ʼE Tonu Ke Tou Tala Ki ʼOtatou ʼu Kāiga Te Logo Lelei
1 ʼE ko te finegalo ʼo te ʼAtua “ke hāofaki te faʼahiga tagata fuli pe, pea ke nātou maʼu te ʼatamai mālama totonu ʼo te moʼoni.” (1 Tim. 2:4) ʼE kau ki “te faʼahiga tagata fuli pe” totatou ʼu kāiga fuli. Moʼo fakaaʼu te logo lelei kia nātou ʼaia, ʼe maʼua kia tatou ke tou fetogi tatatou ʼu faʼahiga fakahā ʼo te logo lelei, pea mo tou vakaʼi fakalelei te ʼu meʼa ʼaē ʼe fia logo kiai te hahaʼi takitokotahi. (1 Ko. 9:19-23) Neʼe foaki e te kautahi ʼa Sehova he ʼu meʼa gāue ʼe feala ke tokoni kia tatou ke lave ki te loto ʼo nātou ʼaē ʼe nātou “lotolelei ki te maʼuli heʼegata.” (Gāue 13:48) Tou vakaʼi peʼe lava feafeaʼi hatatou fakaʼaogaʼi te ʼu kaupepa lalahi kehekehe lolotoga te ʼu māhina ʼo Sūlio pea mo ʼAukusito, moʼo foaki te ʼu meʼa fakalaumālie ʼaē ʼe ʼaoga ki totatou ʼu kāiga.
2 Tou Fakahā Te ʼu Kaupepa Lalahi: ʼI te lisi ʼaē ʼe tuʼu ʼi lalo, ʼe koutou maʼu ai anai he ʼu manatu ʼe feala ke koutou fakaʼaogaʼi mokā koutou fakahā he ʼu kaupepa lalahi. ʼE kau ki te ʼu manatu ʼaia (1) he fehuʼi moʼo kamata ʼaki te fai palalau, (2) mo he ʼu pasina pea mo he ʼu palakalafe ʼo te kaupepa lahi ʼe talanoa ki te ʼu puani ʼaē ʼe koutou palalau kiai, pea (3) mo he vaega ʼe feala ke koutou lau, ʼe ʼalutahi mo te fai palalau. ʼE feala ke koutou fakaʼosi te fai palalau ʼaki takotou faʼahiga palalau ʼa koutou, ʼo mulimuli ki te tali ʼaē ka fai atu. ʼO ʼuhiga mo te ʼu kaupepa lalahi, ʼe fakahā atu e Te Minisitelio ʼāfea ʼo Te Puleʼaga, ʼe tuʼu ai he fakahāhā katoa ʼo te ʼu kaupepa.
ʼE Tokaga Moʼoni Koa Te ʼAtua Kia Tatou?
ʼI tau manatu, koteā te ʼamanaki ʼe tou maʼu moʼo tokoni ki te hahaʼi ʼaē neʼe gaohi koviʼi?—Te ʼu pasina 27 ki te 28, te ʼu palakalafe 23 ki te 27; Isaia 65:17, 18; km 7/97 p. 4.
Te ʼu laumālie ʼo te kau mate—ʼE feala koa hanatou tokoniʼi koutou peʼe nātou fakahalaʼi koutou? ʼE nātou maʼuʼuli moʼoni koa?
Koteā te ʼaluʼaga ʼo te kau mate? ʼE maʼuʼuli koa? Koteā ʼaē ʼe ʼui e te Tohi-Tapu?—Pasina 4 ki te 5; Tnk. 3:20; 9:5; km 7/97 p. 4.
Mokā Mate He Tahi ʼe Tou ʼOfa Mamahi Ai.
Neʼe mole heʼeki ke feʼekeʼaki koa la peʼe feafeaʼi hau fakaloto fīmālieʼi ia ia ʼaē kua mate he tahi neʼe ʼofa ai?—Pasina 26, te ʼu palakalafe 2 ki te 5; Soane 5:28, 29; km 7/96 p. 4.
3 Te Ako Tohi-Tapu ʼAki He Kaupepa Lahi: ʼE tonu ke tou fakatuʼutuʼu tuʼumaʼu ʼi tatatou minisitelio ke tou kamata he ako Tohi-Tapu, ʼi te ʼuluaki fai palalau peʼe ʼi te fai ʼo te ʼaʼahi. Ke hoko te faʼahi ʼaia, ʼe tou maʼu te kaupepa lahi ʼaenī ʼaē ʼe faigafua tona fakaʼaogaʼi moʼo kamata pea mo taki ʼo he ʼu ako Tohi-Tapu:
Koteā ʼAē ʼe Fakamaʼua Mai e Te ʼAtua Kia Tatou?
Neʼe ke ʼiloʼi koa la, ʼe feala ia lagi minuta e 30 ʼi te vāhaʼa, lolotoga vāhaʼa e 16, ke ke mālama vave ki te Tohi-Tapu?—Ako 2, palakalafe 6; 2 Tim. 3:16, 17; km 3/97 p. 4.
4 ʼI te lea fakatātā ʼo te tagata Samalitana lotoʼofa, neʼe fakahā ai e Sesu ko te kāiga moʼoni ʼa he tahi ʼe ko ia ʼaē ʼe ʼofa ʼo tokoni kia ia ʼaē ʼe nofo ʼi te faigataʼaʼia. (Luka 10:27-37) ʼE nofo totatou kāiga ʼi te faigataʼaʼia fakalaumālie. ʼE tonu ke nātou logo ki te logo lelei. Tou fakahoko te maʼua ʼaē ko te vaevae kia nātou te logo lelei ʼaia, ʼo tou fakamoʼoni ai ko tatou ko te ʼu tisipulo moʼoni ʼa Sesu Kilisito.—Mateo 24:14; Kal. 5:14.