Koutou Palalau Ki Te Moʼoni Ki Tokotou ʼu Vāhaʼa Fale
1 Koʼeni te fakatotonu ʼi te ʼu fakatotonu lahi ʼaē ʼe lua: “ ʼE tonu ke ke ʼofa ki tou kāiga ohage pe ko koe totonu.” (Mat. 22:39) Ko te taʼi ʼofa ʼaia ʼe ina uga fakavilivili tatou ke tou vaevae mo ʼotatou vāhaʼa fale te meʼa lelei ʼaē ʼe tou maʼu—te moʼoni ʼaē ʼe tou maʼu ʼi te Folafola ʼa te ʼAtua. Mai tona ʼaluʼaga ʼaē ko Te Tule Leʼo pea mo te Réveillez-vous! ko te ʼu nusipepa ʼe nā faka maʼuhigaʼi te logo ʼo ʼuhiga mo te moʼoni ʼo te Tohi-Tapu, ko te tufa ʼo te ʼu nusipepa ʼaia lolotoga te māhina ʼo Maio, ʼe ko he faʼahi ʼe feala ai hatatou ‘palalau ki te moʼoni ki ʼotatou ʼu vāhaʼa fale.’—Ef. 4:25.
2 Ki te hahaʼi ʼaē ʼe nātou leleiʼia tāfito te lau ʼo te ʼu nusipepa Fakafalani, ʼe feala ke koutou fakahā age te “Réveillez-vous!” ʼo te ʼaho 22 ʼo ʼApelili. ʼE feala ke kamata takotou palalau ʼaki te fehuʼi ʼaenī:
◼ “Koteā koa tau manatu ʼo ʼuhiga mo he mālama ʼe mole toe ʼi ai anai te tau? [Tuku ke fai mai hana tali.] Kua ke ʼiloʼi koa la ko te ʼu lotu ʼo te mālama ʼaē ʼe nātou uga te hahaʼi ki te tau pea mo te fai fakapō? [Tuku ke fai mai hana tali.] Kae, ʼe feala ke ke fakatokagaʼi te meʼa ʼaē ʼe ʼui mai e te Tohi-Tapu ʼo ʼuhiga mo te meʼa ʼaē ka fai anai e te hahaʼi ʼaē ʼe tauhi moʼoni ki te ʼAtua.” Lau ia Isaia 2:2-4 ʼe tuʼu ʼi te kamataʼaga ʼo te pasina 4 ʼo te nusipepa, pea tou lau te ʼuluaki palakalafe ʼo te kupu tāfito “Un appel aux amis de la paix” ʼi te pasina 10. ʼOsi ʼaia, pea koutou fehuʼi age: “ ʼE ke fia ʼiloʼi koa peʼe feafeaʼi anai te fai e te ʼAtua te faʼahi ʼaia? Ko te tali ki te fehuʼi ʼaia ʼe tuʼu ʼi te nusipepa ʼaenī, pea ʼe ʼau tuku atu ke ke lau. Ko tona totogi fakaʼofa ko te falā 50.”
3 Mokā ʼe koutou tuku “Te Tule Leʼo” ʼo te ʼaho 15 ʼo Maio, koutou faigaʼi ke koutou fakaʼaogaʼi he ʼu logo foʼou neʼe tupu ai te tuʼania ʼa te hahaʼi ki te heʼe fīmālie, pea koutou fehuʼi age:
◼ “Koteā tau manatu ʼo ʼuhiga mo te meʼa ʼaē ʼe maʼua ke tou fai ke tou maʼu ai te fīmālie ʼi te maʼuli ʼaenī? [Tuku ke fai mai hana tali.] ʼI tona fakahagatonu, ʼe fakapotopoto koa hatatou falala ki te tagata ʼo ʼuhiga mo te fakatokatoka ʼo te ʼu fihifihia ʼaē ʼe tau mo te malamanei? [Tuku ke fai mai hana tali; ʼosi ʼaia pea tou lau ia Pesalemo 146:3.] ʼE fakahā mai e te tagata fai pesalemo ʼe feala ke tou falala ki te ka haʼu. [Lau ia Pesalemo 146:5, 6.] Ko te alatike ʼaenī, ‘Ko Te Fīmālie Moʼoni ʼi Te Temi Nei ʼo Talu Ai’ ʼe ina fakamahino mai pe koʼe ʼe feala ke tou falala ʼe fetogi anai e Sehova ʼAtua te ʼu ʼaluʼaga ʼo te kele ke lelei age.” Koutou tuku age he ʼu nusipepa pea koutou fakatuʼutuʼu ke koutou toe liliu ʼo palalau mo ia, peʼe feafeaʼi hatatou maʼu te maʼuli fīmālie ʼi te temi nei.
4 ʼE feala ke koutou fili ke koutou fakahā “Te Tule Leʼo” ʼo te ʼaho 1 ʼo Maio. ʼE feala ke koutou kamata fēnei takotou palalau:
◼ “ ʼE lahi te hahaʼi ʼe nātou ʼui ʼe faigataʼa tanatou fakalogo ki tanatou lotu pea mo te ʼu puleʼaga. Ohage la, ko te meʼa ʼaē neʼe hoki hoko ʼi Iukoselavia. [Lau te palakalafe 4 ʼo te pasina 3.] ʼE feala ke tou feʼekeʼaki pe koteā anai te meʼa ʼaē ka tou fai mokā fakafeagai te ʼu meʼa ʼaē ʼe fakamaʼua mai e te ʼu puleʼaga pea mo te ʼu lao ʼa te ʼAtua. ʼE ke ʼiloʼi koa la neʼe ʼui mai e Sesu te meʼa maʼuhiga ʼaupito ʼo ʼuhiga mo te faʼahi ʼaia? [Lau ia Mateo 22:21.] Neʼe talanoa ia Sesu ʼo ʼuhiga mo Sesale ʼi tona ʼuhiga pule ki te fenua. ʼE lava feafeaʼi hatatou mulimuli ki te meʼa ʼaē neʼe ʼui mai e Sesu?” ʼOsi ʼaia pea tou ʼui age ʼe tou toe liliu mai anai ʼo tali ki te fehuʼi ʼaia, pea mo fakahā kiai te apone.
5 Kapau ʼe koutou leleiʼia he fakahā fakanounou, ʼe feala ke koutou ʼahiʼahi te manatu ʼaenī:
◼ “Tokolahi ʼe nātou tokagaʼi ʼe lahi te ʼu nusipepa ia ʼaho nei ʼe talanoa tāfito ki te faifakatau, te ʼu felāveʼi fakasino, peʼe ko te agamālohi. [Fakahā Te Tule Leʼo pea mo te Réveillez-vous!] ʼE mātou tufa te ʼu nusipepa ʼaenī ʼaē ʼe fakatafito ki te Tohi-Tapu. ʼE tuʼu ʼi ai te ʼu meʼa ʼe ʼaoga kia tatou pea ʼe nātou akoʼi tatou ke tou tauhi ki te ʼAtua, ke tou ʼofa ki ʼotatou vāhaʼa fale, pea ke tou taupau he aga ʼe totonu. Kapau ʼe ke fia lau te ʼu nusipepa ʼaenī, ʼe ʼau ʼiloʼi ʼe ke leleiʼia anai te ʼu alatike ʼaē ka ke lau.”
6 Kapau ʼe tou faiva ʼi te palalau ki te moʼoni mo ʼotatou ʼu vāhaʼa fale, ʼe feala ke tou foaki he fiafia lahi ki te tokolahi.—Gāue 8:4, 8.