Ke Tou Teuteuʼi Te Tufa ʼo Te ʼu Nusipepa ʼi ʼApelili

Ohage ko tona tuʼu ʼi tatatou Kaletalio 1996, ko te Taumafa ʼo te ʼAliki ʼe fai anai ʼi te taʼu ʼaenī ʼi te ʼaho 2 ʼo ʼApelili. Ko te faʼahi ʼaia ʼe ina fakaloto mālohiʼi tatou ke tou kau fuli ʼaki he lotomālohi ki te tufa ʼo te ʼu nusipepa lolotoga ʼo te māhina ʼo ʼApelili. Ko te ʼu nusipepa ʼaē ka tou tufa ʼe ʼaoga lelei ki totatou temi! Ko Te Tule Leʼo ʼo te ʼaho 1 ʼo ʼApelili ʼe fakatafito anai ki te akonaki ʼaē neʼe fai ki te kaugamālie ʼi te fakatahi faka tisitilike ʼo te taʼu ʼaenī kua ʼosi, ʼaē ko tona kupu tāfito ʼaenī, “Fakavikiviki Ki Te Hau ʼo Te Heʼegata!” Ko Te Tule Leʼo ʼo te ʼaho 15 ʼo ʼApelili ʼe mulimuli anai ki te kupu tāfito ʼo te Akonaki Makehe ki te Kaugamālie, “Ko Te Fakaʼosi ʼo Te Lotu Hala Kua Ōvi Mai,” ʼaē neʼe fai ʼi ʼApelili ʼo te taʼu ʼaenī kua ʼosi. ʼI te taʼu ʼaenī ko te akonaki makehe “Tou Nonofo Maʼa ʼi Te Taʼiake Fakapikopiko,” ʼo te ʼaho 21 ʼo ʼApelili, ʼe tonu anai ke ina toe fakaloto mālohiʼi tatou ʼo ʼuhiga mo te gāue ki te Puleʼaga. ʼE tou faka maʼuhiga anai te tufa te Réveillez-vous! ʼo te ʼaho 22 ʼo ʼApelili, ʼaē ko tona kupu tāfito “Quand les guerres auront disparu.”

Moʼo mulimuli ki te tufa ʼo Te ʼu Logo ʼo Te Puleʼaga ʼo ʼApelili ʼo te taʼu ʼaenī kua ʼosi, ko te māhina ʼo ʼApelili ʼaenī ʼe ko he māhina lelei anai moʼo tufa te ʼu nusipepa. Ko te temi leva ʼaenī ke fai he ʼu fakatuʼutuʼu. Ko te tokolahi ʼe nātou loto anai ke nātou toʼo te gāue pionie vaeluaʼi temi. ʼE feala anai ke fai he ʼu fakatuʼutuʼu ʼo ʼuhiga mo te ʼu ʼAho ʼaē ʼe tufa ai te ʼu nusipepa, ʼo feala ke tou kau fuli ki ai​—⁠ʼi te uhu, ʼi te hili hoʼatā, pea mo te afiafi. Ko tatou fuli ke tou “liliu ko he ʼu hahaʼi ʼe nātou maʼuliʼi te folafola.” Ohage ko tona fakakikite ʼo ʼuhiga mo te Mesia ia Pesalemo 69⁠:​9, tou fakaʼamu mo tatou ke feala hatatou ʼui: “Ko te fakamalotoloto ʼaē ki tou fale ʼe ina mofi anai ʼau.”​—Sake 1:​22; Soane 2:​17.