Ke Lava Lelei Tokotou Maʼuli

“E ke manuia anai i ou ala, koia e ke poto ai anai.”—SOS. 1:8.

ʼE KOTOU TALI FEAFEAʼI ANAI?

Neʼe lava lelei feafeaʼi te maʼuli ʼo Salomone?

Neʼe lava lelei moʼoni feafeaʼi te maʼuli ʼo Paulo?

Koteā ʼaē ʼe tonu anai ke tou fai ke lava lelei totatou maʼuli?

1, 2. (1) Koteā te manatu ʼa te tokolahi ʼo ʼuhiga mo te lava lelei ʼo te maʼuli? (2) Koteā ʼaē ʼe tonu ke tou fai ke tou ʼiloʼi ai tatatou manatu ʼo ʼuhiga mo te lava lelei ʼo te maʼuli?

KOTEĀ te fakaʼuhiga ʼo te lava lelei ʼo he maʼuli? Kā kotou fai te fehuʼi ʼaia ki te hahaʼi, pea ʼe kehekehe te ʼu tali kā natou fai atu. Ohagē lā ko te tokolahi ʼe natou ʼui ʼe lava lelei he maʼuli ʼo he tahi mo kapau ʼe lahi tana falā, peʼe maʼu hona tuʼulaga lelei, pe neʼe lelei tana ako. Ko ʼihi ia, ʼe natou fakaʼuhiga ki he tahi ʼe felōgoi lelei mo tona fāmili, peʼe ko ʼona kaumeʼa, peʼe ko ʼona kaugā gāue. Ki ʼihi atu ʼaē ʼe natou tauhi ki te ʼAtua, ʼe natou ʼui ʼe lava lelei he maʼuli ʼo he tahi mo kapau ʼe ina maʼu hana ʼu gāue ʼi te loto kōkelekāsio, peʼe fua lelei tana gāue fai fakamafola.

² Kae koteā tona fakaʼuhiga kiā koutou? Moʼo tali kiai, ʼe lelei ke kotou tohi te higoa ʼo ni hahaʼi ʼe kotou manatu neʼe lava lelei tonatou maʼuli pea ʼe kotou leleiʼia mo kotou fakaʼapaʼapa kiā nātou. Ko te ʼu faʼahiga hahaʼi feafeaʼi koa? ʼE natou maʼu koloa koa peʼe natou ʼiloa? ʼE natou maʼu tuʼulaga koa? ʼE ʼiloga anai te meʼa ʼaē ʼi tokotou loto ʼi te ʼu tali ʼaē kā kotou fai anai. Ko te ʼu meʼa ʼaē ʼe maʼuhiga kiā koutou ʼe malave anai ki te ʼu tonu pea mo te ʼu fakatuʼutuʼu ʼaē kā kotou fai.—Luka 6:45.

3. (1) Koteā ʼaē neʼe tonu ke fai e Sosue ke lava lelei tona maʼuli? (2) Koteā ʼaē kā tou vakaʼi anai?

³ ʼE mahino ia, ko te faʼahi ʼaē ʼe maʼuhiga kiā tātou ʼe ko te manatu ʼa Sehova. ʼE hoki feala pē ke tou maʼu te maʼuli heʼegata mo kapau ʼe lava lelei totatou maʼuli ohagē ko te meʼa ʼaē ʼe loto kiai te ʼAtua. ʼI te temi ʼaē neʼe ina hinoʼi ai ia Sosue ke ina taki te kau Iselaele ki te Kele ʼo te Fakapapau, neʼe ʼui age e Sehova kiā ia ke ina lau te lao ʼi te “aho mo te pouli” pea mo fakapapau age ki ai: “E ke manuia anai i ou ala, koia e ke poto ai anai.” (Sos. 1:7, 8) Pea ʼe kotou fakamoʼoni neʼe lava lelei te maʼuli ʼo Sosue. Kae ʼe feafeaʼi kiā tātou? ʼE feafeaʼi hatatou ʼiloʼi te manatu ʼa te ʼAtua ʼo ʼuhiga mo te faʼahi ʼaia? Moʼo tali ki te ʼu fehuʼi ʼaia tou vakaʼi muʼa te maʼuli ʼo te ʼu tagata ʼe toko lua ʼi te Tohi-Tapu.

NEʼE LAVA LELEI KOA TE MAʼULI ʼO SALOMONE?

4. He koʼē neʼe lava lelei te maʼuli ʼo Salomone?

⁴ ʼI te ʼu ʼaluʼaga fuli, neʼe lava lelei ʼosi te maʼuli ʼo Salomone. Koteā tona tupuʼaga? Koteʼuhi lolotoga ni taʼu loaloaga neʼe manavasiʼi pea mo talagafua kiā Sehova, ʼo tupu ai tona tapuakinaʼi lahi e Sehova. Kotou manatuʼi te temi ʼaē neʼe fakaui ai e Sehova kiā Salomone ke ina kole age te meʼa ʼaē ʼe loto kiai, neʼe kole e Salomone te poto ke feala hana takitaki te kau Iselaele. Neʼe tali e Sehova ki tana kole ʼo ina foaki age te poto pea mo te ʼu koloa. (Lau ia 1 Hau 3:10-14.) Neʼe lahi age te poto ʼo Salomone “i te poto o te u foha fuli o te esite pea mo te poto katoa o te kau Esipito . . . , pea nee mafola tona logologona i te u puleaga fuli i ona tafatafa.” (1 Hau 4:30, 31) Neʼe toe lahi age te maʼu koloa ʼo Salomone. ʼI te taʼu fuli neʼe ina maʼu te ʼu tane ʼaulo e ʼuafulu tupu. (2 Klk. 9:13, 14) Neʼe ina laga te ʼu meʼa matalelei. Neʼe toe lelei tana felōgoi fakapolitike pea mo fakakoloa mo te ʼu fenua ʼo ʼona tafaʼaki. Neʼe lava lelei te maʼuli ʼo Salomone lolotoga te temi ʼaē neʼe agatonu ai ki te ʼAtua.—2 Klk. 9:22-24.

5. Koteā ʼaē neʼe mahino kiā Salomone ʼo ʼuhiga mo nātou ʼaē ʼe lava lelei ʼosi tonatou maʼuli?

⁵ ʼE ʼiloga ʼi te ʼu meʼa ʼaē neʼe tohi e Salomone ʼi te tohi ʼo Ekelesiasi tana maʼu te faʼahiga sio tonu ʼaē ʼo ʼuhiga mo te lava lelei ʼo te maʼuli. Neʼe mole manatu ia ko te lava lelei ʼo te maʼuli pea mo te fiafia ʼe ʼāteaina pē ia maʼa te kau maʼu koloa pea mo ʼaē ʼe maʼu tuʼulaga. Kailoa ia. Neʼe ina tohi fēnei: “Nee au iloi mai ai e mole lelei he mea ki te tagata, kae ke fakafiafia ia ia pea mo mauli fimalie; kae nee au sio foki, kapau e kai he tagata, mo inu, mo fiafia i te lelei o ana gaue fuli, ko he ofa aia e foaki e te Atua.” (Ekl. 3:12, 13) Neʼe toe mahino kiā Salomone ko te lava lelei ʼo te maʼuli ʼe ina foaki he fiafia moʼoni ki he tahi mo kapau ʼe ina taupau he ʼu felōgoi lelei mo te ʼAtua. Neʼe tala fēnei e Salomone: “Fakalogo mai ki te fakanounou o te u mea fuli aeni: Ke ke mataku ki te Atua, pea ke ke tauhi ana folafola. Ko te mea aia e tonu ke fai e te tagata fuli.”—Ekl. 12:13.

6. ʼE tokoni feafeaʼi mai te faʼifaʼitaki ʼo Salomone ke tou mahino ki te fakaʼuhiga moʼoni ʼo te lava lelei ʼo te maʼuli?

⁶ Lolotoga ni taʼu, neʼe manavasiʼi pea mo fakalogo ia Salomone ki te ʼAtua. ʼE ʼui fēnei ʼi te Tohi-Tapu neʼe ʼofa ia Salomone kiā Sehova, pea neʼe mulimuli ia ki te u meʼa fuli ʼaē neʼe fai e Tavite tana tamai. (1 Hau 3:3) ʼI te temi ʼaē neʼe ina fai ai te faʼahi ʼaia, neʼe lava lelei ʼosi tona maʼuli. Neʼe laga e Salomone te fale lotu fakaofoofo maʼa te tauhi moʼoni pea mo tohi ni tohi Fakatohi-tapu e tolu. ʼE mahino ia, ʼe mole feala anai ke tou fai te ʼu meʼa ʼaē neʼe fai e Salomone. Kae ko te faʼifaʼitaki ʼo Salomone ʼi te temi ʼaē neʼe agatonu ai ki te ʼAtua ʼe tokoni mai ke tou mahino ki te fakaʼuhiga ʼo te lava lelei moʼoni ʼo te maʼuli pea mo te meʼa ʼaē ʼe ʼaoga ke tou fai ke lava lelei totatou maʼuli. Ohagē lā, neʼe takitaki e te ʼAtua ia Salomone ke ina tohi ʼo ʼuhiga mo te kau maʼu koloa, mo te kau popoto, mo te kau logologona pea mo te kau maʼu tuʼulaga. Tokolahi ʼe natou manatu ʼe ʼaoga ke natou maʼu te ʼu meʼa fuli ʼaia ke lava lelei tonatou maʼuli. Kae neʼe ʼui e Salomone ʼe ko “te tuli o te matagi” ia te gāue kinakina ʼa ʼihi ke natou maʼu te ʼu meʼa ʼaia, peʼe ko te faiga ʼaē ki he ʼu meʼa ʼe mole feala ke maʼu ai te fīmālie moʼoni. Ko te hahaʼi “ae e ofa ki te u koloa e mole ina mau he temi ke fiafia ai i ona koloa.” Pea ʼe natou tuʼania lahi naʼa puli ʼonatou koloa. ʼE toe feala pē foki ke maʼu e ʼihi atu ʼonatou koloa.—Lau ia Ekelesiasi 2:8-11, 17; 5:10-12.

7, 8. Neʼe liliu feafeaʼi ia Salomone ʼo mole kei fakalogo ki te ʼAtua? Neʼe koteā tona fua?

⁷ ʼI te temi matuʼa ʼo Salomone, neʼe mole hoko atu tana fakalogo ʼaē kiā Sehova. ʼE ʼui fēnei ʼi te Tohi-Tapu: “I te temi matua o Salomone, nee fakamaliu leva e ona ohoana tona loto ki ni ihi ake atua; pea nee mole katoa leva tona loto [kiā Sehova], tona Atua, o hage ko te loto o Tavite, tana tamai.” Pea neʼe fai leva e Salomone “te mea ae e kovi kia mata” ʼo Sehova.—1 Hau 11:4-6.

⁸ Neʼe mole kei leleiʼia e Sehova ia Salomone pea neʼe ina tala age te fua kovi ʼo ʼana gāue. Neʼe ʼui fēnei e te ʼAua: “E au haei mooni anai te puleaga maia koe, pea e au foaki anai ia ia ki tau tagata faifekau.” (1 Hau 11:11) Logolā neʼe lava lelei te maʼuli ʼo Salomone ʼi te ʼu faʼahi kehekehe, kae ki muli age neʼe ina fakamamahiʼi te loto ʼo Sehova. Neʼe mole kei lava lelei leva te maʼuli ʼo Salomone ʼuhi ko tana mole fakahoko te meʼa ʼaē ʼe maʼuhiga ʼaupitō ʼi te maʼuli. Neʼe mole nofo agatonu kiā Sehova. ʼE tonu ke tou fai te fehuʼi ʼaenī kiā tātou takitokotahi: “ ʼE au fakaʼaogaʼi lelei anai koa te ako mai te faʼifaʼitaki ʼo te maʼuli ʼo Salomone ke lava lelei ai toku maʼuli?”

TE LAVA LELEI MOʼONI ʼO TE MAʼULI

9. Neʼe lava lelei koa te maʼuli ʼo Paulo ki te tokolahi ʼi tona temi? Kotou fakamahino.

⁹ ʼE mole tatau ʼosi te maʼuli ʼo te ʼapositolo ko Paulo pea mo te maʼuli ʼo te Hau ko Salomone. Neʼe mole maʼuli ia Paulo ʼi he fale hau pea mo kakai mo ʼiʼinu mo ʼihi atu hau. ʼI te tahi ʼu lakaga, neʼe tau ia mo te fia kai, mo te fia ʼinu, mo te mokosia pea mo te masiva. (2 Ko. 11:24-27) ʼI te temi ʼaē neʼe ina tali ai ia Sesu ko te Mesia, neʼe mole kei fakamaʼuhigaʼi ia Paulo e te tokolahi ʼi te lotu Fakasutea. Pea neʼe fehihiʼa ʼosi te kau takitaki ʼo te lotu Fakasutea kiā ia. Neʼe pilisoniʼi, neʼe huipiʼi, neʼe haha ʼaki te ʼu ʼakau, pea mo tuki makaʼi. Neʼe ʼui e Paulo ʼo ʼuhiga mo ia mo ʼona tehina Kilisitiano, neʼe lea koviʼi, neʼe fehiʼaʼinaʼi pea mo fakatagaʼi nātou. Neʼe ina hoko atu fēnei: “O kaku mai ki te aho aeni, kua matou liliu ko ni otaota o te malamanei, ko ni mea fakalialia ki te tagata fuli.”—1 Ko. 4:11-13.

10. He koʼē neʼe feala ke ʼui e ʼihi neʼe mole fakaʼaogaʼi e Paulo te ʼu faigamālie ʼaē neʼe ina maʼu?

¹⁰ Tokolahi neʼe natou ʼiloʼi te maʼuli ʼo Paulo ʼi tona temi tūpulaga, te temi ʼaē neʼe kei higoa ai ko Saulo, neʼe lahi te ʼu faigamālie neʼe tonu ke ina maʼu. ʼE mahalo pe neʼe tupu mai he fāmili maʼuhiga. Pea neʼe akoʼi e te tagata faiako ʼiloa ko Kamaliele. Ki muli age, neʼe ʼui e Paulo neʼe “fakalaka mamao i te tauhi ki te lotu fakasutea i he kaugamalie o toku taitupu.” (Kal. 1:14) Neʼe poto lelei ʼi te lea Fakahepeleo pea mo te Fakakeleka. ʼI tona ʼuhiga tagata ʼo te puleʼaga ʼo Loma, neʼe ina toe maʼu foki te tahi ʼu fealagia pea mo te ʼu fakagafua makehe. Kapau neʼe loto ia Paulo ke lava lelei tona maʼuli ʼi te temi ʼaia, ʼe mahino ia neʼe feala ke liliu ia ko he tahi ʼe koloaʼia pea mo fakaʼapaʼapa ki ai te hahaʼi. Kae neʼe ina filifili ia te tahi age maʼuli, ʼo lagi feala pe ke manatu ia tona fāmili totonu kua vale ia. Koteā tona tupuʼaga?

11. Koteā ʼaē neʼe maʼuhiga lahi kiā Paulo, pea neʼe koteā tana fakatuʼutuʼu? Koteā tona tupuʼaga?

¹¹ Neʼe ʼofa ia Paulo kiā Sehova pea mo faiga ke ina maʼu tana tapuakina. Neʼe mole loto ia ki te maʼu koloa pea mo te logologona. ʼI te temi ʼaē neʼe ina ako ai te moʼoni, neʼe kamata ai leva tana fakamaʼuhigaʼi te ʼu meʼa ʼaē neʼe mole mahino pea mo tokagaʼi e te tokolahi, ohagē lā ko te sākilifisio ʼa Kilisito, mo te gāue fai fakamafola pea mo te ʼamanaki ʼaē ki te maʼuli ʼi selō. Neʼe ʼiloʼi e Paulo ia te meʼa ʼaē neʼe ʼui e Satana ʼo ʼuhiga mo te tagata. Neʼe ʼui e Satana, ʼe feala hana fakamaliu kehe te hahaʼi fuli mai te ʼAtua. Neʼe mahino kiā Paulo, neʼe feala ke ina fai he fakamoʼoni ki te ʼuhiga kakā ʼo Satana. (Sopo 1:9-11; 2:3-5) Koia neʼe fakatuʼutuʼu ai ia Paulo ke hoko atu tana tauhi agatonu ʼaē ki te ʼAtua moʼoni tatau aipē peʼe tonu ke felāveʼi mo he ʼu mamahi. ʼE ko he fakatuʼutuʼu ia ʼe mole fia fai anai kiai he tahi ʼe loto ke lava lelei tona maʼuli ʼi te temi nei.

12. He koʼē koa ʼe tonu ke tou falala ki te ʼAtua?

¹² ʼE tatau koa ʼatatou fakatuʼutuʼu mo ʼaē ʼa Paulo? ʼE mole faigafua tuʼumaʼu te taupau ʼo tatatou agatonu. Kae kapau ʼe tou nofo agatonu kiā Sehova, pea ʼe fiafia anai ʼo ʼuhiga mo tātou pea mo ina tapuakina ia tātou. Pea ʼe ko te meʼa ʼaia ʼaē kā ina fakalava lelei anai totatou maʼuli. (Taag. 10:22) ʼE tou maʼu tapuakina anai ʼi te temi ʼaenī pea mo toe lahi age ʼi te kā haʼu. (Lau ia Maleko 10:29, 30.) Koia ʼaua naʼa tou tuku tatatou falala ki “ni koloa fakatemi,” kae ke tou falala “ki te Atua, ae e ina foaki lahi kia tatou te u mea fuli, ke tou fakafiafia ai.” Kapau ʼe tou fai feia, pea ʼe feala ke tou tui papau ʼe tou maʼu anai “te mauli mooni” ʼaē ʼe fakapapauʼi mai e te ʼAtua. (1 Tim. 6:17-19) Koia, ʼe feala nei ke tou tui papau mokā ʼosi anai ni taʼu e teau, peʼe ko ni taʼu e afe peʼe laka atu, ʼe tou manatuʼi anai pea mo fai te palalau ʼaenī: “Neʼe lava lelei ʼosi toku maʼuli!”

ʼE TUKU ʼIFEA TOKOTOU KOLOA?

13. Koteā ʼaē neʼe ʼui e Sesu ʼo ʼuhiga mo te tānaki ʼo te ʼu koloa?

¹³ Neʼe ʼui fēnei e Sesu ʼo ʼuhiga mo te ʼu koloa: “Aua naa kotou tanaki ni koloa i te kele aeni, koteuhi ko te kogamea aena e maumau ai te ugogo mo te ukaukamea, pea ko te kogamea foki aena e puuhi ai pea mo kaihaa ai te tagata kaihaa; kae kotou tanaki ni koloa i selo, koteuhi ko te kogamea aena e mole maumau ai te ugogo mo te ukaukamea, pea e mole puuhi ai mo kaihaa ai te tagata kaihaa. Koteuhi ko te kogamea ae e tuku ai tou koloa, e tuku ai foki tou loto.”—Mat. 6:19-21.

14. He koʼē ʼe mole ko he aga fakapotopoto ia te tānaki ʼo te ʼu koloa ʼi te kele?

¹⁴ Ko te ʼu “koloa i te kele” ʼo he tahi ʼe mole gata ʼaki pe te falā. ʼE toe kau kiai te ʼu meʼa ʼaē neʼe faitohi kiai ia Salomone pea mo te meʼa ʼaē ʼe fakamaʼuhigaʼi lahi e te hahaʼi, ohagē lā ko te logologona pea mo te maʼu tuʼulaga. ʼE tatau te manatu ʼa Sesu pea mo ʼaē ʼa Salomone ʼi te tohi ʼo Ekelesiasi. ʼE mole heʼegata te ʼu koloa ʼi te kele. ʼE kotou ʼiloʼi pe, ʼe feala ia ke maumauʼi peʼe pulinoa. Neʼe fai e te tagata sivi Tohi-Tapu ko F. Dale Bruner te ʼu fakamahino ʼo ʼuhiga mo te ʼu palalau ʼa Sesu ki te ʼu koloa ʼaia. Neʼe ina ʼui ko te logologona ʼe fakatemi. Ko he tahi ʼe logologona ʼi te ʼaho ʼaenī ʼe vave pe anai tona galoʼi. Ko he tahi ʼe maʼu hana ʼu tuʼuga koloa ʼi te taʼu ʼaenī ʼe feala ke pulinoa ʼi te taʼu kā haʼu. ʼUhi ko tana ʼofa ʼaē ki te hahaʼi, ʼe fakatokaga e Sesu iā nātou ʼo ʼuhiga mo te fakatemi ʼo te logologona pea mo te fakaʼofaʼofa ʼaē ʼo nātou mokā puli te faʼahi ʼaia. Neʼe toe ʼui e te tagata faitohi ʼaia, ʼi te ʼaho fuli ʼe lotomamahi te hahaʼi ʼaē neʼe natou tuku tanatou falala ki te falā pea mo te logologona. Neʼe mole loto ia Sesu ke lotomamahi fēia tana kau tisipulo. Tokolahi ʼe natou fakamoʼoni ki te ʼu manatu ʼa te tagata faitohi ʼaia. Kae ʼe ko te toko fia ʼaē ʼe natou muliʼi te ʼu palalau ʼa Sesu? ʼE kotou maʼuliʼi anai koa te tokoni ʼa Sesu?

15. Ko te faʼahiga lava lelei fea ʼo te maʼuli ʼaē ʼe tonu anai ke tou gāue mālohi kiai?

¹⁵ ʼE tala e ʼihi kau takitaki lotu ʼe mole lelei tatatou faiga mālohi ʼaē ke lava lelei totatou maʼuli. Kae ʼi henī, neʼe mole valokiʼi e Sesu te ʼu taʼi faiga mālohi ʼaia. Neʼe ina fakalotomalohiʼi tana kau tisipulo ke natou fakahagahaga ʼanatou faiga ki te tānaki ʼo “ni koloa ki selo,” te ʼu koloa ʼaē ʼe heʼegata. Ko te meʼa ʼaē ʼe tou loto tāfito anai kiai ʼe ko tatatou faiga ʼaē ke lava lelei totatou maʼuli ʼo mulimuli ki te manatu ʼa Sehova. Koia, ko te ʼu palalau ʼa Sesu ʼe ina fakamanatuʼi mai kiā tātou ʼe tonu ke tou filifili te meʼa ʼaē ʼe tonu ke tou faiga mālohi kiai. ʼI tona fakahagatonu, ʼe tou faiga tuʼumaʼu ki te ʼu meʼa ʼaē ʼe tou loto kiai, ʼaē ʼe tou fakamaʼuhigaʼi ʼi totatou loto.

16. Koteā ʼaē ʼe feala ke tou tui papau kiai?

¹⁶ Kapau ʼe tou filifili ke tou gāue mālohi moʼo fakafiafia te loto ʼo Sehova, pea ʼe tou tui papau ʼe ina foaki mai anai te ʼu meʼa fuli ʼaē ʼe ʼaoga kiā tātou. Ohagē ko te ʼapositolo ko Paulo, ʼe tou tau anai ʼi ʼihi temi mo te fia kai pea mo te fia inu. (1 Ko. 4:11) Kae ʼe tonu ke tou mulimuli ki te tokoni ʼaenī ʼa Sesu: “Aua pe naa kotou tuania, pea aua naa kotou ui: Kotea anai ka tou kai? Kotea anai ka tou inu? Kotea anai ka tou laofi? Koteuhi ko te u mea fuli aena e kumi e te kau pagani, kae e iloi e takotou Tamai i selo e natou aoga kia koutou. Kotou kumi mua te puleaga mo te faitotonu a te Atua, pea e fakalahi atu anai te u mea fuli aena kia koutou.”—Mat. 6:31-33.

KE LAVA LELEI TOKOTOU MAʼULI KI TE ʼATUA

17, 18. (1) Koteā ʼaē ʼe fakalogo kiai te lava lelei ʼo totatou maʼuli? (2) Koteā ʼaē ʼe mole fakalogo kiai te lava lelei ʼo totatou maʼuli?

¹⁷ Ko te manatu tāfito ʼaē ʼe tonu ke tou tāʼofi, ko te lava lelei ʼo totatou maʼuli ʼe mole fakalogo ki te ʼu meʼa lalahi ʼaē neʼe tou fai peʼe ko te tuʼulaga ʼaē ʼe tou maʼu ʼi te mālamanei. ʼE mole toe fakaʼuhiga ia ki he gāue neʼe tuku mai ke tou fai ʼi te loto kōkelekāsio. Neʼe tou maʼu te tapuakina ʼaia ʼuhi pē ko tatatou fakalogo pea mo tatatou agatonu ʼaē ki te ʼAtua. ʼE ʼui mai fēnei e te ʼAtua kiā tātou: “Ko te mea e kumi ki ni tagata tauhi koloa, ke natou tahi agatonu i tana gaue.” (1 Ko. 4:2) Koia ʼe tonu ai ke hoko atu tatatou nofo agatonu ki te ʼAtua. Neʼe ʼui fēnei e Sesu: “Ko ae e kataki fualoa anai o kaku ki te fakaosi e haofaki anai.” (Mat. 10:22) ʼI te temi leva ʼaē kā haofaki ai anai te kau agatonu, ʼe mahino mai leva neʼe lava lelei tonatou maʼuli.

¹⁸ ʼE fakalogo te lava lelei ʼo totatou maʼuli ki tatatou nofo agatonu ʼaē ki te ʼAtua, pea ʼe feala kiā tātou fuli hatatou nofo agatonu kiā te ia ʼi te ʼu ʼaluʼaga fuli pe ʼe hoko kiā tātou. ʼE mole fakalogo tatatou agatonu ki te lahi ʼo totatou logologona, peʼe ki te lahi ʼo te ʼu ako neʼe tou fai, peʼe ki te lahi ʼo te falā ʼaē ʼe tou maʼu. Pea ʼe mole toe fakalogo foki ki totatou poto fakatagata, mo ʼotatou faiva peʼe ko ʼotatou fealagia. ʼI te lotolotoiga ʼo te hahaʼi ʼa te ʼAtua ʼi te temi ʼo te kau ʼapositolo, neʼe maʼu koloa ʼihi kae māsisiva ʼihi. Neʼe fakatotonu e Paulo ki te kau Kilisitiano maʼu koloa ke natou “fai te lelei” pea “ke natou maukoloa ʼi te ʼu gaue lelei.” Neʼe feala kiā natou ʼaē ʼe maʼu koloa pea mo nātou ʼaē ʼe māsisiva “ke natou too te mauli mooni.” (1 Tim. 6:17-19) ʼE toe ʼaoga te tokoni ʼaia ʼi te temi nei. ʼE tou toe maʼu mo tātou fuli ia te faigamālie pea mo te maʼua ʼaia, ʼaē ke tou nofo agatonu pea mo tou “maukoloa i te u gaue lelei.” Kapau ʼe tou fai feiā, pea ʼe lava lelei anai totatou maʼuli ki totatou Tupuʼaga, pea ʼe tou fiafia anai ʼi tatatou ʼiloʼi ʼaē ʼe tou fakafiafiaʼi tona loto.—Taag. 27:11.

19. Koteā ʼaē ʼe tonu anai ke tou fai ke lava lelei totatou maʼuli?

¹⁹ ʼE moʼoni, ʼe mole feala hatatou fetogi te faʼahiga manatu ʼa te hahaʼi ʼo ʼuhiga mo tātou, kae ʼe feala hatatou fetogi tatatou faʼahiga manatu ʼo ʼuhiga mo totatou maʼuli. Peʼe tou maʼu koloa peʼe tou māsisiva, kae kapau ʼe tou gāue mālohi ki te agatonu pea ʼe lava lelei anai totatou maʼuli. ʼE tou fiafia anai ʼi te fakahoko ʼo te ʼu faiga ʼaia. ʼE tapuakina lahi anai tātou e Sehova, ʼi te temi ʼaenī pea mo te temi kā haʼu ʼo heʼegata. ʼAua naʼa galo kiā tātou te ʼu palalau ʼaenī neʼe fai e Sesu ki te kau Kilisitiano fakanofo: “Ke ke agatonu o kaku ki te mate, pea e au foaki anai kia koe te kolona o te mauli.” (Apk. 2:10) ʼE mahino ia, ʼe ko te lava lelei moʼoni leva ʼaia ʼo te maʼuli.

[Paki ʼo te pāsina 14]

ʼI te sio fakatagata, neʼe maʼu e Saulo te ʼu fealagia ʼaē ke lava lelei tona maʼuli

[Paki ʼo te pāsina 15]

Neʼe liliu te maʼuli ʼo Paulo ʼo lava lelei kiā mata ʼo te ʼAtua