoga hola e fā, ʼo au kāuga ʼi te ʼu temi ʼaē neʼe au mālohi ai pea mo kole kiā Sehova ke tokoni mai. Neʼe au sio ki te kiʼi vaka neʼe fakaōvi mai, pea neʼe nātou fakahake māua, kae neʼe kua mate te fafine. ʼI tamatou tau ki te kolo ʼo Bari, ʼi Italia, neʼe nātou ʼave au ki te lopitali, ʼo fai ai toku ʼu ʼuluaki faitoʼo. Neʼe tonu ke au nofo ʼi te lopitali lolotoga ni ʼu ʼaho, pea tokolahi te kau Fakamoʼoni neʼe ʼōmai ʼo fakasiosio au, ʼo nātou foaki mai te ʼu meʼa fuli ʼaē neʼe ʼaoga kiā au. Neʼe punamaʼuli ʼaupito te hahaʼi ʼo te lopitali ki te ʼofa faka Kilisitiano ʼaia.b

ʼI taku kua lelei mai toku ʼu lavea, neʼe hinoʼi au ke au ʼalu ʼo gāue ʼi Loma. Neʼe kole mai ke au gāue ki te hahaʼi fai koloā ʼi te telituale ʼo te loto kolo, ʼo au gāue ai taʼu e nima ʼaki te tokoni ʼa Sehova. Neʼe au fai taku minisitelio ʼi Italia ia taʼu e 20, pea neʼe au ʼofa ki te hahaʼi ʼo Italia.

Neʼe Au Toe Liliu Ki Te Fenua ʼAē Neʼe Au Kamata Ai Taku Gāue

ʼAki te temi, neʼe mahaki kovi ia Ariadne pea mo tona ʼohoana. Neʼe au manatu kapau ʼe au ōvi kiā nāua, pea ʼe feala anai ke au liufaki age kiā nāua te ʼu meʼa fuli ʼaē neʼe nā ʼofa ʼo fai maʼa ʼaku. Neʼe au lotomamahi ʼi taku mavae ʼi Italia, kae neʼe tali e te ʼu tēhina takitaki, pea talu mai te temi vela ʼo te taʼu 1985, ʼe au pionie ʼi Ateni, ʼaē neʼe au kamata ai taku pionie kātoa ʼi te taʼu 1947.

Neʼe au fai faka mafola ʼi te telituale ʼo te kokelekasio ʼaē neʼe au kau ai, pea neʼe au kole ki te ʼu tēhina ʼo te filiale peʼe feala ke au toe fai faka mafola ʼi te loto kolo, ʼi te ʼu telituale ʼo te hahaʼi fai koloā. Neʼe mā fai fakatahi te telituale ʼaia mo te tahi pione, lolotoga taʼu e tolu. Neʼe mā fai faka mafola ai ki te hahaʼi ʼaē ʼe tahitahiga tonatou maʼu atu ʼi tonatou ʼapi.

ʼAki te temi, ʼe tuputupu tuʼumaʼu pe taku fia tauhi, kae kua au gaʼegaʼe. Kua mate te ʼohoana ʼo toku taʼokete, pea kua kivi ia Ariadne, ʼaē neʼe hage ko haku faʼē. Ki toku faʼahi, neʼe au haohaoa lolotoga te ʼu taʼu ʼaē neʼe au kau ai ki te selevisi pionie kātoa. Kae mole heʼeki faʼa fualoa, neʼe ʼau to ʼi te tuʼuga ʼo fasi ai toku nima mataʼu. Pea ʼi te tahi ʼaho neʼe au to ʼo fasi toku koga loto. Neʼe tafa au pea neʼe au nofo fualoa neʼe mole kei feala haku haʼele. ʼI te temi nei ʼe mole kei feala haku haʼele tokotahi. ʼE au fakaʼaogaʼi toku toko pea ʼe feala haku ʼalu ʼo haʼele mo kapau ʼe au kaugā ʼolo mo he tahi. Kae ʼe au faiga lahi, ʼaki te ʼamanaki ʼaē ʼe au toe lava haʼele tokotahi anai. ʼE kei au fiafia tāfito ʼi taku kau ki te gāue, moʼo akoʼi te Tohi-Tapu ki te hahaʼi, tatau aipe peʼe kua au mahamahaki ʼi te temi nei.

Ka au manatuʼi te ʼu taʼu fiafia ʼaia neʼe au kau ai ki te minisitelio temi kātoa, ʼe fonu toku loto ʼi te fakafetaʼi kiā Sehova. Ko ia pea mo tana kautahi ʼi te kele neʼe nātou foaki tuʼumaʼu mai he takitaki lelei pea mo he tokoni maʼuhiga, ke au fakaʼaogaʼi ia meʼa fuli pe ʼe au maʼu ʼi toku maʼuli moʼo tauhi kiā te ia. ʼE au loto moʼoni ke foaki mai e Sehova te mālohi ke au haga hoko atu taku tauhi kiā te ia. ʼE au fiafia ʼi te koga veliveli ʼaē ʼe au fai ki te gāue ʼaē ʼe takitaki e Sehova, ʼaē ko te akoʼi ʼo te Tohi-Tapu ki te hahaʼi ʼi te kele kātoa.​—Malakia 3:⁠10.

[Kiʼi nota]

[Paki ʼo te pasina 9]

Ko au mo toku taʼokete, ia Ariadne, pea mo tona ʼohoana, ia Michalis, ʼi taku mavae ʼo ʼalu ki Kileate

[Paki ʼo te pasina 10]

Neʼe hinoʼi ia au mo Ruth Hemmig ki Istanbul, ʼi Tulukia

[Paki ʼo te pasina 11]

ʼI Italia, ʼi te kamata ʼo te ʼu taʼu 1970

[Paki ʼo te pasina 12]

Ia ʼaho nei, mo toku taʼokete ko Ariadne