Te Tule Leʼo—Ko Te Meʼa Kai Fakalaumālie ʼi Tona Lakaga Totonu
1 Talu mai te ʼu taʼu e 114, ko Te Tule Leʼo ʼe ina fakaloto mālohiʼi tana kau lautohi ke nātou nonofo tokaga ʼi te faʼahi fakalaumālie. Ko te Koutou ʼaʼala! ko te tahi nusipepa neʼe tā e te Sosiete, ʼe ina fakatafito tatatou tui ki te fakapapau ʼa te Tupuʼaga ʼaē ʼe ina toe fakatuʼu, ʼi totatou temi, he mālama foʼou e ʼi ai anai te fīmālie pea mo te tokalelei. Ko te ʼu nusipepa ʼaia e lua ko te ʼu meʼa gāue lelei moʼo inaina ʼo totatou ala ʼi he mālama fakapōʼuli (Is. 60:2). Ko te moʼoni ʼo te Folafola ʼa te ʼAtua ʼe mole toe fetogi ia, kae ko te mahino ʼaē kua tou maʼu ʼe toe ʼāsili age ʼi te fakaʼaogaʼi e Sehova te ʼu meʼa gāue ʼaia ʼo feiā foki ki ʼihi meʼa moʼo foaki mai kia tatou, ʼi te faʼahi fakalaumālie, te “meʼa kai ʼi tona lakaga totonu”. — Mat. 24:45; Taag. 4:18.
2 Tou fakaʼaoga leleiʼi te ʼu nusipepa: ʼE feala ke tou fakahā tatatou fakafetaʼi ki te ʼu mālama fakalaumālie ʼe tou maʼu ʼo tou fakaloto mālohiʼi fakafiafia te hahaʼi ke nātou lau Te Tule Leʼo pea mo te Koutou ʼaʼala! ʼE tou fakahā anai te apone mokā tou faka mafola ʼi te ʼu ʼapi peʼe ko te fagonogono faigamalie. Tokolahi ia nātou ʼaē ʼe nātou tautau tali te ʼu nusipepa, pea, ʼe nātou fakafiafia ʼi tona lau. Ko te hahaʼi ʼaia ʼe nātou leleiʼia anai te faka fealagia kua tuku age kia nātou ke nātou apone. ʼE feala anai ke tou toe fakahā te apone ʼi te ʼaʼahi mokā neʼe mole ina tali ʼi tatatou ʼuluaki fai palalau.
3 ʼE feala ke tou fakahā he manatu e tahi peʼe lua ʼo he nusipepa pea mo fakahā ki ai te ʼu tapuakina ʼe maʼu ʼi tana tautau tali tatatou ʼu nusipepa. He koʼe ʼe mole tou faitohi ki totatou famili ʼaē ʼe nonofo ʼi te ʼu motu peʼe ʼi te vao pea mo fakahā kia nātou ke nātou apone. ʼE fakaloto mālohiʼi tatou ke lahi tatatou tufa te ʼu nusipepa ʼaē ʼe tou maʼu.
4 ʼE feala ke tou fakahā te ʼu nusipepa ki ʼotatou ʼu kaugā gāue, ki te ʼu kaumeʼa ʼi te fale ako pea mo niʼihi ʼi totatou famili. ʼE feala foki ke tou fakahā ki te hahaʼi ʼe feʼiloʼiʼaki mo tatou ʼi tatatou gāue pea mo te faka mafola ʼi te ala.
5 Ko te ʼu nusipepa ʼe tonu ke tuku ki te kau faka mafola ʼi te temi pe ʼaē ʼe ʼaumai ai ki te kokelekasio. Ka tou maʼu he numelo foʼou, tou fakamāhani lelei mo te nusipepa ʼaia. Koteā te ʼu alatike ʼe tali tāfito ki te ʼu meʼa ʼe ʼaoga ki te hahaʼi ʼo totatou telituale? Ko te fīmālie pea mo te tokalelei ʼi te mālama? Ko te ekonomi? Ko he puleʼaga lelei? Te agaaga ʼo te fenua? Ko Te Tule Leʼo ʼe ina fakatokagaʼi fakaleleiʼi te fakasiosio ʼa te hahaʼi ki te tonu tologa pe e tahi, te Puleʼaga ʼo te ʼAtua (Tan. 2:44; Mat. 6:10). ʼE ko he meʼa ʼofa fakatalakitupua ia ʼo totatou “Faiako lahi”. — Is. 30:20.
6 Ko ʼapelili pea mo maio ko te ʼu māhina lelei moʼo foaki ʼo he temi ke lahi ki te fai faka mafola. Koteʼuhi e ko te ʼu fakaʼosi vāhaʼa kotoa e nima ʼi maio, tokolahi te kau faka mafola ʼe nātou pionie vaeluaʼi temi anai ʼi te māhina ʼaia. ʼE feala ʼi te temi nei, ke tou fai fuli he ʼu fakatuʼutuʼu takitokotahi ke feala ai hatatou fai faka mafola ʼo lahi ake lolotoga te ʼu māhina ʼaia e lua, pea mo fakaloto mālohiʼi nātou ʼe felāveʼi anai mo tatou ke nātou lau Te Tule Leʼo pea mo te Koutou ʼaʼala!