Tou Fiafia ʼi Te Fai Fakalelei ʼo Tatatou Fai Faka Mafola
1 Ko tatou fuli ʼe tou fiafia ʼi te ʼu meʼa ʼaē ʼe tou fai lelei. Ia Maleko 7:37, neʼe tala fēnei e te kaugamālie ʼo ʼuhiga mo Sesu: “Kua ina fai lelei ia meʼa fuli.” ʼE mahino papau ia neʼe fiafia ia Sesu ʼi tana fakahoko te finegalo ʼa Sehova! (Vakaʼi ia Pesalemo 40:8.) ʼI tatatou vakaʼi te ʼu faʼifaʼitaki ʼaē ʼe hoa mai, ʼe tou toe fiafia anai mo tatou ʼi tatatou fakalogo ki te fakatotonu ʼa Sesu, ʼaē ke tou ‘faka mafola ki te hahaʼi pea mo fai fakalelei tatatou fai faka mafola.’ (Gāue 10:42) ʼI Sanualio, ʼe tou tufa anai te ʼu tohi ʼaē ʼe pasina 192, neʼe tā ʼi muʼa ʼo te taʼu 1985, ʼaē ʼe lagi maʼu e te kokelekasio peʼe ko te tohi Te ʼAtamai Mālama. ʼE tou lava fakaʼaogaʼi feafeaʼi te ʼu tohi ʼaia ke tou fai fakalelei tatatou fai faka mafola?
2 ʼI te kua tuʼania ʼa te hahaʼi ʼo ʼuhiga mo te ʼu mahaki, ʼe feala ke koutou ʼui age fēnei:
◼ “Logope la te ʼu meʼa lahi ʼaē kua fakahoko e te ʼu tōketā, kae ʼe tokolahi te hahaʼi ʼe nātou maʼuli mamahi ʼuhi ko te mahaki. ʼI tau manatu, koteā tona tupuʼaga? [Koutou tuku ke ina fai mai hana tali.] Neʼe ʼui e Sesu Kilisito ʼe kau anai te mahaki ki te fakaʼiloga ʼo te ʼu ʼaho fakamuli. (Luka 21:11) Kae ʼe toe fakahā foki e te Tohi-Tapu te temi ʼaē ʼe mole toe ʼi ai anai he mahaki. [Koutou lau ia Isaia 33:24.] Koutou fakatokagaʼi ko te tohi ʼaenī ʼe ina fakahā mai he ʼamanaki ʼe fakatafito ki te akonaki faka Tohi-Tapu ʼaenī.” ʼAki te tohi ʼaia, koutou fakahā age he ʼu manatu ʼe ʼalutahi mo te faʼahi ʼaia pea mo koutou tuku age kia ia ki te 150.
3 Ka koutou fai te fagonogono faigamālie ʼo ōvi ki he fale koloā, ʼe feala ke koutou fakaʼalofa ki he tahi pea mo koutou fehuʼi fēnei:
◼ “ ʼI tau manatu, ʼe mole koa la faigataʼa te maʼuli ʼi te kua totogi kovi ʼo te ʼu meʼa? [Koutou tuku ke ina fai mai hana tali.] Kia koe, ʼe mole tou maʼu anai koa ʼi he ʼaho he fīmālie ʼi te faʼahi faka ekonomika?” Koutou tuku ke fai mai hana tali. ʼOsi ʼaia pea koutou fakahā age he vaega ʼi te tohi ʼaia, ʼe ʼalutahi mo te faʼahi ʼaia. Koutou hoko atu, ʼo koutou ʼui fēnei: “ ʼE fakahā e te tohi ʼaenī peʼe fakatokatoka feafeaʼi anai e te ʼAtua, ʼaki tona Puleʼaga, te ʼu fihifihia ʼaē ʼe tupu ʼaki ai te faigataʼa ʼaupito ʼo te maʼuli ʼi te temi ʼaenī.” Koutou tuku age te tohi ki te 150. ʼE feala hakotou ʼui age ki ai neʼe koutou fiafia ʼi takotou fai palalau mo ia, pea mo koutou fehuʼi fēnei age: “ ʼE mole feala koa la ke tā toe felāveʼi ʼi he tahi ʼaho ke toe hoko atu tatā fai palalau?” ʼE feala hakotou kole age ki ai tona numelo telefoni peʼe ko tona tuʼasila.
4 ʼE feala hakotou ʼahiʼahi te ʼuluaki palalau ʼaenī ʼo ʼuhiga mo te tokalelei faka malamanei, ʼo koutou fakaʼaogaʼi te tohi “Te ʼAtamai Mālama”:
◼ “ ʼI tau manatu, he koʼe ʼe faigataʼa te maʼu ʼo te tokalelei ʼi te malamanei? [Koutou tuku ke ina fai mai hana tali, pea koutou fakahā age te paki ʼo te pasina 100 mo te 101.] ʼE fakamahino mai e te Tohi-Tapu pe koʼe ʼe lahi te ʼu faigataʼaʼia ʼaē ʼe hoko ʼi totatou temi. [Koutou lau age ʼi te tohi te vaega ʼo Fakahā 12:7-9, 12 ʼi te palakalafe 3 ʼo te pasina 99.] ʼE mole maʼu te tokalelei ʼi te malamanei, ʼuhi ko te kua lī ifo ʼa te Tevolo ki te kele. ʼE lahi te ʼu fehuʼi maʼuhiga ʼe tali kiai te tohi ʼaenī, pea ʼe ʼau fiafia ʼi haku tuku atu ke ke lau ko tona totogi ko te 150.”—Kapau ʼe koutou fia maʼu he tahi ʼu faʼahiga palalau ʼe lelei moʼo tufa te tohi Te ʼAtamai Mālama, koutou vakaʼi Te Minisitelio ʼo Te Puleʼaga ʼo Malesio mo Sūnio 1997, ʼi te pasina fakamuli.
5 ʼI takotou toe liliu ʼo ʼaʼahi ia nātou ʼaē neʼe nātou toʼo te tohi, koutou faiga ke koutou kamata he ako Tohi-Tapu, ʼo koutou fai te ʼu palalau ʼaenī:
◼ “ ʼI tatā fai palalau fakamuli, neʼe ke talanoa ki he meʼa maʼuhiga ʼaupito. [Koutou fakahā age te meʼa ʼaē neʼe talanoa kiai.] Neʼe ʼau fakakaukauʼi te faʼahi ʼaia, pea ʼe ʼau fia fakahā atu te ʼu manatu ʼaē neʼe ʼau maʼu ʼi te ʼu kumi ʼaē neʼe ʼau fai ʼo ʼuhiga mo te faʼahi ʼaia. [Koutou fakahā age he vaega ʼe ʼalutahi mo te faʼahi ʼaia.] ʼE mātou fakaafe te hahaʼi ke fai hanatou ako, he ko te ako ʼaia neʼe ina faka fealagia ki te toko lauʼi miliona hahaʼi ke nātou ʼiloʼi te ʼu akonaki tāfito ʼo te Tohi-Tapu ʼi he kiʼi temi nounou. Ko te ako ʼaia ʼe ina fakaloto mālohiʼi anai takotou falala ki te fakahoko ʼo te ʼu fakapapau ʼa te ʼAtua.” Koutou fakahā age he ʼu fehuʼi ʼe tali anai kiai te tohi. Kapau ʼe fakafisi ki te ako Tohi-Tapu, pea koutou fakahā age ki ai ʼe toe ʼi ai foki mo te ako nounou ʼe tou fai mo te hahaʼi, ʼe ko he ako ʼe fai pe ia minuta e 15 ʼi te vāhaʼa fuli, lolotoga vāhaʼa e 16. Koutou fakahā age te kaupepa lahi Fakamaʼua, ʼo koutou fuli age te pasina ʼo te ako 1, pea koutou kole age peʼe feala ke koutou fakahā age peʼe feafeaʼi te fai ʼo te ʼuluaki ako.
6 Koutou Manatuʼi ʼo Fakaʼaogaʼi Te ʼu Pepa Fakaafe: ʼE feala ke koutou fakaʼaogaʼi fakalelei te ʼu pepa fakaafe ʼi takotou ʼu ʼuluaki palalau, moʼo uga te fia logo ʼa te hahaʼi ki te ʼu meʼa fakalaumālie, peʼe feala ke koutou tuku age kia nātou ʼaē neʼe mole nātou tali he tohi. Kapau ʼe fia logo he tahi, pea ʼe lelei ke koutou fakaʼaogaʼi te logo ʼaē ʼe tohi ʼi te tuʼa ʼo te pepa fakaafe, moʼo fakaloto mālohiʼi ia ia ke fai hana ako Tohi-Tapu pea ke kau ki tatatou ʼu fono.
7 Koutou popoto ʼi te fai ʼo takotou gāue, pea ʼe koutou fiafia anai ʼi tona fakahoko. Koutou tokakaga tuʼumaʼu ke koutou fai fakalelei takotou fai faka mafola, pea ke koutou fiafia ʼi takotou fakahoko fakalelei te minisitelio ʼi tona ʼu faʼahi kehekehe.—1 Tim. 4:16.