Tou Ako Ki Te Hahaʼi Te ʼu Meʼa ʼAē ʼe Fakamaʼua Mai e Te ʼAtua Kia Tatou
1 Tokolahi te hahaʼi ʼe mole heʼeki “fagono ki te ʼu folafola ʼa Sehova.” (Amosi 8:11) Logope la ko ʼihi hahaʼi ʼe nātou tui ʼe ʼi ai te ʼAtua, ʼe mole nātou ʼiloʼi tana fakatuʼutuʼu pea mo te ʼu meʼa ʼaē ʼe ina fakamaʼua mai kia tatou. Koia, ʼe ʼaoga ai ke tou ako kia nātou te moʼoni ʼo te Puleʼaga ʼaē ka ina hāofaki tonatou maʼuli. Kapau ʼe tou maʼu te ʼu tohi fuli ʼaē ʼe ʼaoga, pea mo tou teuteu fakalelei ke tou fai faka mafola ʼi te ʼu potu fuli pe, ʼe feala ke tou maʼu te hahaʼi ʼaē ʼe nātou fia ako te ʼu meʼa ʼaē ʼe fakamaʼua mai e Sehova kia tatou.
2 Lolotoga te māhina ʼo ʼApelili pea mo Maio, ʼe tou tufa anai Te Tule Leʼo pea mo te Réveillez-vous! Tahi ʼaē meʼa, ʼe tou ʼuluaki tufa anai te kaupepa lahi Koteā ʼAē ʼe Fakamaʼua Mai e Te ʼAtua Kia Tatou? Ko tona ʼu paki ʼe matalelei pea mo tana ʼu fehuʼi, ʼe tupu ai anai te fia ʼiloʼi ʼa te hahaʼi pe koteā te kaupepa ʼaia. Ko te ʼu manatu ʼaē ʼe hoa mai, ʼe nātou tokoni anai kia tatou ke tou fakaʼaogaʼi fakalelei tatatou ʼu tohi ʼi he ʼaluʼaga ʼe lelei.
3 Tou Kumi Fakalelei Te Hahaʼi: ʼI te ʼu koga meʼa ʼaē ʼe lahi ai te hahaʼi ʼaē ʼe mole tou maʼu atu ki tonatou ʼapi ʼi te fai faka mafola, ʼe ko he meʼa lelei tatatou kumi ia nātou, pea mo tou palalau kia nātou ʼi te potu fuli pe ʼaē ʼe tou maʼu ai. Ko te pepa ʼaē ʼe ʼalutahi mo Te Minisitelio ʼo Te Puleʼaga ʼo Sepetepeli 1996, neʼe ina fakaloto mālohiʼi tatou ke tou faka mafola te logo lelei ʼi te potu fuli pe—ʼi te ala, ʼi te ʼu kā, pea mo te ʼu lotoʼā, te ʼu tauʼaga motokā, pea mo te ʼu koga meʼa ʼaē ʼe tuʼu ai te ʼu fale koloā. Tahi ʼaē meʼa, ʼe ko he faka fealagia ʼaia kia tatou ke tou kumi te ʼu faigamālie fuli, ke tou fai te fagonogono faigamālie. Ohage ko te faʼifaʼitaki ʼaenī, ko te tuagaʼane pionie neʼe ʼalu ki te lotoʼā manu pea neʼe ina ʼave te ʼu Réveillez-vous! ʼo te ʼaho 8 ʼo ʼAukusito 1996 ʼaē ko tona kupu tāfito ʼaenī “Espèces menacées : pourquoi sʼen soucier?” ʼI te hola katoa, neʼe ina tufa te ʼu nusipepa e 40 kia nātou ʼaē neʼe mamata ki te ʼu manu! Koteā te ʼu fua lelei ʼaē neʼe koutou maʼu ʼi takotou faka mafola te logo lelei ʼi te potu fuli pe? Ko Te Tule Leʼo pea mo te Réveillez-vous! ʼo feiā aipe mo te kaupepa Fakamaʼua, ʼe ʼaoga tāfito ki te ʼu faʼahiga fagonogono fuli koteʼuhi ʼe nātou fakahā te ʼu manatu ʼe pipiki ki te maʼuli ʼo te hahaʼi, pea mo nātou uga ai te hahaʼi ke nātou fakaʼaogaʼi tonatou poto fakakaukau.
4 Tou Kamata Te ʼu Fai Palalau: Ko te alatike ʼe tuʼu ʼi te pasina fakaʼosi ʼo Te Minisitelio ʼo Te Puleʼaga ʼo ʼOketopeli 1996, ʼe ina foaki atu te ʼu manatu ʼo ʼuhiga mo te teuteuʼi ʼo takotou fakahā Te Tule Leʼo pea mo te Réveillez-vous! Ko te ʼu tokoni ʼaia ʼe toe ʼaoga anai mokā koutou teuteuʼi takotou fakahā te kaupepa Fakamaʼua. ʼE feala ke tou fai he ʼu palalau fakanounou, peʼe tou fakahā he manatu faka Tohi-Tapu. ʼE maʼuhiga ke tou fili lelei te ʼu ʼuluaki palalau ʼaē ka tou fai, koteʼuhi ʼe feala ai hatatou ʼiloʼi peʼe fakalogo anai ia ia ʼaē ʼe tou palalau ki ai. Ko ʼihi neʼe nātou fakatupu te fia logo ʼa te hahaʼi ʼaki te ʼu ʼuluaki palalau ʼaenī: “Neʼe ʼau lau te alatike neʼe ina fakaloto mālohiʼi ʼau, pea ʼe ʼau fia fakahā atu te alatike ʼaia ke ke lau.” Peʼe feala ke tou lagaʼi he fehuʼi ke feala hatatou fai palalau mo ia ʼaē ʼe tou fai faka mafola ki ai.
5 Kapau ʼe ʼaoga ʼi tokotou telituale, ʼe feala ke koutou ʼahiʼahi te ʼu fehuʼi ʼaē ʼe tuku atu ʼi te ʼu faʼifaʼitaki ʼo te māhina ʼaenī:
◼ “Ia ʼaho nei ʼe tou sio kua lahi ʼaupito te fai paki ʼi te ʼu kaupā, te ʼotaʼota, te ʼu manunū pea mo te ʼulihi ʼo te kele. Koteā te meʼa ʼaē ka fai anai moʼo fakamaʼa ʼo te kele pea mo fakaliliu ko he potu ʼe lelei tatatou maʼuʼuli ai?” Tuku ke fai atu hana tali, pea ʼosi ʼaia pea koutou fakamahino age ʼe koutou fia fakahā age ki ai te ʼu manatu ʼe nātou fakamoʼoni mai kia tatou peʼe liliu feafeaʼi anai te kele ko he palatiso, pea ʼe hoko anai ʼafea ia te faʼahi ʼaia. Koutou fakahā he manatu tāfito, he vaega fakanounou, pea mo he paki ʼo te ʼu nusipepa foʼou, peʼe ko te ako 6 ʼo te kaupepa Fakamaʼua, pea mo koutou foaki ki ai te kaupepa ʼaia ke ina lau. Ia muʼa ʼo te fakaʼosi ʼo te fai palalau, koutou fakatuʼutuʼu ke koutou ʼaʼahi ia ia.
◼ “ ʼI tau manatu neʼe fakatuʼutuʼu koa e te ʼAtua ke tou maʼuli ʼi te ʼu fihifihia ohage ko te ʼu meʼa ʼe tau mo tatou ia ʼaho nei?” ʼI tana ʼosi tali atu, ʼe feala ke koutou ʼui fēnei: “ ʼE lagi ʼe ke ʼiloʼi lelei te faikole ʼaē neʼe akoʼi e Sesu ki tana ʼu tisipulo, ʼaē ʼe tou kole ai ke hoko mai te Puleʼaga ʼo te ʼAtua. Neʼe kua ke fakakaukauʼi koa pe koteā moʼoni te Puleʼaga ʼo te ʼAtua?” Tou fakahā age te ako 6 ʼi te kaupepa Fakamaʼua, pea tou lau te ʼu fehuʼi ʼaē ʼe lagaʼi ʼi te kamata ʼo te ako. Pea, lolotoga takotou lau te palakalafe 1, koutou fakahā age te tali ʼo te ʼuluaki fehuʼi. Koutou fakamahino age ko te ʼu fehuʼi ʼaē kei toe ʼe toe maʼu aipe tona ʼu tali. Koutou fakahā age te kaupepa pea koutou ʼui age ʼe koutou toe liliu mai anai ʼo fakahā age he tahi ʼu manatu ʼo ʼuhiga mo te Puleʼaga.
◼ “ ʼE tokolahi te hahaʼi popoto, ʼe nātou kamata ʼui, ʼe ko te ʼu lotu ʼo te malamanei ʼaē ʼe tupu ai te ʼu fihifihia ʼo te tagata, kae mole ko he puleʼaki moʼo fakatokatoka ʼo te ʼu fihifihia ʼaia. Koteā tau manatu ʼo ʼuhiga mo te faʼahi ʼaia?” ʼI takotou ʼosi fakalogo ki tana manatu, koutou fakahā age ki ai he manatu ʼo te ʼu nusipepa foʼou, ke feala ai hana fia ʼiloʼi ko te ʼu fakatuʼutuʼu ʼa te lotu ʼe mole hoko, pea kua ʼamanaki ke fakaʼauha. Koutou fakahā age tokotou higoa pea mo koutou fehuʼi age tona higoa, pea koutou ʼui age ʼe koutou toe fia ʼaʼahi ia ia, ke feala hakotou fakahā age ko te lotu moʼoni neʼe mole ina kākāʼi te hahaʼi.
◼ “ ʼI te kua lahi ʼo te ʼu fihifihia ʼi te maʼuli faka famili ia ʼaho nei, neʼe mole heʼeki ke feʼekeʼaki koa la pe koteā te puleʼaki ʼaē ke maʼuli fiafia ai te famili?” Koutou talitali ke ina fakahā atu tana manatu, pea koutou fakamahino age ʼi te Tohi-Tapu, ʼe fakahā ai e te ʼAtua pe koteā te puleʼaki ʼaē ʼe ʼaoga ke maʼuli fiafia ai te famili. ʼE lagi feala ke koutou lau age ia Isaia 48:17. ʼOsi ʼaia pea koutou fakahā age te ako 8 ʼo te kaupepa Fakamaʼua, pea mo he ʼu vaega faka Tohi-Tapu ʼe nātou fakahā ai te ʼu tokoni ʼaē ʼe ʼaoga moʼoni moʼo takitaki ʼo te famili. Koutou lau te ʼu fehuʼi ʼaē ʼe tuʼu ʼi te kamata ʼo te ako. Koutou fehuʼi age ki ai peʼe ina fia maʼu te ʼu tali ki te ʼu fehuʼi ʼaia. Koutou ʼui age ʼe koutou toe fia liliu mai ʼi he tahi temi moʼo fakahā age ki ai te ʼu tokoni ʼaoga ʼaē ʼe tuʼu ʼi te Tohi-Tapu ʼo ʼuhiga mo te fiafia faka famili.
6 Ko te pepa ʼaē ʼe ʼalutahi mo Te Minisitelio ʼo Te Puleʼaga ʼo Malesio 1997, neʼe ina fakaloto mālohiʼi tatou ke tou lototoʼa ʼo fai te ʼu ʼaʼahi. Neʼe ina toe fakaloto mālohiʼi tatou ke tou fakaʼaogaʼi te kaupepa Fakamaʼua moʼo kamata ʼaki he ʼu ako Tohi-Tapu, pea kapau ʼe mole fai ʼi te ʼuluaki fai palalau, pea ʼe feala tona fai ʼi te ʼaʼahi. Ko te meʼa ʼaē ʼe ʼaoga tāfito ki te hahaʼi, ʼe ko tanatou akoʼi te ʼu meʼa ʼaē ʼe fakamaʼua mai e te ʼAtua pea mo nātou maʼuliʼi. (Kol. 1:9, 10) ʼE tou tokoni ʼaupito anai ki te hahaʼi lolotoga te māhina ʼo ʼApelili pea mo Maio, mo kapau ʼe feala ke tou kamata akoʼi nātou ke nātou ʼiloʼi te ʼu fakamaʼua ʼa Sehova ʼo ʼuhiga mo te maʼuli.—1 Ko. 9:23.