Tou Teuteu Pea Ke Tou Fiafia ʼi Te ʼu Fono ʼo Te Kokelekasio
1 ʼI totatou ʼuhiga famili fakatautehina, ʼe tou fakapotopoto ʼo tou fakatahitahi tuʼumaʼu ki tatatou ʼu fono ʼaē ʼe fai ʼi te vāhaʼa fuli. (1 Tim. 4:15, 16) ʼE lava feafeaʼi hatatou fiafia pea mo tou maʼu ai he ʼu tapuakina lahi mai te ʼu fono ʼaia?
2 ʼE tonu ke tou fakatuʼutuʼu he temi moʼo teuteuʼi tuʼumaʼu ʼo te ʼu fono. Ko ʼihi e lagi feala ke lahi age tonatou temi ʼaē ʼe nātou fakaʼaogaʼi moʼo teuteuʼi ʼo te ʼu fono ʼi ʼihi age. Kae, tatau aipe peʼe tou maʼumaʼua, ʼe ko he aga fakapotopoto hatatou maʼu he temi moʼo teuteuʼi ʼo te ʼu fono. Ko te teuteuʼi faka famili ʼo te ʼu fono ʼe ko he meʼa ʼe lelei ʼaupito.—Ef. 5:15, 16.
3 Ki Te Ako ʼo Te Minisitelio Faka Teokalatike: Tou faiga ke tou lau te polokalama ʼo ʼuhiga mo te lau ʼo te Tohi-Tapu ʼi te vāhaʼa fuli. (Sos. 1:8) Tou vakaʼi fakalelei te ʼu akonaki ʼaē ka tou talanoa kiai, pea ke tou ʼaumai te ʼu tohi ʼaē ʼe ʼaoga moʼo mulimuli ki te ʼu akonaki ʼe fai e te ʼu tēhina. Tou fakakaukauʼi peʼe lava feafeaʼi hatatou fakaʼaogaʼi te ʼu puani ʼo te ʼu akonaki ʼi totatou minisitelio.
4 Ki Te Fono Gāue: Tou lau te polokalama ʼaē ʼe tuʼu ʼi Te Minisitelio ʼo Te Puleʼaga. Tou lau te ʼu alatike ʼaē ka tou talanoa anai kiai. Kapau ko te alatike ʼe fakatafito ki Te Tule Leʼo peʼe ko he tahi age tohi, tou kumi te alatike ʼaia pea ke tou lau. Kapau ʼe ʼi ai he ʼu faʼifaʼitaki ʼo ʼuhiga mo te gāue fai faka mafola, tou vakaʼi fakatomuʼa te ʼu faʼifaʼitaki ʼaia, ke feala ai hatatou teuteu ke tou fakaʼaogaʼi te ʼu faʼifaʼitaki ʼaia ʼi totatou minisitelio.
5 Ki Te Ako ʼo Te Tule Leʼo: Tou lau fakatomuʼa te alatike ʼaē ka tou vakaʼi, pea tou fakaʼiloga te ʼu tali ʼo te ʼu fehuʼi. Ko te kumi ʼo te ʼu vaega faka Tohi-Tapu ʼaē ʼe tuʼu ʼi ai, ʼe feala anai ke tokoni kia tatou ke tou mahino lelei ki te alatike. Ko te metitasioʼi peʼe feafeaʼi te ʼalutahi ʼo te alatike ʼaia mo te ʼu meʼa ʼaē kua tou ʼiloʼi, ʼe ina fakaʼāsili anai te lelei ʼo tatatou ʼatamai mālama. Tou fakatuʼutuʼu ke tou kau ki te fono ʼo tou teuteuʼi he ʼu tali fakanounou ʼi he palakalafe e tahi peʼe lua. Ko te meʼa ʼaia ʼe ko he faʼahi maʼuhiga moʼo fakahā “tatatou ʼamanaki ia muʼa ʼo te hahaʼi.”—Hep. 10:23.
6 Ki Te Ako Tohi ʼo Te Kokelekasio: ʼUluaki, tou vakaʼi te alatike; te kupu tāfito pea mo te ʼu kupu ʼe hoa atu kiai. Pea, ʼi te lolotoga ʼo tatatou lau, tou tohi te ʼu manatu tāfito. Tou vakaʼi te ʼu vaega faka Tohi-Tapu. Tou faiga ke tou tali ki te ʼu fehuʼi ʼaki ʼatatou ʼu faʼahiga palalau māhani. Kapau neʼe tou teuteuʼi te alatike, tou faiga ke tou fakamaʼumaʼu ʼi totatou ʼatamai. Tou faigaʼi ke tou manatuʼi te ʼu puani tāfito pea mo te ʼu faʼahiga manatu ʼaē ʼe tonu ke fakakaukauʼi.—2 Tim. 2:15.
7 Tou Kau Ki Te ʼu Fono: Ke feala hatatou kau ki te ʼu fono katoa, ʼe maʼuhiga ke tou ʼōmai tautonu kiai, ke feala hatatou kau ki te kole ʼi te kamata, ʼaē ʼe kole ai te laumālie ʼo Sehova. Tahi ʼaē meʼa, ʼe tou kau ki te ʼu katiko fakaloto fīmālie ʼo te Puleʼaga. Kapau ʼe mole hatatou ʼu tamaliki liliki peʼe ko he tahi tupuʼaga ke tou heheka ʼi muli ʼo te fale fono, ʼe lagi lelei anai ke tou ʼolo ʼo heka ʼi muʼa, ke mole tou fakatupu hohaʼa kia nātou ʼaē ʼe kau ki te fono pea ʼe tou tokakaga fakalelei anai ki te fono. Ko te ʼu mātuʼa ʼaē ʼe ʼi ai tanatou ʼu tamaliki liliki, ʼe feala ke nātou ʼolo ʼo heheka ʼi muli, ke ʼaua naʼa fakatupu hohaʼa kia nātou ʼaē ʼe kau ki te fono.
8 Tou kumi te ʼu vaega faka Tohi-Tapu ʼaē ʼe fakaʼaogaʼi ʼi te ʼu akonaki. Ko te meʼa ʼaia ʼe tokoni anai kia tatou ke tou manatuʼi te ʼu meʼa ʼaē ʼe tou logo kiai. Tou palalau ki totatou famili pea mo totatou ʼu kaumeʼa ʼo ʼuhiga mo te ʼu meʼa ʼaē ʼe tou ako, ke feala hatatou fakamaʼumaʼu te ʼu faʼahi ʼaia ʼi totatou ʼatamai. Kapau ʼe tou maʼuliʼi te ʼu manatu ʼaē ʼe tou vakaʼi ʼi te ʼu fono, ʼe liliu anai te ʼu fono ʼo maʼuhiga ʼaupito kia tatou, pea ʼe mahino papau ia ʼe nātou “uga [anai tatou] ki te ʼofa pea mo te ʼu gāue matalelei.”—Hep. 10:24, 25.