Tou Kumi Te Hahaʼi ʼAē ʼe Nātou Tali Lelei
1 ʼE tou fakatuʼutuʼu ʼi te gāue fai faka mafola ke tou maʼu te hahaʼi ʼaē “ ʼe nātou tali lelei te maʼuli heʼegata.” (Gāue 13:48) Ko te tufa ʼo te ʼu nusipepa ko Te Tule Leʼo pea mo te Réveillez-vous! ʼe ko he faʼahi lelei moʼo fakahoko ʼo te faʼahi ʼaia, ʼaki ʼatatou ʼu nusipepa ʼe feala ai ke ʼiloʼi e te hahaʼi te ʼamanaki ʼo ʼuhiga mo te Puleʼaga. ʼE tou fai anai te ʼu apone pea mo tou fakahā te maʼuhiga ʼo te ʼu nusipepa lolotoga te māhina ʼo ʼApelili. ʼE tou falala, ko te hahaʼi ʼaē ʼe fia logo ki te moʼoni, ʼe feala ke tou kamata he ʼu ako Tohi-Tapu mo nātou ʼaki te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Koʼeni te ʼu tokoni ʼe ʼaoga anai kia koutou:
2 ʼI takotou fakaʼaogaʼi “Te Tule Leʼo,” ʼo te ʼaho 1 ʼo ʼApelili ʼe feala ke koutou fakahā age te alatike ʼaē “Koutou Fakavikiviki Ki Te Hau ʼo Te Heʼegata!,” ʼaē ʼe ina fakatokagaʼi te akonaki ki te kaugamālie ʼaē neʼe fai ʼi te fakatahi faka tisitilike ʼi te taʼu kua hili, pea mo koutou ʼui age:
◼ “Tokolahi te hahaʼi neʼe palalau mo mātou ʼe nātou tui ki te ʼAtua. Ko ʼihi ʼe nātou manatu ʼe faigataʼa te tui kia te ia. Koteā tau manatu? [Tuku ke fai atu hana tali.] ʼE lahi te ʼu meʼa ʼe nātou fakamoʼoni ʼe ʼi ai te ʼAtua. [Lau ia Pesalemo 104:24.] Ka tou sio ki he foʼi meʼa fai paki peʼe ko he olotinatea, ʼe tou fakamoʼoni ai ko te ʼu meʼa ʼaia neʼe faʼu e he tagata poto. ʼE tonu koa la te ʼui ʼaē ko te ʼu meʼa ʼaē ʼe faigataʼa ʼaupito age tona faʼu, ohage ko te kele pea mo te tagata, neʼe ko he ʼu meʼa neʼe tupu fakafokifā?” Koutou fakaʼaogaʼi he palakalafe ʼi te alatike, ʼo koutou fakahā pe koʼe ʼe tonu ke tou tui ki te ʼAtua. Koutou fakahā age te apone.
3 ʼI te alatike ʼo “Te Tule Leʼo” ʼo te ʼaho 15 ʼo ʼApelili, ko tona kupu tāfito ʼaenī “He Koʼe ʼe Maʼu e Te Tauhi Moʼoni Te Tapuakina ʼa Te ʼAtua?” ʼI muʼa ʼo takotou fakahā te alatike, ʼe feala ke koutou fehuʼi age:
◼ “ ʼAki te ʼu lotu ʼe lauʼi teau ʼi te mālama, ʼi tau manatu ʼe tali fuli koa te ʼu lotu ʼaia e te ʼAtua? [Tuku ke fakahā atu tana manatu.] Neʼe fakakikite e Sesu logope la te ʼui ʼa te tokolahi ʼe nātou lotu, kae ko nātou ʼaē ʼe mole nātou fai te finegalo ʼo te ʼAtua ʼe fakaʼauha anai nātou. [Lau ia Mateo 7:21-23.] ʼE maʼuhiga ke tou ʼiloʼi te lotu moʼoni ʼaē neʼe akoʼi mai e Sesu.” Koutou toʼo te alatike “Koteā Te ʼu Fua ʼAē ʼe Tonu Ke Maʼu e Te Lotu Moʼoni?,” ʼaē ʼe kamata ʼi te pasina 16, pea koutou palalau ki he faʼifaʼitaki ʼe ina fakamahino te puani ʼaia.
4 Mokā fia lau e he tahi tatatou ʼu nusipepa ʼi te lea Fakafalani, ʼe feala ke koutou fakatokagaʼi ia ia ki te alatike ʼo te “Réveillez-vous!” ʼo te ʼaho 22 ʼo ʼApelili!, ko tona kupu tāfito “Quand les guerres auront disparu,” ʼo koutou ʼui age:
◼ “ ʼI te sēkulō ʼaenī neʼe hoko te ʼu tau ʼe lauʼi teau, ʼo kau kiai te ʼu tau faka malamanei e lua. Kae ko te kau takitaki fuli ʼo te mālama ʼe nātou ʼui ʼe nātou loto ki te tokalelei. ʼE ʼau ʼiloʼi ʼe loto te hahaʼi fuli ki te meʼa ʼaia. Kapau ʼe loto te hahaʼi fuli ki te tokalelei, he koʼe koa ʼe mole feala hanatou fakahoko te faʼahi ʼaia? [Tuku ke fai mai hana tali.] ʼI tau manatu koteā koa la te meʼa ʼaē ʼe ʼaoga ki te kele, ke ina maʼu ai te tokalelei moʼoni?” ʼI tana ʼosi fakahā mai tana manatu, tou fuli age ki te pasina 8 pea mo te 9 pea tou lau te ʼu vaega faka Tohi-Tapu ohage ko Pesalemo 46:8, 9. Tou fakaʼaogaʼi te ʼu paki pea mo te ʼu vaega ʼaē ʼe tuʼu ʼi ai, ʼaē ʼe fakahā ai peʼe feafeaʼi anai te fakatuʼu e te Puleʼaga ʼo te ʼAtua ia te tokalelei ʼi te malamanei katoa ʼo talu ai. Pea tou fehuʼi age peʼe ina fia lau te nusipepa, pea tou fakatuʼutuʼu ke tou toe liliu ʼo ʼaʼahi ia ia.
5 Kapau ʼe koutou fakatokagaʼi ko te tokolahi ʼe nātou ʼui ʼe nātou maʼumaʼua, ʼe feala ke koutou ʼui age:
◼ “ ʼE mātou fia tokoni ki te hahaʼi ʼaē ʼe maʼumaʼua pea ʼe mole maʼu honatou temi, heʼe mātou fia palalau mo nātou ʼo ʼuhiga mo te manatu fakalaumālie ʼe ʼaoga ki tonatou maʼuli. Ko tamatou ʼu nusipepa, ko Te Tule Leʼo pea mo te Réveillez-vous!, neʼe fakatuʼutuʼu moʼo foaki ʼo he ʼu manatu ʼe totonu ʼo ʼuhiga mo te ʼu fehuʼi maʼuhiga ʼaē ʼe koutou fai ʼo ʼuhiga mo koutou pea mo tokotou famili. ʼE ʼau fia tuku atu te ʼu nusipepa ʼaenī ke ke lau.”
ʼE mahino papau ia ko te hahaʼi ʼaē ʼe felāveʼi mo tatou ʼe nātou maʼu anai te ʼu fua lelei ʼi tanatou lau Te Tule Leʼo pea mo te Réveillez-vous!, ʼaē ʼe nā foaki mai “te logo lelei ʼo ʼuhiga mo he meʼa ʼe lelei age.”—Is. 52:7.