ʼE ʼi Ai Koa He Fakatuʼutuʼu ʼo Takotou Gāue?
1 Ko Sehova ʼe ko te ʼAtua ʼe ʼi ai tana fakatuʼutuʼu. (Isaia 55:10, 11) ʼE fakaloto mālohiʼi tatou ke tou faʼifaʼitaki kia te ia. (Ef. 5:1) ʼE tou fakahā anai te faʼahi ʼaia ʼi tatatou faʼahiga fakahoko ʼo totatou minisitelio. Koia ʼe lelei ke tou fai te fehuʼi ʼaenī: “ ʼE ʼi ai koa he fakatuʼutuʼu ʼo taku gāue?”
2 Ko takotou fai faka mafola ʼi te ʼu ʼapi, pea mo takotou fagonogono faigamālie, pea mo takotou tufa te ʼu tohi, ʼe ko he ʼu faʼahi kehekehe ʼaia ʼo he minisitelio ʼe ʼi ai tana fakatuʼutuʼu. Kae koutou manatuʼi, ko tatatou gāue ʼe mole gata ʼaki pe te fai faka mafola kae ʼe toe kau kiai te fai ʼo he ʼu tisipulo. (Mat. 28:19, 20) ʼI tatatou ʼosi to te pulapula ʼo te Puleʼaga, ʼe tonu ke tou toe liliu ʼo fakavai te pulapula ʼaia pea mo tokaga hoholo kiai ʼi tatatou falala ʼaē, ʼe fakatuputupu anai e Sehova. (1 Ko. 3:6) ʼE tonu ai ke tou fai fakalelei te ʼu ʼaʼahi pea mo tou kamata he ʼu ako Tohi-Tapu.
3 Koutou Fakalahi Tokotou Minisitelio: ʼE ko he meʼa fakafiafia hakita fakasiosio takita gāue pea mo kita ʼui fēnei: “Kua ʼau fakahoko te meʼa ʼaē neʼe ʼau fakatuʼutuʼu ke ʼau fai.” Ia 2 Timoteo 4:5 (MN), neʼe fai ai e Paulo te fakaloto mālohi ʼaenī: “Fakahoko katoa tau minisitelio.” Ko tona faka ʼuhiga, ke tou faiga ke tou ʼaʼahi te hahaʼi ʼaē ʼe nātou fia logo. ʼI takotou polokalama ʼaē ki te fai faka mafola ʼi te vāhaʼa, koutou fakatuʼutuʼu he temi ke koutou fai ai takotou ʼu ʼaʼahi. Koutou faiga ke koutou kamata he ʼu ako Tohi-Tapu mo nātou ʼaē ʼe ʼoʼofa ki te faitotonu. ʼE tonu ke feiā tatatou fakatuʼutuʼu mokā tou kau ʼi te minisitelio.
4 Koutou fakalavelave ki te kau fai faka mafola pe koteā ʼaē ʼe nātou logoʼi ʼi tonatou loto mokā papitema ʼi he fakatahi he tahi neʼe nātou fai tana ako Tohi-Tapu. ʼE lahi tanatou fiafia, ohage ko te fiafia ʼo ia ʼaē ʼe papitema. Kua nātou fakahoko he fakatuʼutuʼu maʼuhiga! Neʼe ʼui fēnei e he tahi neʼe ina fai he ʼu tisipulo: “Kapau ʼe tou fai he ʼu tisipulo, pea ʼe tou fai ke ʼāsili kaugamālie ia nātou ʼaē ʼe nātou vikiʼi ia Sehova. Tahi ʼaē, ko nātou ʼaē ʼe nātou tali te moʼoni ʼe nātou maʼu anai te maʼuli. ʼE ʼau manako ki te gāue ʼaē ko te akoʼi ʼo te moʼoni ki te hahaʼi—ʼe ko he gāue taulekaleka! . . . Ko te tokolahi ʼo nātou ʼaē kua nātou ʼoʼofa kia Sehova, kua nātou liliu ko hoku ʼu kaumeʼa lelei.”
5 Koutou fakakaukauʼi age muʼa mo kapau ʼe feala hakotou tokoni ki he tahi ke liliu ko he kaugana ʼa Sehova kua papitema! ʼI meʼa fakafiafia leva! ʼE kita maʼu te ʼu fua lelei ʼaia he neʼe ʼi ai takita fakatuʼutuʼu ʼi tokita minisitelio.—Kol. 4:17.