Ko He Fakaʼaogaʼi Fakapotopoto ʼo Te ʼu Meʼa Gāue Tāfito
1 Ka tou fai faka mafola ʼi te ʼu ʼapi, ko totatou loto ke kamata he ʼu felogoi fakafiafia ʼaki te Tohi-Tapu pea mo te ʼu meʼa gāue tāfito ʼe tou maʼu ia ʼaho nei. (Vakaʼi ia 2 Kolonito 6:1; 2 Timoteo 2:15.) Koteā te meʼa ʼaē ʼe tuʼania ai te hahaʼi ʼo te telituale? ʼE nātou tuʼania ia koa te ʼaluʼaga faka ekonomike pea mo te haʼele kovi ʼo te maʼuli faka famili? Ko te fai ʼo he ʼu fakatokaga ʼo ʼuhiga mo te fahaʼi ʼaia ʼi takotou ʼuluaki palalau, ʼe lagi ʼe feala ai ke kamata hakotou fai palalau faka tohi-tapu.
2 ʼE feala ke koutou ʼui age:
◼ “ ʼI te temi nei, tokolahi te hahaʼi ʼe nātou faigataʼaʼia te ʼu fakaʼosi māhina. ʼI takotou manatu ʼe feala anai koa ke foaki mai e te ʼu puleʼaga fakatagata he tonu lelei ki ʼotatou ʼu faigataʼaʼia? [Fakalogo ki tana tali.] Ki toku fahaʼi, neʼe ʼau maʼu te manatu fakaloto mālohi ʼaenī...”
3 ʼE feala anai hakotou lau ake ia Pesalemo 72:12-14 pea mo hoko atu te fai palalau ʼo koutou fakaʼaogaʼi he vaega ʼi te ʼu vaega ʼe tuʼu ʼi te pasina 174, 175 ʼo te tohi Comment raisonner. Peʼe, ʼi te ʼosi lau ʼo he vaega ʼi te Tohi-Tapu, ʼe feala anai hakotou vakaʼi he palakalafe ʼi te kiʼi pepa lotu Une vie paisible dans un monde nouveau. Tokolahi te kau faka mafola, ʼo feiā pe ki te kau tūpulaga, ʼe kamata tanatou ʼu ako faka tohi-tapu ʼaki he kiʼi pepa lotu. ʼE nātou lau he palakalafe, ʼosi ʼaia pea nātou fehuʼi kia ia ʼaē ʼe palalau mo nātou pe koteā tana manatu.
4 ʼI ʼihi kolo, ʼe lagi ʼe koutou loto anai ke kamata fēnei takotou palalau:
◼ “Tokolahi te hahaʼi ʼe nātou fakaʼamu ki te maʼuhiga ʼo te maʼuli faka famili ʼi te temi ki muʼa atu. ʼI takotou manatu ʼe tonu koa ke tou fai tonu takitokotahi pe koteā te ʼu faka maʼuhiga ʼaia, peʼe lelei ke ʼi ai he fakatuʼutuʼu e tahi ʼo te maʼuli ki te hahaʼi fuli? [Tuku ke tali mai.] ʼI te manatu ʼa te tokolahi ko te maʼuliʼi ʼo te ʼu tokoni fakapotopoto ʼo te Tohi-Tapu ko tona fakaliliu ko te haʼele lelei ʼo te maʼuli faka famili.”
5 ʼO aʼu ki te faʼahi ʼaia ʼo te fai palalau, ʼe feala anai hakotou palalau ki te ʼu talanoa ʼa te ʼapositolo ko Paulo ia Kolose 3:12-14, peʼe koutou faiga ke kamata ʼi te temi pe ʼaia he ako faka tohi-tapu ʼo fakasiosio he ʼu manatu ʼe tuʼu ʼi te kiʼi pepa lotu Fiafia ʼi he maʼuli faka famili, ʼi te kupu ʼaē “Ko te ala fea koa ʼaē ʼe fua lelei anai?”
6 ʼAua naʼa koutou lotolotolua ʼo fakahā kia ia ʼaē ʼe palalau mo koutou he kaupepa ʼe ʼaoga ki te fahaʼi ʼaia, koutou fakahā te maʼuhiga ʼo te ʼu kupu ʼo te kaupepa neʼe fili.
7 Kapau neʼe koutou kamata he ako faka tohi-tapu ʼi te ʼuluaki fai palalau, koutou fakatuʼutuʼu he ʼaho moʼo hoko atu ʼo te fai palalau. ʼE feala anai takotou teuteuʼi ia ki te ʼaho ʼaia ʼo koutou ʼui age ki ai, ʼi takotou toe liliu mai, ʼe koutou fakaʼamu ke koutou fakahā age ki ai te tali ki he fehuʼi ʼe fai e te tokolahi: “He koʼe ʼe fakagafua e te ʼAtua te mamahi? ” Ko te alatike ʼaē ki lalo ʼe ina foaki mai he ʼu manatu ʼo ʼuhiga mo te faʼahiga palalau ki te faʼahi ʼaia lolotoga te ʼaʼahi.