ʼE Tou Maʼu Te ʼu Fealagia Pea Mo Te ʼu Meʼa ʼAē ʼe ʼAoga Moʼo Akoʼi ʼo Te Hahaʼi
1 ʼI te fili e Sehova ia Moisese ke ʼalu ʼo fakafofoga ia ia, neʼe logoʼi e Moisese ʼe mole poto ia ʼi te fakahā ʼo te folafola ʼa te ʼAtua kia Falaone. (Ek. 4:10; 6:12) Neʼe fakahā e Selemia tana mole falala ʼaē ʼe feala anai tana gāue ʼi tona ʼuhiga polofeta ʼa Sehova, ʼi tana ʼui ʼaē ki te ʼAtua ʼe mole poto ʼi te palalau. (Sel. 1:6) Logope la tanā mole falala ʼi te kamata, ko te ʼu polofeta ʼaia e lua neʼe nā fakahā ʼe mole nā matataku ʼi te talanoa ʼo ʼuhiga mo Sehova. Neʼe foaki age e te ʼAtua te ʼu meʼa ʼaē neʼe ʼaoga kia nāua ke nā talanoa ʼo ʼuhiga mo ia.
2 Ia ʼaho nei, ʼaki te tokoni ʼa Sehova, ʼe tou maʼu te ʼu meʼa ʼe ʼaoga moʼo fakahoko ʼo tanatou minisitelio ʼaki he loto falala. (2 Ko. 3:4, 5; 2 Tim. 3:17) Ohage ko he mekanisia poto ʼe ina maʼu te ʼu meʼa gāue fuli, ʼe tou maʼu te ʼu meʼa fuli ʼaē ʼe ʼaoga kia tatou moʼo fakahoko fakalelei ʼo totatou minisitelio. ʼI Sanualio ʼe tou tufa anai he kaupepa ʼe pasina 32 ʼe maʼu e te kokelekasio. Logope la ko te ʼu meʼa gāue fakalaumālie ʼaia ʼe mole ko he ʼu meʼa foʼou, kae ʼe kei ʼaoga te ʼu manatu faka Tohi-Tapu ʼi te temi ʼaenī, pea ko te ʼu kaupepa ʼaia ʼe tokoni anai ki te hahaʼi ke nātou ʼiloʼi te moʼoni. Ko te ʼu faʼifaʼitaki ʼaē ʼe hoa mai ʼe ʼaoga moʼo tufa ʼo te kaupepa.
3 ʼE feala ke fakaʼaogaʼi te talanoa ʼo ʼuhiga mo te ako faka Tohi-Tapu moʼo fakatupu ʼo te fia logo ki te Folafola ʼa te Tohi-Tapu. ʼE feala ke koutou kamata fēnei takotou palalau:
◼ “Ia ʼaho nei kua lahi te fakatokagaʼi ʼe ʼaoga ʼaupito ke lelei te ako ʼa te hahaʼi. ʼI tau manatu, ko te faʼahiga ako fea ʼaē ʼe tonu ke maʼu e he tahi ke ina maʼu ai te fiafia lahi pea mo te fīmālie ʼi tona maʼuli? [Tuku ke fai atu hana tali.] Ko te ʼu tapuakina heʼegata ʼe feala ke maʼu e nātou ʼaē ʼe nātou maʼu te ʼatamai mālama ʼo ʼuhiga mo te ʼAtua. [Lau ia Tāʼaga Lea 9:10, 11.] Ko te kaupepa ʼaenī [fakahā te kupu tāfito ʼo te kaupepa ʼaē ʼe koutou tufa] ʼe fakatafito ki te Tohi-Tapu. ʼE fakahā ai ko te matapuna pe e tahi ʼo te ʼatamai mālama ʼe feala ke ina taki ki te maʼuli heʼegata.” Fakahā age ki ai he faʼifaʼitaki ʼi te kaupepa. Koutou tuku ki ai te kaupepa ki te 50, pea koutou fakatuʼutuʼu ke koutou toe liliu ʼo ʼaʼahi ia ia.
4 Mokā koutou liliu ʼo ʼaʼahi he tahi neʼe palalau mo koutou ki te maʼuhiga ʼo te ako faka Tohi-Tapu, ʼe feala ke koutou ʼui age fēnei:
◼ “ ʼI taku haʼu talu mai ai, neʼe tā palalau ki te Tohi-Tapu ʼe ko te matapuna ʼo te ako ʼaē ʼe feala ke ina foaki mai he ka haʼu ʼe heʼegata. ʼE mahino papau ia, ʼe tonu ke tou faiga ke tou ako te ʼu meʼa ʼaē ʼe ʼaoga ke tou ʼiloʼi ʼi te Tohi-Tapu. [Lau ia Tāʼaga Lea 2:1-5.] Tokolahi te hahaʼi ʼe nātou tokagaʼi ʼe faigataʼa tanatou mahino ki te tahi ʼu koga ʼo te Tohi-Tapu. ʼE ʼau fia fakahā fakanounou atu te faʼahiga fai ʼe mātou fakaʼaogaʼi, moʼo tokoni ki te hahaʼi ke lahi te ʼu meʼa ʼaē ʼe nātou ako ʼo ʼuhiga mo te ʼu akonaki tāfito ʼo te Tohi-Tapu.” Koutou fakaʼaogaʼi te kaupepa ʼaē neʼe koutou tuku ki ai, ʼo koutou fuli ki he manatu ʼe lelei pea koutou fakahā fakanounou ki ai peʼe feafeaʼi te ako Tohi-Tapu. Kapau ʼe fia ako, pea koutou fakamahino age ʼe koutou toe liliu mai anai ʼo ʼaʼahi ia ia mo tatatou tohi Te ʼAtamai Mālama ʼAē ʼe Ina Taki Ki Te Maʼuli Heʼegata.
5 Tokolahi ʼe nātou tuʼania ʼuhi ko te mamahi ʼo te lauʼi miliona tamaliki ʼi te malamanei. ʼE lagi feala ke koutou tokoni kia ia ke ina ʼiloʼi te manatu ʼa te ʼAtua ʼo ʼuhiga mo te faʼahi ʼaia, ʼo koutou ʼui fēnei:
◼ “ ʼE mahino ia kua lagi ke sio ki te ʼu tala logo ʼaē ʼe fakahā ai te tamaliki pakupaku, mo mahahaki, pea mo līʼakina ʼi te malamanei katoa. He koʼe ʼe mole feala ke fakatokatoka e te ʼu kautahi te ʼu ʼaluʼaga ʼaia? [Tuku ke fai atu hana tali.] ʼE loto e te ʼAtua ke maʼu e te hahaʼi te meʼa ʼaē ʼe lelei tāfito kia nātou. Fakatokagaʼi age te fakapapau ʼe ina fai ʼo ʼuhiga mo te tamaliki pea mo te hahaʼi lalahi, ʼo mulimuli ki te meʼa ʼe ʼui ʼi te Tohi-Tapu. [Lau ia Fakahā 21:4.] Ko te kaupepa ʼaenī [fakahā te kupu tāfito] ʼe talanoa ki te ʼu puani ʼo ʼuhiga mo te mālama ʼaē ka fakatuʼu e te ʼAtua, ʼaē ʼe mole toe ʼi ai anai he ʼu mamahi.” Kapau ʼe feala, koutou fakahā age he paki ʼe fakahā ai te Palatiso, pea mo koutou palalau ki te faʼahi ʼaia. Koutou tuku age te kaupepa, pea koutou fakatuʼutuʼu ke koutou toe ʼaʼahi ia ia.
6 Kapau neʼe koutou ʼuluaki palalau ki te mamahi ʼa te tamaliki, ʼi te ʼaʼahi ʼe feala ke hoko atu takotou palalau ʼo fēnei:
◼ “ ʼI taku haʼu talu mai ai, neʼe ke fakahā mai tau tuʼania ʼo ʼuhiga mo te ʼu mamahi ʼaē ʼe tau mo te ʼu tamaliki, ʼuhi ko te mavete ʼo te famili, te hoge, te mahaki, pea mo te agamālohi. ʼE fakafimālie tatatou lau ʼi te Tohi-Tapu ʼe ʼi ai te mālama ʼe mole toe mahaki ai anai te tamaliki pea mo te hahaʼi lalahi, pea ʼe mole nātou toe mamahi anai, pea mo mamate. Ko te lea faka polofeta ʼo te tohi ʼa Isaia ʼe talanoa ki te maʼuli ʼe lelei age ʼe fakatuʼu anai ʼi te kele.” Lau pea mo talanoa kia Isaia 65:20-25. Tou fakatuʼutuʼu he ako Tohi-Tapu ʼi te tohi Te ʼAtamai Mālama.
7 Mai tona ʼaluʼaga ʼaē ʼe māhani te hahaʼi lotu ʼi te faikole, ʼe feala ke kamata takotou palalau ʼo ʼuhiga mo te faʼahi ʼaia ʼo koutou ʼui age fēnei:
◼ “ ʼI totatou maʼuli, tokolahi ia tatou ʼe tou tau mo te ʼu fihifihia ʼe nātou uga ai tatou ke tou faikole ki te ʼAtua ke tokoni mai. Pea tahi ʼaē meʼa, tokolahi ʼe hage kia nātou ʼe mole tali tanatou ʼu faikole. Pea ʼe hage ʼe mole logoʼi e te ʼAtua te ʼu faikole ʼaē ʼe fai e te kau takitaki lotu ʼi muʼa ʼo te kaugamālie ʼo ʼuhiga mo te tokalelei. ʼE tou ʼui te faʼahi ʼaia mai tona ʼaluʼaga ʼaē ʼe hoko atu pe te tau ʼa te malamanei pea mo te agamālohi. ʼE fakalogo moʼoni koa te ʼAtua ki te ʼu faikole? Kapau koia ʼaia, he koʼe ʼe hage ki te tokolahi ʼe mole ina tali tanatou ʼu faikole? [Tuku ke fai atu hana tali.] ʼE fakamatala e te Pesalemo 145:18 te meʼa ʼaē ʼe tonu ke tou fai mo kapau ʼe tou loto ke tali e te ʼAtua tatatou ʼu faikole. [Lau te vaega.] ʼO ʼuhiga mo te faʼahi ʼaia, ko te ʼu faikole ki te ʼAtua ʼe tonu ke fakamalotoloto pea ke ʼalutahi mo te moʼoni ʼaē ʼe tuʼu ʼi tana Folafola, te Tohi-Tapu.” Fakahā age te kaupepa ʼaē ʼe koutou tufa, pea mo koutou fakahā te meʼa ʼaē ʼe ʼui ʼo ʼuhiga mo te maʼuhiga ʼo te ʼu faikole.
8 Mokā koutou toe liliu ʼo hoko atu te fai palalau ʼo ʼuhiga mo te faikole, ʼe feala ke koutou fai te ʼu palalau ʼaenī:
◼ “Neʼe ʼau leleiʼia tatā fai palalau ʼo ʼuhiga mo te faikole. ʼE mahino papau ia neʼe ke fakatokagaʼi ko te ʼu manatu ʼa Sesu ʼo ʼuhiga mo te faikole ʼe ko he tokoni lelei.” Lau ia Mateo 6:9, 10, ʼo tou fakahā te ʼu meʼa ʼaē neʼe kole tāfito e Sesu ʼi tana faikole ʼaē ko he faʼifaʼitaki maʼa tatou. Fakahā age te kapite 16, “ ʼE Lava Feafeaʼi Hakotou Fakaōvi Ki Te ʼAtua,” ʼi te tohi Te ʼAtamai Mālama, pea koutou fakahā age ki ai te faʼahiga ako ʼo te Tohi-Tapu ʼaki te tohi ʼaia.
9 Mokā tou fakahā te ʼatamai mālama ʼo te ʼAtua ki te hahaʼi, ʼe feala ke tou fehuʼi fēnei, “Ko ai ʼaē ʼe ina maʼu te ʼu fealagia moʼo fai ʼo te ʼu meʼa ʼaia?” ʼE tali fēnei e te Tohi-Tapu: “Ko tatou.”—2 Ko. 2:16, 17.