Tou Fakalogo Pea Mo Lototoʼa Ohagē Ko Sesu

“Ke kotou kātaki! Kua au mālo ʼi te mālamanei.”—SOA. 16:33.

1. Neʼe fakakātoa feafeaʼi ia te fakalogo ʼa Sesu ki te ʼAtua?

KO SESU KILISITO neʼe ina fai tuʼumaʼu pē ia te finegalo ʼo te ʼAtua. Neʼe mole he temi neʼe ina manatu ai ke talagataʼa ki tana Tamai ʼaē ʼi selō. (Soa. 4:34; Hep. 7:26) Kae ʼuhi ko te ʼu ʼaluʼaga ʼaē neʼe hoko kiā ia ʼi tana maʼuli ʼi te kele, neʼe mole faigafua tana fakalogo. Talu mai te kamata ʼo tana gāue fai fakamafola, ko te ʼu fili ʼo Sesu, ʼo kau ai mo Satana totonu, neʼe natou faiga ke natou fakalotoʼi, peʼe fakakinauʼi peʼe kākāʼi ia Sesu ke ina liʼaki ia tana agatonu. (Mat. 4:1-11; Luka 20:20-35) Ko te ʼu fili ʼaia neʼe natou fakamamahiʼi lahi ia Sesu ʼi tona loto pea ʼi te faʼahi fakasino. Ki muli age, neʼe natou matehi ia ia ʼi te pou fakamamahi. (Mat. 26:37, 38; Luka 22:44; Soa. 19:1, 17, 18) Logolā te ʼu meʼa fuli ʼaia, pea mo tona mamahi ʼaupitō, kae ko Sesu “neʼe fakalogo [aipē] ʼo aʼu ki te mate.”—Lau ia Filipe 2:8.

2, 3. Koteā ʼaē ʼe feala ke tou ako mai te fakalogo ʼaē ʼa Sesu logolā ia te ʼu mamahi ʼaē neʼe tau mo ia?

² ʼAki te ʼu meʼa ʼaē neʼe hoko kiā Sesu ʼi tana kei maʼuli ʼaē ʼi te kele, neʼe ina akoʼi ai ia te ʼu faʼahi foʼou ʼo ʼuhiga mo te fakalogo. (Hep. 5:8) Neʼe hagē neʼe mole kei ʼi ai he meʼa ke ako e Sesu ʼo ʼuhiga mo te tauhi ʼaē kiā Sehova, heʼe talu mai ni ʼu lauʼi taʼu neʼe fakatahi lelei ʼaupitō ia mo Sehova pea neʼe ko te “tufuga faiva” ia ʼa te ʼAtua lolotoga te temi ʼaē neʼe ina fakatupu ai ia meʼa fuli. (Taag. 8:30) Kae ʼi tana kātakiʼi ʼaē ia tona ʼu mamahi ʼaki te tui ʼi tona ʼuhiga tagata fakakelekele, neʼe feala ai ki tana agatonu ke kātoa. Ko Sesu, ia te ʼAlo ʼo te ʼAtua, neʼe tuputupu ʼi te faʼahi fakalaumālie. Koteā ʼaē ʼe tou ako mai tona maʼuli ʼaia?

³ Logolā neʼe ko he tagata haohaoa, kae neʼe mole faigaʼi e Sesu ke kātoa ia tana nofo agatonu ʼaki pē ia tona mālohi ʼo ia totonu. Neʼe ina kole ia te tokoni ʼa te ʼAtua ke tupu ʼaki ai hana taupau maʼu ia tana fakalogo. (Lau ia Hepeleo 5:7.) Kiā tātou, ke tou taupau maʼu ia tatatou fakalogo, ʼe toe ʼaoga foki mo tātou ke tou agavaivai pea mo kole tuʼumaʼu ia te tokoni ʼa te ʼAtua. Ko te tupuʼaga lā ʼaia ʼo te fai ʼaē e te ʼapositolo ko Paulo ia te tokoni ʼaenī ki te kau Kilisitiano: “Kotou taupau ia te faʼahiga manatu ʼaē neʼe toe maʼu e Kilisito Sesu,” ʼi “[tana] fakamālaloʼi [ʼo] . . . ia totonu pea [mo] . . . talagafua ʼo aʼu ki te mate.” (Filp. 2:5-8) Ko te maʼuli ʼo Sesu neʼe ko he fakamoʼoni, ʼe feala ki te hahaʼi ke natou fakalogo, logolā tanatou māʼuʼuli ʼi he sōsiete agakovi. ʼE moʼoni foki ko Sesu neʼe haohaoa, kae ʼe feafeaʼi kiā tātou ʼaē ko te hahaʼi agahala?

Tou Fakalogo Logopē Lā Ia Totatou ʼUhiga Heʼe Haohaoa

4. ʼE fakaʼuhiga feafeaʼi kiā tātou ia totatou faʼu ʼaē ʼaki ia te loto faʼitaliha?

⁴ Ko te ʼAtua neʼe ina fakatupu ia Atama mo Eva neʼe nā popoto pea mo nā maʼu ia te loto faʼitaliha. ʼE tou toe maʼu foki mo tātou ia te loto faʼitaliha heʼe tou kau ki tonā hōloga. Koteā tona fakaʼuhiga? Ko tona fakaʼuhiga, ʼe tou lava filifili ke tou fai ia te meʼa ʼaē ʼe lelei peʼe ko te meʼa ʼaē ʼe kovi. ʼE feala ke tou toe ʼui, neʼe foaki mai e te ʼAtua ia te ʼāteaina ʼaē ke tou filifili ke tou fakalogo kiā te ia peʼe ke tou talagataʼa. ʼAki te ʼāteaina lahi ʼaia ʼaē ʼe tou maʼu, ʼe tonu foki ke tou tali ia te ʼu ikuʼaga ʼo te ʼu tonu ʼaē ʼe tou fai. Koia ʼe fakalogo ia totatou maʼuli peʼe ko totatou mate ki te aga ʼaē kā tou filifili ke tou fai. ʼE toe ʼi ai foki mo tona ʼu fua kiā nātou ʼaē ʼe tou fakatahi ki ai.

5. Koteā te tau ʼe hoko kiā tātou fuli, pea ʼe lava feafeaʼi hatatou mālo mai ai?

⁵ ʼE mole tou tutupu ake ʼaki te loto fia fakalogo, ʼuhi ko totatou ʼuhiga heʼe haohaoa. ʼE mole faigafua tuʼumaʼu ia te fakalogo ʼaē ki te ʼu lao ʼa te ʼAtua. Neʼe tonu kiā Paulo ke ina tauʼi tuʼumaʼu ia tona ʼuhiga agahala ke tupu ʼaki ai hana fakalogo. Neʼe ina tohi fēnei: “ ʼE au logoʼi ʼi te ʼu koga ʼo toku sino te tahi lao ʼe ina tauʼi te lao ʼo toku ʼatamai, pea ʼe ina taki fakapōpula au ki te lao ʼo te agahala ʼaē ʼi te ʼu koga ʼo toku sino.” (Loma 7:23) ʼE moʼoni ʼe faigafua hakita fakalogo ʼi te temi ʼaē ʼe mole fakamaʼua mai ai ke kita fai he sākilifisio, peʼe mole kita mamahi ai, peʼe kita loto kiai. Kae koteā ʼaē kā tou fai anai mokā ʼe fakafeagai ia tatatou fia fakalogo pea mo “te holi ʼaē ʼo te kakano pea mo te holi ʼo te ʼu mata”? Ko te ʼu holi ʼaia ʼo te kakano pea mo te ʼu mata, ʼe tupu mai ia ʼi totatou ʼuhiga heʼe haohaoa pea mai te fakaneke ʼaē ʼa “te manatu ʼo te mālamanei” ʼaē ʼe tou māʼuʼuli ai nei, pea ʼe mālohi ʼaupitō ia te ʼu holi ʼaia. (1 Soa. 2:16; 1 Ko. 2:12) Moʼo tauʼi ia te ʼu holi ʼaia, ʼe tonu ke tou ‘teuteuʼi ia totatou loto’ ʼi muʼa ʼo te hoko mai ʼo he ʼaluʼaga faigataʼa peʼe ko he fakahala, pea mo tou fakatotonu ke tou fakalogo kiā Sehova, tatau aipē peʼe koteā ʼaē ʼe feala ke hoko mai kiā tātou. (Pes. 78:8) ʼE tou maʼu te ʼu tuʼuga faʼifaʼitaki ʼi te Tohi-Tapu ʼo ni hahaʼi neʼe natou mālo he neʼe natou teuteuʼi ʼonatou loto ki te ʼu taʼi ʼaluʼaga ʼaia.—Esi. 7:10; Tan. 1:8.

6, 7. Kotou tuku mai he faʼifaʼitaki ʼe fakahā ai peʼe lava tokoni feafeaʼi mai ia tatatou ako tokotahi ke tou fai ia he ʼu tonu ʼe fakapotopoto.

⁶ ʼE tou lava teuteuʼi ʼotatou loto ʼaki hatatou ako fakamālotoloto ia te Tohi-Tapu pea mo te ʼu tohi Fakatohi-tapu. Kotou fakakaukauʼi age muʼa, ʼe hoko kiā koutou ia te ʼaluʼaga ʼaenī: ʼE ko te afiafi ʼaē ʼe tonu ke kotou fai ai ia takotou ako tokotahi. Kua kotou kole ia te laumālie ʼo Sehova ke tokoni atu ke kotou maʼuliʼi ia te ʼu manatu ʼaē ʼe kotou ako ʼi tana Folafola. Neʼe kua kotou fakatuʼutuʼu ke kotou sioʼi ia te ʼata ʼi te televisio ʼi te pō ʼo te ʼapogipogi ake. Neʼe kotou logo ki te ʼu palalau lelei neʼe fai ʼo ʼuhiga mo te ʼata ʼaia, kae ʼe kotou toe ʼiloʼi ʼe fakahā ʼi te ʼata ʼaia ia he ʼu aga heʼeʼaoga pea mo te agamālohi.

⁷ ʼE kotou metitāsioʼi ia te tokoni ʼaenī ʼa Paulo iā Efesi 5:3: “Ko te fai folonikāsio, mo te heʼemaʼa ʼi tona ʼu faʼahiga agaaga fuli pē, pea mo te mānumānu, ʼe mole tonu pē lā ke fai he talanoa kiai iā koutou, ohagē ko te aga ʼaē ʼe tāu mo he kau māʼoniʼoni.” ʼE kotou toe manatuʼi foki mo te tokoni ʼaē ʼa Paulo iā Filipe 4:8. (Kotou lau.) ʼI takotou metitāsioʼi ia te tokoni ʼaia mai te ʼAtua, ʼe kotou fai ia te fehuʼi ʼaenī: ‘Kapau ʼe au tuku pē au ke hū ki toku loto pea mo toku ʼatamai ia te ʼu taʼi ʼata ʼaia, ʼe au lolotoga muliʼi koa ia te faʼifaʼitaki ʼa Sesu ʼo ʼuhiga mo te fakalogo kātoa ki te ʼAtua?’ Koteā anai kā kotou fai? ʼE kotou sioʼi anai koa ia te ʼata ʼaia?

8. He koʼē ʼe tonu ke māʼoluga tuʼumaʼu kiā tātou ia te ʼu lēkula ʼa Sehova?

⁸ ʼE tou faihala anai mo kapau ʼe tou fakavaivai ifo ia tatatou fakatotonu ʼaē neʼe tou fai ʼi totatou loto ke tou fakalogo ki te ʼu lēkula ʼa Sehova, ʼo lagi tou manatu ʼe tou mālolohi pē moʼo tauʼi ia te ʼu fakaneke ʼo te ʼu fakakaugā kovi, ʼo kau ai ia te ʼu fakakaugā kovi ʼi te ʼu fakafiafia ʼaē ʼe hā ai ia te agamālohi pea mo te ʼu aga heʼeʼaoga. ʼE tonu ia ke tou puipui ia tātou totonu pea mo tatatou fānau mai te ʼu fakaneke kovi ʼaia ʼaē ʼe hā ai ia te manatu ʼa Satana. Ko nātou ʼaē ʼe natou fakaʼaogaʼi ia te ʼu olotinatea, ʼe natou puipui ia tanatou ʼu olotinatea ke mole hū kiai ia te meʼa ʼaē ʼe kovi ʼe higoa ko te virus, heʼe feala ai ke ina maumauʼi ia te ʼu polokalama fuli ʼaē neʼe natou puke ki loto, ke ina fakahaʼele kovi ia te olotinatea, pea feala pē ke mate ai ia te olotinatea pea mo pikisia ai he tahi age ʼu olotinatea. Koia, ʼo ʼuhiga mo te ʼu “kākā” ʼa Satana, ʼe tonu koa ke fakasiʼisiʼi ifo ia tatatou nonofo tōkakaga, ʼo puipui tātou mai ai?—Efe. 6:11.

9. He koʼē ʼe tonu ke tou fakatotonu ke tou fakalogo kiā Sehova ʼi te ʼaho fuli pē?

⁹ ʼI te ʼaho fuli pē, ʼe tonu ʼi ʼihi ʼaluʼaga ke tou filifili peʼe tou fakalogo anai kiā Sehova peʼe kailoa. Ke tou maʼu ia te maʼuli, ʼe tonu ke tou fakalogo ki te ʼAtua pea mo maʼuliʼi ia tana ʼu pelesepeto faitotonu. ʼI tatatou mulimuli ki te faʼifaʼitaki ʼa Kilisito ʼi tana fakalogo ʼaē “ ʼo aʼu ki te mate,” ʼe tou fakahā ai ko tatatou tui ʼe moʼoni. ʼE fakapale anai e Sehova ia tatatou nonofo agatonu. Neʼe fakapapau fēnei e Sesu: “Ko ʼaē kā faʼa kātaki anai ʼo kaku ki te fakaʼosi, ʼe ko ia ia ʼaē kā maʼuli anai.” (Mat. 24:13) ʼE hā lelei mai, ʼe tonu ke tou maʼu ia te lototoʼa ʼaē neʼe fakahā e Sesu.—Pes. 31:24.

Ko Sesu ʼe Ko Te Faʼifaʼitaki Lahi Tokotahi ʼo Te Lototoʼa

10. Ko te ʼu faʼahiga fakaneke fea ʼe feala ke hoko mai kiā tātou, pea koteā ʼaē ʼe tonu ke tou fai kiai?

¹⁰ ʼI tatatou māʼuʼuli mo te ʼu hahaʼi ʼe natou maʼu ia te ʼu aga ʼo te mālama ʼaenī, ʼe tonu ke tou lototoʼa ke ʼaua naʼa tou mulimuli ki te ʼu taʼi aga ʼaia. ʼI te gāue, ʼi te faʼahi fakaekonomika, pea mo te lotu, ʼe tau ia te kau Kilisitiano mo te ʼu fakaneke ʼaē ʼe feala ai hanatou fakamamaʼo mai te ʼu ala faitotonu ʼa Sehova. Tokolahi ʼe natou tau mo te fakafeagai ʼo tonatou fāmili. ʼI ʼihi fenua, kua akoʼi fakamālohi age ʼosi ʼi te ʼu faleako ia te akonaki ʼaē ʼo ʼuhiga mo te evolisio, pea kua tali ʼi te mālamanei ia te akonaki ʼaē ʼe mole he ʼAtua. ʼE mole tonu ke tou fakaʼauʼauganoa mokā hoko mai he ʼu fakaneke fēia. ʼE tonu ke tou fai ni ʼu puleʼaki kiai moʼo tekeʼi ia te ʼu aga ʼaia pea mo puipui aipē ia tātou totonu. Ko te faʼifaʼitaki ʼa Sesu ʼe ina fakahā mai peʼe feafeaʼi hatatou mālo mai ai.

11. ʼE feafeaʼi hatatou maʼu ia he lototoʼa ʼe lahi age mokā tou metitāsioʼi ia te faʼifaʼitaki ʼa Sesu?

¹¹ Neʼe ʼui fēnei e Sesu ki tana ʼu tisipulo: “ ʼI te mālamanei ʼe kotou maʼu te mamahi, kae ke kotou kātaki! Kua au mālo ʼi te mālamanei.” (Soa. 16:33) Neʼe ina tauʼi tuʼumaʼu pē ia te fakaneke ʼa te mālama. Neʼe mole he temi neʼe ina tuku ai ia te mālamanei ke ina fakagata ia tana fai ʼaē tana gāue ko te fai fakamafola peʼe ke ina tuku keheʼi ia te ʼu lēkula ʼo ʼuhiga mo te tauhi moʼoni pea mo te aga ʼaē ʼe lelei; ʼe tonu mo tātou ke tou fai fēia. ʼI tana faikole, neʼe ʼui fēnei e Sesu ʼo ʼuhiga mo tana ʼu tisipulo: “ ʼE mole natou kau ʼi te mālamanei, ohagē pē ko au ʼe mole au kau ʼi te mālamanei.” (Soa. 17:16) Ko tatatou ako pea mo metitāsioʼi ia te faʼifaʼitaki ʼo te lototoʼa ʼaē neʼe tuku mai e Kilisito, ʼe tou maʼu ai ia te lototoʼa ʼaē ke mole tou kau ki te mālamanei.

Tou Ako Mai Te Lototoʼa ʼa Sesu

12-14. Kotou tuku mai he ʼu faʼifaʼitaki neʼe fakahā ai e Sesu ia tana lototoʼa.

¹² Neʼe fakahā e Sesu ia he lototoʼa lahi ʼi tana minisitelio. ʼAki te pule ʼaē neʼe ina maʼu ʼi tona ʼuhiga ʼAlo ʼo te ʼAtua, neʼe lototoʼa ia ʼo “hū . . . ki te fale lotu pea ina kapu ia nātou fuli ʼaē neʼe faifakatau pea mo nātou ʼaē ʼe totogi manu ʼi te fale lotu; pea neʼe ina holoki te ʼu laupapa ʼo te kau fetogi paʼaga, pea mo te ʼu hekaʼaga ʼo nātou ʼaē ʼe fakatau lupe.” (Mat. 21:12) ʼI te ʼomai ʼa te kau sōlia moʼo puke ʼo Sesu ʼi te pō fakaʼosi ʼo tona maʼuli ʼi te kele, neʼe lototoʼa ia ʼo puipui ia tana ʼu tisipulo, ʼo ʼui māʼana: “Kapau ʼe ko au ʼaē ʼe kotou kumi, kotou tuku age ia nātou ʼaenī ke ʼolo.” (Soa. 18:8) Ki muli age, neʼe ina ʼui age kiā Petelo ke ina toe ʼai tana heletā ki tona ʼaiʼaga, ʼo fakahā ai ʼe falala Sesu kiā Sehova, kae ʼe mole falala ia ki te ʼu mahafu.—Soa. 18:11.

¹³ Neʼe lototoʼa Sesu ʼi tana tala ia te moʼoni ʼo ʼuhiga mo te kau faiako hala mo heʼeʼofa ʼo tona temi pea mo tanatou ʼu faiakonaki hala. Neʼe ʼui fēnei e Sesu kiā nātou: “Malaʼia kiā koutou, kau sekelipa mo koutou kau Faliseo, kau mālualoi! Koteʼuhi ʼe kotou māpunuʼi te puleʼaga ʼo selō ki te hahaʼi. . . . Neʼe kotou lotonoa ki te ʼu meʼa ʼaē ʼe maʼuhiga ake ʼo te Lao, ʼaē ko te faitotonu pea mo te manavaʼofa pea mo te agatonu. . . . ʼE kotou fakamaʼa te tuʼa ʼo te ʼipu pea mo te pā, kae ʼi loto ʼe fonu ko te kaihaʼa mo te fakavalevale.” (Mat. 23:13, 23, 25) Neʼe tonu ke maʼu e te ʼu tisipulo ʼa Sesu ia he lototoʼa ʼe tatau, heʼe ko te kau takitaki ʼo te lotu hala ʼe natou toe fakatagaʼi anai mo nātou pea mo matehi ʼihi iā nātou.—Mat. 23:34; 24:9.

¹⁴ Neʼe toe lototoʼa Sesu iā muʼa ʼo te kau temonio. ʼI te tahi lakaga, neʼe fakafeagai age kiā ia te tagata neʼe ʼulusino ai ia te temonio, pea ko te temonio ʼaia neʼe mālohi ʼaupitō he neʼe mole feala ki he tahi ke ina haʼi ia te tagata mo he seini. Neʼe mole mataku Sesu, kae neʼe ina kapu ia te ʼu temonio tokolahi ʼaia, ʼaē neʼe natou puleʼi ia te tagata. (Mko. 5:1-13) Iā ʼaho nei, ʼe mole foaki e te ʼAtua ki te kau Kilisitiano ia te mālohi ke natou fai he ʼu milakulo fēia. Kae ʼi tatatou fai fakamafola pea mo faiako, ʼe tou toe kau mo tātou ki he tau fakalaumālie ʼe tou fakafeagai kiā Satana, ia ia ʼaē ʼe ina “fakakiviʼi . . . ia te ʼatamai ʼo nātou ʼaē ʼe mole tui.” (2 Ko. 4:4) Ohagē ko Sesu, ko tatatou ʼu mahafu “ ʼe mole kakano, kae ʼe mālolohi ʼuhi ko te ʼAtua moʼo holoʼi ʼo he ʼu tule,” ʼaē ʼe ko te ʼu akonaki fakalotu kua aka lelei ʼi te ʼatamai ʼo te hahaʼi kae ko he ʼu akonaki hala ia. (2 Ko. 10:4) ʼI tatatou fakaʼaogaʼi ia te ʼu mahafu fakalaumālie ʼaia, ʼe lahi te ʼu faʼahi ʼe tou ako mai te faʼifaʼitaki ʼa Sesu.

15. He koʼē neʼe lototoʼa ia Sesu?

¹⁵ Neʼe mole lototoʼa Sesu ʼuhi he neʼe mole mataku ʼi te tuʼutāmaki, kae neʼe lototoʼa he neʼe tui ia. ʼE tonu ke toe fēia mo tatatou lototoʼa. (Mko. 4:40) ʼE feafeaʼi hatatou lava maʼu ia te tui moʼoni? Ko te faʼifaʼitaki ʼa Sesu ʼe ina toe takitaki tātou. Neʼe fakahā e Sesu ia tana mālama lelei ʼaē ki te Tohi-Tapu pea mo tana falala kātoa ʼaē kiai. Neʼe mole fakaʼaogaʼi e Sesu ia he mahafu moʼoni, kae neʼe ko te heletā ʼo te laumālie ʼaē neʼe ina fakaʼaogaʼi, ia te Folafola ʼa te ʼAtua. Tuʼa lahi neʼe ina fakamoʼoni ia tana ʼu akonaki ʼaki he ʼu vaega Fakatohi-tapu. Tuʼumaʼu pē neʼe ina fakamuʼamuʼa ʼi tana ʼu palalau ia te kupuʼi palalau ʼaenī: “ ʼE tohi fēnei,” ʼi te Folafola ʼa te ʼAtua.a

16. ʼE tou lava maʼu feafeaʼi ia he tui ke lahi age?

¹⁶ Ke tou maʼu ia te tui ʼaē kā ina tauʼi ia te ʼu faigataʼaʼia fuli ʼe tonu ke hoko mai kiā tātou ʼi tatatou liliu ʼaē ko he tisipulo, ʼe tonu ke tou lau pea mo ako ia te Tohi-Tapu ʼi te ʼaho fuli pea mo kau ki te ʼu fono, ke fakahū ki totatou ʼatamai ia te ʼu moʼoni ʼaē ʼe fakatafito kiai ia tatatou tui. (Loma 10:17) ʼE tonu foki ke tou toe metitāsio, ko tona fakaʼuhiga, ke tou fakakaukauʼi loloto ia te ʼu manatu ʼaē ʼe tou ako, ke malave ki totatou loto. Kapau ʼe maʼuli tatatou tui, pea ʼe feala ke ina uga tātou ke tou lototoʼa. (Sake 2:17) Pea ʼe tonu ke tou kole ia te laumālie māʼoniʼoni heʼe ko te tui ʼe ko he kalitātē ʼe kau ki te fua ʼo te laumālie māʼoniʼoni.—Kal. 5:22.

17, 18. Neʼe fakahā feafeaʼi e te tuagaʼane kei finemui ia tana lototoʼa ʼi te faleako?

¹⁷ Ko Kitty, ia te tuagaʼane kei finemui, neʼe mahino kiā ia, ʼe lototoʼa heʼe ina maʼu ia te tui ʼe maʼuli. Talu mai tana kei veliveli, neʼe ina ʼiloʼi ʼe mole tonu ke “ufiufi ki te logo lelei” ʼi te faleako, pea neʼe loto moʼoni ke fai fakamafola ki tona ʼu kaugā ako. (Loma 1:16) ʼI te taʼu fuli, neʼe ina fakatotonu ke palalau ki ʼihi ʼo ʼuhiga mo te logo lelei, kae neʼe mole ina fakahoko he neʼe mole lototoʼa. ʼI tana lahilahi ake leva, neʼe fetogi kalasi. Neʼe ina ʼui fēnei: “ ʼI te temi ʼaenī, ʼe au fakaʼaogaʼi anai ia te ʼu faigamālie fuli.” Neʼe faikole Kitty ke ina maʼu ia te lototoʼa ʼaē neʼe maʼu e Kilisito, mo te fakasiosio tonu pea ke ina maʼu he faigamālie moʼo fakahoko ia te faʼahi ʼaia.

¹⁸ ʼI te hū ako, neʼe kole ki te kau tamaliki ako ke natou palalau ʼo ʼuhiga mo nātou. Tokolahi neʼe natou fakahā ia tanatou lotu, pea mo natou toe ʼui pē ʼe mole natou maʼuliʼi tanatou lotu. Neʼe mahino ai kiā Kitty neʼe ko te faigamālie ʼaia ʼaē neʼe faikole ke ina maʼu. ʼI te temi leva ʼaē neʼe tonu ke palalau ai, neʼe ina ʼui fēnei ʼaki he loto falala: “Ko au ko te Fakamoʼoni ʼa Sehova, pea ʼe au falala ki te Tohi-Tapu moʼo takitaki au ʼi taku tauhi ki te ʼAtua pea mo te aga ʼaē ʼe tonu ke au fai.” ʼI tana lolotoga palalau ʼaia, kae ko ʼihi kau ako neʼe hā lelei pē ʼi ʼonatou fofoga ia tanatou manatu ʼaē ʼe vale ia te kiʼi tuagaʼane. Kae neʼe fakalogo lelei ʼihi pea ki muli age neʼe natou faifehuʼi ki ai. Mo te tagata faiako pē lā, neʼe ina ʼui ko Kitty ʼe ko he faʼifaʼitaki lelei heʼe agatonu ki tana tui. Neʼe fiafia ʼaupitō ia Kitty ʼi tana tāʼofi te ako mai te faʼifaʼitaki ʼo te lototoʼa ʼa Sesu.

Tou Fakahā Ia Te Tui Pea Mo Te Lototoʼa ʼAē Neʼe Maʼu e Kilisito

19. (a) Koteā te fakaʼuhiga ʼo te maʼu ʼo te tui moʼoni? (b) ʼE feafeaʼi hatatou lava fakafiafia ia Sehova?

¹⁹ Neʼe toe mahino foki ki te ʼu ʼapositolo neʼe tonu ke natou maʼu ia te tui ke feala ai hanatou fai he ʼu gāue ʼaki he lototoʼa. Neʼe natou kole mamahi fēnei kiā Sesu: “Foaki mai kiā mātou he tui ʼe lahi ake.” (Lau ia Luka 17:5, 6.) Ko te tui moʼoni ʼe mole gata pē ki hakita tui ʼe maʼuli ia te ʼAtua. ʼE toe kau kiai ia te maʼu ʼo he ʼu felōgoi loloto mo Sehova pea mo he falala ki ai, ohagē pē ko te felōgoi ʼa he kiʼi tamasiʼi pea mo tana tamai agalelei mo ʼofa. ʼAki te takitaki ʼa te ʼAtua, neʼe tohi fēnei e Salomone: “Ê toku foha, kapau ko tou loto kua liliu ʼo poto, pea ʼe toe fiafia ai foki mo toku loto. Pea ʼe fiafia anai toku ʼu ifiifi mokā fakahā anai e tou ʼu laugutu ia te faitotonu.” (Taag. 23:15, 16) ʼO toe fēia aipē, ko tatatou lototoʼa ʼo taupau maʼu ia tatatou ʼu pelesepeto faitotonu, ʼe fakafiafia ai ia Sehova, pea ʼi tatatou ʼiloʼi ia te faʼahi ʼaia ʼe tuputupu ai anai ia tatatou lototoʼa. Koia, tou mulimuli tuʼumaʼu ki te faʼifaʼitaki ʼa Sesu, ʼo tou lototoʼa ʼo lagolago ki te faitotonu!

[Nota]

ʼE Feala Koa Hakotou Fakamahino?

• Koteā ʼaē kā tokoni mai ke tou fakalogo aipē logolā totatou ʼuhiga heʼe haohaoa?

• Koteā ʼaē ʼe fakatafito kiai ia te tui moʼoni, pea ʼe lava tokoni feafeaʼi ia te faʼahi ʼaia kiā tātou ke tou lototoʼa?

• Koteā anai ia te ʼu fua ʼo tatatou fakalogo pea mo maʼu ia te lototoʼa ʼaē neʼe maʼu e Kilisito?