ʼE Foaki e Sehova Te Mālohi
1 ʼUhi ko tatou ko te hahaʼi ʼa Sehova, neʼe tuku mai kia tatou te gāue ʼaē ko te faka mafola ʼo te logo lelei ʼaki tatatou taupau maʼu ʼo tatatou aga ke “lelei ʼi te lotolotoiga ʼo te ʼu puleʼaga.” (1 Pe. 2:12; Mat. 24:14) ʼUhi ko te ʼu temi faigataʼa ʼaenī ʼo feiā aipe ki ʼotatou ʼu vaivaiʼaga, ʼe mole feala ke tou fakahoko te gāue ʼaia ʼaki totatou mālohi. (2 Tim. 3:1-5) ʼE ko he meʼa fakafiafia tatatou falala ki te tokoni ʼa Sehova!
2 Neʼe kātakiʼi e te ʼapositolo ko Paulo te ʼu faigataʼaʼia lahi ʼaupito. (2 Ko. 11:23-27) Neʼe feafeaʼi tana tauʼi te ʼu faigataʼaʼia ʼaia pea mo fakaʼosi te gāue ʼaē neʼe tuku age ke ina fai? Neʼe foaki age e Sehova “te mālohi ʼaē ʼe laka age ʼi te mālohi māhani.” (2 Ko. 4:7) Neʼe mahino Paulo ki te tokoni fakaʼatua ʼaia ʼi tana tohi fēnei: “ ʼE ʼau maʼu te mālohi ʼi te ʼu meʼa fuli ʼaki ia ia ʼaē ʼe ina foaki mai te mālohi.” (Filp. 4:13) ʼE feiā pe anai te tokoni ʼa Sehova kia tatou. E feafeaʼi koa hatatou maʼu te tokoni ʼaia?
3 ʼAki Hatatou Faikole Tuʼumaʼu: Neʼe fakaloto mālohiʼi tatou e Sesu ke tou ‘haga kole, ke tou haga kumi, pea ke tou haga fisifisi,’ pea ʼaua naʼa tou fiu ʼi te fai ʼo te faʼahi ʼaia. (Luka 11:5-10) Ko tatatou faikole tuʼumaʼu ʼe tou fakahā ai kia Sehova te loloto ʼo takita tokaga ki tana ʼu meʼa, te mālohi ʼo tatatou holi, pea mo te fakamalotoloto ʼo te ʼu meʼa ʼaē ʼe uga ai tatou. (Pes. 55:17; 88:1, 13; Lom. 1:9-11) Neʼe fakahā e Paulo te maʼuhiga ʼo te faikole tuʼumaʼu ʼi tana uga tatou ke tou “faikole tuʼumaʼu.” (1 Tes. 5:17) Ko te faikole ʼe ko te ʼuluaki meʼa tāfito ʼaia ʼe feala ai ke tou maʼu te tokoni ʼa Sehova.
4 ʼAki Hatatou Mulimuli Ki Te Takitaki Faka Teokalatike: Ko te kupu “Teokalatike” ʼe faka ʼuhiga ki te “takitaki ʼe fai e te ʼAtua,” ʼaē ʼe ko te ʼAtua ʼofa. ʼE tou maʼu te fua lelei ʼo tana takitaki ʼaki tatatou tali tana pule pea mo tou mulimuli ki tana ʼu fakatotonu ʼi te ʼu puleʼaki ʼaē ʼe tou fai, tatau aipe peʼe ko he ʼu puleʼaki maʼuhiga peʼe mole faʼa maʼuhiga. Ko “te tagata kaugana agatonu mo poto” ʼe ina fakafofoga te takitaki faka teokalatike ʼaē ʼi te kele. (Mat. 24:45-47) Kapau ʼe tou fia maʼu te tapuakina ʼa Sehova, ʼe maʼuhiga ke tou gāue tahi mo te kautahi ʼaē ʼe fakaʼaogaʼi e te “kaugana.” (Vakaʼi ia Hepeleo 13:17.) ʼE fakapale anai e Sehova tatatou agatonu ʼaē kia te ia pea mo tatatou lotolelei ʼo fakalogo ki tana ʼu lao ʼaki hana tuku mai te mālohi ʼaē ʼe ʼaoga kia tatou ʼi te temi totonu.—Hep. 4:16.
5 ʼAki Tatatou Fakaōvi Ki ʼOtatou ʼu Tēhina: Ko te ʼofa ʼe ko te fakaʼiloga ʼo te kau tisipulo ʼa Sesu. (Soane 13:34, 35) ʼAki te kehekehe ʼo totatou ʼu ʼuhigaʼi tagata, ʼe feala ke hoko he ʼu tokakovi ia tatou. ʼE ʼaoga ke tou maʼu te manavaʼofa, ke tou fefakamolemoleʼaki. (Ef. 4:32) Ko te faʼahi ʼaia ʼe ina faka fealagia ai kia tatou ke tou fakaōvi ki ʼotatou ʼu tēhina ʼi te tui pea ʼe feala hatatou lotomālohi ʼi tanatou kātakiʼi te ʼu fihifihia ʼaē ʼe tau mo nātou. ʼI tatatou “ ʼiloʼi ko te ʼu mamahi ʼaia ʼe hoko ki te famili katoa ʼo [totatou] ʼu tēhina ʼi te malamanei,” ʼe tou maʼu te mālohi ʼaē ʼe haʼu mai te ʼAtua moʼo tauʼi ʼo te ʼu taʼi faigataʼaʼia ʼaia.—1 Pe. 5:9.
6 ʼAki Hatatou Taupau Maʼu He Polokalama ʼe Tou Māhani Kiai ʼo ʼUhiga Mo Te Ako Takitokotahi: Ko te fakaloto mālohiʼi ʼo totatou ʼatamai pea mo totatou loto ʼi te faʼahi fakalaumālie ʼe feala ai hatatou tauʼi te ʼohofi ʼa Satana. (1 Pe. 5:8) Ko he polokalama ʼe tou māhani kiai ʼo ʼuhiga mo te ako takitokotahi ʼe fakatuputupu ai anai tatatou maʼu ia te ʼatamai mālama. ʼE feala ke tou fakaʼaogaʼi te ʼatamai mālama ʼaia moʼo tauʼi ʼo te ʼu fihifihia ʼi te ʼaho fuli. Neʼe fakahā e Paulo ko te “ ʼatamai mālama totonu” ʼe ko he koga tāfito ia ke tou maʼu ai te maʼuli. (1 Tim. 2:3, 4) ʼE maʼuhiga ke tou toʼo tuʼumaʼu te meʼa kai fakalaumālie.
7 ʼAki te kokelekasio faka Kilisitiano ʼe feala ke tou maʼu ai te ʼu fakatuʼutuʼu fuli ʼe ʼaoga moʼo tokoni kia tatou ke tou nonofo mālohi. Ko tatatou lagolago mo totatou loto katoa ki te ʼu gāue ʼo te kokelekasio ʼe fakamoʼoni ai anai ʼe tou “haʼele anai pea ʼe mole tou vaivai anai.”—Is. 40:29-31.