Tou Fakaʼaogaʼi Te ʼu Kaupepa Lalahi Moʼo Kumi ʼo Te Hahaʼi ʼAē ʼe Fia Logo
1 Ko te ʼu kaupepa lalahi ko te ʼu meʼa gāue mālohi. ʼAki pe he ʼu pasina e 32, ʼe feala te fakatafito e te ʼu kaupepa ʼaia te ʼu moʼoni ʼo te Tohi-Tapu pea mo holoʼi he ʼu fakakaukau pea mo he ʼu akonaki ʼe fakafeagai ki te mālama ʼo te ʼAtua — 2 Ko. 10:5.
2 ʼI te ʼosi lau ʼo te kaupepa Les Témoins de Jehovah — Unis pour faire la volonté de Dieu sur toute la terre, neʼe uga ai te tagata ke ina tohi: “Neʼe mole heʼeki ʼau sio ki he kautahi feiā. (...) ʼE ko he meʼa taulekaleka ia te maʼu ʼo he hahaʼi ʼe nātou fai fakamalotoloto te finegalo ʼo te ʼAtua ʼi te temi ʼaenī kua lahi ai te malualoi faka lotu.” Ko he tagata faifakalauʼakau ʼi Afelika neʼe ina ako te kaupepa lahi ʼaē Fiafia kite mauli heegata ite kele! Koteā te meʼa neʼe hoko kia ia? Neʼe ina liaki tana faifakalauʼakau pea neʼe ina fakamavae te ʼu fafine ʼaē neʼe nonofo mo ia kae ina taupau pe te ʼuluaki fafine ʼaē neʼe nā nonofo. ʼOsi ʼaia pea ʼohoana ia mo te fafine ʼaia.
3 Ko te kaupepa Doit-on croire à la Trinité? ʼe lelei tona fai, ʼe tonu, pea ko te meʼa gāue mālohi moʼo fakahā ʼo te moʼoni. ʼO ʼuhiga mo te faʼahi ʼaia, neʼe tohi fēnei e te Sunday Gleaner ʼi Samaika, les Antilles: “Ko te kaupepa (...) ʼe ko he meʼa mālohi ia ʼa te kau Fakamoʼoni pea ʼi te temi nei ko nātou ʼaē ʼe mole tui ki te Tahitolu — peʼe ko te ʼu ʼatua lua — ke nātou nonofo maʼu. E lahi te ʼu ʼatu talanoa ʼo te hisitolia pea mo te teolosia ʼe tuʼu ʼi te kaupepa ʼaia ʼo hā mai ai ko te akonaki ʼaē ʼo te Tahitolu ʼe mole tuʼu ia ʼi te Tohi-Tapu. (...) ʼE faigataʼa ia ki te tagata faitohi faka lotu ke ina vakaʼi peʼe fia te lahi — ʼo tatau aipe peʼe ko te lahi ʼaē ʼo te hahaʼi ʼo te ʼēkelesia — ia tanatou tali ki te ʼu fakamatala mālohi pea mo fakamahinohino lelei ʼe fakaʼaogaʼi e te kau Fakamoʼoni moʼo tali ki te manatu ʼaē ko Sesu ko te ʼAtua.”
4 Tou fakaʼaogaʼi fakalelei: Moʼo aʼu ki tona ikuʼaga, ʼe tonu ke tufa te ʼu meʼa gāue taulekaleka pea mo mālohi ʼaia ki te hahaʼi ʼaē ʼe nātou lau anai. Talu mai ai kua tou maʼu te ʼu kaupepa lalahi kehekehe, ʼo takitahi mo ia tona kupu tāfito kehekehe, ʼe tonu ke tou faiga ʼo fakahā te kaupepa ʼaē ʼe tou fakasiosio ʼe ʼaoga kia ia ʼaē ʼe fai palalau mo tatou. ʼAki te ʼiloʼi lelei ʼo ʼatatou ʼu kaupepa pea ka ʼe ʼi ai he ʼu kaupepa kehekehe ia tatou, ʼe faigafua anai hatatou fakaʼaogaʼi lelei, ʼi te gāue faka mafola, ʼi totatou ʼapi, peʼe ko he tahi atu faʼahi.
5 Ohage la, kapau ʼe tou palalau mo he tahi neʼe lotolotolua ki te akonaki ʼa te keletiate ʼo ʼuhiga mo te Tahitolu peʼe neʼe ʼui maʼana ko Sesu ko te ʼAtua, ko te kaupepa fea ʼaē ʼe koutou fakaʼaogaʼi anai? Kapau ʼe fehuʼi mai e he tahi, he koʼe ko te ʼAtua ʼofa ʼe ina fakagafua ʼi te temi nei te mamahi lahi, ko te kaupepa fea ʼaē ʼe ʼaoga ki ai? Kapau ʼe ʼui mai e he tahi ʼe ina leleiʼia he puleʼaga ʼe ʼaoga ki te hahaʼi, ko te kaupepa fea ʼaē ʼe ʼaoga ki ai?
6 ʼO mole gata ʼaki pe te mahino pe ko te kaupepa fea ʼaē ke fakaʼaogaʼi, tou faigaʼi ʼo uga he tahi ke ina fia ʼiloʼi te ʼu manatu ʼo te kaupepa. Kapau ʼe fealagia te temi, fakahā age he fakamatala peʼe ko he fakatā moʼo uga ʼo tana fia logo ke ina lau te kaupepa. Peʼe koutou lau he palakalafe e tahi peʼe lua mo ia, koutou kumi te ʼu vaega ʼaē ʼe tuʼu ʼi ai, pea fai palalau ki te ʼu manatu. E lahi te ʼu ako faka tohi-tapu neʼe kamata feiā.
7 Ko ʼatatou ʼu kaupepa ʼe nātou foaki he ʼu tali faka tohi-tapu pea mo te ʼamanaki kia nātou ʼaē ʼe toʼetoʼe pea mo te lotomamahi ʼuhi ko te ʼu meʼa fakalialia ʼe hoko ʼi te mālama ʼaenī (Vakaʼi ia Esekiele 9:4). Ko te hahaʼi ʼaē ʼe hage ko he ʼu ōvi ʼe nātou tali anai te logo ʼaia ʼaki te ʼu meʼa ʼe tuʼu ʼi te ʼu kaupepa. Ko totatou pilivilesio ko te fakaʼaogaʼi lelei ʼo te ʼu kaupepa lalahi ʼi te ʼu faʼahi fuli ʼo totatou minisitelio moʼo kumi ʼo te hahaʼi ʼaē ʼe fia logo.