Te Tule Leʼo Pea Mo Te Réveillez-vous!—Ko He ʼu Nusipepa Ki Totatou Temi Maʼuhiga!
1 ʼE lolotoga hoko ʼi te temi nei te ʼu meʼa ʼe nātou fakamaveuveu te malamanei, ko te fakahoko ʼo te lea faka polofeta ʼo te Tohi-Tapu! Ka tou fakatokagaʼi te ʼu meʼa ʼaē ʼe hoko ʼi ʼotatou tafa ʼi te malamanei pea ʼo toe feiā aipe mo te ʼu meʼa ʼaē ʼe hoko ʼi te loto kautahi faka teokalatike, ʼe tou mahino katoa ai ki te maʼuhiga ʼaē ke tou faka mafola “te logo lelei” ʼo te Puleʼaga. (Maleko 13:10) Ko te meʼa ʼaia ʼe ina fakamahino mai, ʼe tonu ke tou gāue mālohi lolotoga te māhina ʼo ʼApelili.
2 Ko te maʼuhiga ʼo tatatou logo ʼe fakahā lelei ʼi te gāue makehe ʼaē ka tou fai anai ʼi te māhina ʼaenī. ʼE tou fakatalitali ʼaki te holi mālohi ki te fakahā ʼo te ʼu Logo ʼo Te Puleʼaga ʼaē ka tou tufa anai lolotoga te ʼu māhina ʼo ʼApelili pea mo Maio. Moʼo fakatupu ʼo tatatou fia kau mālohi ki te gāue ʼaia ʼo feiā mo te taupau ʼo te fia logo ʼi tatatou telituale, ʼe maʼu anai te ʼu alatike ʼaoga ki te temi ʼaia ʼi Te Tule Leʼo pea mo te Réveillez-vous! ʼe nātou fakahā lelei te faka ʼuhiga faka polofeta ʼo te ʼu meʼa fakatupu maveuveu ʼaē ʼe hoko ʼi te malamanei. E feafeaʼi hatatou lava teuteuʼi he faʼahiga palalau ʼe ina lagaʼi anai te fia logo ʼi te ʼu nusipepa?
3 ʼE mahino ia ʼe tou lava fai anai te ʼu palalau lelei ʼaki tatatou mulimuli ki te fakatuʼutuʼu maʼuhiga ʼaenī: (1) Koutou fili he alatike ʼi he nusipepa ʼe koutou manatu ʼe fia fai anai kiai te hahaʼi ʼo takotou telituale. (2) Koutou fili he palalau peʼe ko he vaega faka Tohi-Tapu ʼi te alatike ʼaia ʼe koutou tui ʼe ina uga anai te fia logo ʼo ia ʼaē ʼe koutou felogoi mo ia. (3) Koutou teuteuʼi he kiʼi palalau nounou ʼe maʼu ai he fakamālo, mo he fehuʼi peʼe ko he fakamatala ʼe ina fakaʼiloga lelei he manatu faka Tohi-Tapu ʼaoga, pea mo he fakaafe fakamalotoloto ke ina tali te apone. ʼE koutou fakatokagaʼi ai, ʼe faigafua te faʼahi ʼaia. E lagi feala ke koutou fakatahi mo he tahi kaugā fagona ʼe kaugā gāue mo koutou ʼi te minisitelio pea mo koutou teuteuʼi he faʼahiga palalau.
4 Mai tona ʼaluʼaga ʼaē ko te “Réveillez-vous!” ʼo te ʼaho 22 ʼo ʼApelili ʼe ina lagaʼi te fehuʼi ʼaenī, “Vivons-nous les derniers jours?” (ʼE tou maʼuʼuli koa ʼi te ʼu ʼaho fakamuli?), ʼe feala ke koutou vakaʼi te manatu ʼaia ʼi te kupu “Derniers jours” (te ʼu ʼaho fakamuli) ʼi te pasina 11 ʼo te tohi “Comment raisonner.” E lagi koutou kamata fēnei takotou fai palalau:
◼ “ ʼE mātou ʼaʼahi koutou ke tou palalau ki te faka ʼuhiga ʼo te ʼu maveuveu ʼaē ʼe hoko ʼi ʼotatou tafa. Koutou fakatokagaʼi ʼe ʼui fēnei e te alatike ʼaenī . . .”
5 ʼE lagaʼi e “Te Tule Leʼo” ʼo te ʼaho 1 ʼo ʼApelili te fehuʼi ʼaenī: “Te Lotu—ʼE Tapu Koa Te Palalau Kiai?” ʼI tatatou palalau ki te apone ʼe feala ke koutou ʼui fēnei:
◼ “ ʼE tau ʼui ko te lotu ʼe mole ko he meʼa ʼe tonu ke tou palalau kiai koteʼuhi ʼe lahi fau te ʼu fihifihia ʼe maʼu ai. Koteā takotou manatu ʼo ʼuhiga mo te faʼahi ʼaia? Pea koutou palalau age ai leva ki te alatike.
6 ʼE feala pe ke koutou fakaʼaogaʼi “Te Tule Leʼo” ʼo te ʼaho 15 ʼo ʼApelili, te alatike “ ʼE Feala Koa Ke Maʼu Te Moʼoni ʼo ʼUhiga Mo Te Lotu?” ʼE feala pe ke tali lelei koutou mokā koutou fai te ʼu ʼuluaki palalau ʼaenī:
◼ “Mai tona ʼaluʼaga ʼaē kua lahi te ʼu lotu ʼi te temi nei, ko ʼihi hahaʼi ʼe nātou fai te fehuʼi ʼaē peʼe feala koa ke maʼu te moʼoni ʼo ʼuhiga mo te lotu. ʼE fakahā e te alatike ʼaenī te ala ʼaē ʼe feala kia koutou pea mo ʼau ʼaenī ke tou maʼu he tali ʼe feʼauga lelei mo te fehuʼi ʼaia. . . .”
7 ʼI muʼa ʼo hakotou ʼolo ki te gāue faka mafola, he koʼe koa ʼe mole koutou akoako takotou faʼahiga palalau mo he tahi kaugā fagona ke koutou fakamāmāhani? ʼE mahino ia ʼe feala ai hakotou fefakahāʼaki he ʼu manatu ʼaoga ʼe ina fakatuputupu anai te lelei ʼo takotou fai faka mafola pea ʼe lahi age anai takotou falala.
8 ʼI te fakaōvi ki te fakaʼosi ʼo te tuʼu ʼaenī, tou fakaʼamu ke tou fakatuputupu tatatou ʼu faiga moʼo tokoni ki te hahaʼi faitotonu ke feholaki mai ia Papiloni Lahi. (Fkhā. 18:4) ʼE ʼi ai te tokoni lahi ʼo Te Tule Leʼo pea mo te Réveillez-vous! ʼi te gāue ʼaē ʼe mole toe hoko anai ʼi he tahi temi. ʼE tou loto fakafetaʼi ki te foaki mai e Sehova te ʼu meʼa gāue lelei ʼaia ke tou fakaʼaogaʼi!